“Larim Bilip Holi Bilong Yupela i Mekim Yupela i Kamap Strong”

1, 2. Yumi ken mekim wanem na bai bodi bilong yumi i stap strong na yumi gat gutpela helt? Bilong wanem dispela i bikpela samting?

YUMI olgeta i laik bai bodi bilong yumi i stap strong na yumi gat gutpela helt. Tasol bilong ol dispela samting i ken kamap, yumi mas kisim ol gutpela kaikai, mekim ol eksasais, na lukautim bodi bilong yumi long olgeta taim. Yumi mas taitim bun bilong mekim olsem, tasol dispela bai mekim sampela samting long laip bilong yumi long nau na long bihain, olsem na yumi no ken givap. Tasol i gat narapela samting tu i mas kamap strong, na yumi mas tingting long en. Em wanem samting?

² Disaipel Jut i bin toktok long dispela samting taim em i mekim dispela tok long ol Kristen: “Stap insait yet long pasin laikim bilong God.” Long dispela wankain hap bilong Baibel, em i kamapim tu rot bilong mekim olsem, em i tok: “Oltaim larim bilip holi bilong yupela i mekim yupela i kamap strong moa yet.” (Jut 20, 21, NW) Yu ken mekim wanem na bai bilip bilong yu i kamap strong moa na bai yu ken i stap insait yet long pasin laikim bilong God? Yumi ken skelim 3-pela samting yumi mas tingim.

3-5. (a) Satan i laik giamanim yu na bai yu gat wanem kain tingting long ol lo bilong Jehova? (b) Yumi mas i gat wanem kain tingting long ol lo bilong God? Dispela bai kirapim yumi long pilim olsem wanem? Stori long dispela.

³ Namba wan samting, yumi mas strongim bilip bilong yumi long ol lo bilong God. Taim yu stadi long dispela buk, yu bin skelim planti stretpela lo bilong Jehova long ol pasin yumi mas bihainim. Yu gat wanem tingting long ol dispela lo? Satan i laik giamanim yu na bai yu ting olsem ol lo na ol stiatok bilong Jehova i pasim yu tumas, o i putim hevi long yu. Em i bin yusim dispela rot long giamanim ol man, kirap long taim dispela rot i bin wok gut long Iden. (Stat 3:​1-6) Olsem wanem? Em bai giamanim yu? Pasin bilong yu long skelim ol samting bai makim olsem em bai giamanim yu o nogat.

⁴ Yumi ken mekim tok piksa: Tingim olsem yu wokabaut insait long wanpela naispela pak, na nau yu lukim olsem wanpela traipela strongpela banis i pasim ol man long i go long wanpela hap bilong pak. Ol plaua na diwai samting long hapsait bilong banis i luk nais tru. Ating pastaim yu tingting olsem dispela banis i pasim rot bilong yu long raun gut long dispela pak. Tasol taim yu lukluk i go insait long dispela hap em banis i raunim, yu lukim wanpela laion nogut i raun na painim abus! Nau yu luksave olsem dispela banis i stap bilong lukautim ol man. Olsem wanem? I gat wanpela birua i wok long bihainim yu long nau? Baibel i mekim tok lukaut: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.”​—1 Pita 5:8.

⁵ Satan em i wanpela birua nogut. Jehova i no laik bai yumi kamap abus bilong Satan, olsem na em i bin kamapim ol lo bilong banisim yumi long ol “trik na giaman” bilong dispela man nogut. (Efesus 6:11) Olsem na taim yumi tingim tingim long bel ol lo bilong God, yumi mas tingim ol dispela lo olsem samting i kamapim klia pasin laikim bilong Papa bilong yumi long heven. Taim yumi gat dispela kain tingting, ol dispela lo i lukautim yumi na i givim amamas long yumi. Disaipel Jems i tok: “Man husat i lukluk gut long dispela lo i gutpela olgeta i mekim man i kamap fri, na em i save mekim long olgeta taim, em bai amamas long em i mekim olsem.”​—Jems 1:​25, NW.

 6. Wanem nambawan rot bilong strongim bilip bilong yumi long ol stretpela lo na ol stiatok bilong God? Stori long wanpela lo olsem.

