Sapta 9
Husat i Soim Rot Bilong Abrusim Bagarap?
I GAT wanpela rot tasol bilong abrusim bagarap bai painim ol man nogut long taim bilong “bikpela hevi tru” em olsem: Yumi mas bilip olsem Krais Jisas em i man bilong i go pas na soim rot long yumi—olgeta samting yumi mekim i mas kamapim long ples klia olsem yumi save harim tok bilong em na bihainim lek bilong em. (Aposel 4:12) Ol samting Jehova i bin mekim bilong helpim ol Isrel long lusim Isip long yia 1513 B.C.E., em i gutpela piksa bilong dispela samting. Jehova i wokim mirakel na helpim ol Isrel long brukim Solwara Retsi, tasol em i bagarapim ami bilong ol Isip i ronim ol Isrel. God i givim wok long Moses bilong i go pas na soim rot long lain bilong em.—Josua 24:5-7; Eksodas 3:10.
2 Taim ol Isrel i lusim Isip na wokabaut i go long Graun Bilong Promis, sampela lain moa i go wantaim ol. Olsem Moses i tok: “Planti arapela lain manmeri . . . i go wantaim ol.” (Eksodas 12:38) Husat ol dispela lain? Sampela ol i bilong Isip na sampela i bilong ol narapela lain, em ol i laik i go wantaim ol Isrel. Ol i bin lukim ol samting nogut i painim ol Isip bilong kamapim long ples klia olsem Jehova wanpela em i God tru na ol god bilong ol Isip ol i god giaman tasol na ol i no inap helpim ol Isip long abrusim bagarap. Na tu ol i bin harim stori bilong ol Isrel long gutpela sindaun ol inap kisim long “graun i gat planti gris na ol kaikai i save kamap gutpela tumas.” (Eksodas 3:7, 8; 12:12) Tasol olsem wanem? Ol i bilip tru olsem Moses em dispela man God i bin putim em i stap hetman na man bilong kisim bek lain bilong God? I no longtaim na traim i painim ol long dispela samting.—Aposel 7:34, 35.
3 Ol Isrel wantaim ol dispela “planti arapela lain manmeri” ol i kamap klostu long Solwara Retsi na nau king bilong Isip wantaim ol ami bilong em i bihainim ol bilong kisim ol i go bek na wok kalabus gen long ol. Bilong abrusim dispela kalabus, ol i mas pas gut wantaim na bihainim tok bilong Moses, long wanem Jehova i putim Moses bilong go pas long ol na soim rot long ol. Jehova i kamapim wanpela smok o “klaut” na pasim rot bilong ol birua, na em i brukim solwara i go tupela hap na long namel graun i drai olgeta. Olgeta Isrel na ol dispela “planti arapela lain manmeri” wantaim Moses ol i wokabaut long dispela graun i drai na ol i no bagarap olsem ol Isip. (Eksodas 14:9, 19-31) Ol i wokabaut i go namel long solwara na wara i sanap olsem banis long hap na long hap, na dispela smok i stap antap long ol, na nau wanpela samting i olsem piksa em i kamap. Baibel i tok dispela samting i painim ol i olsem ol i baptais; ol i no baptais long wara—ol i baptais long Moses. Dispela i makim ol i bilip olsem Moses em i profet bilong Jehova na Jehova i bin salim em bilong kisim bek ol. (1 Korin 10:1, 2) Olsem tasol long olgeta Isrel bilong spirit—bilong abrusim bagarap em bai painim ol man nogut bilong dispela graun ol i mas kisim wankain baptais bilong makim ol i bilip long Krais em i man bilong kisim bek ol, na ol i mas kamapim long ples klia olsem ol i bihainim tru lek bilong em. Ol “planti lain manmeri” long nau ol i mas i go wantaim ol dispela Isrel bilong spirit.
4 Jehova i bin givim bikpela namba tru long Pikinini bilong em Krais Jisas. Long Krais Jisas, God i wokim rot bilong “tekewe yumi long dispela pasin nogut nau i stap long graun” bambai yumi no ken bagarap. (Galesia 1:3-5; 1 Tesalonaika 1:9, 10) Long rot bilong Moses, Jehova i givim sampela lo long ol Isrel na taim ol i bihainim ol dispela lo, dispela i helpim i stap bilong ol. Tasol sampela lo, sapos ol i bikhet long en ol i mas i dai. Bihain Jisas i kam long graun na em i kamap wanpela bikpela profet i winim Moses. Ol tok em i skulim ol man long en ol dispela tok “i givim laip i stap gut oltaim oltaim,” tasol sapos ol i bikhet long ol dispela tok, bai ol i bagarap na lus olgeta. Olsem na em i bikpela samting tru long yumi mas bihainim tok bilong Jisas!—Jon 6:66-69; 3:36; Aposel 3:19-23.
