Rot 3: Wok Gut Wantaim

“Sapos tupela man i stap wantaim, em i gutpela. . . . Sapos wanpela i pundaun, orait narapela i ken litimapim em gen.”​​—⁠Saveman 4:​9, 10.

Mining bilong dispela. Ol marit i stap gut wantaim ol i rispek long lo bilong God long Baibel olsem man i het bilong famili. (Efesus 5:​22-24) Ol i save wok gut wantaim​—⁠man o meri i no save bihainim laik bilong em yet, na em i no ting em i stap singel yet. Ol i “wanpela bodi tasol”​—⁠em wanpela tok bilong Baibel i makim olsem marit bilong tupela i bilong i stap oltaim, na tupela i pas gut wantaim.​—⁠Stat 2:⁠24.

As na em i bikpela samting. Sapos yu na poroman bilong yu i no save wok gut wantaim, kwiktaim ol liklik hevi inap kamap olsem bikpela hevi, na narapela bai sutim tok long narapela na yupela i no tingting long stretim hevi. Tasol sapos yutupela i wok gut wantaim, yupela bai kamap olsem namba wan pailot na namba tu pailot ol i stiaim balus i go long wanpela hap tasol, na yupela i no olsem tupela pailot i stiaim narapela narapela balus i go na bihain ol i bam. Taim yupela i no wanbel, toktok gut wantaim long rot bilong stretim, na no ken lusim nating taim long tok pait na narapela i sutim tok long narapela.

Traim mekim olsem. Mekim wok long ol askim i stap daunbilo bilong skelim pasin bilong yupela long wok gut wantaim.

◼ Mi save tingim mani mi kisim long wok skin olsem mani “bilong mi yet,” long wanem, em pe bilong wok mi yet i bin mekim?

◼ Mi save stap longwe long ol wanblut bilong poroman bilong mi, maski em i save pas gut wantaim ol?

◼ Bilong malolo gut, mi mas i stap longwe long poroman bilong mi?

Pasim tok long bel. Tingim wanpela o tupela rot we yu ken wok gut moa wantaim poroman bilong yu.

Askim poroman bilong yu long sampela tingting bilong em long dispela.

[Piksa long pes 5]

Pasin bilong wok gut wantaim i olsem yutupela i stap namba wan pailot na namba tu pailot i gat wok long stiaim balus i go long wanpela hap tasol