⁶ Pasin bilong bihainim ol lo bilong God i nambawan gutpela rot bilong strongim bilip bilong yumi long Man Bilong Givim Lo na long savetingting i stap long ol lo bilong em. Olsem, “lo bilong Krais” i gat tok bilong Jisas long yumi mas skulim ol narapela long “olgeta tok [em i] bin givim.” (Galesia 6:2; Matyu 28:​19, 20) Ol Kristen i tingim tru lo bilong bung wantaim bilong mekim lotu na bilong narapela i ken strongim bel bilong narapela. (Hibru 10:​24, 25) Na narapela lo bilong God i tokim yumi long beten oltaim long Jehova na beten i mas kam long bel bilong yumi. (Matyu 6:​5-8; 1 Tesalonaika 5:17) Taim yumi bihainim ol dispela lo, bai yumi luksave olsem ol dispela lo i stiaim gut yumi. Na tu, dispela bai mekim na yumi stap amamas na belgut, em ol samting yumi no inap kisim long dispela graun i gat planti hevi long en. Taim yu tingim tingim long bel ol gutpela samting i bin painim yu taim yu bihainim ol lo bilong God, ating bilip bilong yu long ol dispela lo i kamap strong moa yet, a?

7, 8. Olsem wanem Baibel i strongim bel bilong ol lain i tingting planti olsem, nogut ol i no inap bihainim stretpela pasin i go i go inap planti yia?

⁷ Sampela taim, sampela i tingting planti olsem em bai hatwok tumas long bihainim ol lo bilong Jehova i go i go inap planti yia. Ol i pret olsem ol bai pundaun. Sapos sampela taim yu pilim olsem, tingim dispela tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut [“bel isi,” NW] na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.” (Aisaia 48:​17, 18) Olsem wanem? Sampela taim yu bin tingting long ol dispela tok na pilim olsem ol i gutpela tok tru bilong strongim bel?

⁸ Long ol dispela ves Jehova i tokim yumi olsem sapos yumi bihainim tok bilong em, dispela bai helpim yumi. Em i tok promis long tupela gutpela samting bai painim yumi. Namba wan, bel isi bilong yumi bai stap olsem wanpela wara​—em i stap isi, em i pulap tru, na i save ron oltaim. Namba tu, stretpela pasin bilong yumi bai stap olsem solwara i bruk long nambis. Sapos yu sanap long nambis na lukim biksi i wok long bruk long nambis, ating yu pilim olsem dispela samting i no gat pinis bilong en. Yu save olsem biksi bai wok yet long kam na bruk long nambis i go inap long olgeta taim bihain. Jehova i tok sapos yu bihainim ol tok bilong em, stretpela pasin bilong yu bai i no gat pinis bilong en. Sapos yu wok strong long stap gut long em, em bai i no inap larim yu i pundaun! Nogat tru! (Song 55:22) Ol kain gutpela promis olsem i kirapim yu long bilip strong moa long Jehova na long ol stretpela lo bilong em, a?

9, 10. (a) Bilong wanem em i gutpela mak tru long kamap strongpela Kristen? (b) Olsem wanem pasin bilong tingim ol samting bilong spirit i helpim yumi long i stap amamas?

⁹ Namba tu samting, yumi mas bihainim dispela tok: “Yumi mas taitim bun na wok yet long kamap strong.” (Hibru 6:​1, NW) Em i gutpela samting tru long ol Kristen i putim mak long kamap strong. Yumi no inap kamap gutpela olgeta long nau, tasol yumi inap kamap strongpela Kristen. Na tu, taim Kristen i kamap strong, em i kisim bikpela amamas moa long mekim wok bilong Jehova. Bilong wanem i olsem?

¹⁰ Strongpela Kristen em man bilong tingim ol samting bilong spirit. Em i tingim ol samting olsem Jehova i save tingim. (Jon 4:23) Pol i tok: “Ol man i save wokabaut long pasin bilong olpela bel, tingting bilong ol i save bihainim laik bilong olpela bel tasol. Tasol ol man i save wokabaut long pasin bilong Holi Spirit, tingting bilong ol i save bihainim laik bilong Holi Spirit.” (Rom 8:5) Pasin bilong tingim ol samting bilong skin tasol, dispela i no save kamapim amamas, long wanem, dispela pasin i kirapim man long tingim em yet tasol, na em i no tingim taim bihain, na em i tingting tasol long mani kago. Tasol pasin bilong tingim ol samting bilong spirit, dispela i save kamapim amamas, long wanem, dispela pasin i kirapim man long tingting long Jehova, em “God bilong amamas.” (1 Timoti 1:​11, NW) Man i gat pasin bilong tingim ol samting bilong spirit, em i save amamas long mekim ol samting Jehova i laikim na em i save amamas tu taim ol traim i painim em. Bilong wanem i olsem? Ol traim i opim rot long em i ken soim olsem Satan em i man bilong giaman, na tu, ol traim i opim rot long em i ken kisim pasin bilong i stap gut long God, em ol samting i save amamasim Papa bilong yumi long heven.​—Sindaun 27:11; Jems 1:​2, 3.

