Husat Inap Soim Rot Long Yumi?
HUSAT inap soim rot long yumi na bai ol samting yumi mekim i kamap gutpela—i no ol samting bilong wok bilong skin—ol pasin tru tru bilong yumi? Olsem yumi stori pinis long stori i kamap paslain long dispela, bilong kamap gutpela long dispela samting, i mas i gat sampela stretpela lo, olsem stiatok, yumi bihainim, na ol samting yumi tingting long mekim long i stap bilong yumi i stret—i no ol samting bilong kisim biknem, mani, o strong bilong bosim ol man.
Yumi ken painim we ol gutpela stiatok na ol bekim bilong ol askim bilong yumi, olsem yumi stap bilong mekim wanem? Yu ting yumi inap painim long ol save na tingting bilong yumi yet? Yumi save pinis, yumi man bilong graun tasol na yumi gat sin, na ol laik nogut i save kamap long yumi na ol inap bringim yumi i go long rot nogut. (Stat 8:21) Olsem na planti milion manmeri i wok yet long bihainim ol laik nogut bilong skin, em Baibel i kolim olsem “pasin bilong bel kirap na aigris na bikhet.” (1 Jon 2:16) Dispela i no rot bilong mekim ol samting bilong yumi i kamap gutpela tru—em i wanpela rot giaman i save kamapim bel hevi na yumi stap nogut. Long dispela as, planti manmeri ol i save go long Man Bilong Wokim yumi bilong helpim ol long painim bekim bilong ol bikpela askim long ol samting bilong i stap bilong ol.a
Yu Ting Yumi Mas Lukluk i Go Long God?
Bilong wanem em i stretpela tingting long lukluk i go long Man Bilong Wokim yumi? Em i save long as na em i bin wokim yumi, olsem na em i save yumi mas i gat wanem tingting long i stap bilong yumi. Na tu, em i save long olsem wanem em i bin wokim yumi—long skin, long tingting, na long bel. Olsem na God i save long ol gutpela stiatok tru ol man i ken bihainim long i stap bilong ol. Na tu, God i as tru bilong pasin laikim, olsem na em i laik tru bai yumi ken i stap amamas tru na ol samting yumi mekim i kamap gutpela. (1 Jon 4:8) Orait yumi ken painim we ol gutpela tok bilong em long soim rot long yumi? Yumi ken painim long Baibel Holi, em God i bin redim bilong yumi na em i bin kirapim 40 man long raitim, olsem ol kuskus bilong em.b (2 Timoti 3:16, 17) Tasol olsem wanem yumi ken bilip olsem ol stiatok i stap long dispela buk em inap tru long soim rot long yumi?
Jisas Krais, em nambawan mausman bilong God, em i bin tok: “Ol wok bilong God i soim olsem save bilong en em i samting tru.” (Matyu 11:19; Jon 7:29) Gutpela savetingting yumi kisim long bihainim ol stiatok bilong God, dispela i helpim yumi long mekim ol samting i kamap gutpela na yumi gat amamas tru—bai yumi “bihainim ol gutpela na stretpela pasin”—tasol save bilong dispela graun i givim baksait long God, em i mekim na ol wok samting bilong ol man i lus nating tasol na ol i no stap amamas.—Sindaun 2:8, 9; Jeremaia 8:9.
Yumi ken tingim wanpela lain i bin kamap long 1960 samting, ol i kolim lain hipi. Ol i bin givim baksait long lo bilong bipo, na ol i laik kamapim strong ol narapela kain pasin, olsem pasin bilong kisim drak, painim ol amamas samting bilong nau tasol na no ken tingting long tumora, na stap fri long mekim pasin pamuk na olkain pasin olsem. Tasol yu ting dispela rot ol i bihainim i kamapim olsem ol i gat gutpela save na tingting tru? Yu ting dispela pasin i bin mekim na ol man i pilim olsem i stap bilong ol i gat as tru bilong en na ol i gat ol stretpela lo i kamapim bel isi tru na amamas tru? Ol samting i kamap pinis i soim olsem dispela i no bin helpim ol man long senisim pasin bilong ol na kisim gutpela pasin—em i helpim ol pasin nogut bilong ol man i go bikpela moa.—2 Timoti 3:1-5.
Tasol ol savetingting bilong Baibel i bin helpim ol man long olgeta taim. (Aisaia 40:8) Bai yu save long as bilong dispela samting taim yu ritim stori i kamap bihain long dispela, long wanem, em i kamapim 6-pela stiatok bilong Baibel i bin helpim planti milion manmeri bilong olgeta lain long stap amamas tru na ol samting ol i mekim i kamap gutpela—maski ol i stap rabis o ol i man nating i no gat nem.
[Ol Futnot]
a Lukim blok “Sampela Bilip Kranki.”
b Lukim Awake! bilong Novemba 2007, i stori long het tok “Can You Trust the Bible?” Ol stori long dispela nius i kamapim sampela tok long ol samting ol saveman i painim insait long graun, ol stori long ol samting i kamap bipo, ol save bilong saiens, na sampela narapela tok, na ol dispela tok i kamapim olsem i gat as na yumi ken bilip tru long Baibel.
[Blok long pes 5]
SAMPELA BILIP KRANKI
Planti man i ting i no gat God i stap na yumi bin kamap nating long rot bilong evolusen. Sapos dispela tingting i stret, orait i no gat wok long painimaut olsem i gat wanem as na yumi stap.
Sampela narapela i ting God i bin wokim yumi na bihain em i lusim yumi. Sapos tru God i bin lusim yumi, yumi olsem pikinini i no gat papa na i no gat ol lo bilong stiaim yumi. Tingim: God i mekim na olgeta animal i gat savetingting na ol i ken inapim wok bilong ol. Long dispela rot savetingting bilong God i kamap ples klia long ol samting yumi lukim. Yu ting dispela Man bai wokim yumi na bihain em i lusim yumi na yumi yet i mas painim ol tok bilong stiaim yumi? Nogat tru!—Rom 1:19, 20.
Ol dispela bilip kranki i mekim na planti man i wok tasol long kisim ol samting bilong skin, na ol i ting i no gat wok long painimaut olsem i gat wanem as na yumi stap.
[Piksa long pes 5]
Ol savetingting i stap long Baibel i bin kamapim gutpela samting, olsem na yumi inap tru long bihainim