Rot Bilong Mekim Marit i Stap Gut

MARIT i olsem yumi raun long wanpela longpela rot na planti samting bai painim yumi long dispela rot​—⁠sampela gutpela samting na sampela hevi tu. I gat planti ston na hul samting long rot em yumi no bin tingim, na sampela i laik pasim rot na i olsem yumi no inap kalapim. Tasol planti manmeri i raun gut long dispela rot na ol i amamas, na ol liklik hevi tasol i painim ol. Tru tumas, bilong skelim olsem marit i wok gut o nogat, yumi no ken tingim tasol ol gutpela samting na ol hevi i kamap​—⁠bikpela samting em pasin tupela marit i save mekim bilong stretim ol hevi.

Wanem samting inap mekim na bai raun bilong yumi long rot bilong marit i ken wok gut na yumi kisim amamas long en? Planti marit i pilim olsem ol i mas i gat wanpela ‘mep bilong marit’ bilong soim rot long ol. Man i as bilong marit, em God Jehova, i bin givim wanpela gutpela “mep” em yumi inap bilip tru long en bilong soim rot long ol marit. Dispela mep em Baibel, tasol ol tok bilong en i no save pinisim nating ol hevi bilong marit, nogat. Baibel i gat ol gutpela tok bilong helpim ol marit, tasol ol marit i mas bihainim ol dispela tok bambai marit bilong ol i ken wok gut.​—⁠Song 119:105; Efesus 5:​21-​33; 2 Timoti 3:⁠16.

Orait yumi ken skelim sampela stiatok bilong Baibel em ol inap helpim yu na bai raun bilong yu long rot bilong marit i ken kamap gutpela na i gat amamas long en.

▸ Marit em i samting i holi. “Samting God i pasim pinis, em man i no ken katim.” (Matyu 19:⁠6) Man Bilong Wokim yumi i bin kamapim namba wan marit taim em i bringim namba wan man, Adam, i kam long meri bilong em Iv. (Stat 2:​21-​24) Krais Jisas i bin lukim dispela namba wan marit taim em i no kam daun yet long graun, na em i strongim tok olsem marit bilong Adam na Iv i bilong i stap oltaim. Em i tok: “Ating yupela i no bin ritim tok i stap long buk bilong God? Dispela tok i tok olsem, ‘Bipo tru taim God i wokim olgeta samting, em i wokim ol manmeri, na em i mekim ol i kamap man na meri. Na God i tok, “Olsem na man i save lusim papamama na i pas wantaim meri bilong en, na tupela i kamap wanpela bodi tasol.” ’ God i tok olsem na tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim.”​—⁠Matyu 19:​4-6.

Taim Jisas i tok “samting God i pasim pinis,” Jisas i strongim tok olsem God yet i bin kamapim marit, olsem na yumi mas tingim marit em i samting holi.a

Tasol ol man na meri i no laik stap insait long marit i no gat amamas o pasin bilong laikim tru narapela. Tupela i laik i stap amamas na bel isi long marit bilong ol. Ol inap kisim amamas long marit sapos ol i bihainim ol tok bilong Man Bilong Wokim yumi, i stap long Baibel.

Yumi olgeta i gat sin, olsem na ol tingting kranki i save kamap o tupela i no wanbel long sampela samting. Tasol i no olsem laik na pasin bilong tupela i mas wankain tasol na bai marit i ken wok gut, nogat. Bikpela samting em tupela i save mekim wanem bilong stretim ol hevi i kamap. Olsem na wanpela bikpela samting tru insait long marit, em pasin bilong stretim ol kros long gutpela pasin, long wanem, pasin bilong laikim tru narapela “i save mekim ol arapela gutpela pasin i kamap strong na i wok bung wantaim.”​—⁠Kolosi 3:⁠14.

