Marit​—Presen i Kam Long God

1, 2. (a) Taim man na meri i marit nupela, sampela taim yumi inap tingting long wanem samting? Bilong wanem yumi tingting olsem? (b) Bai yumi skelim wanem ol askim long dispela sapta?

YU SAVE amamas long i go long ol weding? Planti manmeri i save amamas long i go, long wanem, ol weding i gutpela taim bilong amamas. Tupela nupela marit i luk nais tru, na pes bilong ol i lait! Long dispela de, ol i amamas tru na i luk olsem ol gutpela samting tasol bai painim ol long bihain.

² Tasol yumi mas tok stret olsem long nau i gat planti hevi insait long marit. Yumi laik bai tupela nupela marit i stap gut, tasol ating sampela taim yumi tingting: ‘Ol bai i stap amamas? Marit bilong ol bai i stap gut?’ Pasin bilong man na meri bai bekim ol dispela askim, olsem ol bai bilip long tok bilong God long marit na bihainim dispela tok o nogat. (Sindaun 3:​5, 6) Ol i mas mekim olsem bilong i stap insait yet long pasin laikim bilong God. Nau yumi ken skelim bekim Baibel i givim long 4-pela askim: Bilong wanem yu laik marit? Sapos yu laik marit, yu mas makim wanem kain poroman marit? Yu ken mekim wanem bilong redi long marit? Na wanem samting inap helpim tupela marit long i stap amamas yet insait long marit bilong ol?

 3. Bilong wanem em i no savetingting long marit sapos i no gat gutpela as bilong mekim olsem?

³ Sampela i ting ol i mas marit bambai ol i ken i stap amamas​—ol i ting ol i no inap stap belgut na amamas sapos ol i no painim poroman marit. Dispela tingting i no tru! Jisas em singelman, na em i tok pasin bilong i stap singel em i wanpela presen, na em i strongim ol man husat inap i stap singel long mekim olsem. (Matyu 19:​11, 12) Aposel Pol tu i toktok long ol blesing bilong i stap singel. (1 Korin 7:​32-38) Jisas na Pol i no kamapim wanpela lo olsem man i mas i stap singel, nogat, tok bilong “tambuim ol manmeri long ol i no ken marit” em ‘tok bilong ol spirit nogut.’ (1 Timoti 4:​1-3) Tasol ol man husat i laik mekim wok bilong Jehova na ol samting i no ken pulim nabaut tingting bilong ol, pasin bilong i stap singel i opim rot long ol inap mekim planti samting. Olsem na em i no savetingting long marit taim i no gat gutpela as bilong mekim olsem, kain olsem ol wanlain i subim yu long marit.

 4. Taim marit i stap gut, olsem wanem dispela i helpim wok bilong mekim bikpela long ol pikinini?

⁴ Tasol olsem wanem? I gat sampela gutpela as na wanpela i marit? Yes, i gat. Marit tu em i wanpela presen i kam long gutpela God bilong yumi. (Stat 2:18) Olsem na marit i gat ol gutpela samting bilong en na inap kamapim amamas. Olsem, marit i stap gut em i nambawan gutpela as bilong famili. Ol pikinini i mas i stap insait long famili we papamama i mekim bikpela long ol, laikim ol, stretim ol, na stiaim ol. (Song 127:3; Efesus 6:​1-4) Tasol wok bilong mekim bikpela long ol pikinini, dispela tasol i no as bilong marit.

5, 6. (a) Olsem Saveman 4:​9-12 i kamapim, pasin pren i kamapim wanem ol gutpela samting? (b) Olsem wanem marit i ken i stap olsem baklain i gat tripela string?