11, 12. (a) Pol i tok wanem long save bilong Kristen “long kliagut long wanem samting i stret na wanem samting i no stret”? Wanem mining bilong tok ol i tanim olsem “trenim”? (b) Bodi i mas kisim wanem kain trening na bai bodi i ken kamap strong na inap mekim ol samting?

¹¹ Bilong kamap strongpela Kristen husat i save tingim ol samting bilong spirit, yumi mas kisim trening. Tingim dispela ves: “Strongpela kaikai em bilong ol man i bikpela pinis. Em ol man i bin traim save bilong ol planti taim na long dispela rot ol i trenim gut save bilong ol long kliagut long wanem samting i stret na wanem samting i no stret.” (Hibru 5:​14, NW) Taim Pol i tokim yumi long “trenim” save bilong yumi long kliagut long wanem samting i stret na wanem samting i no stret, em i yusim wanpela tok Grik ol i bin yusim long ol haus eksasais long kantri Grik long bipo, na dispela tok inap makim olsem man i ‘kisim trening olsem jimnas.’a Orait tingim ol samting i insait long kain trening olsem.

¹² Taim mama i karim yumi, bodi bilong yumi i no kisim trening yet. Olsem, bebi i no inap luksave long ol han na lek bilong em i stap we. Olsem na bebi i save tromoi nabaut han bilong em, na sampela taim em i save paitim pes bilong em yet na bebi i kirap nogut long en. Tasol isi isi bodi i lain long mekim samting. Bebi i krol, bihain liklik em i kirap long wokabaut, na bihain em i ron.b Tasol olsem wanem long jimnas? Taim yu lukim em i kalap i go antap na tantanim gut tru bodi bilong em, yu save olsem inap longpela taim ol masol long bodi bilong em i bin kisim trening. Save bilong jimnas long mekim olsem i no kamap nating​—em i bin kisim trening inap planti planti aua. Baibel i tok, kain trening olsem “bai i helpim yumi liklik.” Olsem na taim yumi trenim save bilong yumi long kliagut long wanem samting i stret na wanem samting i no stret, dispela bai helpim tru yumi!​—1 Timoti 4:8.

13. Olsem wanem yumi ken trenim save bilong yumi long kliagut long wanem samting i stret na wanem samting i no stret?

¹³ Long dispela buk, yumi bin skelim planti tok bilong helpim yu long trenim save bilong yu long kliagut long wanem samting i stret na wanem samting i no stret bambai yu ken i stap gut long Jehova olsem man i save tingim ol samting bilong spirit. Beten na skelim gut ol stiatok na lo bilong God taim yu wokim ol disisen long ol wan wan de. Taim yu laik wokim disisen, askim yu yet: ‘Wanem lo o stiatok bilong Baibel i stret long dispela samting? Olsem wanem mi ken bihainim ol dispela lo o stiatok? Wanem pasin bai i amamasim Papa bilong mi long heven?’ (Sindaun 3:​5, 6; Jems 1:5) Olgeta disisen yu wokim long kain pasin olsem bai trenim moa yet save bilong yu long kliagut long wanem pasin i stret na wanem pasin i no stret. Kain trening olsem bai helpim yu long kamap na stap olsem man bilong tingim ol samting bilong spirit.

14. Bilong kamap strong long ol samting bilong spirit, yumi mas kisim pasin bilong hangre long wanem samting? Yumi mas was gut long wanem samting?

