Ol Yangpela i Laik Save
Olsem Wanem Mi Inap Save Gut Moa Long Papamama Bilong Mi?
Jessica na papamama bilong em i kaikai wantaim sampela pren. Taim ol i kaikai i stap, wanpela bilong ol i tokim mama bilong Jessica olsem, “Yu save mi lukim husat?” Hap asde mi lukim Richard—dispela mangi yu bin prenim long haiskul.”
Jessica i kirap nogut na pundaunim fok bilong em long tebol. Em i no bin harim mama i stori liklik long Richard!
“Man! Mama, yu bin prenim narapela man paslain long yu prenim Papa? Mi no bin save!”
OLSEM Jessica, sampela taim yu bin kirap nogut long wanpela stori bilong papa o mama em yu no bin save long en? Sapos olsem, ating dispela i mekim na yu tingting olsem, i gat wanem stori moa bilong ol em yu no save long en!
Ating i gat wanem as na yu no save long olgeta samting bilong papamama bilong yu? Wanem gutpela samting inap kamap sapos yu save gut moa long ol? Na olsem wanem yu inap mekim dispela samting?
Planti Samting Moa Yu Inap Save Long En
Bilong wanem na i gat sampela samting long papamama bilong yu em yu no save yet long en? Ating sampela taim as bilong dispela, em yu stap longwe long ol. Jacob,a nau em i gat 22 krismas, em i tok: “Papa na Mama i divos taim mi gat 8-pela krismas. Bihain long dispela, mi save lukim Papa wan wan taim tasol long olgeta yia. I gat planti samting long Papa em mi gat laik tru long save long en.”
Maski yu bin i stap wantaim papamama inap planti yia, ating ol i no bin tokim yu long olgeta samting i bin kamap long ol. Bilong wanem? Wankain olsem yumi olgeta, sampela taim papamama i sem long ol popaia ol i bin mekim long bipo. (Rom 3:23) Na tu, ating ol i tingting planti olsem sapos ol i kamapim ol popaia bilong ol, bai yu no rispek long ol—o ol i pret nogut dispela i kirapim yu long mekim laik bilong yu yet.
Tasol planti taim, i gat ol samting we papamama i no tokim yu long en, long wanem, yupela i no bin stori long ol dispela samting. Wanpela yangpela man nem bilong en Cameron, em i tok: “Maski yu stap wantaim papamama inap planti yia, i gat planti samting yet long ol em yu mas kisim save long en!” Gutpela sapos yu yet i kirapim papamama long stori. Bai yumi skelim fopela gutpela samting dispela inap kamapim.
Gutpela samting #1: Ating papamama bai luksave olsem yu laik save gut long ol. Ol bai amamas long yu laik save long ol samting i bin kamap long laip bilong ol. Na ating ol bai pilim moa yet hevi bilong yu na filings bilong yu!—Matyu 7:12.
Gutpela samting #2: Bai yu kliagut long tingting bilong papamama. Olsem: Ating bipo papamama bilong yu i no bin gat planti mani samting. Taim yu save long dispela, ating yu kliagut long as na ol i lukautim gut mani, maski sapos yu pilim olsem i no gat wok long ol i mekim olsem.
Sapos yu kliagut long tingting bilong ol, dispela inap helpim yu. Wanpela yangpela man nem bilong em Cody, em i tok: “Taim mi kliagut long tingting bilong papamama bilong mi, mi inap skelim gut ol tok bilong mi paslain long mi toktok, nogut mi mekim tok i bagarapim bel bilong ol.”—Sindaun 15:23.
Gutpela samting #3: Ating bai yu no sem long stori long ol samting i painim yu. Bridgette i gat 18 krismas, em i tok: “Mi sem long toktok wantaim Papa long wanpela boi mi save laikim. Tasol taim mi kamapim bel bilong mi long Papa, em i stori long mi long namba wan taim em i bin laikim wanpela meri na em i bin pilim gutpela tru. Na em i stori tu long de em i bin tokim gelpren bilong em olsem tupela i no ken pren moa, na em i bin pilim nogut tru. Dispela i kirapim mi long stori moa long em long dispela laik bilong mi.”
