Sapta 13
Bikpela Lain i Sanap Long Ai Bilong Sia King Bilong Jehova
1. (a) Paslain long ol i kisim pe, wanem samting i mas painim ol wokboi bilong God i bin stap paslain long taim bilong Krais na lain 144,000? (b) Dispela bikpela lain i stap long nau, wanem samting inap painim ol?
OL GUTPELA wokboi bilong Jehova, kirap long Abel i go inap long Jon Bilong Baptais, ol i bin putim pasin bilong mekim laik bilong God i stap namba wan samting long laip bilong ol. Tasol taim ol dispela man i laik i dai, ol i save ol i mas wet long kirap bek long nupela taim God bai kamapim long graun. Lain 144,000 em ol bai wok king wantaim Krais long Kingdom bilong God long heven, ol tu i mas i dai pastaim na bihain ol i ken kisim pe bilong ol. Tasol Kamapim Tok Hait 7:9 i soim olsem long taim bilong las de, bai i gat “planti manmeri tru” o bikpela lain manmeri i kam long olgeta lain em ol i no ken i dai, tasol ol inap i stap oltaim long graun. Olsem wanem? Yu wanpela bilong ol?
Luksave Long Bikpela Lain
2. Ol i kisim wanem save i kamapim klia olsem bikpela lain bilong Kamapim Tok Hait 7:9 ol i husat?
2 Long 1923, ol wokboi bilong Jehova i luksave olsem “ol sipsip” long stori bilong Jisas long Matyu 25:31-46 na ol “arapela sipsip” em Jisas i tok long en long Jon 10:16, em ol manmeri inap i stap oltaim long graun. Long 1931 ol i kisim save olsem ol man i kisim mak long pes bilong ol, em Esekiel 9:1-11 i stori long en, ol tu i makim ol manmeri em ol inap kisim laip long graun. Long 1935, ol i kisim save olsem bikpela lain manmeri em hap bilong lain arapela sipsip em Jisas i bin tok long en. Long nau planti milion manmeri i kam insait long dispela bikpela lain em God i orait long ol.
3. Bilong wanem dispela tok ol i “sanap i stap long pes bilong sia king,” i no makim wanpela lain bilong i go long heven?
3 Long Kamapim Tok Hait 7:9, bikpela lain manmeri i no stap long heven. Ol i “sanap i stap long pes bilong sia king” bilong God, tasol i no olsem ol i mas i stap long heven. Ol i sanap tasol long ai bilong God na em inap lukim ol. (Song 11:4) Bikpela lain manmeri em ‘man i no inap kaunim namba bilong ol,’ i no bilong i stap long heven, long wanem, Baibel i no kolim namba bilong ol olsem em i kolim namba tru bilong lain bilong i stap long heven long Kamapim Tok Hait 7:4-8 na 14:1-4. Ol dispela ves i kolim namba bilong ol man God i kisim long graun bilong i stap long heven em 144,000.
4. (a) Wanem dispela “bikpela hevi tru” em bikpela lain bai i winim? (b) Husat i lukim dispela bikpela lain na i lotu wantaim ol, olsem Kamapim Tok Hait 7:11, 12 i tok?
4 Long Kamapim Tok Hait 7:14, Baibel New World Translation i tok dispela bikpela lain ol i bin “winim taim bilong bikpela hevi tru.” Ol i winim bikpela hevi nogut tru, i no gat kain hevi olsem i bin painim ol man long bipo. (Matyu 24:21) Taim ol i tenkyu long God na Krais i bin kisim bek ol, long dispela taim olgeta gutpela ensel long heven bai i singaut wantaim ol na i tok: “I tru. Yumi amamas moa yet long God bilong yumi, na yumi tokaut long biknem bilong em. Em i gat olgeta gutpela tingting, na yumi givim tenkyu long em, na litimapim nem bilong em. Em i gat strong tru. . . . Oltaim oltaim dispela olgeta samting ol i bilong God tasol. I tru.”—KTH 7:11, 12.
Ol Samting Ol i Mas Mekim Bilong Abrusim Bagarap
5. Olsem wanem yumi inap save long ol samting yumi mas mekim na bai yumi ken insait long bikpela lain?
5 Jehova i bihainim ol stretpela lo bilong em, olsem na em i lukautim dispela bikpela lain na ol i no bagarap long taim bilong bikpela hevi tru. Baibel i kamapim klia pasin bilong ol man husat bai abrusim bagarap. Olsem na ol manmeri i laikim tumas stretpela pasin ol inap mekim ol samting long nau na bai ol i no ken bagarap. Ol i mas mekim wanem?
6. Bilong wanem i stret Baibel i tok dispela bikpela lain manmeri ol i olsem ol sipsip?
6 Ol sipsip i gat pasin isi na pasin bilong bihainim tok. Olsem na taim Jisas i tok em i gat ol arapela sipsip i no bilong lain i go long heven, em i tok long ol man husat i laik i stap oltaim long graun, na tu, ol i laik bihainim ol tok bilong em. “Ol sipsip bilong mi i save harim maus bilong mi, na mi save long ol, na ol i bihainim mi.” ( Jon 10:16, 27) Em ol manmeri i harim na bihainim tru tok bilong Jisas, ol i kamap disaipel bilong em.
