Gutpela Yu Bilip Long God Triwan o Nogat?
Winim 2 bilion manmeri i tok ol i Kristen. Planti bilong ol i insait long ol lotu i skulim ol man long God Triwan—em dispela bilip olsem Papa, Pikinini, na holi spirit ol i wanpela God. Olsem wanem dispela bilip bilong God Triwan i kamap wanpela bilip bilong Misin? Na bikpela samting moa, dispela bilip i stret wantaim tok bilong Baibel o nogat?
WOK bilong raitim Baibel i pinis long yia 100 C.E. Winim 200 yia bihain, long yia 325 C.E. ol i kamapim bilip bilong God Triwan long wanpela bikpela bung bilong lotu i bin kamap long taun Naisia long Esia Maina, em nau ol i kolim Iznik, Teki. Buk New Catholic Encyclopedia i tok, tokaut ol i mekim long Kibung Bilong Naisia i kamapim klia mining tru bilong ol bilip em Misin i skulim ol man long en, na tu, i kamapim klia God na Krais ol i husat tru. Tasol wai na ol i pilim olsem ol i mas kamapim klia God na Krais ol i husat bihain long ol man i bin pinisim wok bilong raitim Baibel winim 200 yia i go pinis? Yu ting Baibel i no stori gut long God na Krais?
YU TING JISAS EM I GOD?
Taim Konstantin wanpela i bosim Gavman Rom, ol man i tok ol i Kristen ol i tok pait long God i stap olsem wanem wantaim Krais. Jisas em i God? O God i wokim Jisas? Bilong stretim dispela tok, Konstantin i tokim ol bikman bilong sios long kam bung long Naisia, i no olsem em i laik save long ol tok i tru bilong Baibel, nogat, em i mekim olsem bikos em i no laik lotu i brukim gavman bilong em.
Konstantin i askim ol bisop, em ating ol i planti handret, long wanbel long wanpela disisen, tasol ol i no mekim olsem. Olsem na em i tokim ol bikman bilong lotu long kisim dispela bilip olsem Jisas em i “bilong wanpela bodi” (tok Grik homoousios) wantaim Papa. Dispela tok Grik em Baibel i no as bilong en i kamap olsem as tok bilong bilip bilong God Triwan, na bihain ol i mekim i kamap wanpela bilip bilong lotu. Long pinis bilong yia 300 C.E., dispela bilip bilong God Triwan we holi spirit i namba 3 god, i kamap na i stap olsem i kam inap long nau.
BILONG WANEM YU MAS TINGIM DISPELA?
Jisas i tok: “Ol man i lotu tru long Papa, ol bai lotuim em long . . . pasin i tru.” (Jon 4:23) Tok i tru i stap long Baibel. (Jon 17:17) Yu ting Baibel i tok Papa, Pikinini, na holi spirit ol i 3-pela man insait long wanpela God?
Baibel i no kolim dispela tok “God Triwan.” Na tu, i no gat wanpela taim Jisas i bin tok em i wankain olsem God. Jisas i lotuim God. (Luk 22:41-44) Na narapela samting, em pasin pren i stap namel long Jisas na ol disaipel bilong em. Maski bihain long em i kirap bek long dai na i go stap antap long ples spirit, em i kolim ol disaipel bilong em olsem “ol brata bilong mi.” (Matyu 28:10) Yu ting ol i brata bilong God i Gat Olgeta Strong? Nogat! Tasol long rot bilong bilip bilong ol long Krais, em nambawan Pikinini Bilong God, ol tu i kamap pikinini bilong dispela wanpela Papa. (Galesia 3:26) Skelim sampela skripsa wantaim ol bilip i bin kamap long Kibung Bilong Naisia.
Tokaut Bilong Naisia i tok:
“Mipela bilip . . . long wanpela Bikpela em Krais Jisas . . . em i kamap long Papa, God i kamap long God, Lait i kamap long Lait, God tru i kamap long God tru.”
Tok Baibel i mekim:
▪ “Papa i stap namba wan tru na i winim mi [Jisas].”—Jon 14:28.a
▪ “Mi [Jisas] bai go antap, na mi go long Papa bilong mi na Papa bilong yupela. Na mi go long God bilong mi na God bilong yupela.”—Jon 20:17.
▪ “Yumi gat wanpela God tasol, em God Papa.”—1 Korin 8:6.
▪ “Yumi litimapim nem bilong God, em i God na Papa bilong Bikpela bilong yumi, Jisas Krais.”—1 Pita 1:3.
▪ “Mi [Jisas] man bilong tok ‘I tru’ . . . Mi as bilong olgeta samting God i bin wokim.”—Kamapim Tok Hait 3:14.b
[Ol Futnot]
a Olgeta tok bilong Baibel mipela i kamapim long dispela hap i kam long Buk Baibel.
b Buk Tru Tru Baibel i Tok Wanem? i bilong helpim ol man long stadi long Baibel na i gat dispela tupela sapta: “God Em i Wanem Kain Man Tru?” na “Jisas Krais Em i Husat?” Yu ken kisim wanpela bilong dispela buk long ol Witnes Bilong Jehova o ritim long Intenet long www.jw.org/tpi.
[Piksa long pes 12]
[Rait long pes 12]
“Yumi gat wanpela God tasol, em God Papa.”—1 Korin 8:6, Buk Baibel
[Piksa long pes 13]
Fes Kibung Bilong Naisia (piksa ol atis i droim) i opim rot bilong dispela bilip bilong God Triwan
[Kredit Lain]
© SuperStock
[Blok long pes 13]
DISPELA BILIP:
▪ Buk The New Westminster Dictionary of Church History i tok: “Tokaut Bilong Naisia i no bin kamap long Fes Kibung Bilong Naisia long (325 C.E.) . . . tasol ol i bin kamapim long Fes Kibung Bilong Konstantinopel long (381 C.E.).”
▪ “Long 325 C.E., Kibung Bilong Naisia i tokaut long bikpela as tok bilong bilip [bilong God Triwan bai kamap bihain], em olsem Pikinini i ‘bilong wanpela bodi . . . olsem Papa.’”—Encyclopædia Britannica.
[Blok long pes 13]
“Baibel bilong ol Kristen na Nupela Testamen i no mekim wanpela tok i sapotim dispela bilip bilong God Triwan o stori long 3-pela man i insait long wanpela god.”—Encyclopædia Britannica.
“Bilip bilong God Triwan . . . i no bin stap long taim bilong ol Kristen bilong pastaim, na tu, em i no bin stap paslain long pinis bilong yia 200 C.E.”—Library of Early Christianity—Gods and the One God.
“Bilong kirapim ol man long kisim bilip bilong God Triwan, Misin [Katolik] i kamapim ol tok bilong em yet na i kisim helpim tu long rot bilong ol tingting ol saveman i kamapim.”—Catechism of the Catholic Church.