Lukautim “Ol Sipsip” i Stap Nabaut Long Hap Bilong Kaprivi

WANPELA ka (Land-Rover), em ol kaikai na spea taia samting na ol buk na nius bilong Baibel i pulap long en, em i lusim Winhuk, em nambawan biktaun bilong Saut-Wes Afrika (Namibia), na em i raun i go long hap bilong not. Em i go long wanem taim? Long mun Me, long 1981. I gat fopela pasendia long dispela ka na taim ol i raun i go long dispela ples stret i no gat wara, ol i tingting long ol samting bai painim ol long dispela raun bilong ol.

Draiva bilong ka, em Chris du Plessis, em wantaim poroman wanwok bilong em, tupela i Witnes Bilong Jehova, na tupela i mekim wok painia oltaim, olsem ol i autim tok bilong Kingdom long olgeta de. Tupela i bin i stap sampela wik long Katatura, em wanpela bikpela taun bilong ol blakskin em i stap klostu long Winhuk. Tupela i amamas long wok ol i bin mekim long dispela taun. Tupela i amamas long i go long haus bilong ol dispela blakskin, long wanem ol dispela man i mekim gutpela pasin long tupela na ol i laik harim tok.

Nau tupela hia i kisim wasman sekit, em Schalk Coetzee, wantaim meri bilong em i go lukim wanpela liklik lain Witnes ol i stap longwe long hap bilong not. Ol ka nating i no inap raun long dispela hap, tasol ol i kisim dispela strongpela ka (Land-Rover) na ol inap kem long wanem wanem hap ol i kamap long en. Tupela marit i slip insait long ka, na tupela singel i slip long haus sel antap long rup bilong ka!

Ol i draiv i go inap 370 kilomitaa na nau ol i kamap long wanpela hap ol i kolim ‘ples bilong i dai,’ long wanem ol raskol soldia bilong Angola i kam insait long dispela hap na mekim pait na kilim planti man i dai. Ol i go liklik long hap bilong not na ol i lukim sampela ka i bagarap i stap, tasol i no gat samting nogut i painim ol.

Pastaim ol i go lukim liklik kongrigesen i stap long Ondangwa, em wanpela tesen bilong ami i stap klostu long boda bilong kantri Angola. Ol painia salim i lukautim dispela kongrigesen. Christo Els wantaim meri bilong em Elizabeth, tupela i bin lainim tok ples bilong ol manmeri bilong dispela ples, em tok ples Ndonga−em hatwok, tasol tupela i bin mekim. Ol manmeri long dispela hap i save harim gut tok; ol i laikim tru Baibel. Sampela taim Christo o meri bilong em i mas senisim man o meri bilong haus na mekim wok bilong ol long gaden bambai ol i ken harim tok bilong Kingdom. Sampela taim Christo i mas stiaim ol donki i pulim samting bilong brukim graun long gaden o meri bilong em i mas mekim wok long tul bilong rausim gras nogut long gaden!

I gat pait long dispela hap, olsem na ol man i raun long rot ston ol i mas was gut, long wanem ol birua i haitim ol bom (land mines) insait long graun long ol dispela rot. Planti taim Christo na Elizabeth i save raun long ol rot wesan long bus, na ol man ol i bungim ol long rot ol i kirap nogut, long wanem tupela i no gat gan samting.

Tupela i amamas tru long i go lukim ol Ovahimba ol i stap long bus long dispela longwe ples. Dispela lain i save pasim skin bilong animal olsem klos bilong ol, na ol i save penim skin bilong ol long yelopela graun. Tupela painia hia i mekim wok long wanpela buk tupela i bin helpim wok bilong tanim tok bilong en. Tupela i amamas long lukim ol dispela manmeri i laikim tru tok bilong Kingdom!

Taim Brata Coetzee na lain bilong em i kam lukim ol, long dispela wik ol i putim wanpela kibung bilong wanpela de. I no gat planti man i stap long dispela hap, olsem na liklik lain tasol i kam long kibung. Tasol olgeta long dispela longwe ples ol i amamas long ol gutpela tok ol i harim long kibung, na ol i amamas long bung wantaim ol brata.

