Sapta 9
Bilip Bilong Kirap Bek i Gat Strong
1. Sapos ol man i dai pinis ol i no inap kirap bek, ol bai i stap olsem wanem?
OLSEM WANEM? Wanpela yu laikim em tru em i dai? Sapos ol man i dai pinis ol i no inap kirap bek, bai yumi no inap lukim ol gen. Ol bai i stap olsem Baibel i stori long en: “Ol man i dai pinis, ol i no inap save long wanpela samting. . . . Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis [matmat], dispela ples bai yu go long en.”—Saveman 9:5, 10.
2. Wanem gutpela samting bai kamap long rot bilong kirap bek?
2 Jehova i gat pasin sori na long rot bilong kirap bek em i opim rot long planti manmeri i dai pinis long ol i ken kirap bek na amamas long kisim laip oltaim. Olsem na yu inap wet long bung gen wantaim famili bilong yu i dai pinis long nupela taim God bai kamapim.—Mak 5:35, 41, 42; Aposel 9:36-41.
3. (a) Long wanem ol rot kirap bek em i bikpela samting bilong kamapim laik bilong Jehova? (b) Long wanem taim bilip long kirap bek i strongim tru yumi?
3 Ol man i dai pinis ol bai kirap bek, olsem na i no gat as na yumi mas pret nogut tru long i dai. Jehova inap larim Satan long mekim olgeta samting em i laik mekim bilong soim olsem tok em i sutim long Jehova em i tru, tasol Jehova i no larim ol wokman bilong em i stap gut long em i bagarap olgeta. Dispela tok Satan i sutim i olsem: “Sapos wanpela man i laik i stap gut, em inap givim olgeta samting bilong en bilong baim bek laip bilong en.” ( Jop 2:4) Jisas i stap gut long God i go inap long em i dai, olsem na God i kirapim em bek na em i kisim laip long heven. Long dispela rot Jisas inap kamapim gutpela ofa bilong em long ai bilong sia king bilong Papa long heven, em dispela ofa i givim laip long yumi. Long rot bilong kirap bek, ol man bilong “liklik lain,” em ol man i mekim wok king wantaim Krais, ol inap wet long i stap wantaim em long Kingdom bilong heven. (Luk 12:32) Ol narapela manmeri bai kirap bek na ol i gat rot long kisim laip oltaim long Paradais long graun. (Song 37:11, 29) Olgeta Kristen i ting bilip long kirap bek em i “bikpela” samting bilong strongim ol taim ol traim i painim ol, olsem ol birua i laik kilim ol i dai.—2 Korin 4:7.
Wanpela As Tok Bilong Bilip Kristen
4. (a) Olsem wanem bilip long kirap bek em i “skul yumi save kisim pastaim long tok bilong Krais”? (b) Planti manmeri bilong graun i gat wanem tingting long kirap bek?
4 Olsem Hibru 6:1, 2 i kamapim, tok bilong kirap bek em i “skul yumi save kisim pastaim long tok bilong Krais.” Em i wanpela as bilong bilip i helpim yumi long kamap strongpela Kristen. (1 Korin 15:16-19) Tasol planti manmeri bilong dispela graun i no klia long tok bilong Baibel long kirap bek. Ol i no save tingim ol samting bilong spirit, olsem na planti manmeri moa i ting dispela laip bilong nau tasol em i laip tru. Dispela i mekim na ol i save painim ol amamas tasol. Na i gat ol manmeri i bihainim ol lotu bilong tumbuna—insait long ol lotu bilong Kristendom na long ol narapela lotu—ol i ting ol i gat wanpela samting i no save dai taim bodi i dai, olsem soul o spirit. Tasol dispela bilip i no stret wantaim tok bilong Baibel long kirap bek, long wanem, sapos insait long man i gat wanpela soul o spirit i no save dai, i no gat as na ol man i mas kirap bek. Sapos yumi traim long bungim dispela tupela bilip, em bai paulim yumi na i no helpim yumi long wet long gutpela samting bai kamap bihain. Olsem wanem yumi ken helpim ol man i gat gutpela bel em ol i gat laik long save long tok i tru?