¹⁴ Yumi inap kamap strongpela Kristen, tasol oltaim yumi ken wok long kamap strong moa yet. Bilong kamap bikpela, yumi mas kaikai. Olsem na Pol i tok: “Strongpela kaikai em bilong ol man i bikpela pinis.” Rot bilong strongim bilip bilong yu em yu mas wok long kisim strongpela kaikai bilong spirit. Taim yu bihainim ol tok yu lainim, yu bihainim gutpela tingting. Baibel i tok: “Gutpela tingting em i nambawan tru.” Olsem na yumi mas kisim pasin bilong hangre long kisim save long ol gutpela tok i tru em Papa bilong yumi i save givim long yumi. (Sindaun 4:​5-7; 1 Pita 2:2) Taim yumi kisim save na savetingting i kam long God, em i no samting bilong hambak long en. Oltaim yumi mas skelim yumi yet, nogut pasin antap o sampela narapela pasin nogut i wok long kamap long bel bilong yumi. Pol i tok: “Oltaim yupela i mas skelim pasin na tingting bilong yupela yet na painimaut, bilip bilong yupela i stap strong, o nogat.”​—2 Korin 13:5.

15. Bilong wanem pasin laikim i bikpela samting bilong kamap strong long ol samting bilong spirit?

¹⁵ Ating man i gat strongpela bodi na gutpela helt, tasol em i mas wok yet long kaikai na lukautim gut bodi bilong em. Yumi mas i gat wanem samting na bai yumi ken kamap strongpela Kristen na stap strong long ol samting bilong spirit? Nambawan samting, yumi mas i gat pasin laikim. Pasin bilong yumi long laikim tru Jehova na laikim tru ol narapela man i mas wok yet long kamap strong moa. Sapos yumi no gat pasin laikim, olgeta save bilong yumi na wok yumi mekim bai i kamap olsem samting nating​—olsem planti pairap nating. (1 Korin 13:​1-3) Taim yumi gat pasin laikim, yumi inap kamap strongpela Kristen na wok yet long kamap strong moa long ol samting bilong spirit.

16. Satan i save kirapim ol man long kisim wanem kain tingting? Jehova i bin givim wanem samting bilong lukautim yumi?

¹⁶ Namba tri samting, oltaim yumi mas tingim ol gutpela samting Jehova i laik givim yumi, em ol samting yumi bilip na wet long en. Bilong mekim olsem, yumi mas was gut long tingting bilong yumi. Satan, em hetman bilong dispela graun, em i hapman bilong kirapim ol man long kisim tingting kranki, na ting olsem gutpela samting i no inap kamap, na i no trastim narapela, na bel hevi. (Efesus 2:2) Ol kain tingting olsem inap bagarapim Kristen. Tasol gutpela tru na Jehova i givim wanpela tul bilong lukautim yumi​—em gutpela samting yumi ken bilip na wet long en.

17. Baibel i tok wanem bilong soim olsem pasin bilong bilip na wetim gutpela samting, dispela em i bikpela samting?

¹⁷ Baibel i kolim ol hap bilong klos pait bilong spirit em yumi nidim bilong pait long Satan na ol pasin nogut bilong dispela graun. Wanpela bikpela hap bilong dispela klos pait em hat kapa, olsem “pasin bilong wetim God i kisim bek yumi.” (1 Tesalonaika 5:8) Long taim bilong ol man i bin raitim Baibel, soldia i save olsem em bai i no inap abrusim bagarap long pait sapos em i no werim hat kapa bilong em. Planti taim ol i wokim dispela hat long ain na insait bilong en ol i wokim long gras o skin bilong bulmakau samting. Na taim wanpela samting i paitim het bilong soldia, hat kapa i save lukautim het na soldia i no kisim bagarap tumas. Olsem hat kapa i save lukautim het, pasin bilong bilip na wetim gutpela samting inap lukautim tingting bilong yu.

18, 19. Olsem wanem Jisas i stap gutpela piksa long pasin bilong bilip na wetim gutpela samting? Olsem wanem yumi ken bihainim dispela pasin bilong em?

¹⁸ Jisas i stap nambawan gutpela piksa long pasin bilong bilip na wetim gutpela samting. Tingim ol hevi em i bin karim long laspela nait bilong em long i stap laip long graun. Wanpela pren bilong em i putim em long han bilong ol birua bilong kisim mani. Narapela pren i tok em i no save long em. Na ol arapela i lusim em na ranawe. Ol wanples bilong em i sakim em, na ol i tokim ol soldia bilong Rom long givim bikpela pen long em na kilim em i dai. Yumi ken tok olsem ol traim i painim Jisas i bikpela tru, winim ol traim bai painim yumi. Wanem samting i bin helpim em? Hibru 12:2 (NW) i bekim dispela askim: “Em i tingim amamas em bai kisim na dispela i helpim em long sanap strong na karim hevi long diwai pos, na em i no wari long sem em bai kisim. Na nau em i sindaun pinis long han sut bilong sia king bilong God.” Jisas i no lusim tingting long “amamas em bai kisim.”

