Wai na Yumi Save Karim Pen na Hevi, Go Lapun, na Dai?

“Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri.” —ROM 5:12.

God i wokim namba wan man na meri—Adam na Iv—tingting na bodi bilong tupela i gutpela olgeta. Na tu, em i putim tupela long Paradais long graun—em ol i kolim gaden Iden. Em i tokim tupela long kaikai prut bilong olgeta diwai long gaden, tasol prut bilong wanpela diwai tasol ol i no ken kaikai. Tasol Adam na Iv i wokim disisen long kaikai prut bilong dispela diwai, na dispela em sin. (Stat 2:15-17; 3:1-19) Tupela i sakim tok na God i rausim ol long dispela gaden, na laip bilong tupela i kamap hatwok tru. Bihain tupela i kamapim ol pikinini, na laip bilong ol tu i pulap long hevi. Olgeta i kamap lapun na dai. (Stat 3:23; 5:5) Yumi save sik, go lapun, na dai bikos yumi kam long Adam na Iv.

“Dispela graun olgeta i stap long han bilong Satan.”—1 JON 5:19.

Satan em wanpela spirit husat i bikhet long God. (Jon 8:44; Revelesen 12:9) Bihain ol narapela ensel i joinim Satan. Baibel i kolim ol olsem ol spirit nogut. Ol dispela spirit nogut i save yusim strong bilong ol long giamanim ol manmeri na bai ol i sakim tok bilong Krieta. Ol i stiaim planti manmeri long mekim ol pasin nogut. (Buk Song 106:35-38; 1 Timoti 4:1) Satan na ol spirit nogut i amamas long mekim ol man i karim pen na hevi.

“Samting man i planim, dispela samting tasol em bai kamautim.”—GALESIA 6:7.

Long kain kain rot yumi karim pen na hevi bikos long sin yumi kisim long Adam, na tu, Satan i stiaim pasin ol man i mekim. Sampela taim ol man yet i mekim na hevi i painim ol. Long wanem rot ol i mekim olsem? Taim ol i mekim ol pasin nogut o taim ol i no wokim gutpela disisen, planti taim ol yet i karim hevi long dispela. Tasol ol manmeri i mekim ol gutpela samting, ol bai kamapim ol gutpela samting. Olsem, wanpela maritman na papa husat i save onest, wok strong, na laikim famili bilong em, em bai kisim planti gutpela samting na famili bilong em bai stap amamas. Tasol papa i man bilong pilai laki, spakman, o lesman em bai mekim na em yet na famili bilong em bai kamap rabis. Olsem na em i savetingting long yumi bihainim tok bilong Krieta bilong yumi. Krieta i laik bai yumi kisim ol gutpela samting, na tu, “stap bel isi tru.”—Buk Song 119:165.

“Long taim bilong las de, . . . ol man bai laikim ol yet tasol, ol bai laikim tumas mani, . . . sakim tok bilong papamama, . . . ol bai i no gat pasin bilong bosim bel, ol bai kamap wail olgeta, ol bai i no laikim ol gutpela pasin.”—2 TIMOTI 3:1-5.

Long nau, ol manmeri i mekim ol pasin olsem ol dispela ves i tok profet long en. Pasin bilong ol i kamapim klia olsem yumi stap long “las de” bilong dispela taim nau yumi stap long en. Baibel i tok profet tu olsem long taim bilong yumi bai i gat ol woa, kaikai i sot, ol bikpela guria, na ol sik. (Matyu 24:3, 7, 8; Luk 21:10, 11) Ol dispela samting i kamapim planti pen na hevi na dai.