Litimapim Nem Bilong God, Em i As Bilong Bilip Bilong Yumi
“Mi God Bikpela bilong yupela . . . Nau mi tok olsem, man i litimapim nem bilong mi, orait bai mi givim biknem long em. Na man i bikhet long mi, orait bai mi daunim em tru.”−1 SAMUEL 2:30.
1. I gat wanem as na yumi laik litimapim nem bilong Jehova? (1 Timoti 1:17; Revelesen 4:11)
YUMI save long ol tok bilong God long Baibel na yumi bilip na wetim ol gutpela samting i kamap, olsem na i stret yumi mas litimapim nem bilong God, “em i as bilong bilip bilong yumi.” (Rom 15:13) Bilong wanem i stret yumi mekim olsem? Na olsem wanem yumi ol sinman i ken litimapim nem bilong Bikpela Man bilong wokim heven na graun? Na sapos yumi litimapim nem bilong Em, bai em i givim biknem long yumi?
2 Ol samting i bin painim Jisas inap helpim yumi long save long bekim bilong ol dispela askim. Yumi save, oltaim Jisas i laik bai ol man i litimapim nem bilong Papa bilong em, na bai nem bilong Papa i kamap bikpela na em i kisim biknem. (Jon 5:23; 12:28; 15:8) Jisas i krosim ol Farisi na ol saveman bilong lo, long wanem ol i ‘litimapim nem bilong God long maus bilong ol, tasol bel bilong ol i stap longwe long em.’ Tingting na pasin bilong ol i no stret; ol i no litimapim tru nem bilong God. (Matyu 15:7-9) Tasol olsem wanem? Yumi ken tok, taim Krais i litimapim nem bilong God, dispela i samting bilong bilip bilong em na ol samting em i wet long en? Na taim Jisas i litimapim nem bilong God long dispela rot, God i mekim wanem?
3 Jisas i bilip tru long tok bilong Devit long Sam 16:10: “Bai yu no larim mi go i stap long ples bilong ol daiman. Na bai yu no larim man bilong yu yet i sting long matmat.” Krais Jisas i bilip tru olsem God bai kirapim bek em long matmat, olsem na em inap tokim man nogut ol i hangamapim em klostu long Jisas, olsem: “Mi tok tru long yu tude: Bai yu stap wantaim mi long Paradais.” (Luk 23:39-43, NW) Liklik taim bihain, dispela man nogut i dai pinis, olsem na em i no lukim ol samting i kamap olsem Jisas i bilip na wet long en−em i no lukim God i kirapim bek Jisas. Tasol wanpela man i lukim dispela samting long ai bilong em yet, em i tok: “Dispela Jisas God i kirapim pinis. Mipela olgeta i lukim dispela pinis na mipela i tok.” (Aposel 2:31, 32) Dispela samting i bin kamap tru.
4 Planti man, em Jisas i autim tok long ol, ol i save em inap tru long kisim biknem na i stret ol i mas litimapim nem bilong em. (Luk 4:15; 19:36-38; 2 Pita 1:17, 18) Tasol bihain em i dai olsem wanpela man nogut. Olsem wanem? Ol i no ken litimapim moa nem bilong em? Ol i mas litimapim, long wanem dispela God Jisas i bilip long em, em i orait long Jisas. Olsem na em i kirapim bek Jisas. God, “em i as bilong bilip bilong yumi,” em i kirapim bek Pikinini bilong em na givim laip oltaim long em long heven na em i no inap i dai moa, olsem na yumi save, Papa i litimapim yet nem bilong Pikinini bilong em. Pol i tok: “Yumi lukim Jisas. . . . [em] i dai bilong helpim olgeta man. Em i karim dispela pen na i dai, olsem na God i litimapim em na i givim bikpela namba na biknem long em.”−Hibru 2:7, 9; Filipai 2:9-11.
5 Jisas i save litimapim nem bilong Jehova na Jehova i givim biknem long em. Jisas i stori long narapela kain namba Papa i givim long em; em i kamap long ai bilong ol disaipel na em i tokim ol: “God i givim mi bikpela namba long heven na long graun. Olsem na yupela i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. . . . Harim: Mi stap wantaim yupela olgeta de, inap long dispela taim i pinis.” (Matyu 28:18-20) Papa i givim dispela narapela kain namba long Jisas na long dispela rot tu Jisas i kisim biknem. Jisas i mas mekim wok long dispela namba bilong helpim ol manmeri ol bai mekim wanpela wok bilong litimapim nem bilong dispela Man Jisas i litimapim nem bilong em. Olsem wanem? I gat sampela samting yumi ken mekim na bai yumi litimapim nem bilong Papa, na bai em i givim biknem long yumi?
Ol Man i Litimapim Nem Bilong God
6 Planti man ol i no tingting long litimapim nem bilong God; ol i tingting long kisim biknem bilong ol yet. Ating sampela man bai tok, i stret yumi laik bai ol man i litimapim nem bilong yumi; em wanpela gutpela laik God i bin putim long skin bilong yumi. Tru, yumi laik kisim gutnem, olsem na yumi laik bai ol man i litimapim nem bilong yumi. (1 Timoti 3:2, 13; 5:17; Aposel 28:10) Tasol nogut yumi gat bikpela laik tumas long ol man i mas litimapim nem bilong yumi. Yumi lukim planti man ol i laik tru long kisim biknem na ol i mekim kain kain pasin bambai ol inap kisim; na sapos ol i mekim wanpela pasin i no stret na em bai daunim nem bilong ol, bai ol i haitim bambai ol man i no ken save long en.
