Pasin Bilong Jop Long i Stap Gut Long God—Bilong Wanem Yumi Kirap Nogut long En?
“Bai mi stap gut long God inap long taim mi dai!”—JOP 27:5, NW.
1. Jop em i husat? Olsem wanem yumi save em i wanpela man tru em i bin i stap tru long bipo?
JOP em i wanpela man i gat nem long bipo. Em i gat planti samting bilong skin, na ol manmeri i save litimapim nem bilong em, long wanem em i save mekim pasin sori na em i gutpela jas na hetman bilong ol manmeri. Baibel i tok Jop i kamap “man i gat bikpela nem tru, winim olgeta narapela man long hap Bilong sankamap.” (Jop 1:3, NW; 29:12-25) Baibel i stori long em wantaim Noa na Danyel na i tok, em i stretpela man tru. (Esikiel 14:14, 20) Na Baibel i tok Jop i makim gutpela pasin ol Kristen i ken bihainim. Olsem na yumi save, Jop em i wanpela man tru em i bin i stap tru long bipo.—Jems 5:11.
2. Olsem wanem yumi inap save wanem taim traim i bin painim Jop long han bilong Seten?
2 Jop i stap long ples Us long dispela hap nau yumi kolim Arebia. Em i no wanpela Isrel, tasol em i save lotuim Jehova na Jehova i tokim Seten long dispela samting. Jehova i tok: “Planti man i stap long graun, tasol i no gat narapela man i kain olsem [Jop].” Dispela tok i kamapim long ples klia olsem i no gat narapela gutpela wokman bilong God i stap long graun long dispela taim bipo. (Jop 1:8, NW) Olsem na traim i painim Jop long han Bilong Seten, dispela traim i bin kamap taim ol kandere bilong em, em ol Isrel, ol i stap kalabus yet long Isip—dispela traim i kamap namel long taim gutpela wokboi bilong God, em Josep, i dai long yia 1657 B.C.E., na taim Moses i kamap na i stap gut long God.
3. Husat i raitim stori bilong Jop long Baibel? Olsem wanem em inap kisim save long ol samting i bin painim Jop?
3 Moses em i bin raitim stori bilong Jop long Baibel. Tasol olsem wanem Moses inap save long traim i bin painim Jop? Moses i ranawe lusim Isip long yia 1553 B.C.E. na em i go i stap long graun bilong ol Midian klostu long hap bilong Us. (Eksodas 2:15-25; Aposel 7:23-30) Long dispela taim Jop i stap laip yet, long wanem Jehova i bin blesim em na skruim 140 yia moa long laip bilong em. (Jop 42:16) Bihain, taim ol Isrel i wokabaut pinis long ples nating na ol i stap klostu long hap bilong Us, ating Moses i harim tok long ol samting i bin painim Jop taim em i lapun pinis na em i dai.
Jop i No Save Tumas
4. (a) Save Jop i kisim long Jehova, em i kisim we? Olsem wanem na em i save long lain bilong Ebraham na Aisak? (b) Jop i mekim wanem na em i kisim nem olsem stretpela man tru?
4 Taim traim i painim Jop, long dispela taim Jop i no save tumas long God na long ol samting God i laik mekim, long wanem ol i no bin raitim yet sampela tok bilong Baibel. Tasol Jop i save long sampela samting Jehova i bin mekim long Ebraham na Aisak na Jekop na Josep. Long wanem Jop em i wanpela tumbuna pikinini bilong brata bilong Ebraham, em Neho; em i kamap long lain bilong namba wan pikinini man bilong Neho, nem bilong em Us. Na brata bilong Us em Betyuel, em i papa bilong meri bilong Aisak, Rebeka, na tumbuna bilong Josep. (Jenesis 22:20-23) Yumi save, Jop i holim gut long tingting na long bel ol save em i kisim long ol tok Jehova i bin givim long Ebraham wantaim lain bilong em, na em i strong long bihainim pasin Jehova i laikim. Olsem na Jop em i stretpela man tru, em i no gat asua long wanpela samting, em i givim bel olgeta long Jehova.