7. Ol disaipel bilong Jisas i mas kamapim wanem ol pasin?
7 Olgeta wan wan disaipel bilong Jisas i mas kamapim wanem ol narapela pasin? Baibel i bekim: “Yupela i mas rausim dispela olpela pasin na tingting bilong yupela i mas kamap nupela. Yupela i mas kamap ol nupela manmeri, em ol manmeri God i mekim ol i kamap nupela . . . , long wanem, pasin bilong ol i stretpela olgeta na i holi tru.” (Efesus 4:22–24) Ol i kamapim ol pasin i helpim ol wokman bilong God long stap wanbel wantaim—‘pasin bilong laikim tru ol arapela, amamas, stap bel isi, no ken belhat kwik, helpim ol man, mekim gutpela pasin long ol, wokabaut stret oltaim, stap isi, na daunim laik bilong olpela bel.’—Galesia 5:22, 23.
8. Wanem samting bai painim bikpela lain taim ol i helpim lain remnan?
8 Bikpela lain i helpim liklik lain i bilong i go long heven, em ol i go pas long mekim wok autim tok. (Matyu 24:14; 25:40) Ol arapela sipsip i givim dispela helpim, maski ol i save ol man bai birua long ol. Ol i birua long ol, long wanem, long kirap bilong taim bilong las de, Krais Jisas na ol ensel bilong em i bin rausim Satan na ol spirit nogut long heven. Dispela i kamapim ‘bikpela hevi long graun, long wanem, Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.’ (KTH 12:7–12) Olsem na taim pinis bilong pasin nogut bilong dispela graun i wok long kam klostu, Satan i birua moa yet long ol wokman bilong God.
9. Wok bilong ol wokman bilong God long autim gutnius i go bikpela olsem wanem? Bilong wanem i olsem?
9 Maski ol man i birua tru long ol, wok autim tok i wok long i go bikpela. Long pinis bilong Namba Wan Pait, namba bilong ol man i autim tok bilong Kingdom em sampela tausen tasol. Tasol nau i gat planti milion, long wanem, Jehova i tok promis: “I no gat wanpela bilong ol dispela samting bilong pait inap bagarapim yu.” (Aisaia 54:17) Wanpela hetman bilong kaunsil bilong ol Juda long taim bilong ol aposel i luksave olsem ol man i no inap daunim wok bilong God. Taim em i stori long ol disaipel em i tokim ol Farisi olsem: “Yupela i mas larim ol i stap. Sapos dispela wok ol i mekim em i kirap long tingting bilong ol man tasol, orait em bai i bagarap. Tasol sapos God yet i kirapim dispela wok, orait yupela bai i no inap pasim ol. Nogut yupela i pait long God!”—Aposel 5:38, 39.
10. (a) Dispela “mak” em bikpela lain manmeri i kisim i makim wanem samting? (b) Olsem wanem ol wokman bilong God i bihainim ‘maus i kamap long heven’?
10 Baibel i tok bikpela lain manmeri i kisim mak bilong abrusim bagarap. (Esekiel 9:4-6) Dispela “mak” i soim olsem ol i dediket pinis long Jehova, ol i kisim baptais olsem ol disaipel bilong Jisas, na ol i wok long kamapim ol pasin bilong Krais. Ol i bihainim ‘maus i kamap long heven’ em dispela maus i tok long olgeta lotu giaman Satan i bosim: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.”—KTH 18:1-5.
11. Wanem bikpela samting ol man bilong bikpela lain i save mekim na dispela i kamapim klia olsem ol i wokman bilong Jehova?
11 Na tu, Jisas i tokim ol disaipel: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” ( Jon 13:35) Tasol ol man bilong ol lotu bilong dispela graun ol i save kilim i dai narapela narapela long taim bilong woa, na planti taim ol i mekim olsem, long wanem, narapela man i bilong narapela lain tasol! Baibel i tok: “Sapos yumi laik save husat em i pikinini bilong God, na husat em i pikinini bilong Satan, orait yumi ken save olsem, man i no mekim stretpela pasin, em i no bilong God. Na man i no save laikim tru ol arapela pikinini bilong God, em tu i no bilong God. . . . Yumi no ken i stap olsem Kein. Em i man bilong Satan, na em i kilim i dai brata bilong en.”—1 Jon 3:10-12.
12. Long taim bilong bikpela hevi tru, Jehova bai mekim wanem long ol lotu i olsem “diwai” i save kamapim kaikai nogut?
12 Jisas i tok: “Olgeta gutpela diwai i save karim gutpela kaikai. Na diwai nogut i save karim kaikai nogut. Gutpela diwai em i no inap karim kaikai nogut. Na diwai nogut em i no inap karim gutpela kaikai. Olgeta diwai i no save karim gutpela kaikai, em ol i save katim na tromoi i go long paia. Olsem na yupela i mas lukim pasin bilong ol yet na bai yupela i save long ol giaman profet.” (Matyu 7:17-20) Pasin bilong ol lotu bilong dispela graun i soim olsem ol i “diwai” nogut, na klostu nau Jehova bai i bagarapim ol long taim bilong bikpela hevi tru.—KTH 17:16.
