Beten

Stori: Beten em pasin bilong toktok long God tru o ol god giaman long maus o long tingting.

Yu wankain olsem planti man na yu ting God i no harim beten bilong yu?

God i save harim beten bilong husat?

Sng 65:2; Ap 10:34, 35: “Yu save harim beten bilong mipela.” “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (God i no save tingim lain o skin bilong man o em i rabisman o maniman. God i save tingim bel na pasin bilong man.)

Lu 11:2: “Taim yupela i beten, yupela i ken tok olsem, ‘Papa, nem bilong yu i mas i stap holi.’ ” (Yu save beten long Papa, em Baibel i tok nem bilong em Jehova? O yu beten long ol santu?)

Jo 14:​6, 14: “Jisas i tokim em olsem, ‘Mi yet mi rot . . . I no gat wanpela man inap i kam long Papa long narapela rot. Nogat. Long mi tasol. Olgeta samting yupela i askim long nem bilong mi, em bai mi mekim.” (Yu save beten long nem bilong Krais Jisas, long wanem, yu save yu sinman na Jisas em i Man bilong askim God long helpim yu?)

1 Jo 5:14: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. Olsem na yumi no save pret long God.” (Pastaim yu mas save long laik bilong God, na bai yu no ken pret long beten long em. Na yu mas mekim beten i stret long laik bilong em.)

1 Pi 3:12: “Bikpela i save lukautim ol stretpela manmeri, na em i save putim yau long ol beten bilong ol. Tasol Bikpela i no save laikim ol manmeri nogut.” (Yu bin wok long kisim save long tok bilong Jehova long Baibel bambai yu ken save wanem pasin i stret na wanem pasin i nogut?)

1 Jo 3:22: “Sapos yumi beten na askim em long wanpela samting, orait em i save givim long yumi, long wanem, yumi save bihainim lo bilong en, na yumi save mekim pasin em i laikim.” (Yu laik tru long mekim pasin God i laikim, na yu wok strong long bihainim ol lo bilong em yu save pinis long en?)

Ais 55:​6, 7: “Nau Bikpela i stap klostu long yupela . . . olsem na nau em i taim bilong yupela i mas beten long em . . . Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim . . . Na ol i mas kam bek long God, Bikpela bilong yumi. Em i save marimari moa yet long ol manmeri i kam bek long em.” (Jehova i mekim pasin marimari na maski man i bin mekim pasin nogut, Jehova i tok em i ken beten long Em. Tasol em i mas tanim bel na lusim ol pasin na tingting nogut bilong em na bai Jehova i orait long em.)

Wanem samting inap mekim na bai God i no orait long beten bilong man?

Mt 6:5: “Yupela i no ken mekim [beten] olsem ol man bilong giaman i save mekim. Ol i laikim tumas long sanap na mekim prea insait long ol haus lotu, na long ol kona bilong bikrot, bai ol man i ken lukim ol. Mi tok tru long yupela, ol i kisim pinis pe bilong ol.” (Na Luk 18:​9-14)

Mt 6:7: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.”

Snd 28:9: “Sapos man i givim baksait long lo [bilong God], orait God bai i no inap harim beten bilong en. God bai i lukim dispela beten i olsem stingpela samting tasol.”

Mai 3:4: “Bihain wanpela taim bai i kamap na bai yupela i krai long Bikpela, tasol em bai i no inap harim . . . long wanem, yupela i bin mekim pasin nogut.”

Je 4:3: “Taim yupela i beten long kisim samting, yupela i no save kisim, long wanem, tingting bilong yupela i no stret na yupela i beten long God. Yupela i ting long kisim ol samting bilong tromoi tasol long laik bilong bel bilong yupela.”

Ais 42:8; Mt 4:10: “Yupela i mas givim biknem long mi [Jehova] wanpela tasol. Yupela i no ken litimapim nem bilong ol giaman god, em ol man yet i wokim.” “Yu mas lotu long em [Jehova] wanpela tasol.” (Na Song 115:​4-8) (Beten em i wanpela pasin bilong lotu. Sapos yu beten long ol piksa na god giaman, yu ting God bai amamas?)