⁵ Tingim as skripsa bilong dispela sapta na ol ves i stap klostu long en: “I no gutpela long man i stap wanpis. Sapos tupela man i stap wantaim, em i gutpela. Sapos tupela man i poroman long wok, orait bai wok bilong tupela i kamap gutpela moa. Sapos wanpela i pundaun, orait narapela i ken litimapim em gen. Tasol sori tru long man i stap wanpis na i pundaun. Bai i no gat man bilong helpim em. Sapos tupela i kol, orait tupela i ken slip wantaim, na bai tupela i no kol moa. Tasol sapos wanpela tasol i stap, olsem wanem bai em inap hatim skin bilong em yet? Sapos birua i pait long wanpela man, ating birua inap winim em. Tasol sapos birua i pait long tupela man, ating em i no inap. Sapos ol i tanim tripela string na wokim baklain, orait dispela baklain i no inap bruk kwiktaim.”​—Saveman 4:​9-12.

⁶ Dispela hap bilong Baibel i stori long gutpela samting bilong pasin pren. Insait long marit, tupela marit i bes pren bilong narapela narapela. Olsem dispela skripsa i soim, marit inap mekim na man na meri i gat poroman bilong helpim em, mekim gut bel bilong em, na lukautim em. Marit bai strong moa sapos i gat wanpela man moa i pas wantaim tupela. Olsem dispela ves i kamapim, baklain i gat tupela string em inap bruk. Tasol i hatwok long brukim baklain i gat tripela string i pas wantaim. Sapos nambawan tingting bilong man na meri em long mekim ol samting Jehova i laikim, marit bilong ol bai i olsem baklain i gat tripela string. Tupela i givim bel tru long Jehova, olsem na marit bilong ol i strong tru.

7, 8. (a) Pol i raitim wanem tok long ol singel Kristen husat i hatwok long bosim laik bilong mekim maritpasin? (b) Baibel i givim wanem stretpela tingting long marit?

⁷ Insait long marit tasol man na meri i ken inapim laik bilong ol long mekim maritpasin. Na i stret maritpasin em samting i givim amamas long tupela. (Sindaun 5:18) Ating wanpela singelman o singelmeri bai hatwok yet long bosim ol laik bilong bodi maski em i abrusim pinis taim we laik bilong mekim maritpasin i strong. Sapos em i no bosim dispela samting, ol laik bilong bodi inap kirapim em long mekim pasin doti o pasin i no stret. Holi spirit i kirapim Pol long raitim dispela tok long ol singel: “Sapos ol i no inap bosim gut laik bilong bodi bilong ol, orait ol i ken marit. Mobeta ol i marit, nogut strongpela laik long bel i winim ol.”​—1 Korin 7:​9, 36, NW; Jems 1:15.

⁸ Maski wanem samting i kirapim wanpela long marit, i gutpela long kisim stretpela tingting long marit. Olsem Pol i tok, ol manmeri i marit ol “bai i painim planti hevi long laip bilong ol.” (1 Korin 7:28) Ol marit i gat ol hevi em ol singel i no gat. Tasol sapos yu laik marit, yu ken mekim wanem na bai yu no gat planti hevi na bai yu kisim bikpela amamas? Wanpela samting em yu mas makim gut poroman bilong maritim.

9, 10. (a) Pol i mekim wanem kain tok piksa bilong soim olsem hevi inap kamap sapos yumi pas wantaim ol man i no bilip? (b) Wanem samting i save painim planti man em ol i sakim tok bilong God long no ken maritim man i no bilip?

⁹ Holi spirit i kirapim Pol long raitim wanpela bikpela stiatok em yumi mas bihainim taim yumi laik makim poroman bilong maritim: “Yupela i no ken pas wantaim ol man i no bilip.” (2 Korin 6:​14, NW) Pol i tingim wok gaden taim em i mekim dispela tok piksa. Sapos tupela animal em sais o strong bilong ol i no wankain na ol man i pasim tupela wantaim bilong mekim wok, tupela animal wantaim bai kisim hevi. Na olsem tasol, sapos man i bilip i maritim wanpela i no bilip, ol hevi bai painim tupela. Sapos wanpela i laik stap insait yet long pasin laikim bilong Jehova na narapela i no tingting liklik long dispela samting, ol bai i no gat wankain tingting long wanem samting i bikpela samting, na dispela bai kamapim planti hevi. Olsem na Pol i tokim ol Kristen long maritim tasol “man i bilip long Bikpela.”​—1 Korin 7:39.