5. I gat wanem samting na yumi kirap nogut long pasin bilong Jop long i stap gut long God?
5 Josep i dai pinis long Isip na liklik taim bihain Seten i tok pait wantaim Jehova long heven long pasin bilong Jop long i stap gut long Jehova. Tasol Jop i no save long dispela samting. Jop i no save bilong wanem hevi i painim em na dispela samting i mekim na yumi kirap nogut long pasin bilong em long i stap gut long God. Tasol Jehova i kirapim Moses long raitim stori bilong Jop long Baibel bambai dispela inap helpim olgeta wokboi bilong Em long bihain.
Tok i Kamap long Pasin Bilong Jop long i Stap gut long God
6. (a) Wanem samting i kamap long wanpela bung long heven na yumi save, i gat tok i stap namel long God na Seten? (b) Wanem taim dispela tok i bin kamap? Wanem samting i insait long en?
6 Yumi no inap lukim ol samting i kamap long heven, tasol stori bilong Jop long Baibel i givim save long yumi olsem bipo i gat wanpela bung bilong ol ensel long heven. Ol i kam sanap long ai bilong God Jehova na Seten tu i kam sanap wantaim ol. Long dispela taim Jehova i tokim Seten i gat planti man i stap long graun, “tasol i no gat narapela man i kain olsem [Jop]. Em i stretpela man na em i no gat asua. Em i save pret long God na em i sakim ol pasin nogut.” (Jop 1:8, NW) Nau yumi save, i gat tok i stap namel long God na Seten, na pasin bilong Jop long i stap gut long God em i insait long dispela tok. Tasol dispela tok i no nupela tok. Dispela tok i bin kamap taim Seten i pulim Adam tupela Iv na ol i lusim God. Long dispela taim i olsem Seten i tokim God: ‘Givim liklik hap taim long mi na bai mi inap pulim olgeta manmeri na bai ol i lusim yu.’—Jenesis 3:1-6.
7. Seten i tok wanem long as bilong pasin bilong Jop long i stap gut long God? Seten i tok wanem bilong traim God?
7 Nau long dispela bung long heven, Seten i mas kamapim tingting bilong em long as bilong pasin bilong Jop long i stap gut long God. Em i tok: “Ating Jop i pret nating long God? Ating yu no bin lukautim em gut, na haus bilong em tu, na olgeta samting bilong em?” Seten i laik traim God na em i tok: “Tasol nau plis, yu kirap na bagarapim olgeta samting bilong em na bai yu lukim, long pes bilong yu stret bai em i toknogutim yu, o nogat.”—Jop 1:9-11, NW.
8. (a) Jehova i bekim wanem tok long Seten? (b) Seten i givim wanem ol bikpela hevi long Jop?
8 Jehova i bilip tru olsem Jop i no ken lusim em, olsem na em i bekim tok long Seten, olsem: “Harim! Olgeta samting bilong em i stap long han bilong yu. Yu ken mekim laik bilong yu long en. Tasol yu no ken bagarapim skin bilong em yet.” (Jop 1:12, NW) Wantu Seten i kirap givim hevi long Jop. Ol Sabia i kam stilim olgeta 1,000 bulmakau bilong Jop na 500 donki meri, na ol i kilim i dai olgeta wokboi bilong Jop i lukautim ol dispela bulmakau na donki; wanpela tasol i no i dai. Bihain Seten i salim paia i kam daun na i kukim 7,000 sipsip bilong Jop wantaim ol wasman bilong sipsip; wanpela tasol em i no i dai. Na bihain Seten i kirapim tripela lain Kaldia i go stilim olgeta 3,000 kamel bilong Jop na ol i kilim i dai olgeta wasman bilong ol kamel; wanpela tasol i no i dai. Na bihain moa Seten i kirapim strongpela win na win i bagarapim haus ol 10-pela pikinini bilong Jop i bung long en bilong wokim bikpela kaikai na olgeta i bagarap. Ol wan wan man i abrusim bagarap ol i ranawe i kam tokim Jop long ol dispela samting nogut nogut i bin kamap.—Jop 1:13-19.
