Mi Painim Bel Isi ‘Long Ples Nogut i Gat Bikpela Tudak’
Em stori bilong Barbara Schweizer
Taim ol samting i bin wok gut, i stap bilong mi i olsem ples i gat “gutpela gras.” Tasol mi save tu long i stap bilong man i wokabaut ‘long ples nogut i gat bikpela tudak.’ Mi bilip strong olsem, Jehova em Wasman bilong yumi, olsem na maski wanem kain hevi i painim yumi, yumi inap karim.—Song 23:1-4.
LONG 1993, taim mitupela man bilong mi i gat klostu 70 krismas, mipela pasim tok long kirap na mekim narapela kain samting—go long Ekwado, em wanpela kantri i sot long man bilong skulim ol long Baibel. Mama bilong mitupela i bin karim mipela long Amerika, tasol mipela i save long tok Spen na mipela i no gat dinau samting. Mipela i save, long Ekwado wok bilong tromoi umben na “kisim ol manmeri” olsem pis i gutpela, olsem na mipela tingting long go long dispela hap na mekim wok.—Matyu 4:19.
Inap sampela de mipela i stap long brens-ofis bilong Sosaiti Was Taua long Ekwado, na bihain mipela go long bas-tesin long Guaiakil. Mipela i gat bikpela laik long go long Masala—em wanpela biktaun i no gat planti man long en bilong autim tok. Tasol taim mipela wetim bas, wantu man bilong mi, em Fred, em i sik, olsem na mipela i pasim tok long mipela i no ken go yet long Masala. Mi lusim Fred wantaim ol switkes bilong mipela, na mi go long ples i gat telefon bilong tokim brens-ofis mipela i laik kam bek. Taim mi kam bek sampela minit bihain, man bilong mi i no stap!
Em laspela taim mi bin lukim Fred i stap laip. Long dispela sotpela taim mi bin lusim em long bas-tesin, bikpela sik i painim em—klok i bagarap. Mi sut nabaut painim em na nau wanpela wokman bilong bas-tesin i kam long mi na tokim mi ol i bin kisim Fred i go long haus sik. Taim mi kamap long haus sik, ol i tokim mi em i dai pinis.
Em nau, mi stap wanpis long wanpela kantri mi no save long en—mi no gat haus na mi no gat man bilong putim olgeta hevi bilong mi long em. Mi tok olsem, long wanem, long olgeta taim Fred i bin go pas na stretim ol samting bilong mitupela. Mi no bilip long mi yet, olsem na mi amamas taim Fred i bin mekim olsem. Tasol nau mi mas pasim tok long mekim ol samting, na stretim sindaun bilong mi, na wok long winim bel hevi bilong mi tu. Bel bilong mi i bagarap stret—em i olsem mi bin pundaun long wanpela ‘ples nogut i gat bikpela tudak.’ Mi bin tingting olsem: Bai mi lain long mi wanpela i karim ol hevi?
Lain Long Tok i Tru na Lusim Sampela Samting
Taim mi bungim Fred, mitupela i bin katim pinis marit wantaim poroman bilong mipela yet. Nau mitupela Fred i pren na bihain mipela i pas gut wantaim, olsem na mipela pasim tok long marit. Mipela bin lotu long Siatel, Wosington, long Yunaitet Stets, tasol lotu i no bikpela samting long mipela i go inap long taim Jamie, wanpela yangpela painia (em i autim tok long olgeta de), em i kam lukim mipela. Em i gat gutpela pasin, olsem na mi orait long em i ken stadi long Baibel wantaim mi.
Fred tu i laik harim tok, olsem na papamama bilong Jamie i kisim stadi, na wanpela yia bihain, em long 1968, mitupela i kisim baptais. Kirap long taim mipela i nupela long tok i tru, mipela i gat laik long putim ol samting bilong Kingdom bilong God olsem namba wan samting long i stap bilong mipela. (Matyu 6:33) Tupela marit i bin stadi wantaim mipela em Lorne na Rudi Knust, na tupela i bin makim gutpela pasin long dispela samting. Liklik taim bihain long mipela i kisim baptais, ol i go sindaun long wanpela taun i sot long ol man bilong autim tok. Dispela taun em long nambis long hap Is bilong Yunaitet Stets. Samting ol i mekim i kirapim tingting bilong mipela.