Gutpela samting #4: Yu inap lainim sampela samting. Ol samting i bin painim papamama, em inap helpim yu long karim ol bel hevi na hatwok i painim yu yet. Joshua i gat 16 krismas, em i tok: “Mi laik save long olsem wanem papamama bilong mi i bin lukautim bikpela famili bilong mipela we olgeta i mas kisim narapela narapela kain helpim long ol samting bilong skin, bel, na lotu. I mas i gat sampela gutpela skul em mi inap kisim long ol.” Baibel i tok: “Ol lapun i gat planti gutpela tingting na save.”—Jop 12:12.
Go Pas Long Toktok Wantaim Ol
Sapos yu laik save gut moa long papamama bilong yu, yu ken mekim wanem? Yu ken mekim olsem:
Makim gutpela taim. I no olsem long olgeta taim yu na papamama i mas sindaun gut na toktok wantaim, nogat. Tasol taim yupela i pilai, wok wantaim long mekim wanpela projek, wokabaut o raun long ka, em ol taim we yu ken toktok wantaim ol. Cody, em yumi stori pinis long en, em i tok: “Mi bin stori gut wantaim papamama bilong mi long taim mipela i bin raun long ka. Tru, em isi moa long putim yaufon na harim musik o slip, tasol mi luksave olsem taim mi go pas long toktok wantaim ol, gutpela samting i save kamap!”
Mekim ol askim. Yu mas save olsem, maski em gutpela taim long toktok, Mama i no inap kirap wantu na stori long yu long namba wan taim em i kirap laikim wanpela boi, o Papa i no inap stori wantu long taim em i bin bagarapim ka bilong papa bilong em. Tasol ating ol bai stori long ol kain samting olsem sapos yu askim ol!—Bilong save long wanem kain askim yu ken mekim, lukim blok long pes 12.
Redi long senisim toktok. Planti taim, taim ol i bekim wanpela askim, nau ol i skruim stori i go i go na kamapim narapela stori. Ating yu bai traim long stiaim tok i go bek long samting yupela i bin stori long en, tasol no ken mekim olsem! Tingim, i no olsem yu laik save tasol long ol samting i bin kamap long laip bilong ol, nogat. Yu laik pas gut moa wantaim papamama, na gutpela rot bilong mekim olsem em yu mas toktok long ol samting ol i laik toktok long en.—Filipai 2:4.
Bihainim gutpela tingting. “Tingting bilong man i olsem wanpela hul wara i daun moa. Tasol man i gat gutpela save, em inap pulim dispela tingting i kam antap.” (Sindaun 20:5) Yu mas bihainim gutpela tingting taim yu laik kirapim papamama long stori long ol samting em ol i no laik toktok long en. Olsem: Ating yu laik save long ol popaia em papa i bin mekim na i sem long en, long taim em i bin i gat wankain krismas olsem yu. Na sapos wankain samting i laik kamap gen, em bai mekim wanem na bai em i no ken mekim wankain popaia. Tasol paslain long yu kirap askim em long kain samting olsem, i gutpela sapos yu tok, “Em orait sapos mi askim long . . . ”
Skelim gut tok yu mekim. Taim papamama i stori long yu long laip bilong ol, yu “mas putim yau kwik long harim tok, tasol . . . no ken hariap long mekim toktok.” (Jems 1:19) No ken tok bilas o semim ol long samting ol i bin mekim. Ol kain tok olsem—“Man! Mi no inap bilip long yu bin mekim olsem!” o “Olsem na yu save putim strongpela tambu long mi, laka?”—bai pasim maus bilong papa o mama na ol i no laik stori moa. Na tu, yu no ken stori long ol narapela long ol samting ol i tokim yu long en.