¹⁰ Sampela singel Kristen i pilim olsem ol i stap wanpis, na ol i ting i gutpela moa long maritim wanpela i no bilip na bai ol i no stap wanpis moa. Sampela narapela i sakim tok bilong Baibel, na ol i maritim wanpela i no lotuim Jehova. Planti taim tru, ol bikpela hevi i painim ol kain lain olsem. Bihain, ol i lukim olsem ol i bin maritim man o meri em ol i no inap toktok wantaim em long ol nambawan bikpela samting long i stap bilong yumi ol man. Ol inap pilim olsem ol i stap wanpis tru, winim taim ol i no marit yet. Tasol gutpela tru, planti tausen singel Kristen ol i bilip na bihainim tok bilong God long dispela samting. (Song 32:8) Ol i gat laik long marit, tasol ol i stap singel i go inap long taim ol i painim poroman husat i lotuim God Jehova.

11. Wanem samting inap helpim yu long makim gut poroman bilong maritim? (Lukim tu blok i stap long pes 130.)

¹¹ Tru, i no olgeta wokboi bilong Jehova i gutpela bilong maritim. Sapos yu tingting long marit, painim wanpela em pasin bilong em bai wok gut wantaim pasin bilong yu, na ol mak bilong spirit em i laik winim, na pasin bilong em long laikim tru God i wankain olsem bilong yu. Lain gutpela wokboi i bin kamapim planti tok long dispela samting, na i gutpela long yu beten na tingim ol dispela tok bilong Baibel, na larim dispela tok i stiaim yu taim yu wokim disisen long dispela bikpela samting.a​—Song 119:105.

12. Long planti kantri ol i save bihainim wanem kain pasin long samting bilong marit? Stori bilong husat long Baibel inap givim gutpela tingting long papamama?

¹² Long planti kantri, ol papamama yet i save makim poroman marit bilong pikinini bilong ol. Long ol dispela kantri, planti man i bilip olsem ol papamama inap tru long mekim olsem, long wanem, savetingting bilong ol i bikpela moa. Planti marit em papamama i bin makim tupela long marit, marit bilong ol i save wok gut, olsem i bin wok gut long taim bilong ol man i bin raitim Baibel. Stori bilong Abraham i salim wokboi bilong em i go bilong painim meri bilong Aisak, dispela inap givim gutpela tingting long ol papamama husat i laik painim poroman marit bilong pikinini bilong ol. Abraham i no tingting long mani o namba. Nogat. Em i wok strong long painim meri bilong Aisak namel long ol lain i lotuim Jehova.b​—Stat 24:​3, 67.

13-15. (a) Olsem wanem stiatok i stap long Sindaun 24:27 inap helpim yangpela man husat i tingting long marit? (b) Yangpela meri i ken mekim wanem bilong redi long marit?

¹³ Sapos yu tingting strong long marit, gutpela sapos yu askim yu yet, ‘Tru tru mi redi long marit?’ Tingting bilong yu long pasin bilong laikim narapela, maritpasin, pasin pren, o kamapim pikinini, ol dispela samting tasol i no makim olsem yu redi long marit. Nogat. I gat sampela mak em man na meri i mas tingting long en.

¹⁴ Yangpela man husat i wok long painim meri bilong maritim, em i mas tingim gut dispela stiatok: “Stretim gut wok bilong yu long ausait, na redim ol wok yu mas mekim long gaden. Orait bihain yu mas strongim ol wanhaus bilong yu.” (Sindaun 24:​27, NW ) Wanem poin bilong dispela ves? Long dispela taim bipo, sapos man i laik “strongim ol wanhaus bilong [em],” o marit na kamapim famili, em i mas askim em yet, ‘Mi redi long lukautim meri na ol pikinini sapos mitupela bai kamapim ol pikinini?’ Em i mas wok pastaim, olsem lukautim gaden bilong em. Wankain stiatok i stret long nau tu. Man husat i laik marit, em i mas redi long mekim wok bilong lukautim famili. Sapos man i no gat bikpela sik samting, orait em i mas wok. Baibel i tok olsem man i no lukautim famili bilong em long skin, bel na tingting, na long ol samting bilong spirit, em i man nogut, winim ol man i no gat bilip!​—1 Timoti 5:8.