I gat narapela as na mipela i tingting long go sindaun long narapela hap. Fred em i maneja bilong wanpela bikpela stua. Wok bilong em i kisim bikpela hap taim bilong em, na em i save sapos mipela i go sindaun long narapela hap i no gat planti samting bai pulim taim bilong em, na em inap lusim sampela hap taim moa long tok i tru na long tupela pikinini bilong mipela. Na mi gat wanpela pikinini meri mi bin kisim long namba wan poroman marit bilong mi na nau em i marit. Em wantaim man bilong em, ol tu i kisim tok i tru, olsem na i hatwok long mipela i bihainim tingting bilong mipela long lusim Siatel. Tasol ol i save long tingting bilong mipela na i gat wanem as na mipela i laik mekim olsem, na ol i wanbel long samting mipela i laik mekim.
Olsem na long 1973 mipela i go sindaun long Spen. Long dispela taim Spen i sot tru long ol man bilong autim tok na long ol brata bilong go pas long wok. Fred i tingim gut ol samting na em i tok, sapos mipela i was gut na mipela i no baim planti samting, mani mipela i bin bungim bai inap long sindaun bilong mipela long Spen, na mipela inap lusim bikpela hap taim long wok autim tok. Mipela i bin mekim olsem. I no longtaim na Fred i kirap mekim wok elda, na long 1983, mitupela i mekim wok painia.
Inap 20 yia mipela i mekim wok long Spen, na mipela i lain long tok ples bilong ol, na kisim amamas long planti samting i painim mipela. Planti taim mitupela Fred i autim tok wantaim na mipela i bin stadi long Baibel wantaim ol marit, em sampela bilong ol long nau ol i Witnes i baptais pinis. Mipela i stap sampela yia pinis long Spen na nau tupela yangpela pikinini bilong mipela, em Heidi na Mike, ol tu i insait long wok painia. Mipela i no gat planti samting bilong skin, tasol i no gat narapela taim i winim dispela taim na mi amamas tru. Mipela i no gat planti samting bilong pulim nabaut tingting bilong mipela. Na mipela famili inap poroman wantaim long olgeta taim, na olsem wel bilong meri wanpis em Baibel i stori long em, mani mipela i bin bungim na was gut long en, em i no pinis.—1 King 17:14-16.
Senisim Sindaun Bilong Mipela Gen
Long 1992, mipela i tingting gen long go sindaun long narapela hap. Ol pikinini bilong mipela i bikpela pinis, na nau Spen i no sot tru long ol man bilong autim tok. Mipela i save long wanpela misineri i bin wok long Ekwado long bipo, na em i tokim mipela olsem dispela kantri i sot tru long ol painia na elda. Olsem wanem? Mipela i lapun tumas bilong i go na sindaun long wanpela nupela kantri? Mipela i no ting olsem, long wanem, skin bilong mitupela i strong na mipela i laikim tru wok autim tok. Olsem na mipela salim toksave long brens bilong Ekwado na redim ol samting bilong mipela i ken go. Na pikinini meri bilong mi, Heidi, na man bilong em, Juan Manuel, em tupela i wok long hap not bilong Spen, ol tu i gat laik long kam long mipela.
Orait, long Februeri 1993, mipela i stretim pinis olgeta samting na mipela i kamap pinis long nupela kantri. Mitupela i amamas tru long mipela i ken mekim wok painia long Ekwado, em wanpela kantri i gat planti manmeri long en i laik stadi long Baibel. Ol man long brens i tok amamas long mipela na bihain mipela i tingting long go lukim sampela biktaun ol i tokim mipela long en na ol i sot long ol wokman. Tasol man bilong mi i dai.
‘Long Ples Nogut i Gat Bikpela Tudak’
Pastaim mi kirap nogut, na bihain mi no inap bilip olsem em i dai pinis. Wan wan taim tasol Fred i bin sik. Mi mas mekim wanem? Mi mas go we? Mi no inap tingting gut.
I no gat narapela taim mi bin pilim nogut tru olsem nau mi pilim, tasol ol brata sista spirit, em ol i gat pasin marimari, ol i bin helpim mi, maski mi no save gut long ol, na dispela i olsem wanpela gutpela blesing mi bin kisim. Ol brata long brens i mekim gutpela pasin tru na stretim olgeta samting—ol samting bilong planim man bilong mi tu. Mi inap tingim moa yet pasin sori bilong Brata na Sista Bonno. Tupela i stretim rot na mi no bin stap wanpis, na sampela nait Edith Bonno i slip long rum bilong mi bambai mi no ken pilim olsem mi stap wanpis. Na famili bilong Betel i tingim tru mi na mekim gutpela pasin sori long mi, na dispela i olsem ol i karamapim wanpela gutpela blanket long mi bilong lukautim mi—em blanket bilong pasin sori.