▸ Toktok long pasin rispek. “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em. Tasol tok bilong man i gat gutpela tingting i save helpim ol man olsem gutpela marasin.” (Sindaun 12:18) Ol saveman i tok, sapos ol man i kirap toktok wantaim long gutpela pasin rispek, orait toktok bilong ol bai pinis long wankain gutpela pasin. Yu save, taim poroman marit i mekim wanpela tok i sutim bel bilong yu, bel bilong yu i bagarap stret. Olsem na yu yet i mas beten na wok strong long mekim ol tok long pasin rispek na gutpela pasin. (Efesus 4:31) Wanpela meri marit bilong Japan, em Haruko,b em i marit inap 44 yia na em i tok: “Mitupela i save lukim ol liklik pasin kranki bilong narapela narapela, tasol mipela i save toktok long pasin rispek na mekim gutpela pasin long narapela. Dispela i bin helpim marit bilong mipela long kamap gutpela.”

▸ Mekim gutpela pasin na pasin sori. “Yupela i mas mekim gutpela pasin long ol arapela Kristen na givim bel bilong yupela long ol.” (Efesus 4:32) Taim tupela marit i no wanbel liklik long wanpela samting na wanpela i kros, dispela bai kirapim poroman tu long kros. Annette, em wanpela meri Jemani, em i bin marit inap 34 yia, na em i tok: “Tru, i hatwok long stap isi taim kros o hevi i kamap​—⁠yumi save mekim ol tok i bagarapim bel bilong poroman, na nau hevi i go bikpela.” Tasol sapos yu wok strong long mekim gutpela pasin na pasin sori, dispela bai helpim yu long kamapim bel isi insait long marit.

▸ Mekim pasin daun. “Yupela i no ken tingting long yupela yet tasol . . . Yupela i mas daunim yupela yet na yupela i mas ting pasin bilong ol arapela i winim pasin bilong yupela.” (Filipai 2:⁠3) Planti kros i save kamap, long wanem, taim hevi i kamap, narapela i putim asua i go long narapela, na ol i no mekim pasin daun na painim rot bilong mekim isi bel bilong narapela. Taim yutupela i no wanbel long wanpela tok, pasin daun inap helpim yu long daunim pasin bilong strong long kamapim olsem tok bilong yu i stret.

▸ No ken bel hevi kwik. “Yu no ken belhat kwik long narapela man.” (Saveman 7:⁠9) Wok strong long abrusim pasin bilong daunim o sakim tingting bilong poroman o belhat sapos em i laik save long as bilong wanpela tok o samting yu bin mekim. Putim yau long ol tok bilong em na pilim ol tok em i mekim na tokaut long dispela. Tingting gut paslain long yu bekim tok. Planti marit, taim ol i lapun pinis ol i kisim save olsem, pasin bilong pas gut wantaim na laikim tru narapela narapela, dispela i winim tru pasin bilong win long tok pait.

▸ Save long taim bilong pasim maus. “Putim yau kwik long harim tok, tasol yupela i no ken hariap long mekim toktok, na yupela i no ken kros kwik.” (Jems 1:19) Pasin bilong toktok gut wantaim em i wanpela bikpela samting bilong helpim ol marit long i stap amamas. Orait bilong wanem Baibel i tok i gat “taim bilong pasim maus”? (Saveman 3:⁠7) Ating dispela em i taim bilong putim gut yau na bai yu inap kliagut long tok bilong poroman​—⁠pasin bilong toktok gut wantaim em wanpela bikpela samting bilong helpim yu long save long ol tingting tru i stap long bel bilong poroman na bilong wanem em i gat dispela kain tingting.

▸ Putim yau na pilim tok bilong poroman. “Yupela i mas amamas wantaim ol man i amamas. Na yupela i mas krai wantaim ol man i krai.” (Rom 12:15) Pasin bilong pilim gut ol hevi bilong poroman em i bikpela samting bilong helpim yupela long toktok gut wantaim, long wanem, long dispela rot yu inap pilim olgeta tingting i stap insait tru long bel bilong poroman. Dispela inap mekim na narapela bai tingim gut na rispek long ol tok na tingting bilong narapela. Nella, em wanpela meri Brasil i bin marit inap 32 yia, em i tok: “Taim mitupela i toktok wantaim long ol hevi bilong mipela, oltaim mi save putim yau na harim gut ol tok bilong Manuel na bai mi ken pilim gut ol tingting i stap long bel bilong em.” Taim poroman bilong yu i toktok, em taim bilong yu long “pasim maus” na putim yau na pilim gut ol tok em i kamapim.