13. Olsem wanem bikpela lain i soim olsem ol i wanbel na sanap “long pes bilong sia king” bilong Jehova?
13 Kamapim Tok Hait 7:9-15 i stori long ol samting ol bikpela lain i mekim na bai ol i no ken bagarap. Ol i stap wanbel na sanap “long pes bilong sia king” bilong Jehova, na ol i daun long em olsem king bilong heven na graun. Ol i bin “wasim ol klos bilong ol long blut bilong Pikinini Sipsip, na ol klos i kamap waitpela,” dispela i makim olsem ol i save ofa bilong Jisas i rausim sin bilong ol. ( Jon 1:29) Ol i dediket long God na ol i kisim baptais long wara bilong soim olsem ol i dediket pinis. Olsem na ol i stap klin long ai bilong God, ol waitpela klos bilong ol i makim dispela, na ol i mekim wok bilong em “long san na long nait.” Olsem wanem? I gat ol samting yu ken mekim na bai laip bilong yu i stret moa wantaim ol dispela tok?
Ol Gutpela Samting Yu Kisim Long Nau
14. Wanem sampela gutpela samting i painim ol wokman bilong Jehova long nau?
14 Ating yu bin lukim ol gutpela samting i painim ol man i mekim wok bilong Jehova long nau. Olsem: Taim yu kisim save long ol gutpela samting Jehova i tingting pinis long mekim, yu save olsem yu inap wet long kisim ol gutpela samting tru long bihain. Olsem na nau laip bilong yu i gat as tru bilong en—em bilong lotu long God tru na wet long kisim laip oltaim long Paradais long graun. Yes, King Krais Jisas “bai i bringim ol [bikpela lain] i go long ol hul i gat wara i kamap, em wara bilong givim laip.”—KTH 7:17.
15. Wanem gutpela samting i bin painim ol Witnes Bilong Jehova taim ol i bihainim ol stiatok bilong Baibel long wok politik na stretpela pasin?
15 Wanpela gutpela samting bikpela lain i kisim long nau em pasin bilong laikim tru ol arapela, na pasin bilong i stap wanbel, em dispela samting i stap namel long ol wokman bilong Jehova long olgeta hap. Yumi olgeta i kisim wankain kaikai bilong spirit, olsem na yumi olgeta i bihainim ol wankain lo na stiatok i stap long Baibel. Long dispela as wok politik na tingting bilong ol lain man i no brukim yumi. Na tu, yumi bihainim ol stretpela pasin em God i laik bai lain bilong em i mas bihainim. (1 Korin 6:9-11) Lain bilong Jehova i stap long paradais bilong spirit, ol i no pait, bruk bruk, na mekim pasin pamuk, em planti man bilong graun i save mekim. Lukim olsem wanem Aisaia 65:13, 14 i stori long dispela.
16. Maski ol hevi bilong nau i save painim ol manmeri bilong bikpela lain, ol i wet long wanem gutpela samting bai i kamap?
16 Tru, ol wokman bilong Jehova hia long graun i no gutpela olgeta. Na ol i save kisim ol hevi ol narapela manmeri tu i save kisim, olsem taim nogut i painim ol o ol i kisim bagarap long woa. Ol i kisim sik, karim pen, na ol i dai. Tasol ol i bilip olsem long nupela taim, God “bai mekim drai wara i stap long ai bilong olgeta bilong ol. Na ol manmeri bai i no dai moa, na ol bai i no bel hevi moa na krai moa, na ol bai i no inap kisim pen gen.”—KTH 21:4.
17. Maski wanem samting i painim yumi long nau, wanem gutpela samting bai painim ol man i lotu long trupela God?
17 Maski yu lusim laip bilong yu long nau, long wanem, yu lapun, yu gat sik, eksiden i painim yu, o ol man i birua long yu, Jehova bai kirapim yu bek na bai yu kisim laip long Paradais. (Aposel 24:15) Bai yu wok long kisim yet ol gutpela samting bilong spirit long Taim Bilong Wan Tausen Yia Krais i Stap King. Pasin bilong yu long laikim tru God bai kamap strong moa taim yu lukim ol samting em i tingting pinis long mekim i kamap. Na ol gutpela samting bilong skin Jehova bai givim long yu bai mekim na yu laikim em moa yet. (Aisaia 25:6-9) Gutpela samting tru bai painim lain bilong God long bihain!
Stori Gen Long Ol Dispela Tok
• Taim Baibel i stori long bikpela lain em i stori long wanem bikpela samting tru bai kamap?
• Sapos yumi laik tru long insait long dispela bikpela lain em God i orait long ol, nau yumi mas mekim wanem?
• Ol blesing em bikpela lain i kisim nau na ol blesing ol bai kisim long nupela taim God bai kamapim, ol i bikpela samting olsem wanem long yu?
[Piksa long pes 123]
Planti milion bilong bikpela lain manmeri i wanbel long lotuim God tru