Yu Gat Taim Yet!
Ol tok i stap antap inap helpim yu long save gut moa long papamama taim yu stap yet wantaim ol. Tasol olsem wanem sapos yu lusim ol pinis na stap long narapela hap? Ol dispela stiatok inap helpim yu long pas gut gen wantaim papamama—o pas gut wantaim papa o mama em yu no bin save gut long em. Dispela samting i bin painim Jacob. Maski nau em i stap em yet, em i tok: “Nau mi kirap long save gut moa long papa bilong mi, na mi amamas tru long mekim olsem.”
Olsem na maski yu stap yet wantaim papamama o yu lusim ol pinis na stap long narapela hap, yu gat taim yet long save gut moa long ol. Traim long bihainim ol tok i stap long dispela stori bilong helpim yu long mekim olsem.
Bilong lukim sampela stori moa long hap “Ol Yangpela i Laik Save,” long tok Inglis, lukim Web-sait www.watchtower.org/ype
[Futnot]
a Mipela i senisim sampela nem long dispela stori.
SAMTING BILONG TINGIM
◼ Wanem ol tok bilong dispela stori yu laik askim papamama long en?
◼ Taim yu wok long save gut moa long papamama bilong yu, olsem wanem dispela inap helpim yu long save gut long yu yet?
[Blok/Piksa long pes 12]
Mekim ol kain askim olsem long papamama:
MARIT: Olsem wanem yu na Mama (o Papa) i bin bung? Wanem samting kirapim yu long laikim Papa (o Mama?) Yupela i stap we taim yupela i bin marit nupela?
TAIM OL I LIKLIK: Mama i karim yu we? Yu bin pas gut wantaim ol brata na susa bilong yu? Papamama bilong yu i bin putim strongpela lo long yu o ol i isi long yu?
SKUL: Yu bin laikim wanem sabjek long skul? Wanem sabjek yu no bin laikim? Yu gat wanpela feiveret tisa? Wanem samting i mekim na dispela tisa em i spesel?
WOK MANI: Wanem namba wan wok mani yu bin kisim? Yu bin amamas long dispela wok? Sapos yu inap makim wanpela wok yu laik mekim, bai yu makim wanem kain wok?
OL SAMTING OL I LAIKIM: Sapos yu inap go raun long narapela kantri, bai yu go we? Wanem kain wok o pilai samting yu laik lainim?
SAMTING BILONG LOTU: Yu bin kamap bikpela insait long famili Kristen? Sapos nogat, orait wanem samting i bin kirapim laik bilong yu long kisim save long Baibel? Wanem ol hevi i bin painim yu taim yu kirap bihainim ol stiatok bilong Baibel?
BIKPELA SAMTING LONG OL: Yu ting wanem ol samting i bikpela samting tru bilong pas gut wantaim ol narapela?, bilong i stap amamas?, bilong helpim marit i stap gut? Wanem nambawan gutpela skultok yu bin kisim?
Traim mekim olsem: Makim sampela bilong ol dispela askim i stap antap na traim long ges wanem bekim papamama bai givim. Bihain, askim ol na skelim bekim bilong ol wantaim bekim yu bin ting ol bai kamapim.
[Blok long pes 13]
TOK I GO LONG PAPAMAMA
Yu kaikai wantaim man bilong yu, pikinini meri, na sampela pren bilong yupela. Taim yupela i wok long stori, pren bilong yu i kolim nem bilong wanpela man yu bin prenim bipo—na bihain yupela i bruk—paslain long yu bungim man bilong yu. Yu no bin tokim pikinini meri bilong yu long dispela stori. Nau em laik save. Bai yu mekim wanem?
Gutpela sapos yu amamas long pikinini i mekim ol askim. Taim pikinini man o meri i givim askim na i putim yau long ol bekim bilong yu, em nau yupela i toktok wantaim—em samting planti papamama i laikim.