Hap Bilong Kaprivi

Ol i go kamap long Rundu na i stap liklik taim bilong kisim ol pepa long gavman i orait long ol i go moa, na nau ol i go insait long Hap Bilong Kaprivi. Sapos yu lukim mep long pes 26 bai yu lukim dispela hap em i wanpela longpela hap graun i no braitpela tumas, em i kirap long hap bilong not-is long Namibia na i go long namel tru bilong hap bilong saut long Afrika. Dispela hap i longpela inap 480 kilomita, na hap bilong en i bikpela liklik em i braitpela inap 80 kilomita. Em i gat boda wantaim tripela kantri, em Angola, na Sambia, na Boswana. Ami i bosim dispela hap, tasol ol manmeri long dispela hap ol i stap isi liklik, winim long hap bilong san i go daun.

Inap olsem 40,000 samting manmeri ol i stap long Hap Bilong Kaprivi, planti ol i blakskin, na i gat sampela Busman ol i save kam insait long dispela hap long hap bilong san i go daun. Planti manmeri long dispela hap ol i save long tok Inglis na ol i save rit rait. Ol dispela Witnes i raun long ka ol i draiv i go long hap bilong sankamap na planti taim long rot ol i pasim ka na toktok wantaim sampela manmeri. Ol i amamas tu long lukim ol gutpela diwai samting bilong dispela hap, na ol animal bilong bus, olsem ol elefan na antelop. Taim ol i kam klostu long liklik “taun” ol i kolim Katima Mulilo, nau ol i lukim ol lain haus i planti liklik, em ol haus morata. Ol painia i laikim tru dispela ples, olsem na taim Schalk Coetzee i tok, ‘Yupela i laik wok painia long dispela longwe ples?’ tupela i tok tupela i amamas long mekim.

Fopela hia i stap liklik taim long Katima Mulilo na bihain ol i go lukim sampela Witnes i stap longwe; ol i stap long Kasane long hap bilong not long Boswana. Ol i brukim wanpela Nesenel-Pak ol i lukautim ol animal bilong bus long en (Chobe Game Reserve). Sampela taim ol i raun klostu long bikpela lain bafalo o bikpela lain elefan. Taim ol i wokim kem long nait, ol i harim ol laion i krai strong klostu long ol.

Long Kasane, ol i go wantaim ol painia bilong dispela hap long haus bilong ol man na autim tok, na ol painia i tanim tok. Ol i bihainim pasin bilong ol Afrika. Ol i wokabaut isi isi i go klostu long haus na nau ol i sanap ausait na singaut bambai ol man i stap insait long haus i ken save ol i kam lukim ol. Wanpela man long haus i bekim tok na singautim ol i go insait na sindaun. Planti taim man bilong haus i tokim famili bilong em olgeta long i kam bung na harim tok. Nau ol i mas lusim bikpela hap taim liklik long givim gude long ol man na narapela i mas askim narapela, ‘Yu stap i orait?’ ‘Yu bilong we?’ Dispela ol tok i pinis, orait nau Witnes i ken kirap na stori long sampela tok bilong Baibel.

Ol Witnes long dispela hap i amamas tru na ol i tenkyu tru long ol dispela brata i kam longwe bilong lukim ol. Ol i save mekim ol miting long wanpela liklik haus ol i wokim long graun malumalum, olsem na Brata Coetzee i tok, gutpela sapos ol inap wokim wanpela Haus Kingdom.

Nau Fopela i go bek long Katima Mulilo na ol i amamas long lukim ol Witnes bilong dispela hap. Ol i stap wanpela wik wantaim ol. Ol i wokim kem klostu long Wara Sambisi na long nait i no gat planti samting i pairap−ol kundu tasol. Witnes long dispela hap ol i wok strong, tasol ol brata i mas givim sampela tok long ol bilong soim rot long ol, long wanem ol i no save gut long rot bilong wokim ol miting, o long rot bilong i go long haus bilong ol man na autim tok, o long rot bilong stretim marit long gavman, olsem rejistaim.