¹⁵ Meri husat i laik marit, em tu i redi long mekim planti bikpela wok. Baibel i mekim gutpela tok long sampela pasin na save em meri i mas i gat bilong em i ken helpim man bilong em long lukautim famili. (Sindaun 31:​10-31) Ol man na meri husat i marit hariap tumas na ol i no redi long mekim wok, ol i tingim ol yet tasol, ol i no tingim ol samting ol i ken givim long poroman ol i laik maritim. Tasol bikpela samting moa, ol lain i laik marit, ol i mas i gat save long bihainim ol stiatok bilong God insait long marit.

16, 17. Ol man na meri i redi long marit, ol i mas tingim tingim long bel wanem ol stiatok bilong Baibel?

¹⁶ Bilong redi long marit, man na meri i mas tingim tingim long bel ol wok God i bin makim bilong ol long mekim. Man i mas save long wok em het bilong famili Kristen i mas mekim. Dispela wok i no mekim na man i gat rait long mekim hatpela pasin. Nogat. Em i mas bihainim pasin bilong Jisas long mekim wok olsem het bilong famili. (Efesus 5:23) Na olsem tasol, meri Kristen i mas kliagut long ol gutpela wok bilong meri marit. Olsem wanem? Em bai redi long daun long man bilong em olsem het bilong famili? (1 Korin 11:3) Em i stap aninit pinis long lo bilong Jehova na bilong Krais. (Galesia 6:2) Na insait long famili em i stap aninit long narapela lo tu​—em wok bos bilong man bilong em. Olsem wanem? Em inap sapotim na daun long man bilong em husat i no gutpela olgeta? Sapos meri i no amamas long mekim olsem, orait mobeta em i no marit.

¹⁷ Na tu, man na meri i mas redi long mekim ol samting bilong tingim na lukautim narapela narapela. (Filipai 2:4) Pol i tok: ‘Yupela man wan wan i mas laikim tru meri bilong yupela, olsem yupela i save laikim yupela yet. Na meri i mas i stap aninit long man bilong en na mekim gutpela pasin long em.’ Holi spirit i stiaim Pol na em i save olsem man i mas pilim olsem meri bilong em i rispek tru long em. Na meri i mas pilim olsem man bilong em i laikim em tru.​—Efesus 5:​21-33.

18. Bilong wanem man na meri i pren wantaim i mas bosim gut bel?

¹⁸ Olsem na taim man na meri i pren wantaim, dispela i no wanpela haptaim bilong amamas tasol. Nogat. Em taim we man na meri i mas lain long mekim gutpela pasin long narapela narapela, na skelim olsem i gutpela long tupela i marit o nogat. Na tu, em taim bilong bosim gut bel! Narapela i laikim tru narapela, olsem na ol inap kisim strongpela laik long holim narapela o kis long em. Tasol ol man na meri husat i laikim tru narapela narapela, ol bai sakim olgeta pasin em inap bagarapim narapela long ol samting bilong spirit. (1 Tesalonaika 4:6) Olsem na sapos yu wok long prenim wanpela, orait yu mas bosim gut bel; dispela pasin inap helpim yu long laip olgeta bilong yu, maski yu marit o nogat.

19, 20. Olsem wanem tingting bilong Kristen long marit i mas narapela kain long tingting bilong planti man long nau? Stori long dispela.

¹⁹ Sapos tupela marit i laik bai marit bilong ol i stap strong, ol i mas i gat stretpela tingting long pasin bilong stap gut long marit. Marit i no pinis bilong samting; em i kirap bilong samting em Jehova i laik bai em i mas i stap longpela taim. (Stat 2:24) Sori tru, planti man long nau i no gat dispela tingting. Long sampela kantri, ol man i ting marit i olsem tupela string ol i taitim gut wantaim. Ating ol i no luksave olsem dispela tok piksa i kamapim tingting bilong planti man long marit. Olsem wanem yumi ken tok olsem? Ol i laik bai tupela string ol i taitim gut wantaim i stap olsem, tasol tu, ol i laik bai i no hatwok long ol i ken mekim dispela tupela string i lus.

