LESEN 34
Olsem Wanem Yumi Ken Soim Olsem Yumi Laikim Jehova?
Yu pilim olsem yu pas gut moa wantaim God winim long taim yu kirap stadi long Baibel? Yu laik wok yet long strongim pasin pren bilong yu wantaim em? Sapos olsem, tingim olsem taim Jehova i lukim pasin bilong yu long laikim em i go bikpela, em bai laikim na tingim yu moa yet. Olsem wanem yu ken soim em olsem yu laikim em?
1. Olsem wanem yumi soim Jehova olsem yumi laikim em?
Yumi soim Jehova olsem yumi laikim em taim yumi bihainim tok bilong em. (Ritim 1 Jon 5:3.) Em i no fosim wanpela man long bihainim tok bilong em, nogat. Em i larim yumi yet i makim olsem yumi bai bihainim tok bilong em o nogat. Bilong wanem? Jehova i laik bai ‘long bel bilong yumi, yumi bihainim tok.’ (Rom 6:17) Dispela i makim olsem em i laik bai yu bihainim tok bilong em, i no olsem yu mas mekim, tasol yu mekim bikos yu laikim em. Seksen 3 na 4 bilong dispela buk bai helpim yu long soim pasin bilong yu long laikim Jehova taim yu mekim ol samting bilong amamasim em na sakim ol samting we i no amamasim em.
2. Wai na i hatwok long soim olsem yumi laikim Jehova?
“Planti hevi i save painim stretpela man.” (Buk Song 34:19) Yumi olgeta i save hatwok bikos yumi no gutpela olgeta. Na tu, ating yumi gat hevi long sait bilong mani, ol man i mekim pasin i no stret long yumi, na ol narapela hevi. Taim yumi bungim ol hevi, i hatwok long mekim ol samting Jehova i tokim yumi long mekim. Dispela i olsem bikos ating em isi long bihainim ol rot em Jehova i no orait long en. Tasol taim yu bihainim ol samting Jehova i tokim yu long mekim, yu soim olsem yu laikim em moa winim ol narapela samting. Na yu soim olsem yu stap gut long em. Na em bai stap gut long yu, na em i no inap lusim yu.—Ritim Buk Song 4:3.
KISIM SAMPELA SAVE MOA
Kisim save long wai Jehova i amamas taim yu bihainim tok bilong em, na wanem samting bai helpim yu long mekim olsem.
3. Wanpela bikpela tok yu insait long en
Long Buk Jop, yumi lukim olsem Satan i no sutim tok long Jop tasol, nogat, em i sutim tok long olgeta man i laik lotuim Jehova. Ritim Jop 1:1, 6–2:10, na stori long ol dispela askim:
Satan i tok i gat wanem as na Jop i bihainim tok bilong Jehova?—Lukim Jop 1:9-11.
Satan i tok wanem long olgeta man, na yu tu?—Lukim Jop 2:4.
Ritim Jop 27:5b, na stori long dispela askim:
Olsem wanem Jop i soim olsem em i laikim tru Jehova?
Jop i kamapim klia olsem em i laikim Jehova taim em i stap gut long em
Yumi kamapim klia olsem yumi laikim Jehova taim yumi stap gut long em
4. Mekim bel bilong Jehova i amamas
Ritim Provep 27:11, na stori long ol dispela askim:
Jehova i pilim olsem wanem taim yu bihainim savetingting na harim tok bilong em? Bilong wanem?
5. Yu inap stap gut long Jehova
Pasin bilong yumi long laikim Jehova i kirapim yumi long tokim ol narapela man long em. Pasin bilong yumi long stap gut long em i kirapim yumi long mekim olsem maski i no isi long mekim. Pilaim VIDIO, na stori long ol dispela askim.
Sampela taim yu pilim hatwok long tokim ol narapela long Jehova?
Long vidio, wanem samting i helpim Grayson long daunim pasin bilong em long pret?
Em isi long i stap gut long Jehova sapos yumi laikim ol samting em i laikim na heitim ol samting em i heitim. Ritim Buk Song 97:10, na stori long ol dispela askim:
Taim yu stadi, yu kisim save long wanem ol samting Jehova i laikim? Wanem sampela samting em i heitim?
Olsem wanem yu inap lain long laikim ol samting i gutpela na heitim ol samting i nogut?
6. Taim yumi bihainim tok bilong Jehova dispela i helpim yumi
Pasin bilong bihainim tok bilong Jehova, dispela em nambawan rot tru long bihainim long olgeta taim. Ritim Aisaia 48:17, 18, na stori long ol dispela askim:
Yu ting yumi inap trastim Jehova olsem oltaim em i save long ol samting i gutpela bilong helpim yumi? Bilong wanem?
Taim yu wok long stadi long Baibel na kisim save long God tru, Jehova, dispela i helpim yu olsem wanem?
SAMPELA MAN I TOK: “Ol samting mi mekim inap amamasim God?”
Bai yu yusim wanem skripsa bilong soim olsem ol pasin yumi mekim inap mekim Jehova i amamas o bel hevi?
OL BIKPELA POIN
Yu inap soim olsem yu laikim Jehova long rot bilong bihainim ol tok bilong em na i stap gut long em maski long sampela taim i hatwok.
Riviu
Yu kisim wanem skul long pasin bilong Jop?
Olsem wanem yu ken soim Jehova olsem yu laikim em?
Wanem samting bai helpim yu long stap gut yet long Jehova?
MEKIM WOK PAINIMAUT
Kisim save long hau yu ken stap gut long Jehova na long kongrigesen.
“Man i Save Stap Gut Long Narapela, Yu Save Stap Gut Long Em” (16:49)
Kisim save long ol tok Satan i sutim long ol man.
“Job Keeps His Integrity” (The Bible—What Is Its Message? section 6)
Kisim save long hau ol pikinini tu inap soim olsem ol i laikim Jehova.
Olsem wanem wanpela yangpela inap stap gut long God taim ol narapela yangpela i putim presa long em?
Strongim Bel na Sakim Ol Wanlain i Putim Presa Long Yu! (3:59)