Ol dispela brata i kam lukim ol, ol i amamas long autim tok long dispela hap! Wanpela i tok: “Taim ol manmeri i save mipela i gat ol buk bilong Baibel long tok ples Silotsi, em tok Ales bilong ol, ol i kapsait i kam long mipela. Ol i laik kisim ol buk na ol i laik tumas long mipela i mas lainim ol. Mipela i kirap nogut tru!”

Fopela i lusim ol dispela nupela pren bilong ol long Katima Mulilo na ol i raun i go bek long Winhuk. Ol i stap wanpela wik wantaim kongrigesen i stap long Rundu long hap bilong not long Namibia. Planti brata long dispela kongrigesen ol i bin ranawe long Angola na ol i save mekim tok Potugal. Hatwok i kamap gen long tok ples! Ol i raun i go inap 4,000 kilomita na ol i kamap long Winhuk. Skin bilong ol i les, tasol ol i amamas na ol i tenkyu long Jehova long gutpela wok ol inap mekim.

Ol i Go Bek long Katima Mulilo

Dispela tupela yangpela brata i mekim wok painia oltaim ol i go bek long Katima Mulilo na ol i stap long dispela hap bilong helpim ol “sipsip” bilong Jehova. Bilong i stap long dispela hap ol i mas i gat ples slip na liklik wok mani bilong tupela o tripela de long wik. Ol i kisim pinis wok na ol i kisim orait long slip long wanpela haus i gat wil em i olsem ka, em bilong Sosaiti Was Taua. Tupela i tenkyu long Jehova long wanem em i lukautim ol long ol samting ol i sot long en.

Kwiktaim ol i kirap helpim ol Witnes bilong dispela hap long kain kain rot. Ol i helpim ol long wokim wanpela Haus Kingdom. Ol i katim kunai bilong wokim rup, na ol i kisim wanpela kain graun long haus bilong anis, em dispela graun i save go strong tru olsem simen. Ol i lain long wokim rup morata long pasin bilong ol Afrika. Ol i penim banis bilong haus long waitpela pen na haus i kamap gutpela na i naispela bilong lukim. Ol i no gat mani bilong baim ol sia, olsem na ol i katim diwai na wokim sampela bang. Haus i no gutpela tumas, tasol em i Haus Kingdom bilong ol yet!

Bipo ol i no mekim tru ol miting, olsem na nau dispela tupela painia i redim ol 5-pela miting olsem ol Witnes Bilong Jehova i save mekim long olgeta hap. Tupela i mekim bikpela wok, tasol dispela samting i strongim tupela yet na ol Witnes bilong dispela hap. Tupela i mas lain long mekim tok Silotsi, em tok ples bilong ol manmeri bilong dispela hap.

I no longtaim na ol i kamap olsem wanpela kongrigesen, na bihain 4-pela brata bilong dispela hap ol inap mekim ol pablik-tok na lukautim olgeta miting, na wanpela i kamap wanpela wokman bilong kongrigesen. Tupela painia hia i amamas long i go long haus bilong ol man na autim tok. Planti man tumas i laik stadi na tupela i no inap helpim olgeta. Yu laik mekim wok long kain ples olsem? Yu inap mekim?

Ol i Go Bek Gen long Kasane

Wasman sekit i bin tokim tupela painia hia long i go lukim grup bilong Kasane long Boswana sampela taim. Wanpela taim ol i laik i go na bikpela hevi i painim tupela. Ol i stap klostu long boda na sampela soldia bilong Boswana i pasim ol.

Kepten bilong ol dispela soldia i tok: “Yupela i man bilong lukstil!”

Tupela brata i tok: “Nogat. Mipela i wokman bilong God. Mipela i Witnes Bilong Jehova na mipela i save lainim ol man long ol tok bilong Baibel.”

Kepten i tok: “Yupela i gavman. Yupela i no Kristen. Yupela i soldia bilong Saut Afrika.”