Insait long sampela de tasol, ol 3-pela pikinini bilong mi, ol tu i stap wantaim mi, na ol samting ol i mekim bilong helpim mi i bikpela samting. Tasol maski mi gat planti gutpela manmeri wantaim mi long san, mi hatwok tru long nait. Long dispela taim Jehova i strongim mi. Taim mi bel hevi stret, long wanem, mi stap wanpis, mi beten long em, na em i mekim isi bel bilong mi.
Bihain long ol i planim Fred, wanpela askim i kamap olsem: Mi mas mekim wanem long i stap bilong mi nau? Mi laik stap long Ekwado, long wanem, mitupela Fred i bin pasim tok long mekim olsem, tasol mi pilim olsem mi wanpela i no inap mekim olsem. Olsem na Heidi na Juan Manuel, em ol i bin tingting pinis long kam long Ekwado bihain, ol i stretim sampela samting bilong ol i ken kam kwik na mipela olgeta inap wok wantaim.
Insait long wanpela mun mipela i painim haus long Loha, em wanpela biktaun brens i bin tokim mipela i gutpela long go long en bilong mekim wok. I no longtaim na mi mekim planti wok bilong stretim sampela samting, na mekim sampela samting bilong sindaun gut long nupela haus, na kirap autim tok long wanpela nupela kantri. Ol dispela wok i mekim na em i daunim bel hevi bilong mi liklik. Na mi inap krai wantaim pikinini meri bilong mi, em pikinini i bin pas gut wantaim Fred, na dispela tu i daunim bel hevi bilong mi.
Tasol 2-pela mun bihain long mi kisim dispela nupela sindaun, bel hevi bilong mi i go bikpela moa. Mi no inap tingim ol amamas mitupela Fred i bin kisim wantaim, long wanem, dispela i save mekim mi i bel hevi tru. Mi no larim ol samting bilong bipo i kamap long tingting bilong mi—mi tingim i stap bilong mi long wanpela de tasol, na mi no inap tingting tumas long ol samting bilong bihain. Tasol mi bin traim long mekim sampela gutpela samting long olgeta de, na mekim moa yet wok autim tok bilong mi. Dispela i bin strongim mi.
Long olgeta taim mi bin amamas long autim tok na skulim ol man long Baibel, na long Ekwado ol manmeri i laik harim tok, olsem na em i wanpela gutpela wok bilong mekim. Taim mi nupela long dispela kantri na wanpela taim mi go long haus bilong ol man, mi bungim wanpela yangpela meri marit, na em i tok: “Yes, mi laik lain long Baibel!” Dispela meri em namba wan Baibel-stadi mi bin kirapim long Ekwado. Dispela kain samting i mekim na mi tingting tasol long wok bilong mi na mi no tingting tumas long bel hevi bilong mi yet. Jehova i blesim tru wok autim tok bilong mi. I olsem olgeta taim mi bin go autim tok, gutpela samting i kamap.
Mi save, pasin bilong mi long wok yet olsem painia, em i wanpela blesing. Mi tingim dispela wok na long bihainim ol samting dispela wok i makim, na em i helpim mi long mekim sampela gutpela samting long olgeta de. Insait long sotpela taim tasol mi mekim 6-pela Baibel-stadi.
Bilong helpim yu long save long amamas mi save kisim long wok autim tok bilong mi, mi laik stori long wanpela meri i gat 50 krismas samting, i no longtaim i go pinis na em i kamapim klia olsem em i amamas tru long ol tok bilong Baibel. Taim mi kamapim wanpela tok bilong Baibel long em, pastaim em i laik save gut long insait bilong en, na bihain em i kirap na bihainim dispela tok. Bipo em i wanpela meri bilong mekim pasin pamuk, na i no longtaim i go pinis wanpela man i askim em long stap nating wantaim em, tasol dispela meri i strong tru long sakim tok bilong em. Em i tokim mi em i amamas tru long sanap strong long bihainim ol lo bilong Baibel, long wanem, nau tingting na bel bilong em i stap isi, em wanpela samting em i no bin kisim bipo. Kain Baibel-stadi olsem i save amamasim tru bel bilong mi na mi pilim olsem i stap bilong mi i gat as bilong en.
Mi Wok Long Stap Amamas
Wok bilong kamapim ol disaipel i givim bikpela amamas long mi, tasol bel hevi bilong mi i no bin pinis hariap. Sampela taim mi bel hevi na sampela taim nogat. Pikinini meri na tambu bilong mi, ol i bin helpim mi tru, tasol taim mi lukim 2-pela i mekim sampela kain samting wantaim olsem narapela i mekim gut long narapela, mi pilim tru hevi bilong mi olsem mi no gat poroman. Mi sori tru long man bilong mi, long wanem, mipela i bin pas gut wantaim, na em i bin mekim planti samting bilong helpim mi. Nau mi no inap toktok wantaim em, o askim em long wanpela samting, o stori long gutpela samting i bin painim mi long wok autim tok, olsem na sampela taim mi bel hevi na pilim olsem i stap bilong mi i no gat as—em hatwok long karim dispela hevi.