9. Wanem samting i mekim na i hatwok long Jop i karim ol dispela hevi? Tasol Jop i mekim wanem?
9 Planti hevi nogut tru i painim Jop! Sapos Jop i save long as bilong ol dispela hevi, bai em i hatwok long karim, tasol Jop i no save. Em i no save long dispela tok i bin kamap long heven. Em i no save long ol samting Jehova i laik mekim long rot bilong em, em Jehova i laik kamapim long ples klia olsem i gat sampela manmeri i stap na maski wanem wanem kain traim Seten i putim long ol, ol i no ken lusim God. Bel bilong Jop i pas tru na em i ting tu olsem God i as bilong ol dispela hevi i painim em, tasol Jop i tok: “Jehova yet i givim, na Jehova yet i tekewe. Mi mas litimapim nem bilong Jehova long olgeta taim.” Planti hevi i painim Jop, tasol em “i no mekim sin o toknogutim God.”—Jop 1:20-22, NW.
10. (a) Seten i tokim Jehova long larim em i mekim wanem samting moa long Jop? Bilong wanem Jehova i orait long dispela samting? (b) Jop i bagarap tru na wanem samting i kamap?
10 Wanpela taim moa Seten i go sanap wantaim ol narapela ensel long ai bilong Jehova. Na ating em i sem tru taim Jehova i tokim em gen long tingim stretpela pasin bilong Jop, em Jehova i tok: “Em i sanap strong yet; em i no lusim mi”! Tasol Seten i laik traim yet long pundaunim Jop. Em i tok, sapos God i larim em i bagarapim skin bilong Jop, bai Jop i toknogutim God. Jehova i save, dispela hevi tu i no inap pundaunim Jop, olsem na em i orait long Seten i mekim. Tasol em i tokim Seten: “Yu no ken kilim em i dai.” Orait, Seten i kirap givim wanpela sik nogut tru long Jop. (Jop 2:1-8, NW) Jop i bagarap tru na dispela samting i kirapim ol famili na pren bilong em long klia long em; ol man ol i save long em bipo, ol i tok bilas long em.—Jop 12:4; 17:6; 19:13-19; 30:1, 10-12.
11. Wanem narapela hevi gen i painim Jop? Bilong wanem yumi kirap nogut long pasin bilong em long i stap gut long God maski ol hevi i painim em?
11 Nau narapela hevi gen i painim Jop! Bilip bilong meri bilong Jop i no strong moa. Em i tokim Jop: “Bilong wanem yu holimpas yet stretpela pasin? Gutpela sapos yu toknogutim God na bai yu dai!” Tasol Jop i tokim em: “Yu mekim tok olsem wanpela longlong meri. Olsem wanem? Bai yumi kisim tasol ol gutpela samting i kam long han bilong God tru na yumi no ken kisim ol samting i nogut?” Na Baibel i tok: “Long ol dispela hevi Jop i no mekim rong long maus bilong em.” (Jop 2:9, 10, NW) Taim yumi tingim olsem Jop i no save long as bilong ol hevi i painim em, tru tumas, yumi kirap nogut long pasin bilong em long i stap gut long God!
Narapela Kain Traim
12. (a) Ol man i kam bilong mekim gut bel bilong Jop, ol i husat? (b) Olsem wanem Seten i mekim wok long ol dispela man bilong pundaunim Jop?
12 Tasol Seten i no pinis yet long traim Jop. Em i kirapim tripela saveman long i go lukim Jop, em ol i save long Jop o ol i bin harim tok olsem em i “gat bikpela nem tru, winim olgeta narapela man long hap bilong sankamap.” Ol i gat bikpela krismas, winim bilong Jop. (Jop 1:3, NW; 15:10; 32:6) Tupela i olsem hap famili bilong em. Elifas em i wanpela tumbuna pikinini bilong Ebraham; em i kamap long lain bilong Teman, em i tumbuna pikinini bilong Iso. Na Bildat em i wanpela tumbuna pikinini bilong Sua, em wanpela pikinini man bilong Ebraham. (Jop 2:11; Jenesis 36:15; 25:2) Sofa em i bilong wanem lain, em yumi no save tru. Dispela tripela man i tok ol i pren bilong Jop na ol i kam bilong helpim em na mekim gut bel bilong em, tasol Seten i mekim wok long ol bilong pundaunim Jop. Sampela man long nau ol i man bilong givim askim long ol kalabusman bilong skelim tingting politik bilong ol, ol i save mekim olsem ol i pren bilong ol dispela kalabusman na ol i laik helpim ol, tasol ol i giaman; ol i laik paulim tingting bilong ol dispela man bambai ol i birua long gavman bipo ol i givim bel long en. Olsem tasol Seten i laik paulim tingting bilong Jop long rot bilong ol dispela “pren” giaman na bai Jop i kirap na birua long God bilong em.—Jop 16:2, 3.
