I Stap na Wok Bilong Jisas

Ol Traim Bilong Jisas i Lainim Yumi

JISAS i baptais pinis na bihain spirit bilong God i bringim em i go long ples i no gat man long hap bilong Judia. I gat planti samting Jisas i mas tingim, long wanem taim em i baptais “heven i op” bambai em i ken save long ol samting bilong heven. Olsem na nau Jisas inap tingim i stap bilong em bilong bipo taim em i bin i stap long heven olsem wanpela pikinini spirit bilong God.

Jisas i stap 40 san na 40 nait long dispela ples i no gat man na em i no kisim kaikai. Bihain em i hangre na Seten i kam kamap long em bilong traim em. Em i tok: “Sapos yu Pikinini Bilong God, yu tok na ol dispela ston i ken tanim i kamap bret.” Tasol Jisas i save i no stret sapos em i mekim wok long strong bilong em bilong inapim laik bilong em yet. Olsem na em i sakim Seten.

Tasol Seten i no lusim Jisas. Em i putim narapela traim gen long Jisas. Em i sanapim Jisas antap long banis bilong haus lotu na tokim em long kalap i go daun na bai ol ensel i kam helpim em. Tasol Jisas i no mekim. Em i kolim tok bilong Baibel na em i tok i no stret em i traim God olsem.

Long namba tri traim Seten i soim olgeta kingdom bilong dispela graun long Jisas na em i tok: “Sapos yu brukim skru na lindaun na lotu long mi, orait bai mi givim yu dispela olgeta samting.” Tasol Jisas i no mekim pasin i no stret; em i stap gut long God.

Ol dispela traim i painim Jisas inap lainim yumi. Ol i lainim yumi olsem: Seten em i stap tru; em i no olsem tingting nogut o pasin nogut i stap long bel bilong man olsem sampela man i tok. Na ol dispela traim i lainim yumi olsem: Olgeta gavman bilong dispela graun ol i bilong Seten. Sapos ol i no bilong Seten, bai Seten i no inap tok long givim long Krais, a?

Na tingim dispela samting tu: Seten i tok, sapos Jisas i lotu wanpela taim tasol long em bai em i givim olgeta kingdom bilong dispela graun long Jisas. Ating Seten bai putim wankain traim long yumi. Ating bai em i opim rot bambai yumi inap kisim bikpela mani kago o bikpela nem na namba long dispela graun. Tasol gutpela sapos yumi bihainim pasin bilong Jisas. Maski wanem wanem kain traim i painim yumi, yumi mas i stap gut long God!

Matyu 3:16; 4:1-11; Mak 1:12, 13; Luk 4:1-13.

◆ Heven i op long Jisas bambai Jisas inap mekim wanem?

◆ Seten i mekim wanem bilong traim Jisas?

◆ Ol traim bilong Jisas i lainim yumi long wanem ol samting?

[Full-page picture on page 25]