Tasol bai yu stori wantaim pikinini man o meri long olgeta samting i bin kamap long laip bilong yu long bipo? Ating bai yu no stori long ol samting yu sem long en. Tasol sapos i stret, tokim em long sampela popaia yu bin mekim na ol hevi yu bin bungim, na dispela inap helpim pikinini. Dispela inap helpim em olsem wanem?
Tingim wanpela eksampel. Wanpela taim aposel Pol i stori long em yet olsem: “Taim mi laik mekim gutpela pasin, pasin nogut i save pasim rot bilong mi. . . . O sori, dispela hevi i bagarapim tru tingting bilong mi!” (Rom 7:21-24) God Jehova i kirapim Pol long raitim ol dispela tok na ol i stap yet long Baibel bilong helpim yumi. (2 Timoti 3:16) Na dispela tok i helpim tru yumi, long wanem, yumi olgeta inap pilim tru tok bilong Pol.
Olsem tasol, taim ol pikinini i harim stori long ol gutpela rot yu bin makim bilong bihainim na ol popaia yu bin mekim, dispela inap helpim ol long pilim tingting bilong yu. Tru, yu bin kamap bikpela long wanpela taim i no wankain long taim bilong ol pikinini. Tasol maski ol samting i senis, yumi ol man i no save senis; na ol stiatok bilong Baibel tu i no senis. (Sng. 119:144) Taim yu toktok wantaim ol long ol hevi i bin painim yu—na olsem wanem yu bin winim ol dispela hevi—dispela inap helpim ol tineja pikinini bilong yu taim ol i wok long stretim ol hevi bilong ol yet. Wanpela yangpela man nem bilong em Cameron, em i tok: “Taim yu painimaut olsem papamama bilong yu i bin karim ol hevi i wankain olsem yu yet, dispela i helpim yu long save olsem papamama bilong yu ol i no gutpela olgeta, ol i wankain tasol olsem yu.” Na em i tok moa: “Taim hevi i painim yu long narapela taim, bai yu tingting olsem ating wankain hevi i bin painim papamama tu long bipo.”
Was gut: I no olsem olgeta stori bilong yu i mas i gat skultok long en. Tru, ating yu tingting planti, nogut tineja pikinini bilong yu i kisim tingting kranki o em i pilim olsem i orait long em i ken mekim wankain popaia. Tasol no ken kolim tasol ol samting yu laik bai pikinini i kisim skul long en long dispela stori (“Olsem na yu no ken . . . ”), yu mas stori liklik long yu bin pilim olsem wanem. (“Taim mi tingting long samting i bin kamap, em bai gutpela tru sapos mi no bin mekim dispela samting, long wanem, . . . ”) Olsem na pikinini man o meri inap kisim gutpela skul long samting i bin painim yu, na em i no inap pilim olsem yu wok long givim skultok long em.—Efesus 6:4.
[Blok long pes 13]
“Wanpela taim mi tokim Mama olsem mi save amamas moa long stap wantaim ol wanskul winim ol wanbilip Kristen. Long de bihain, Mama i putim wanpela pas long des bilong mi. Insait long pas em i tokim mi olsem, bipo em tu i bin pilim olsem em i no gat pren namel long ol wanbilip. Em i kirapim mi long tingim ol man em Baibel i stori long ol na ol i mekim wok bilong God maski i no gat wanpela i stap wantaim ol bilong strongim ol. Na tu, em i tok amamas long mi bin wok strong long kamap pren bilong ol narapela. Mi kirap nogut long save olsem, i no mi tasol i gat dispela hevi. Mama tu i bin karim dispela kain hevi, na mi amamas long save long dispela na mi krai. Samting Mama i tokim mi long en i strongim tru mi, na mi kisim strong long mekim samting i stret.”—Junko, 17, Japan.
[Piksa long pes 11]
Askim papamama long soim yu ol poto o ol narapela samting bilong bipo. Planti taim dispela inap kirapim ol long stori