Bikpela hevi i laik painim tupela, tasol taim ol soldia i lukim ol buk na nius bilong Baibel tupela i holim na ol i lukim olsem tupela i no gat gan, ol i larim tupela i go.

Ol ami i pulap long dispela hap na pasin birua i wok long i go bikpela, olsem na i hatwok long ol brata i go long kantri Sambia. Ol brata i stap long Katima Mulilo ol i mas brukim Wara Sambisi tasol na bai ol i stap long Sambia na ol brata long Sambia i gat planti buk na nius samting long tok Silotsi, tasol ol ami i was i stap, olsem na ol manmeri long hap bilong Katima Mulilo i pret long brukim wara long kanu na i go long hap. Wanpela o tupela taim ol soldia long narapela narapela hapsait bilong dispela wara i pairapim gan.

Lukautim “Ol Sipsip” i Stap Nabaut

Tasol ol dispela samting i no pasim wok bilong ol painia. Ol i wok strong long lukautim “ol sipsip” i stap long Hap Bilong Kaprivi. Olsem: Ol i harim tok long Andru, wanpela lapun man i stap long wanpela liklik ples longwe long Katima inap 70 kilomita. Dispela lapun i laik tru long kisim save long Baibel. Taim ol i kamap long em, em i sindaun kaunim buk Tok i Tru na em i amamas tumas long ol i kam lukim em! Inap planti yia em wanpela em i bin stadi na lainim ol tok na taim ol painia i kam helpim em, dispela i strongim em.

Frank Mwemba em tu i stap longwe long kongrigesen. Em i stap long wanpela liklik ples longwe long Katima inap 100 kilomita. Ka i gat fowil-draiv, dispela kain ka tasol inap i go long dispela hap long sampela taim tasol, long wanem planti hap long Kaprivi i olsem ples tais na sampela taim wara i karamapim olgeta. Frank i kisim save long tok i tru long Sambia na em i bilip na kisim baptais, na bihain em i kam bek long ples bilong em long Hap Bilong Kaprivi. Inap planti yia em wanpela tasol i lotuim Jehova. Olsem wanem? Em i bin sanap strong? Em i bin autim tok long dispela ples i stap longwe long kongrigesen? Em i bin sakim ol pasin bilong ples, olsem kain kain wok marila na posin samting na pasin bilong maritim planti meri? Em i rejistaim marit bilong em long gavman na em i marit stret? Tru tumas! Frank i maritim wanpela meri tasol. Em i save kisim pis na wokim gaden bilong lukautim meri pikinini bilong em, tasol sampela taim inap sampela de em i raun long kanu o wokabaut long lek i go long ol liklik ples i stap nabaut na autim gutpela tok bilong Kingdom long ol man. Oltaim em i save stadi wantaim meri pikinini bilong em, na em i save klia long ol man bilong mekim kain kain wok marila posin samting, na em i amamas long soim pepa bilong marit long dispela tupela painia i kam lukim em!

Wanpela taim wanpela bilong dispela tupela painia, em Chris, em i kalap long bot long Wara Sambisi na em i go long wanpela hap i olsem ples tais ol i kolim Nantungu. Em i harim tok olsem sampela man long dispela hap ol i laik harim tok. Taim bot i kamap pinis long dispela hap, em i kisim ruksak bilong em na lusim bot. Em i tingting olsem: ‘Tru i gat sampela man long dispela hap ol i laik harim tok?’ Em i amamas long wanem i gat sampela man ol i wok strong long bihainim ol tok bilong Baibel ol Witnes long Sambia i bin lainim ol long en. Ol i amamas tru long lukim ol buk na nius long tok Silotsi, em Chris i karim i kam. Em i kisim sampela nupela Wastaua tu i kam. Inap tripela de Chris i mekim bikpela wok long toktok wantaim ol long ol tok bilong Baibel na long i go long ol liklik ples klostu bilong lukim ol man i laik harim tok. Em i stretim rot bambai ol i ken mekim ol miting na autim tok bilong Kingdom long olgeta taim na em i lusim ol i go bek long Katim.