5 Sampela man ol i no laik daun long man i gat wok long bosim ol. Long wanem ol i lukim planti man i gat bikpela namba ol i mekim nogut long ol man. Tasol Jisas i no ken mekim olsem, long wanem em yet i tok: “Yupela ol man i mekim hatwok na i karim bikpela hevi, yupela olgeta i kam long mi, bai mi givim yupela malolo. Yupela kisim dispela diwai mi givim long yupela, na karim long sol bilong yupela. Na yupela kisim save long mi. Long wanem mi save mekim pasin isi long ol man, na mi save daunim mi yet. Na bai bel bilong yupela i painim malolo. Dispela hevi mi putim long sol bilong yupela, em i no hatwok, na samting mi givim yupela bilong karim, em i no gat hevi.” (Matyu 11:28-30) Yumi amamas long kain man olsem i bosim yumi! Ol man i kam long Jisas na ol i bilip tru long em, bilip bilong ol i no ken lus nating. (Rom 10:11) Bai ol i stap gutpela tru olsem wanpela lain sipsip i gat gutpela wasman.
GUTPELA WASMAN TRU
6 Lain Isrel ol i olsem wanpela lain sipsip ol i bilong Jehova. Em i givim Lo long ol—ol i stap insait long kontrak bilong em olsem ol sipsip i stap insait long banis. Dispela kontrak bilong Lo i lukautim ol na ol i no bihainim pasin bilong ol narapela lain em ol i givim baksait long God. Na ol man i bihainim tok, dispela Lo i bringim ol i go long Krais. (Efesas 2:14-16; Galesia 3:24) Jehova i tok profet long Krais em i King na Wasman bilong ol sipsip na Jehova i tok: “Bai mi kamapim wanpela wasman bilong bosim ol [sipsip bilong mi], em boi bilong mi Devit, na em bai givim kaikai long ol.” (Esikiel 34:23, 31, NW) I no olsem Devit yet bai bosim gen lain bilong God; Devit i dai pinis. Tasol Jehova bai kamapim wanpela man long lain bilong Devit na putim em i stap king na wasman bilong lain bilong God. Na long rot bilong dispela man bai God i lukautim ol. (Jeremaia 23:5, 6) I gat sampela man ol i kirap na ol i giaman na tok, ‘Mi Krais. Mi man bilong kisim bek yupela.’ Tasol long yia 29 C.E., Jehova i givim wok long Jon Bilong Baptais na em i tokaut long ol Isrel olsem Krais Jisas em i wasman tru bilong ol, em God i bin salim i kam. Dispela man em Pikinini bilong God na God i bin kisim laip bilong em long heven na putim long bel bilong wanpela meri singel long lain bilong Juda, bambai dispela Pikinini i ken kamap man long graun insait long lain bilong Devit. Insait bilong dispela nem Devit i olsem “laikim tumas,” olsem na taim Jisas i baptais pinis long wara, i stret Jehova i tokaut olsem: “Yu Pikinini bilong mi. Mi laikim yu tumas. Bel bilong mi em i gutpela long yu.”—Mak 1:11.
7 Paslain liklik long taim Jisas i dai, em i tok: “Mi gutpela wasman bilong sipsip. Gutpela wasman bilong sipsip em i save lusim laip bilong em yet bilong helpim ol sipsip.” (Jon 10:11) Em i skelim pasin bilong em wantaim pasin bilong ol Krais giaman ol i bin i kam pas, na em i tok: “Man i no save go insait long dua bilong banis bilong sipsip, tasol em i kalapim banis long narapela hap na i go insait, kain man olsem em i stilman na man bilong pulim samting. Tasol man i save go insait long dua, em i wasman bilong sipsip. Wasman bilong dua em i save opim dua long dispela man. Na ol sipsip ol i save harim maus bilong em. Em i save singautim nem bilong ol sipsip bilong em yet. Na em i kisim ol i go ausait. Em i bringim olgeta sipsip bilong em i go ausait pinis, orait em i save wokabaut i go pas long ol. Na ol sipsip ol i save long maus bilong em, olsem na ol i bihainim em. Ol i no save bihainim narapela man. Nogat. Ol i save ranawe long em. Long wanem ol i no save long maus bilong ol arapela man.”—Jon 10:1-5, 8.