13. (a) Dispela tripela man i kam lukim Jop, taim ol kam pinis, ol i mekim wanem? (b) Taim ol i kirap long mekim sampela tok, ol i mekim olsem wanem?
13 Dispela tripela “pren” giaman i kam pinis na inap 7-pela san na 7-pela nait ol i sindaun i stap na lukluk long bikpela pen na hevi Jop i karim. Ol i pasim maus i stap na i no toktok liklik. (Jop 2:12, 13) Elifas, ating em i gat bikpela krismas winim tupela narapela, em i kirap mekim sampela tok pastaim. Ol tok em i mekim i as bilong ol tok tripela wantaim i mekim. Elifas na tupela poroman bilong em i wok long sutim tok long Jop na Jop i bekim tok. Tripela taim ol i sutim tok long Jop, na long namba tri taim Sofa i no mekim sampela tok. Ating em i pilim olsem i no gat sampela tok moa em i laik mekim. Olsem na Sofa i mekim tok tupela taim tasol na Elifas wantaim Bildat i mekim tok tripela taim tripela taim.
14. Tripela i mekim wanem kain tok bilong pundaunim Jop? Olsem wanem Seten i mekim wankain pasin bilong pundaunim Jisas?
14 Elifas i mekim bikpela tok, tasol em i no mekim strongpela tok tumas. Tasol Bildat i mekim ol strongpela tok i sutim tru bel bilong Jop, na Sofa i mekim moa yet. Tok bilong ol i gat trik bilong en bilong giamanim Jop na kamapim laik bilong Seten, em i laik pundaunim Jop na bai em i lusim God. Planti tok ol i mekim i tru, tasol i no stret long dispela taim na ol i mekim wok kranki long en. Seten i mekim wankain pasin bilong pundaunim Jisas. Em i kolim wanpela tok bilong Baibel i tok, ol ensel bilong God bai lukautim wokboi bilong Em, na nau Seten i tokim Jisas long lusim banis bilong haus lotu na kalap i go daun na bai ol man i ken save em i Pikinini bilong God. (Matyu 4:5-7; Sam 91:11, 12) Dispela kain tingting bilong Seten ol i sutim long Jop inap longtaim liklik.
15. Elifas i kolim wanem as bilong ol hevi i painim Jop?
15 Taim Elifas i kirap mekim tok, em i tok as bilong ol hevi bilong Jop em olsem: God i laik bekim pe nogut long em long ol rong em i bin mekim. Em i tok: “Ol man i no gat asua ol i no save bagarap, a? Mi lukim samting i save kamap olsem: Ol man i tingting long mekim pasin nogut na ol man i mekim pasin nogut, ol i save kisim pe nogut.” (Jop 4:7, 8, NW) Elifas i mekim sampela tok moa na em i tok, God i no save bilip long ol wokboi bilong em. Elifas i tok: “Em i no bilip long ol wokboi bilong em, na em i save kotim ol [ensel] bilong em. Orait, em i mas mekim moa yet long yumi ol man bilong graun.”—Jop 4:18, 19, NW.
16. Elifas i sutim tok long Jop na bihain Bildat i kirap sutim wanem tok long Jop? Em i mekim wanem tok piksa na i no stret em i sutim dispela tok long Jop?
16 Nau Bildat i kirap sutim tok long Jop. Em i tok: ‘Sapos yu stretpela man na yu no gat asua, orait longtaim pinis bai God i kirap helpim yu na bai yu stap gutpela olsem bilong bipo.’ Bildat i stori long pitpit bilong wara, sapos em i no gat wara em i save drai na i dai, na em i tok, olsem tasol “olgeta man i givim baksait long God” bai ol i dai. Dispela tok bilong em i stret, tasol i no stret em i sutim dispela tok long Jop na em i tok moa olsem: “Na man nogut i wet nating na i no inap lukim gutpela taim”!—Jop 8:6, 11-13, NW.