5. (a) Paslain long man inap pilim ol samting bilong kirap bek, em i mas save long wanem samting? (b) Bai yu mekim wok long wanem ol skripsa bilong soim ol samting i painim man taim em i dai? na i stap bilong ol man i dai pinis? (c) Yumi ken mekim wanem sapos wanpela man i mekim wok long Baibel i no kamapim klia tok i tru?
5 Paslain long ol man inap pilim ol gutpela samting bilong kirap bek, ol i mas i gat stretpela save long ol samting i painim man taim em i dai na long i stap bilong ol man i dai pinis. Planti taim sampela skripsa tasol inap kliaim tingting bilong man i gat laik long save long tok i tru bilong Baibel. (Saveman 9:5, 10; Song 146:3, 4) Tasol sampela Baibel bilong nau i no kamapim klia tok i tru long ol samting i painim ol man i dai pinis. Olsem na ating yumi mas skelim ol tok ol i bin raitim Baibel long en long bipo.
6. Olsem wanem yu ken helpim man long save olsem soul em i wanem samting?
6 Baibel New World Translation i helpim yumi long mekim olsem, long wanem, olgeta hap we tok Hibru neʹphesh na tok Grik psy·khe i stap em i tanim olsem “soul.” Long pinis bilong dispela Baibel i gat lista long planti skripsa i kamapim dispela tupela tok. Planti narapela Baibel (planti Baibel long tok Inglis) taim ol i tanim dispela tupela tok ol i no save tanim olsem soul tasol, nogat; ol i tanim tu olsem “samting i gat laip,” “man,” na “laip,” na ol i tanim “neʹphesh bilong mi” olsem “mi” na “neʹphesh bilong yu” olsem “yu.” Pasin bilong skelim ol narapela Baibel wantaim Baibel New World Translation bai helpim sumatin i gat gutpela bel long save olsem long tok Hibru na tok Grik dispela tok ol i tanim olsem “soul” i makim ol manmeri na ol animal. Tasol ol dispela tok i no makim olsem soul em i wanpela samting yumi no inap lukim o holim, olsem samting i lusim bodi taim man i dai na i stap laip long narapela hap, nogat.
7. Bai yu kamapim wanem ol tok bilong Baibel bilong stori long i stap bilong ol man long Sheol? long Hades? long Gehenna?
7 Baibel New World Translation i yusim tok “Sheol” olgeta taim bilong tanim tok Hibru sheʼohlʹ na em i tanim tok Grik haiʹdes olsem “Hades” na tok Grik geʹen·na olsem “Gehenna.” Long Song 16:10, Buk Baibel i tanim tok Hibru sheʼohlʹ olsem “ples bilong ol man i dai pinis” na long Aposel 2:27 em i tanim tok Grik haiʹdes tu olsem “ples bilong ol man i dai pinis.” Olsem na yumi ken save mining bilong tok Sheol i wankain olsem bilong tok Hades. Baibel i kamapim klia olsem tok Sheol na Hades i makim matmat na em i samting bilong i dai, em i no samting bilong laip. (Song 89:48; KTH 20:13)a Baibel i kamapim klia tu olsem ol man inap lusim matmat long rot bilong kirap bek. ( Jop 14:13; Aposel 2:31) Dispela tok geʹen·na em Buk Baibel i tanim olsem hel o paia bilong hel, i no makim wanpela ples we ol man nogut bai kisim pen long en bihain long ol i dai. Nogat. Em i tok piksa na i makim olsem ol bai pinis olgeta. Ol man i stap long Sheol na Hades ol inap kisim laip bihain, tasol ol man i go long Gehenna ol i no inap i stap laip gen, na Baibel i no tok soul (planti Baibel long tok Inglis) o spirit (Buk Baibel ) bai i stap long dispela hap.—Matyu 10:28.
