Buk Bilong Baibel Namba 31—Obadia

Man Bilong Raitim: Obadia

Raitim Pinis: 607 B.C.E. samting

 1. Wanem samting i makim olsem tok bilong profet i bikpela samting, na profet yet nogat?

BUK Obadia i gat 21 ves tasol; em i sotpela buk tru, winim ol narapela long Ol Skripsa Hibru. Obadia i tok profet olsem God bai mekim save long wanpela lain na bai ol i pinis olgeta, na em i tok profet tu olsem bihain Kingdom bilong God bai win tru. Namba wan tok bilong buk em liklik tok tasol, olsem: “God, Bikpela i givim dispela tok long Obadia.” Buk i no stori long Obadia i kamap long wanem taim o ples, o long wanem lain, o ol samting em i bin mekim. Dispela i makim klia olsem profet yet i no bikpela samting; tok em i autim em bikpela samting, na dispela i stret, long wanem, olsem Obadia yet i tok, “em tok bilong ol samting God i laik mekim.”

 2. Obadia i mekim planti tok profet long wanem kantri? I gat wanem as na lain bilong dispela kantri ol i no pret?

² Buk i mekim bikpela tok long kantri Idom. Graun bilong ol Idom i kirap long hap saut bilong raunwara Detsi na i bihainim ples daun bilong wara Jordan; narapela nem bilong dispela kantri em Seir. Em ples maunten na i gat ol ples nogut olsem ol baret i go daun moa namel long ol maunten. Sampela maunten long hap is bilong ples daun bilong wara Jordan ol i go antap inap 1,700 mita. Ol manmeri long distrik Teman i gat nem olsem ol man i gat gutpela tingting na save na man i gat strongpela bel. Ol Idom i sindaun long ol ples maunten, olsem na ol i no pret; ol i hambak na ting ol birua i no inap daunim ol.a

 3. Ol Idom i mekim gut long ol Israel, olsem brata bilong ol, o olsem wanem?

³ Ol Idom i lain bilong Iso, em brata bilong Jekop. Narapela nem bilong Jekop, em Israel, olsem na ol Idom na ol Israel i “wanblut.” (Lo 23:⁠7) Ol Idom i olsem brata bilong ol Israel, tasol ol i no mekim gut long ol. Klostu long taim bilong go insait long Graun Bilong Promis, ol Israel i kamkamap long kantri Idom na Moses i salim tok long king na askim em long larim ol i wokabaut long kantri bilong em. Tasol king i tambuim ol na ol Idom i kisim planti soldia i kam bilong pait long ol. (Nam. 20:​14-21) Bihain Devit i daunim ol, tasol long taim bilong King Jehosafat ol i bung wantaim ol Amon na Moap na pait long ol Juda. Na taim Jehoram, pikinini bilong Jehosafat, i stap king, ol Idom i bikhet na i no aninit moa long em, na ol i kisim ol Israel bilong Gasa na Tair i go kalabus. Long taim bilong King Ahas ol i pait long ol Juda na kisim sampela moa i go kalabus.​—⁠2 Sto. 20:​1, 2, 22, 23; 2 Kin. 8:​20-22; Amo. 1:​6, 9; 2 Sto. 28:⁠17.

 4. (a) Ol Idom i bin mekim wanem pasin nogut na long dispela as Obadia i tokaut long strafe bai painim ol? (b) Wanem samting i makim olsem Obadia i raitim buk long 607 B.C.E. samting?

⁴ Dispela pasin birua i kamap strong long 607 B.C.E. long taim ol Babilon i daunim Jerusalem. Ol Idom i amamas long dispela na ol i wok long kirapim ol Babilon long bagarapim tru Jerusalem. Ol i tok: “Brukim olgeta haus samting bilong Jerusalem na bagarapim olgeta.” (Sng. 137:⁠7) Taim ol birua i tilim ol gutpela samting ol i kisim long pait, ol Idom i kisim sampela; na taim ol Juda i laik ranawe, ol Idom i pasim rot na holim ol na givim ol long ol birua. Ol dispela pasin nogut ol Idom i mekim taim Jerusalem i bagarap em i as bilong dispela tok bilong strafe em buk bilong Obadia i kolim, na ating Obadia i bin raitim taim em i tingim klia yet dispela pasin nogut tru ol i bin mekim. (Oba. 11, 14) Jerusalem i bagarap na 5-pela yia bihain Nebukatnesar i kisim kantri Idom na mumutim olgeta samting bilong ol, olsem na yumi save Obadia i bin raitim buk bilong em paslain long dispela; planti man i ting em i raitim long 607 B.C.E.

 5. (a) Wanem samting i makim olsem tok bilong Obadia i stret na i tru? (b) Wanem ol samting i makim olsem Obadia em i profet tru? Olsem wanem nem bilong em i stret long em?