¹⁹ Wanem dispela amamas? Jisas i save olsem sapos em i sanap strong na karim hevi, em bai insait long wok bilong mekim holi nem bilong Jehova, na em bai kamapim klia tru olsem Satan em i man bilong giaman. Dispela samting Jisas i bilip na wet long en i givim bikpela amamas tru long em, winim olgeta narapela samting! Na tu, em i save olsem Jehova bai blesim tru pasin bilong em long stap gut long Em​—i no longtaim na gutpela taim bai kamap we Jisas bai i stap gen wantaim Papa bilong em. Jisas i tingim dispela gutpela samting bilong wet long en taim em i karim ol bikpela hevi tru. Yumi mas mekim wankain samting. I gat amamas yumi tu bai kisim. Jehova i givim gutpela wok long yumi olgeta wan wan na yumi ken insait long wok bilong mekim holi gutpela nem bilong em. Yumi inap kamapim klia olsem Satan em i man bilong giaman. Yumi inap mekim olsem sapos yumi makim Jehova i stap King bilong yumi na yumi mekim ol samting bilong i stap insait yet long pasin laikim bilong Papa bilong yumi, maski wanem kain ol hevi na traim i painim yumi.

20. Wanem samting inap helpim yu long tingting long ol gutpela samting?

²⁰ Jehova i amamas long mekim gut long ol wokboi bilong em i stap gut long em, na tu, em i gat bikpela laik tru long mekim olsem. (Aisaia 30:18; Malakai 3:10) Em i amamas long inapim ol stretpela laik bilong ol wokboi bilong em. (Song 37:4) Olsem na tingting long dispela gutpela samting yu bilip na wet long en. No ken kisim ol tingting kranki na tingting nogut bilong dispela graun bilong Satan. Sapos yu pilim olsem bel o tingting bilong yu i wok long kisim tingting o spirit bilong dispela graun, orait beten askim Jehova long givim “dispela bel isi bilong God i winim tru tingting bilong man.” Dispela bel isi bai lukautim bel na tingting bilong yu.​—Filipai 4:​6, 7, NW.

21, 22. (a) Bikpela lain i bilip na wetim wanem gutpela samting? (b) Yu bilip na wetim tru wanem samting? Yu tingting strong long mekim wanem?

²¹ I gat gutpela samting tru yu ken tingting long en! Sapos yu wanpela bilong bikpela lain husat bai winim bikpela hevi tru, tingim dispela laip em klostu nau yu bai kisim. (KTH 7:​9, 14) Taim Satan na ol spirit nogut bilong em i no stap moa, bai yu kisim narakain bel isi em nau long dispela taim yu hatwok long kliagut long en. Husat bilong yumi i bin i stap long taim we Satan i no putim presa long yumi bilong pundaunim yumi? I no gat wanpela, a? Taim dispela presa i no stap moa, bai yumi amamas tru long mekim dispela graun i kamap wanpela paradais aninit long wok king bilong Jisas na 144,000 manmeri i wok king wantaim em long heven! Yumi amamas tru long wetim dispela taim we olgeta kain sik na bagarap bilong skin bai pinis olgeta, na yumi bai welkamim ol wanfamili bilong yumi i kirap bek long matmat, na sindaun bilong yumi bai kamap kain sindaun em God i laik bai yumi kisim! Taim yumi wok long kamap gutpela olgeta, bai yumi inap kisim prais i gutpela moa, em Rom 8:21 (NW) i tok promis long en​—bai yumi “kamap fri bilong kisim glori olsem ol pikinini bilong God.”

²² Jehova i laik bai yu stap fri olgeta. Bilong i stap fri olsem, yu mas bihainim tok. Yu mas wok strong tru long bihainim tok bilong Jehova long olgeta wan wan de. Olsem na larim bilip holi bilong yu i mekim yu i kamap strong moa yet, na bai yu ken i stap insait yet long pasin laikim bilong God i go inap long olgeta taim bihain!