8. Olsem wanem stretpela save long kirap bek inap stiaim tingting na pasin bilong man?
8 Orait taim yu stretim pinis tingting bilong man long ol dispela samting, nau em inap save olsem wanem kirap bek inap helpim em. Na em inap kirap pilim tru pasin bilong Jehova long laikim tru ol man na stretim rot bilong kirapim bek ol. Ol man i bel hevi long wanpela bilong famili i dai pinis, ol i ken wetim taim bilong bung gen wantaim ol long nupela taim God bai kamapim, na dispela gutpela samting inap daunim bel hevi bilong ol. Taim yumi klia gut long ol dispela samting, em i helpim yumi long save long ol samting i dai bilong Krais i makim. Ol Kristen bilong pastaim i save kirap bek bilong Jisas Krais em i as bilong bilip Kristen, em i opim rot bilong ol narapela man i ken kirap bek. Ol i givim bel long tokim ol man long Jisas i kirap bek pinis, na ol gutpela samting ol man inap wet long kisim long rot bilong en. Na olsem tasol long nau tu, ol man i bilip long kirap bek ol i wok strong long autim dispela gutpela tok i tru long ol narapela man.—Aposel 5:30-32; 10:42, 43.
Mekim Wok Long ‘Ki Bilong Ples Bilong Ol Daiman’
9. Pastaim Jisas i mekim wanem wok long “ki bilong Dai na bilong Ples bilong ol man i dai pinis [“Hades,” “NW” ]”?
9 Olgeta manmeri husat bai wok wantaim Krais long Kingdom bilong heven, ol i mas i dai. Tasol ol i save gut long tok promis em i bin mekim: “Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis [“Hades,” “NW” ].” (KTH 1:18) Wanem mining bilong dispela tok? Em i stori long samting i bin painim em yet. Em tu i dai. Tasol God i no lusim em long ples bilong ol man i dai pinis (Hades). Long de namba tri, Jehova yet i kirapim em bek olsem spirit na givim laip i stap oltaim na i no inap i dai moa. (Aposel 2:32, 33; 10:40) Na tu, God i givim “ki bilong Dai na bilong Ples bilong ol man i dai pinis [“Hades,” “NW”]” long em bilong helpim ol narapela man long lusim matmat na lusim ol samting nogut sin bilong Adam i bin kamapim. Jisas i holim ol dispela ki, olsem na em inap kirapim bek ol disaipel i stap gut long em. Pastaim em i kirapim bek ol Kristen God i bin makim, em ol i bilong kongrigesen bilong em na ol bai kisim laip oltaim long heven na i no inap i dai moa, em dispela kain laip Papa bilong em i bin givim long em.—Rom 6:5; Filipai 3:20, 21.
10. Ol Kristen God i bin makim na ol i stap gut long em, ol bai kirap bek long wanem taim?
10 Ol dispela Kristen God i bin makim na ol i stap gut long God, ol bai kirap bek long wanem taim? Tok Baibel i mekim i soim olsem dispela kirap bek i kirap pinis. Aposel Pol i tok ol bai kirap bek taim Krais “i kam bek,” na em i kam bek na i stap pinis kirap long yia 1914. (1 Korin 15:23) Taim ol Kristen God i bin makim ol i dai nau long taim Krais i kam i stap pinis, ol i no ken wet long matmat. Taim ol i dai, “wantu tasol” ol i kirap bek olsem spirit, na ol i “senis na i kamap narakain.” Na ol i amamas tru, long wanem, “gutpela pasin ol i bin mekim, em i go wantaim ol”!—1 Korin 15:51, 52; KTH 14:13.
11. Planti manmeri bai kirap bek we? Wanem taim dispela samting bai kamap?
11 I no dispela lain tasol bilong mekim wok long Kingdom bilong heven ol bai kirap bek. Kamapim Tok Hait 20:6 i tok dispela lain i kirap bek long “namba wan taim,” olsem na i mas i gat namba tu kirap bek. Ol man i kirap bek long bihain, ol bai inap i stap oltaim long Paradais long graun. Wanem taim dispela samting bai kamap? Buk Kamapim Tok Hait i tok, dispela samting bai kamap bihain long “graun wantaim skai”—olsem pasin nogut bilong nau wantaim ol gavman—i pinis. Pinis bilong pasin nogut bilong nau i klostu tru. Bihain, long taim God i makim, ol manmeri bilong kisim laip long graun ol bai kirap bek.—KTH 20:11, 12.