17. Sofa i mekim wanem ol strongpela tok?
17 Na tok bilong Sofa i strongpela moa. Em i tok, ‘God i mas kirap na tokim yu long tingting bilong em!’ I olsem em i laik tok: ‘God i save long rong yu bin mekim na em i givim strafe long yu. Em inap bekim bikpela hevi long yu, tasol em i no mekim olsem. Yu mas lukim ol pasin nogut bilong yu, na bai yu inap i stap gutpela na bai yu gat planti pren bilong yu.’—Jop 11:4-6, 14-20.
18. Namba tu taim ol i mekim toktok, ol i sutim wanem ol tok long Jop?
18 Namba tu taim ol i mekim toktok, Elifas i sutim tok gen long pasin bilong Jop. Em i tok: ‘God i no save bilip long ol ensel, olsem na em i no ken bilip long kain man olsem yu! Man nogut i save karim hevi long olgeta taim.’ (Jop 15:14-16, 20) Bildat i kros, long wanem Jop i sanap strong na sakim tok bilong ol, olsem na em i tok: ‘Lait bilong yu bai i dai, na bai olgeta man i lusim tingting long yu. Kain samting olsem i save painim ol man i givim baksait long God.’ (Jop 18:5, 12, 13, 17-21) Sofa i stori long gutpela sindaun bilong Jop long bipo na em i tok: ‘Ating yu no save, amamas bilong man nogut i no save stap longtaim, na amamas bilong man i givim baksait long God i bilong liklik taim tasol? Heven i save kamapim long ples klia rong bilong ol man nogut.’—Jop 20:4, 5, 26-29.
19. (a) Elifas i ting God i gat wanem tingting long stretpela pasin bilong ol man? (b) Bilong pinisim ol tok ol i sutim long Jop, Bildat i tok wanem?
19 Namba tri taim ol i mekim toktok, Elifas i kirapim ol tok. Em i tok: ‘Yu ting i gat wanpela man em inap helpim God? Sapos yu bihainim stretpela pasin, yu ting dispela bai helpim God?’ Em i tok: ‘Yu mas tanim bel i go bek long God na stretim wokabaut bilong yu. Na bai yu stap gutpela gen.’ (Jop 22:2, 3, 21-23) Bildat i pinisim ol dispela tok ol i sutim long Jop, em i tok: ‘Husat long dispela graun inap hambak na tok em i no gat asua? God i lait tumas. Mun na ol sta i no lait olsem. Ol i olsem samting nating long ai bilong em. Orait, ol man i olsem liklik samting tru long ai bilong em, olsem liklik snek nating bilong graun tasol!’—Jop 25:2-6.
Ol Tok Jop i Bekim na Ol Tok Bilong Stretim Jop
20. (a) Ol i tok, hevi i olsem strafe God i givim long man bilong bekim rong bilong em, tasol Jop i bekim wanem tok long ol? (b) Jop i tingting strong long mekim wanem? Olsem wanem yumi save God i tingim tru stretpela pasin bilong Jop long i stap gut long em?
20 Maski Jop i karim bikpela hevi tru, tasol em i no larim ol tok giaman ol i sutim long em i pundaunim em. Em i tok, sapos pen na hevi i olsem strafe God i givim long ol man bilong bekim rong ol i bin mekim, orait “olsem wanem na ol man nogut i stap laip, na ol i go lapun, na ol i save kisim planti samting bilong skin, winim ol narapela man?” (Jop 21:7-13, NW) Dispela tripela man i sutim tok long Jop ol i tok, God i no save tingim tumas stretpela pasin bilong ol man i stap gut long Em. Tasol dispela tok bilong ol i no stret. God i save amamas long stretpela pasin bilong ol man i stap gut long em, long wanem dispela i helpim em long bekim tok long Seten, em Seten i tok em inap pundaunim olgeta man na bai ol i lusim God. (Provep 27:11; Sam 41:12) Jop i bilip tru olsem em inap holimpas stretpela pasin na i stap gut long God na em i tok: “Bai mi stap gut long God inap long taim mi dai!” (Jop 27:5, NW) Em i no bin mekim wanpela samting na bai ol dispela hevi i mas painim em. Nogat tru!