²⁰ Planti man long nau i ting marit i bilong sotpela taim tasol. Ol i amamas long marit, long wanem, ol i ting dispela bai inapim sampela laik bilong ol, tasol tu ol i laik bai ol i ken katim marit taim ol hevi i kamap. Tasol tingim tok piksa Baibel i mekim long marit​—marit i olsem baklain. Ol i wokim ol baklain bilong sip bilong i stap strong na i no ken bruk, long taim bilong bikpela win na ren tu. Na olsem tasol, God i wokim marit bilong i stap strong. Tingim, Jisas i tok: “Samting God i pasim pinis, em man i no ken katim.” (Matyu 19:6) Sapos yu laik marit, yu mas i gat wankain tingting long marit. Olsem wanem? Dispela kain tingting i mekim na marit i kamap olsem wanpela hevi? Nogat.

21. Man na meri marit i mas ting olsem wanem long narapela narapela? Wanem samting inap helpim ol long mekim olsem?

²¹ Man na meri marit i mas holimpas stretpela tingting long narapela narapela. Sapos tupela wantaim i tingim ol gutpela pasin na wok bilong narapela, marit bai givim amamas na nupela strong long ol. Yu ting man na meri inap holim kain stretpela tingting olsem long poroman marit husat i gat sin? Jehova i save gut long yumi wanem kain man, tasol yumi save bilip olsem em i save tingim ol gutpela pasin na wok bilong yumi. Man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu?” (Song 130:3) Man na meri marit i mas i gat wankain stretpela tingting na pasin bilong fogivim narapela narapela.​—Kolosi 3:13.

22, 23. Olsem wanem Abraham na Sera i stap gutpela piksa long ol marit long nau?

²² Marit inap kamapim bikpela amamas moa taim em i stap strong inap planti yia. Baibel i stori long marit bilong Abraham na Sera taim tupela i lapun pinis. Laip bilong ol i gat ol hevi na hatwok bilong en. Tingim Sera i pilim olsem wanem taim em i gat 60 krismas samting na em i lusim gutpela haus bilong em long taun Ur, em taun i gat planti gutpela samting, na em i stap long ol haus sel i go inap long taim em i dai. Maski i olsem, em i daun long wok bos bilong man bilong em. Em i gutpela helpim bilong Abraham, na long pasin rispek em i mekim ol samting na bai ol disisen bilong Abraham i kamapim gutpela samting. Na em i no daun long em long skin tasol, nogat. Long bel, Sera i kolim man bilong em olsem bikman bilong em. (Stat 18:12; 1 Pita 3:​5, 6) Bel i kirapim em long soim pasin rispek long Abraham.

²³ Tru, dispela i no makim olsem oltaim Abraham na Sera i wanbel long ol samting. Nogat. Wanpela taim Sera i kamapim wanpela tok em Abraham i “bel hevi” long en. Tasol Jehova i stiaim Abraham na em i daunim em yet na i harim tok bilong meri bilong em, na dispela i kamapim gutpela samting long famili. (Stat 21:​9-13) Ol man na meri marit long nau, na ol lain i bin marit inap planti yia pinis, ol inap lainim planti samting long dispela tupela marit i daun long God.

24. Wanem kain ol marit i litimapim nem bilong God Jehova? Bilong wanem i olsem?

²⁴ Insait long kongrigesen Kristen, i gat planti tausen marit em ol i stap amamas​—ol marit we meri i rispek tru long man bilong em, na man i laikim tru meri bilong em na i givim biknem long em, na tupela wantaim i putim laik bilong Jehova i stap namba wan long laip bilong ol. Sapos yu laik marit, orait i gutpela yu makim gut poroman bilong maritim, mekim ol samting bilong redi gut long marit, na wok strong long kamapim marit i gat bel isi na pasin laikim long en na i litimapim nem bilong God Jehova. Long dispela rot, marit bilong yu bai helpim yu long stap insait yet long pasin laikim bilong God.