Nupela Poroman Wanwok

Poroman wanwok bilong Chris i gat sik na em i lusim Hap Bilong Kaprivi long 1982. Bihain narapela painia i kam wok strong wantaim Chris inap wanpela yia long dispela hap, nem bilong em Melt Marais. Na long Me 1983 Chris i maritim Magda wanpela yangpela sista painia na Magda i kamap namba 3 poroman wanwok bilong em. Ol i mekim tok bilong marit long dispela liklik Haus Kingdom Chris i bin helpim ol brata long wokim.

I hatwok long Magda i lain long i stap long Hap Bilong Kaprivi. Ol i bin putim dispela haus i gat wil i stap ausait long taun na i no gat paua o wara. Planti taim long nait, ol elfan i save kam long hap ol i stap long en. Pastaim Magda i pret tru taim em i lukluk long windo na lukim draipela elefan i stap klostu long haus bilong ol! Tasol kwiktaim em i lain na em i laikim tru nupela sindaun bilong em na wok bilong em. Gutpela pasin bilong em i strongim liklik kongrigesen i stap long Katima.

Narapela samting i strongim ol brata i stap long Hap Bilong Kaprivi em ol kibung sekit i kamap long Fransistaun, long Boswana (em longwe inap 650 kilomita). Na ol i amamas tru long i go (longwe inap 1,400 kilomita) long wanpela kibung distrik klostu long Johanesbek. Ol i kirap nogut long planti tausen tausen Witnes ol i bung wantaim na olgeta samting i wok gut na ol brata sista waitskin i mekim gut tru long ol−em olgeta dispela samting i kamapim long ples klia olsem spirit bilong Jehova i mekim wok.

Tasol samting i strongim tru “ol sipsip” i stap long Hap Bilong Kaprivi em gutpela wok ol yangpela painia i mekim bilong helpim ol. Na ol dispela painia i redi long mekim wok long ples i no gat planti Witnes long en, ol tu i kisim bikpela amamas taim ol i wok long helpim ol dispela brata i sot long man bilong helpim ol.

Tasol long Septemba 1983 Chris na Magda i mas lusim Hap Bilong Kaprivi. Bilong wanem? Chris i tok: “Brens-ofis bilong Sosaiti Was Taua long Saut Afrika i singautim mipela i go mekim wok. Mipela hevi long tok gutbai long ol man bilong autim tok long Hap Bilong Kaprivi, em ol inap olsem 13, na long tok gutbai long ol narapela manmeri long dispela liklik kongrigesen na tripela grup long dispela hap. Mipela i beten askim Jehova long salim sampela wokman moa i go wok long gaden long dispela hap, em planti kaikai long en i mau pinis.”−Matyu 9:​37, 38.

I gat planti narapela hap tu long graun ol i sot long ol Witnes. Olsem wanem? Yu inap i go long kain ples olsem na helpim “ol sipsip” bilong Jehova? Yu laik i go? Sapos olsem, orait gutpela pe i wetim yu, olsem Jisas i tok: “Amamas bilong man i givim samting long arapela man, dispela i winim amamas bilong man i kisim samting bilong em yet.”−Aposel 20:⁠35.

[Futnot]

[Ol Mep/Piksa long pes 26]

(Bilong save ol dispela rait i stap we long pes, lukim buk o magasin)

NAMIBIA

ANGOLA

OVAMBOLAN

Ondangwa

Rundu

Sumeb

Otavi

Grutfonten

‘Ples bilong i dai’

Winhuk

HAP BILONG KIPRIVI

Wara Sambisi

Katima Mulilo

Kasane

BOSWANA

SOLWARA ATLANTIK

[Piksa long pes 28]

Ol i kem klostu long Wara Sambisi long Katima Mulilo. Schalk Coetzee i raitim ripot long ol wok em i bin mekim long dispela wik olsem wasman sekit. Lukim “haus” i stap antap long ka

[Piksa long pes 30]

Ol i autim tok long Kasane, long hap bilong not long Boswana