21. Ilaihu i givim wanem tok long ol man i giaman long mekim gut bel bilong Jop? Na em i givim wanem tok long Jop bilong stretim em?
21 Yangpela man Ilaihu i bin putim gut yau long ol planti planti toktok ol i bin mekim na nau em i kirap mekim sampela tok. Em i tok, dispela tripela “pren” giaman bilong Jop ol i no bin mekim sampela tok i makim olsem Jop i bin mekim rong. (Jop 32:11, 12) Tasol bihain em i tokim Jop: “Mi wok long harim ol tok yu mekim, olsem ‘Mi stap stret, mi no gat asua; mi stap klin, na mi no gat rong. Harim! Em i painim rot bilong birua long mi; em i mekim olsem mi wanpela birua bilong em.’ ․․․ Tasol dispela tok bilong yu i no stret.” (Jop 33:8-13, NW; 6:29; 13:24, 27; 19:6-8) Tru, Jop i tingting tumas long stretim bek nem bilong em yet. Tasol em i no bin toknogutim God, na em i no lusim bilip liklik; em i bilip tru olsem God bai mekim pasin i stret.
22. (a) Jop i harim tok bilong Jehova na bihain em i tok wanem? (b) God i laik bai Elifas na tupela poroman bilong em ol i mas mekim wanem? Bihain wanem samting i painim Jop?
22 Ilaihu i pinis long toktok na nau bikpela win i kirap na klaut i pairap na Jehova yet i toktok. Em i tok: “Husat dispela man em i no gat save na em i kamapim ol tok i haitim gutpela tok bilong stretim man? Stretim tingting bilong yu, ․․․ Mi laik givim sampela askim long yu, na yu mas bekim tok long mi.” Jop i harim tok bilong Jehova na bihain em i tokaut olsem em i no bin tingting gut na em i toktok; em i no save gut; em i tok nating tasol; na em i hevi long dispela rong em i bin mekim. Nau Jehova i tokim Elifas em i gat kros long em wantaim tupela poroman bilong em na Jop i mas beten bilong helpim ol. Bihain Jehova i mekim gut long Jop na Jop i kisim 7-pela pikinini man moa na 3-pela pikinini meri ol i gat gutpela skin, na em i kisim planti sipsip na kamel na donki, winim tru bilong bipo. Na God i skruim 140 yia moa long laip bilong Jop. Jop em i “lapun tru na em i dai.”—Jop 38:1-4, NW; 42:1-17, NW.
23. Yumi mas ting olsem wanem long pasin bilong Jop long i stap gut long God?
23 Tru tumas, Jop em i man bilong i stap gut long God! Em i no save Seten i as bilong ol hevi i painim em. Dispela samting i kamapim moa yet gutpela pasin bilong Jop long i stap gut long God, long wanem em i ting olgeta dispela hevi i kam long God, tasol em i no givim baksait long God o toknogutim Em. Dispela i lainim tru yumi, long wanem yumi save long as bilong ol hevi na traim i painim yumi, em ol i bilong pundaunim yumi na bai yumi lusim stretpela pasin na lusim God! Dispela samting i mas kirapim yumi long bihainim pasin bilong Jop na wok strong yet long mekim wok bilong Jehova maski wanem wanem samting Birua bilong God i mekim bilong pundaunim yumi.
Yu Inap Bekim?
◻ I gat wanem samting na yumi kirap nogut long pasin bilong Jop long i stap gut long God?
◻ Husat ol i go lukim Jop? Seten i laik mekim wanem long rot bilong ol?
◻ Tripela i sutim wanem ol tok long Jop?
◻ Jop i bekim wanem tok? Husat i stretim em?
◻ Wanem samting i kamap bihain? Yumi mas ting olsem wanem long dispela samting?
[Piksa long pes 13]
Seten i salim tripela “pren” giaman bilong paulim tingting bilong Jop bambai em i birua long God