Ais 8:19: “Ol manmeri bai i tokim yupela long i go long ol dispela man na meri i save toktok wantaim . . . ol man i dai pinis, na kisim tingting bilong ol. . . . Tasol ol manmeri i dai pinis, ol i no inap givim tingting long ol manmeri i stap yet. Olsem na bilong wanem ol i save ran i go long ol manmeri i dai pinis long kisim tingting bilong ol? Ol i mas i go long God bilong ol.”

Je 1:​6, 7: “Man i mas bilip tru na i beten long God. Em i no ken lusim bilip liklik . . . Man i gat tupela tingting, em i . . . no ken ting Bikpela bai i givim wanpela samting long em. Nogat.”

Wanem ol samting i stret yumi ken beten askim God long en?

Mt 6:​9-13: “Yupela i mas [beten] olsem, ‘[1] Papa bilong mipela, yu stap long heven, nem bilong yu i mas i stap holi. [2] Kingdom bilong yu i mas i kam. [3] Mipela i mas bihainim laik bilong yu long graun olsem ol i save bihainim long heven. [4] Nau yu ken givim mipela kaikai inap long dispela de. [5] Na yu ken lusim ol rong bilong mipela . . . [6] Na yu no ken larim ol traim i kamap long mipela, tasol yu ken tekewe mipela long [Satan].’ ” (Yumi mas tingim nem na laik bilong God pastaim. Yu lukim?)

Sng 25:​4, 5: “God, yu mas skulim mi long gutpela pasin bilong yu . . . Lainim mi long bihainim tok tru bilong yu.”

Lu 11:13: “Papa bilong yupela i stap long heven em bai i amamas long givim Holi Spirit long ol man i askim em.”

1 Te 5:​17, 18: “Yupela i mas beten oltaim. Maski wanem samting i kamap long yupela, yupela i mas tenkyu long God.”

Mt 14:​19, 20: “[Jisas] i kisim dispela 5-pela bret wantaim tupela pis, na em i lukluk i go long heven, na i givim tenkyu long God. Na em i brukim ol bret . . . na olgeta i kaikai na ol i pulap.”

Je 5:16: “Yupela i mas prea long God i helpim ol [brata].”

Mt 26:41: “Yupela i mas was na prea i stap. Nogut traim i kamap long yupela na yupela i pundaun.”

Fl 4:6: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela . . . na askim em long helpim yupela.”

Sapos Man i Tok​—⁠

‘Yu beten wantaim mi pastaim, na bai mi harim tok bilong yu’

Yu ken tok: ‘Mi amamas yu pilim olsem beten em i bikpela samting. Ol Witnes Bilong Jehova i save beten long olgeta taim. Tasol Jisas i bin mekim wanpela tok long taim na pasin bilong beten na ating yu no save long en. Em i tokim ol disaipel ol i no ken beten long ai bilong ol man na bai ol man i ken lukim ol i man bilong beten. Yu tingim dispela tok? . . . (Mt 6:⁠5)’ Na ating yu ken tok moa olsem: ‘Bihain em i kolim bikpela samting yumi mas tingim na ol namba wan samting yumi mas beten long en. Mi kam bilong toktok wantaim yu long dispela. (Mt 6:​9, 10)’

O yu ken tok: ‘Mi save sampela misin i save mekim olsem. Tasol ol Witnes bilong Jehova, nogat. Long wanem, Jisas i tokim ol disaipel long bihainim narapela pasin bilong autim tok. Em i no tok, “Sapos yupela i go insait long wanpela haus, orait yupela i mas beten pastaim.” Nogat. Lukim tok bilong em long Matyu 10:​12, 13. . . . Na Mt 10 ves 7 i kolim tok ol i mas autim. . . . Olsem wanem dispela Kingdom inap helpim kain man olsem yumi? (KTH 21:⁠4)’