8 Ol man i stap insait long banis sipsip bilong ol Juda na ol i bihainim kontrak bilong Lo, ol i bilip olsem Jisas em i Krais tru taim “wasman bilong dua,” em Jon Bilong Baptais, i tokim ol long em. Ol i kamap “sipsip” bilong Jisas yet, na em i bringim ol i go insait long wanpela nupela banis sipsip bilong Jehova. Dispela banis sipsip i makim ol i stap gut long ai bilong Jehova insait long nupela kontrak em i bin wokim wantaim ol Isrel bilong spirit long blut bilong Jisas. Long rot bilong dispela kontrak ol inap kisim laip long heven wantaim Krais, em dispela “pikinini” bilong Ebraham olgeta lain man bai kisim blesing long em. (Hibru 8:6; 9:24; 10:19-22; Jenesis 22:18) Dispela Jisas God i kirapim em long matmat na kisim em i go bek long heven, em “dua” bilong dispela banis sipsip, olsem nupela kontrak. Olsem Papa bilong Jisas i tok pinis long en, Jisas i kisim liklik lain tasol i go insait long dispela banis—em 144,000 tasol—pastaim em i kisim sampela bilong lain Juda na bihain sampela bilong lain Sameria na bilong ol narapela lain. Jisas em i Gutpela Wasman bilong ol sipsip, olsem na em i save long nem bilong olgeta wan wan sipsip bilong em na em i tingim olgeta wan wan na lukautim ol gut.—Jon 10:7, 9; Revelesen 14:1-3.
9 Tasol Jisas i no lukautim tasol dispela “liklik lain sipsip” ol i bilong kisim Kingdom bilong heven. (Luk 12:32) Em i tok: “Mi gat arapela sipsip tu, na ol i no bilong dispela banis. Mi mas bringim ol dispela tu. Na bai ol i harim maus bilong mi. Na bambai i gat wanpela lain sipsip tasol na wanpela wasman tasol bilong ol sipsip.” (Jon 10:16) Husat ol dispela “arapela sipsip”? Em ol manmeri ol i no insait long nupela kontrak; ol i no lain Isrel bilong spirit. Tasol ol i bilip long blut bilong Jisas na ol i kam insait long ol samting Jehova i mekim bilong givim laip oltaim long ol man long graun. Nau bikpela lain bilong ol i kam bung wantaim ol manmeri bilong lain Isrel bilong spirit ol i stap yet long graun; ol tu i bihainim Krais olsem Gutpela Wasman bilong ol sipsip. Ol manmeri bilong lain “arapela sipsip,” em ol i stap laip yet long graun na nau ol i kamap ples klia, ol i olsem dispela “planti tumas manmeri” Revelesen 7:9, 10, 14 i stori long ol na ol inap abrusim bagarap long taim bilong “bikpela hevi tru.”
10 Bilong kamap wanpela bilong dispela lain Baibel i kolim ol olsem “arapela sipsip,” em Gutpela Wasman i save lukautim ol, yumi mas “harim” maus bilong em na kamapim long ples klia olsem yumi insait tru long dispela “wanpela lain sipsip tasol,” em lain bilong Kingdom tu i stap insait long en. Yu mekim olsem? Yu harim gut maus bilong em?
11 Ating yu save long tok bilong Jisas, em i tok: “Lo bilong mi em i olsem: Yupela i mas laikim tru ol brata, olsem mi laikim yupela.” (Jon 15:12) Yu bihainim dispela lo? Yu laikim tru ol brata olsem Jisas i bin mekim? Yu redi long lusim sampela samting bilong yu bilong helpim ol? Ol samting yu mekim na tingting bilong yu i kamapim long ples klia olsem yu laikim tru olgeta brata sista long kongrigesen Kristen na olgeta wanhaus bilong yu?