12. Husat sampela bai kirap bek long graun? Bilong wanem yumi ken amamas long dispela samting?
12 Husat bai i kirap bek long graun? Ol gutpela wokboi bilong Jehova bilong bipo, em ol man na meri i bilip strong long kirap bek, olsem na “ol i sakim tok bilong ol birua.” Ol i no inap lusim pasin bilong stap gut long God na bai ol birua i no ken mekim nogut long ol na kilim ol i dai. Nogat. Baibel i stori liklik tasol long ol dispela manmeri, olsem na bai yumi amamas tru long kisim save long ol na harim tok long maus bilong ol yet long ol samting i bin painim ol! Abel bai kirap bek na kisim laip long graun, em namba wan witnes bilong Jehova. Enok na Noa, em ol man i no pret long autim tok bilong God paslain long Bikpela Tait; Abraham na Sara, em ol i bin mekim gut long ol ensel; Moses em God i givim Lo long rot bilong em long maunten Sainai; ol profet i gat strongpela bel olsem Jeremaia, em i lukim Jerusalem i bagarap long 607 B.C.E.; na Jon Bilong Baptais, em i bin harim maus bilong God yet i tokaut long Jisas em i Pikinini bilong Em. Na planti gutpela man na meri i bin stap gut long God em ol i dai nau long taim bilong las de, ol tu bai kirap bek.—Hibru 11:4-38; Matyu 11:11.
13, 14. (a) Wanem samting bai painim Ples bilong ol man i dai pinis na ol daiman i stap long en? (b) Husat ol bai kirap bek? Bilong wanem ol i kirap bek?
13 Ol wokman bilong God i stap gut long em, i no ol tasol bai kirap bek. Bihain, sampela moa bai kirap bek, na bai i no gat wanpela man i stap moa long matmat. Planti manmeri tru bai lusim matmat taim Jisas i mekim wok long ‘ki bilong ples bilong ol daiman [“Hades,” “NW” ]’ bilong helpim ol man. Jon i lukim samting olsem driman na em i lukim ol i ‘tromoi Ples bilong ol man i dai pinis [“Hades,” “NW” ] i go daun long bikpela hul i gat paia.’ (KTH 20:14) Wanem mining bilong dispela tok? Mining bilong en i olsem: Ples bilong ol man i dai pinis, olsem matmat, bai pinis. Em bai no stap moa, long wanem, Jisas bai kirapim bek ol man i lotuim Jehova na i stap gut long em, na tu, em bai kirapim bek ol man nogut. Baibel i tok: “God bai i kirapim bek ol man i dai pinis, em ol stretpela man na ol man nogut wantaim.”—Aposel 24:15.
14 Tasol God i no kirapim bek ol man nogut bilong ol i mas kot na i dai gen. Nogat. Bai ol i stap long taim bilong stretpela pasin aninit long Kingdom bilong God, na bai i gat ol man i helpim ol long stretim pasin bilong ol na bai ol i bihainim ol pasin bilong Jehova. Jon i lukim “buk bilong laip” i op, olsem na ol inap mekim ol samting na bai God i ken raitim nem bilong ol long dispela buk. Em bai i skelim “pasin olgeta wan wan man i bin mekim” bihain long ol i kirap bek pinis. (KTH 20:12, 13) Olsem na ol inap “kirap bek na i stap laip,” na i no olsem ol i mas kirap bek bilong “kamap long kot” na kisim strafe.—Jon 5:28, 29.
15. (a) Husat i no inap kirap bek? (b) Yumi save long tok i tru bilong kirap bek na dispela i mas mekim wanem long yumi?
