Yu Inap Kamap Pren Bilong Jehova

Jehova i laik bai yu mas save gut long em. Bilong wanem? Em i laik olsem taim yu wok long save gut long em, ol pasin bilong em, na laik bilong em, yu bai kamap pren bilong em. Tru tru yu inap kamap pren bilong God? (Ritim Buk Song 25:14.) Yu ken mekim wanem bilong kamap pren bilong em? Baibel i bekim ol dispela askim na kamapim klia wai na em i bikpela samting long yu stap pren bilong Jehova.

1. Jehova i singautim yu long mekim wanem?

“Yupela i mas i go klostu long God, na em bai kam klostu long yupela.” (Jems 4:8) Dispela i makim wanem samting? Jehova i singautim yu long kamap pren bilong em. Sampela i pilim olsem i hatwok long stap pren bilong man ol i no inap lukim, moa yet em God. Tasol, long Tok bilong em, Baibel, Jehova i kamapim olgeta samting yumi nidim bilong save gut long em na go klostu long em. Taim yumi ritim tok bilong Jehova i kam long yumi long Baibel, pasin pren bilong yumi wantaim em i wok long kamap strong maski yumi no lukim em.

2. Wai na Jehova inap stap gutpela Pren bilong yu?

No gat wanpela i laikim yu moa olsem Jehova. Em i laik bai yu stap amamas na go long em long wanem wanem taim yu nidim helpim. ‘God i save wari long yu, olsem na yu mas putim olgeta hevi bilong yu long han bilong em.’ (1 Pita 5:7) Jehova i save redi long sapotim, mekim isi bel, na putim yau long ol pren bilong em.—Ritim Buk Song 94:18, 19.

3. Jehova i laik bai ol pren bilong em i mekim wanem?

Jehova i laikim olgeta man, “tasol em i save pas gut wantaim man bilong mekim stretpela pasin.” (Provep 3:32) Jehova i ekspektim ol pren bilong em long mekim ol samting em i tingim olsem gutpela samting na sakim ol samting we em i tingim olsem samting nogut. Sampela inap pilim olsem ol i no inap bihainim olgeta lo bilong Jehova long wanem ol samting i gutpela na wanem ol samting i nogut. Tasol Jehova i gat bikpela pasin marimari. Em i orait long olgeta man husat i laikim Em tru na traim bes long amamasim Em.—Buk Song 147:11; Aposel 10:34, 35.

KISIM SAMPELA SAVE MOA

4. Abraham em pren bilong Jehova

Stori bilong Baibel long Abraham (narapela nem Abram) i givim sampela save long yumi long wai na em i stap pren bilong God. Ritim stori bilong Abraham long Stat 12:1-4. Bihain stori long ol dispela askim:

• Jehova i tokim Abraham long mekim wanem?

• Jehova i tok promis long em long wanem samting?

• Abraham i mekim wanem long tok Jehova i givim long em?

5. Jehova i laik bai ol pren bilong em i mekim wanem?

Yumi save ekspektim ol pren bilong yumi long mekim sampela samting.

• Wanem sampela samting em yu laik bai ol pren bilong yu i mekim long yu?

Ritim 1 Jon 5:3, na stori long dispela askim:

• Jehova i laik bai ol pren bilong em i mekim wanem?

Bilong bihainim tok bilong Jehova, yumi mas senisim ol pasin na tingting bilong yumi. Ritim Aisaia 48:17, 18, na stori long dispela askim:

• Wai na Jehova i tokim ol pren bilong em long mekim ol senis?

6. Ol samting Jehova i mekim long ol pren bilong em

VIDIO: Jehova i Mekim Planti Samting Bilong Helpim Mi (3:20)

• Olsem wanem Jehova i helpim meri long vidio long daunim ol tingting kranki na bel hevi?

Ritim Aisaia 41:10, 13, na stori long ol dispela askim:

• Jehova i tok promis long mekim wanem samting long olgeta pren bilong em?

• Yu ting Jehova inap stap gutpela Pren? Bilong wanem?

7. Bilong stap pren bilong Jehova yu mas toktok wantaim em na putim yau long em

Pasin bilong toktok wantaim na putim yau long narapela narapela i save strongim pasin pren. Ritim Buk Song 86:6, 11, na stori long ol dispela askim:

• Hau bai yumi toktok wantaim Jehova?

• Hau bai Jehova i toktok wantaim yumi?

OL BIKPELA POIN

Jehova i laik stap Pren bilong yu, na helpim yu long kam klostu long em.

Riviu

• Jehova i save helpim ol pren bilong em olsem wanem?

• Wai na Jehova i tokim ol pren bilong em long mekim ol senis?

• Yu ting Jehova i tokim ol pren bilong em long mekim ol samting i hatwok long mekim? Wai na yu ting olsem? O wai na yu ting nogat?

MEKIM WOK PAINIMAUT

Olsem wanem pasin pren bilong yu wantaim God inap stiaim ol samting yu mekim long laip bilong yu?

“Jehova—Wanpela God i Stret Yumi Save Long Em” (Wastaua, Februeri 15, 2003)

Kisim save long hau yu inap kamap pren bilong God.

“Hau Bai Mi Kamap Pren Bilong God?” (Atikol long jw.org/tpi)

Kisim save long hau wanpela meri i pilim olsem pasin pren bilong em wantaim Jehova i seivim em.

“Mi No Laik i Dai!” (Wastaua No. 1 2017)

Harim tok ol tineja i kamapim long tingting ol i gat long Jehova.

Yu Mas Mekim Wanem Bilong Stap Pren Bilong God? (1:46)