▸ Kisim pasin bilong tok amamas. “Yupela i mas tenkyu.” (Kolosi 3:15) Ol marit i save tok amamas long poroman long ol gutpela wok na pasin em i mekim, marit bilong ol i save stap strong. Tasol long olgeta de i gat planti wok bilong mekim na sampela marit i no tingting long tok tenkyu long poroman​—⁠ol i ting poroman bai save ol i amamas long ol wok em i mekim. Dokta Ellen Wachtel i tok: “Planti marit inap tok amamas long poroman bilong ol, tasol ol i no save tingting long mekim olsem.”

Ol meri i laik bai man bilong ol i tok ol i laikim ol na tenkyu long ol gutpela samting ol i mekim. Yu maritman inap mekim planti samting bilong strongim marit na helpim meri bilong yu​—⁠na yu yet tu​—⁠long i stap belgut na bel isi, taim yu tokim meri olsem yu amamas na tenkyu long ol gutpela wok na pasin bilong em.

Em i bikpela samting long man i tokaut olsem em i amamas long meri bilong em, tasol em i mas kamapim dispela long narapela rot tu. Yupela maritman, taim yupela i givim kis long meri bilong yupela, na mekim gut long em, na smail long em, i olsem yupela i tok, “Mi laikim yu tru.” Dispela i mekim na meri i save yu tingim em olsem gutpela samting tru bilong yu. Ringim em o salim teks mesis long em na tok, “Mi tingim yu” o “Yu stap orait?” Sapos yu no mekim ol dispela kain tok na pasin long meri olsem yu bin mekim taim yutupela i no marit yet, i gutpela yu kirap gen long mekim. Wok yet long kisim save long ol samting i save mekim gut bel bilong meri.

Tok bilong mama bilong King Lemuel bilong Israel bilong bipo i stret tru, em i tok: ‘Man bilong en i litimapim nem bilong em moa yet na i tok, “I gat planti meri i save mekim gutpela pasin tru, tasol yu winim ol moa yet.” ’ (Sindaun 31:​1, 28, 29) Wanem laspela taim yu bin litimapim nem bilong meri bilong yu? Na meri, wanem laspela taim yu bin mekim olsem long man bilong yu?

▸ Hariap long lusim rong. “Nogut yupela i belhat yet i stap na san i go daun.” (Efesus 4:26) Insait long marit, yu wantaim poroman bai mekim sampela popaia o pasin kranki. Olsem na em i bikpela samting long yutupela wantaim i gat pasin bilong lusim rong. Clive na Monica, long Saut Afrika, ol i bin marit inap 43 yia, na ol i lukim olsem dispela tok bilong Baibel i bin helpim ol tru. Clive i tok: “Mipela i wok strong long bihainim stiatok i stap long Efesus 4:​26, na mitupela i hariap long lusim rong bilong narapela, long wanem, mipela i save God i laikim dispela pasin. Em nau, bel bilong mipela i gutpela na taim mipela i go slip, bel i no kotim mipela na mipela i slip gut.”

Wanpela savetok bilong bipo i tok: “Nambawan pasin bilong [man] i olsem. Em i no save tingim rong narapela man i mekim long em.” (Sindaun 19:11) Annette, pastaim yumi bin stori long em, em i wanbel long dispela tok, na em i tok moa: “Marit i no inap stap gut sapos narapela i no lusim ol rong o popaia bilong narapela. Sapos tupela i no mekim olsem, narapela bai bel nogut long narapela na i no bilip moa long em, na dispela i save bagarapim marit. Taim yumi lusim rong o popaia bilong poroman, dispela i save strongim marit, na yumi pas gut moa wantaim poroman.”

Sapos yu bin bagarapim bel bilong poroman, yu no ken ting bihain bel hevi bilong em bai pinis nating. Bilong i stap bel isi gen wantaim, sampela taim yu mas mekim samting i hatwok long mekim, tasol ol marit i mas mekim: Yu mas tokaut olsem yu bin popaia na mekim pasin kranki. Na long pasin daun mekim tok olsem: “Sori tru lewa. Mi popaia.” Taim yu mekim tok sori, poroman bai rispek long yu, na dispela bai strongim pasin olsem narapela i bilip long narapela, na tingting na bel bilong yu bai stap isi.