Wanem samting i save helpim mi long kain taim olsem? Mi save beten strong long Jehova na askim em long helpim mi long tingting long narapela samting—samting bilong helpim tingting bilong mi. (Filipai 4:6-8) Na tru tumas, em i save helpim mi. Long nau—em sampela yia bihain long Fred i bin dai—mi inap toktok long sampela gutpela amamas mitupela Fred i bin kisim wantaim. Olsem na isi isi bel hevi bilong mi i wok long pinis. Olsem Devit, man bilong raitim Song, mi pilim olsem mi bin wokabaut long wanpela ‘ples nogut i gat bikpela tudak.’ Tasol Jehova i stap bilong mekim isi bel bilong mi, na ol gutpela brata i bin stiaim mi long gutpela rot.
Ol Samting Mi Bin Lain Long En
Fred i bin go pas long olgeta samting, na mi ting mi wanpela i no inap mekim olsem. Tasol Jehova, famili bilong mi, na ol brata, ol i bin helpim mi long mekim olsem. Long sampela samting bel bilong mi i strong moa, winim bilong bipo. Mi save beten moa long Jehova, na mi wok long lain long pasim tok long mekim ol samting.
Mi amamas tru mitupela Fred i bin wok wantaim inap 20 yia long Spen. Nau long dispela taim yumi stap long en, yumi no save wanem samting bai kamap long olgeta wan wan de, olsem na mi ting taim rot i op em i bikpela samting long yumi mekim ol samting long strong bilong yumi bilong amamasim Jehova na famili bilong yumi. Ol dispela yia mitupela Fred i stap long Spen i bin helpim gut mipela na strongim marit bilong mitupela, na mi bilip olsem ol dispela yia i strongim mi long karim hevi taim Fred i dai. Paslain long Fred i dai, mi wok painia na dispela wok i bosim i stap bilong mi long olgeta de, olsem na taim mi hatwok long nupela sindaun bilong mi olsem meri wanpis, dispela wok i mekim na mi pilim olsem i stap bilong mi i gat as bilong en.
Taim Fred i dai, pastaim mi pilim olsem mi tu i dai. Tasol i no olsem. Mi gat wok—wok bilong Jehova na wok bilong helpim ol man. Planti man long hap mi stap long en ol i no save long tok i tru, olsem na mi no inap lusim wok bilong mi. Pasin bilong helpim ol narapela i helpim mi, olsem Jisas i tok. (Aposel 20:35) Ol gutpela samting i painim mi long wok autim tok i helpim mi long wetim ol gutpela samting em bai kamap long en.
Long sampela de i go pinis, dispela bel hevi mi save pilim sampela taim, i kisim mi gen. Tasol taim mi lusim haus na go long wanpela Baibel-stadi, wantu bel bilong mi i amamas. Tupela aua bihain mi kam bek long haus—mi stap belgut na pilim olsem mi kisim strong pinis. Olsem man bilong raitim Song i tok, ating sampela taim yumi “krai na planim kaikai,” tasol Jehova i save blesim wok bilong yumi, na yumi “amamas na kisim ol kaikai i mau.”—Song 126:5, 6.
I no longtaim i go pinis na mi mas senisim sedyul bilong mi liklik, long wanem, mi gat sik—mak bilong blut i go antap. Olsem na nau mi save mekim wok painia haptaim. I stap bilong mi i gutpela, tasol mi ting nau long dispela taim yumi stap long en, mi no inap tru lusim dispela bel hevi mi bin kisim taim man bilong mi i dai. Mi amamas tru long lukim 3-pela pikinini bilong mi i mekim wok painia. Tasol bikpela samting moa mi bai amamas long en, em long lukim Fred gen long nupela taim. Ating em bai amamas tru long harim tok long wok mi bin mekim long Ekwado—ol samting mitupela i bin tingting long mekim i bin karim kaikai.
Mi save beten olsem, ol tok man bilong raitim Song i bin mekim i ken wok yet long kamap tru long i stap bilong mi. Em i tok: “Bikpela, bai yu lukautim mi gut, na olgeta de mi stap laip bai yu marimari long mi. Na bai mi stap oltaim oltaim long haus bilong yu.”—Song 23:6.
[Piksa long pes 17]
Mi autim tok long San Lukas, Loha, Ekwado