15 Tasol i no olsem olgeta manmeri i dai pinis ol bai kirap bek, nogat. Sampela i bin mekim rong em God i no inap lusim. Ol dispela manmeri i no stap long ples bilong ol man i dai pinis (Hades), ol i stap long Gehenna, olsem ol i pinis olgeta. Ol man i bagarap long taim bilong “bikpela hevi tru” i klostu pinis, ol tu bai lus olgeta. (Matyu 12:31, 32; 23:33; 24:21, 22; 25:41, 46; 2 Tesalonaika 1:6-9) Olsem na maski God i mekim bikpela pasin marimari na kirapim bek olgeta manmeri i stap long Hades, dispela i no makim olsem yumi ken mekim nabaut na bihainim kain kain pasin long nau. Ol man i bikhet na sakim wok king bilong Jehova, ol i no inap kirap bek. Dispela i mas kirapim yumi long kamapim klia olsem yumi pilim tru gutpela pasin bilong God na yumi bihainim laik bilong em.
Bilip Long Kirap Bek i Strongim Ol
16. Olsem wanem bilip bilong kirap bek inap strongim tru yumi?
16 Yumi ol manmeri i bilip tru long kirap bek, dispela bilip inap strongim yumi tru. Long nau, taim yumi go lapun, yumi save yumi no inap abrusim i dai, maski i gat ol gutpela marasin samting. (Saveman 8:8) Tasol sapos yumi bin stap gut long wok bilong Jehova na oganaisesen bilong em, yumi inap wet long kisim ol gutpela samting long bihain. Yumi save olsem long rot bilong kirap bek, yumi ken i stap laip gen, long taim God i makim. Na bai yumi kisim “laip tru,” olsem aposel Pol i tok!—1 Timoti 6:19; Hibru 6:10-12.
17. Wanem samting inap helpim yumi long i stap gut long Jehova?
17 Yumi save olsem ol man i dai pinis ol bai kirap bek, na yumi save long dispela Man em i as bilong dispela gutpela samting, olsem na yumi inap sanap strong long bilip. Dispela i strongim yumi long i stap gut long God, maski ol birua i tok ol bai kilim yumi i dai. Inap longpela taim Satan i bin mekim wok long dispela pret bilong i dai bilong holimpas ol man, olsem kalabusim ol. Tasol Jisas i no bin pret long i dai. Em i stap gut long Jehova i go inap long taim em i dai. Long rot bilong ofa bilong em bilong baim bek ol man, Jisas i opim rot long ol narapela i ken lusim pasin bilong pret long i dai.—Hibru 2:14, 15.
18. Wanem samting i bin helpim ol wokman bilong Jehova long sanap strong tru?
18 Ol wokman bilong Jehova i bilip long ofa bilong Krais na long kirap bek, olsem na ol i bin sanap strong tru. Taim ol man i mekim nogut long ol, ol i kamapim klia olsem “ol i no bin laikim tumas laip bilong ol yet”—ol i laikim tumas Jehova. (KTH 12:11) Ol i bihainim gutpela tingting na ol i no lusim ol stiatok Kristen bilong lukautim laip bilong ol long nau. (Luk 9:24, 25) Ol i save olsem sapos laip bilong ol long nau i lus, long wanem, ol i daun long wok king bilong Jehova, em bai mekim gut long ol na kirapim bek ol. Yu gat kain strongpela bilip olsem? Sapos yu laikim tumas Jehova na tingim gut tok promis bilong kirap bek, bai yu gat kain strongpela bilip olsem.
[Futnot]
a Long Song 89:48 Buk Baibel i tanim tok Hibru sheʼohlʹ olsem “matmat” na long KTH 20:13 Buk Baibel i tanim tok Grik haiʹdes olsem “ples bilong ol man i dai pinis.”
Stori Gen Long Ol Dispela Tok
• Bilong wanem man i mas save long soul o spirit na long i stap bilong ol man i dai pinis na bai em i ken klia gut long kirap bek?
• Husat bai kirap bek? Taim yumi save long dispela samting, dispela i mas mekim wanem long yumi?
• Pasin bilong bilip long kirap bek i strongim yumi olsem wanem?
[Piksa long pes 84, 85]
Jehova i tok promis olsem ol stretpela man na ol man nogut bai kirap bek