▸ Stap gut long poroman na long marit bilong yu. “Tupela [man na meri] i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim.” (Matyu 19:⁠6) Yu bin mekim tok promis long poroman bilong yu long ai bilong God na ol man olsem yutupela bai stap wantaim, maski wanem kain hevi i kamap.c Dispela i no wanpela lo bilong gavman tasol yu mas bihainim. Nogat. Yupela i bin mekim tok promis, long wanem, narapela i laikim tru narapela, na i givim rispek na ona long narapela narapela na long God. Olsem na yu no ken wok long bagarapim marit holi bilong yu long pasin bilong tok gris long wanpela i no poroman bilong yu; yu mas laikim poroman bilong yu tasol.​—⁠Matyu 5:⁠28.

▸ Pasin bilong daunim laik bilong yumi yet i strongim pasin bilong stap gut long poroman. “Yupela i no ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela . . . na helpim ol long i stap gut.” (Filipai 2:⁠4) Sapos yu putim laik bilong poroman i go pas long laik bilong yu yet, dispela bai strongim marit. Premji, em i bin marit inap 20 yia, em i save helpim meri bilong em long mekim ol wok bilong haus, long wanem, meri i mekim wok mani fultaim. Em i tok: “Mi save helpim Rita long kukim kaikai na klinim haus na mekim ol narapela wok bambai em i gat hap taim na strong long mekim ol samting em i laikim.”

Pasin Bilong Taitim Bun i Gat Gutpela Pe

Sampela taim, bikpela wok bilong mekim marit i wok gut inap mekim na sampela i laik givap. Tasol yu no ken larim ol liklik hevi i mekim na yu givim baksait long tok promis bilong yu na olgeta hatwok yu bin mekim bilong strongim marit.

Sid i bin marit inap 33 yia na em i tok: “Sapos yu taitim bun tru na yu soim olsem yu laik bai marit bilong yu i stap gut, Jehova bai mekim gut long marit bilong yu.” Taim narapela i helpim narapela long ol taim bilong hevi, na long gutpela taim yutupela i stap amamas wantaim, orait dispela raun bilong yupela long rot bilong marit em bai i gutpela na marit bilong yupela bai i stap gut.

[Ol Futnot]

[Rait long pes 6]

Baibel i olsem mep bilong soim rot long ol marit

[Blok/Piksa long pes 7]

Taim yupela i mas toktok long wanpela hevi

◼ Makim wanpela taim em yupela i no taiet.

◼ No ken sutim tok long poroman; mekim gutpela tok tasol.

◼ No ken katim tok; taim wanpela i toktok narapela i putim yau, na senis senis olsem.

◼ Tokim poroman yu pilim tingting i stap long bel bilong em.

◼ Kamapim sori bilong yu long poroman, maski yupela i no wanbel long sampela samting.

◼ Isi long em, redi long senisim tingting bilong yu.

◼ Long pasin daun tok sori taim yu mekim tok kranki.

◼ Tokaut olsem yu laikim em na amamas long em.

[Blok/Piksa long pes 8]

Bilong marit i ken stap gut

◼ Holimpas ol tok i tru bilong Baibel i save strongim marit.

◼ Lusim hap taim long strongim marit na mekim gut long poroman.

◼ Wok long kamapim pasin bilong sori na laikim tru narapela.

◼ Bihainim ol tok bilong yu na wok strong long stap gut long marit.

◼ Mekim gutpela pasin na rispek long poroman.

◼ Helpim em long ol wok bilong haus.

◼ Toktok wantaim long pasin em yutupela i amamas long en.

◼ Lap wantaim na malolo wantaim.

◼ Wok yet long strongim marit.

[Blok/Piksa long pes 9]

Bilong yu yet i ken tingim

◼ Mi mas wok long strongim wanem samting long marit bilong mi?

◼ Bilong mekim olsem, mi mas mekim wanem ol samting?