Rait i Stap Long Banis​—⁠Yu Lukim?

WINIM 2,500 yia bipo sampela rait i bin kamap long banis bilong wanpela haus. Wantu tasol ol samting i kamap olsem dispela rait i makim na dispela i senisim ol samting i laik kamap long bihain. Sapos yumi laik save moa long dispela samting yumi mas opim Baibel long hap bilong Danyel, na bai yumi save, i gutpela sapos yumi harim ol toksave i stap long Baibel, long wanem dispela ol toksave i bilong helpim yumi. Na dispela bai kirapim yumi long harim gut wanpela bikpela toksave i kamap nau long taim bilong yumi.

Taim Em i Stap Strong Tru

Long nait, long Oktoba 5 long yia 539 paslain long taim bilong Krais, ol manmeri bilong Babilon i dring na danis. Ol ami bilong Midia na Pesia, ol birua bilong ol, i kamap pinis long dua bilong taun, tasol ol Babilon i ting taun bilong ol i no ken bagarap. Ol banis bilong taun i strong na ol i ting ol birua i no inap i kam insait. Olsem na ol i amamas i stap. Ol birua i harim krai bilong musik na nek bilong ol man i singsing na lap na amamas, na ating ol i ting olsem bai ol i no inap daunim kwik dispela taun!

Insait long bikpela haus bilong king, King Belsasa i lukim ol bikpela man i gat nem em i bin singautim ol i kam bung na ating em i hambak tru. Em i tokim ol wokboi bilong em long karim ol kap gol na silva i kam, em tumbuna bilong em, King Nebukatnesa, em i bin kisim long haus lotu bilong Jehova long Jerusalem sampela yia bipo. Ating Belsasa i tok, ‘Kaman! Yumi dring wain long ol dispela kap na litimapim nem bilong ol god bilong yumi!’​—⁠Danyel 5:​1-4.

Inap long Em i Bagarap Olgeta

Wantu pes bilong Belsasa i senis. Em i pret nogut tru. Long ai bilong lam i stap klostu long banis, wanpela han i kamap na i raitim fopela tok ol i no save long insait bilong en. I no gat musik moa; ol i no danis moa. King i seksek nogut tru na lek bilong em i guria. Dispela rait i makim wanem samting? King i singautim ol saveman na glasman bilong Babilon i kam! Em i tok, man i kamapim insait bilong dispela rait em king bai givim biknem na planti gutpela samting long em.​—⁠Danyel 5:​5-7.

Olgeta manmeri i guria i stap na wetim ol saveman i kamapim sampela tok. Tasol ol i tingting planti. Wanem insait tru bilong dispela rait i stap long banis? No gat wanpela i laik kamapim as bilong en. Ol i pret. Na king i pret moa yet.​—⁠Danyel 5:​8, 9.

Kwin i harim tok long dispela samting i kamap na em i kam insait. Em i tokim Belsasa i gat wanpela saveman bilong narapela ples em i stap long Babilon na em inap kamapim insait bilong dispela tok, long wanem bipo em i bin mekim. Olsem na ol i singautim Danyel i kam. Danyel i no pret. Em i tokim king long ol samting i bin painim Nebukatnesa sampela yia bipo. Na bihain em i tokim Belsasa long ol samting i laik painim em. Danyel i tok:

“Han i raitim tok olsem: MENE, MENE, TEKEL na PARSIN.

“Insait bilong dispela tok i olsem: MENE, God i makim pinis hamas de kingdom bilong yu i ken i stap, na nau em i pinisim pinis.

“TEKEL, em i bin skelim yu na yu sot.

“PERES, em i brukim kingdom bilong yu na givim pinis long ol Midia na Pesia.”​—⁠Danyel 5:​10-28, NW.

Truim i Kamap Kwiktaim

Ating ol dispela samting i no kamap kwiktaim na Belsasa i mas wet longtaim bambai em i ken save tok bilong Danyel i stret o nogat? Orait, nau yumi ken stori long ol samting i bin kamap, na yumi ken skelim ol dispela samting i no makim tasol samting i kamap long bipo.

Ol ami bilong Midia na Pesia i bin digim graun na wokim ol baret bilong senisim rot bilong Wara Yufretis em i ron namel long biktaun Babilon. King Sairas i wet inap long apinun bilong mekim ol samting em i tingting long mekim. Em i ting, taim tudak i kamap pinis bai ol Babilon i no was gut. Ol i opim ol dispela baret na bikpela hap wara i ron i go insait long en. Taim wara i drai liklik ol soldia i wokabaut i go daun na bihainim rot bilong wara.

Long dispela apinun ol Babilon i no pasim dua bilong taun i stap long rot bilong Wara. Ating ol i hambak na ol i ting ol birua i no inap daunim dispela taun. Ol i no redi na nau ol ami bilong Midia na Pesia i go insait long taun. Wanpela lain soldia i go insait long haus bilong king na ol i kilim i dai Belsasa. Bikpela gavman bilong Babilon i bagarap.​—⁠Danyel 5:⁠30.

Narapela Bagarap i Kamap Kwiktaim Olsem

Ol samting i kamap stret olsem Danyel i tok, olsem na yumi save yumi mas tingim gut ol toksave i stap long Baibel. Sampela tok aposel Pol i raitim long bihain i kamapim long ples klia olsem i gat sampela narapela bikpela samting i mas kamap kwiktaim na i no kamap yet. Long namba wan pas spirit holi i kirapim em long raitim long ol Kristen long Tesalonaika, em i tok: “Bai ol i tok, ‘Em i gutaim nau, yumi stap gut.’ Long dispela taim tasol samting bilong bagarapim ol [em i kam long God] bai i kamap kwiktaim long ol, olsem pen i save kamap long meri i laik karim pikinini. Na ol i no inap abrusim dispela samting.”​—⁠1 Tesalonaika 5:⁠3.

Tasol taim Babilon i bagarap, Danyel na ol Juda ol i no bagarap, na olsem tasol i gat rot bilong abrusim dispela bagarap i laik kamap em God i as bilong en. Yumi mas mekim wanem bambai yumi ken abrusim bagarap long dispela taim? Yumi mas was i stap. Long ol samting bilong spirit yumi no ken slip, na bai Jehova i lukautim yumi. Pol i tok: “Tasol yupela brata i no i stap long tudak, na bai dispela de i kamap long yupela olsem stilman i save kamap. Nogat.”​—⁠1 Tesalonaika 5:⁠4.

Dispela “de” Pol i stori long en em i “De bilong [Jehova].” Em taim bilong God long stretim ol samting bilong ol man long rot bilong Kingdom bilong Em i stap long han bilong Krais. (1 Tesalonaika 5:⁠2) Wanem taim bai ‘rait i kamap long banis’ bilong toksave long yumi olsem dispela De i klostu? Wanpela tok profet i kamap paslain na i stap long Danyel sapta 2 i bekim dispela askim bilong yumi.