12 Aposel Pol i tok, sapos yumi “harim” tru maus bilong Jisas na “ol i skulim [yumi] long tok i tru i stap long Jisas,” orait bai yumi senisim pasin bilong yumi olgeta. Bai yumi lusim ol pasin bilong yumi bilong bipo na kirap bihainim ol gutpela pasin bilong Jehova, na yumi kamap “nupela man.” (Efesas 4:17-24; Kolosi 3:8-14) Olsem wanem? Taim yu lainim tok bilong Baibel, oltaim yu save tingim wanem ol pasin bilong yu yu mas stretim bambai yu ken bihainim pasin God i laikim? Yu wok strong long stretim ol dispela pasin bilong yu? Yu tingim gut bikpela wok Jisas i tok yumi mas mekim long nau—em wok bilong autim tok bilong Kingdom bilong God—na yu wok strong long painim rot bilong mekim dispela wok? Yu pilim tru gutpela pasin marimari God i mekim long yu na dispela i kirapim bel bilong yu na yu laik tru long mekim dispela wok?—Matyu 24:14.
13 Yumi mas was gut, nogut bel bilong yumi i giamanim yumi. Planti milion manmeri ol i tok ol i bilip long Krais Jisas, na ating ol inap kolim sampela tok bilong em, tasol ol i bihainim tasol ol tok i no gat hatwok long en. Ating sampela i no save mekim ol pasin ol i ting i gat bikpela rong long en. Ating ol i amamas long tok promis bilong God olsem yumi inap i stap long Paradais long graun aninit long Kingdom bilong God, na ating ol i amamas long bung wantaim ol manmeri i wok strong long bihainim pasin Kristen. Tasol sapos yumi laik abrusim bagarap na i stap long “nupela graun,” yumi mas harim gut olgeta tok bilong Jisas. Yumi mas save yumi no inap bosim gut wokabaut bilong yumi yet. Yumi mas harim tok bilong Pikinini bilong God na bihainim gut lek bilong em, em dispela man Jehova i bin makim em bilong kisim bek lain bilong Em.—Jeremaia 10:23; Matyu 7:21-27; 1 Pita 2:21.
[Askim Bilong Stadi]
1. (a) Yumi mas bihainim husat bambai yumi no ken bagarap long taim bilong “bikpela hevi tru”? (b) God i givim wanem wok long Moses na i gutpela piksa bilong dispela samting?
2. (a) Husat ol dispela “planti arapela lain manmeri” ol i lusim Isip na i go wantaim ol Isrel? (b) Ating planti ol i tingim wanem samting na ol i go? (c) Traim i painim ol long wanem samting?
3. (a) Bilong wanem ol i mas bihainim rot Moses i soim long ol? (b) Ol i ‘baptais long Moses’ na dispela i makim wanem samting? (c) Bilong wanem dispela samting em bikpela samting long ol Isrel bilong spirit?
4. Jehova i givim wanem kain namba long Krais?
5. Bilong wanem yumi laik tru long i stap aninit long Jisas?
6. (a) Olsem wanem lain Isrel i kain olsem lain sipsip i stap insait long banis? (b) Jehova i mekim wanem tok promis long kamapim wanpela wasman bilong ol dispela “sipsip”? Em i truim dispela tok promis olsem wanem?
7. (a) Jisas em i “gutpela wasman bilong sipsip” na olsem wanem em i kamapim sori bilong em, em i tingim tru “ol sipsip”? (b) Olsem wanem dispela pasin bilong em i narapela kain long pasin bilong ol Krais giaman i bin i kam pas?
8. (a) Ol Juda i bihainim Jisas, em i bringim ol i go insait long wanem nupela “banis bilong sipsip”? (b) Em i kisim hamas i go insait long dispela banis?
9. Husat ol dispela “arapela sipsip,” em Jisas i stori long ol? Wanem taim em i bringim ol i kam?
10. Bilong kamap wanpela bilong dispela lain “arapela sipsip,” yumi mas mekim wanem?
11. Bilong kamapim long ples klia olsem yumi “harim” tru tok bilong Jisas long Jon 15:12, yumi mas mekim wanem?
12. (a) Sapos “ol i skulim [yumi] long tok tru i stap long Jisas,” orait bai yumi mekim wanem long pasin bilong yumi? (b) Olsem na yumi mas mekim wanem long ol tok yumi lainim long Baibel?
13. (a) Sapos yumi no was gut, ating bel bilong yumi bai giamanim yumi olsem wanem? (b) Olsem na yumi mas mekim wanem bilong bihainim lek bilong Jisas?