⁵ Olgeta tok profet Obadia i bin mekim long ol Idom i kamap tru! Klostu long pinis bilong buk, tok profet i tok: “Bai ol i pinisim ol lain bilong Iso olsem paia i kukim kunai i drai. Na i no gat wanpela man long lain bilong Iso bai i stap. Mi Bikpela, mi tok pinis.” (Ves 18) Ol Idom i pait long bainat, na bainat i bagarapim ol, na lain bilong ol i pinis olgeta. Olsem na tok bilong Buk Obadia i stret na i tru. Obadia em i profet tru: Em i autim tok long nem bilong Jehova; tok profet bilong em i litimapim nem bilong Jehova; ol samting i kamap bihain i kamapim klia olsem tok profet bilong em i kamap tru. Nem bilong em i stret tru long em, long wanem, insait bilong en i olsem “Wokboi bilong Jehova.”

HELPIM YUMI OLSEM WANEM?

10. Wanem sampela tok profet moa i tokaut long Idom i mas bagarap? Sapos yumi skelim ol dispela tok profet na tok profet bilong Obadia tu, dispela bai helpim yumi olsem wanem?

¹⁰ Bilong kamapim klia olsem dispela strafe i mas painim Idom, Jehova i kirapim sampela profet moa long autim wankain tok. Sampela bikpela tok profet olsem i stap long Joel 3:19; Amos 1:​11, 12; Aisaia 34:​5-7; Jeremaia 49:​7-22; Esekiel 25:​12-14; 35:​2-15. Ol tok profet ol i bin mekim paslain long Obadia ol i tokaut long ol pasin birua ol Idom i bin mekim bipo, na ol tok profet bilong bihain i tokaut long ol pasin nogut ol i mekim long taim Babilon i daunim Jerusalem, olsem Obadia i tokaut long en, em ol pasin Jehova i no inap lusim tingting long en. Sapos yumi skelim rot bilong strafe i painim ol Idom olsem Jehova i tok profet pinis, dispela bai strongim bilip bilong yumi long strong bilong Jehova long mekim tok profet. Na tu, bai yumi bilip tru olsem Jehova em i God bilong kamapim tru olgeta samting em i bin tok long mekim.​—⁠Ais. 46:​9-11.

11, 12. (a) Ol lain pastaim ol i “sindaun gut wantaim” Idom, olsem wanem ol i winim ol long pait? (b) Wanem ol samting i kamap na bihain “i no gat wanpela man long lain bilong Iso” i stap?

¹¹ Obadia i tok, “ol kantri i save poromanim” Idom na ol i “sindaun gut wantaim” Idom, ol dispela kantri yet bai winim Idom long pait. (Oba. 7) Pastaim kantri Babilon i sindaun gut wantaim Idom, tasol long 550 B.C.E. samting, King Nabonaidas i kisim ami bilong Babilon i go pait long ol Idom na daunim ol.b Tasol 100 yia bihain, ol Idom i ting ol inap kamap strong gen. Malakai 1:4 i stori olsem: “Ol Idom i tok, ‘Ol taun bilong mipela i bagarap pinis, tasol mipela bai i wokim bek gen.’ ” Tasol Jehova i tok, “Yupela i ken wok gen, tasol bai mi brukim ol na bai ol i bagarap gen.” Maski ol i laik kamap strong, long 400 B.C.E. samting ol Nabatea i kisim pinis ples. Ol Idom i lusim graun bilong ol na i go sindaun long hap saut bilong Judia; bihain ol man i kolim dispela hap olsem distrik Idumea. Ol i no kisim bek graun bilong Seir.

¹² Josifas i tok, inap 100 yia samting paslain long Krais, King Jon Hirkanus Namba 1 bilong Juda i daunim liklik lain Idom ol i stap yet, na subim ol long katim skin. Isi isi ol i kamap hap lain bilong Juda na wanpela Juda i stap namba wan gavman bilong ol. Taim ol Rom i daunim pinis Jerusalem long yia 70 C.E., nem bilong ol Idom i pinis na ol i no stap moa olsem wanpela lain.c Samting i kamap tru olsem Obadia i bin tok profet long en: “Bai [God i] bagarapim yupela olgeta na daunim nem bilong yupela. . . . Na i no gat wanpela man long lain bilong Iso bai i stap.”​—⁠Oba. 10, 18.

13. Wanem samting i painim ol Juda na i narapela kain tru long samting i painim ol Idom?

¹³ Idom i bagarap na i stap olsem, tasol ol Juda i go bek long graun bilong ol long 537 B.C.E. Serubabel i stap namba wan gavman bilong ol na ol i wokim gen tempel long Jerusalem na ol i stap gutpela gen long ples.

14. (a) Ol samting i painim Idom i mas givim wanem tingting long ol man? (b) Olgeta man i mas daunim ol yet na mekim wanem tok olsem Obadia i mekim? Bilong wanem ol i mas mekim olsem?

¹⁴ Tru tumas, pasin hambak i save mekim na man i bagarap! Ol samting nogut i bin painim Idom i mas givim tingting long olgeta man i hambak na ol i amamas long lukim hevi i painim ol wokboi bilong God. Ol i mas daunim ol yet na mekim tok wankain olsem Obadia, em i tok Jehova yet i stap king. Ol man i pait long Jehova na lain bilong em, ol bai lus na pinis olgeta. Tasol Kingdom bilong Jehova na gutpela wok king bilong em bai stap strong oltaim oltaim!​—⁠Ves 21.

[Ol Futnot]