7 Biknem yumi kisim long ol man em bilong liklik taim tasol, long wanem ol dispela man i givim biknem long yumi bai ol i dai. I gat planti man ol i bin kisim biknem long bipo, tasol ol i dai pinis na nau ol man i no tingim ol moa. Hamas man i save long nem bilong ol tumbuna bilong ol? Hamas man i save long nem bilong ol hetman bilong lain bilong ol, em ol i bin i stap 100 yia bipo? Sapos wanpela man i stap laip o em i dai pinis, dispela i samting nating. Dispela man i olsem liklik hap das i stap long wanpela skel, o olsem wanpela liklik hap wara long bikpela baret wara. Taim em i dai pinis, sapos inap liklik taim ol man i tingim em na ol i litimapim nem bilong em, em i no save. (Jop 14:21; 2 Kronikel 32:33; Eklisiastis 9:5; Sam 49:12, 20) Bikpela samting em olsem: Dispela man i mas bilip na wetim ol samting God i tok promis long en, na em i mas litimapim nem bilong God, na bai God i givim biknem long em. Bilong save gut long dispela samting, yumi ken skelim tupela man i bin i stap long Isrel long bipo, em tupela bin i stap long wankain taim.
8 Wanpela em Elai. Inap 40 yia Elai i mekim wok bilong God olsem hetpris; na em i wanpela hetman bilong Isrel. (1 Samuel 1:3, 9; 4:18) Tasol bihain em i no bosim gut tupela pikinini man bilong em, em Hopni na Finias. Tupela i mekim wok pris, tasol ol i save stilim sampela hap kaikai bilong ol ofa, na ol i save mekim pasin pamuk na Elai i no stretim gut tupela. Olsem na God i tokim Elai: “Long dispela pasin yu litimapim nem bilong tupela na daunim nem bilong mi.” God i tok, em i bin mekim tok promis long Eron, tumbuna bilong Elai, na long ol lain bilong em, bai ol inap mekim wok olsem pris oltaim, tasol em i no ken larim wanpela man long lain bilong Elai i holim wok hetpris. Bilong wanem? God i tok: “Man i litimapim nem bilong mi, orait bai mi givim biknem long em. Na man i bikhet long mi, orait bai mi daunim em tru.”−1 Samuel 2:12-17, 29-36; 3:12-14.
9 Tasol Samuel i narapela kain. Ating yu save, taim Samuel i liklik yet, papamama i kisim em i go bilong mekim wok long haus lotu sel long Sailo. Wanpela nait Jehova i toktok long yangpela Samuel. Yu ken kaunim stori bilong dispela long 1 Samuel 3:1-14. Samuel i slip na Jehova i singaut long em; Jehova i no singaut strong, em i tok isi tasol na Samuel i kirap na em i ting olsem lapun Elai i singautim em. God i tokim Samuel em i laik givim strafe long lain bilong Elai na Samuel i mas tokim lapun Elai long dispela samting. Samuel em i yangpela tasol, na Elai em i hetpris, olsem na i hatwok long Samuel i go givim dispela tok long Elai. Samuel i pret, tasol em i go mekim. Em i bihainim tok bilong God na long dispela rot em i litimapim nem bilong God.−1 Samuel 3:18, 19.
10 Inap planti yia Samuel i mekim wok olsem profet na hetman long Isrel na em i litimapim nem bilong Jehova. Jehova i mekim gut long Samuel na givim biknem long em, olsem 1 Samuel 7:7-13 i tok. Kwiktaim Jehova i harim beten bilong Samuel na helpim ol Isrel long daunim ol Filistia. Sapos God i mekim gut long yu olsem em i bin mekim long Samuel, bai yu amamas tru, a? Ol pikinini man bilong Samuel i no bihainim gutpela pasin bilong Samuel, tasol God i no sakim Samuel olsem Em i bin mekim long Elai. Long wanem Samuel i wok strong long mekim olgeta samting em inap mekim bilong litimapim nem bilong God. Narapela samting i kamapim long ples klia dispela samting, em olsem: Taim ol Isrel i tokim Samuel ol i laik bai em i makim wanpela man i kamap king bilong ol, Samuel i no amamas. (1 Samuel 8:6, 7) Tasol God i givim wok long Samuel bilong makim Sol na Devit i kamap king. Taim Samuel i dai pinis, ol Isrel i krai long em na litimapim nem bilong em. Tasol bikpela samting em olsem: God yet i givim biknem long em. God i kirapim ol man long raitim nem bilong Samuel long Baibel, na nem bilong em i stap wantaim nem bilong ol narapela bilipman bilong bipo, em ol bai kisim blesing−bai ol i kirap bek na kisim ol gutpela samting God i redim bilong ol. (Sam 99:6; Jeremaia 15:1; Hibru 11:6, 16, 32, 39, 40) Olsem na sapos yumi litimapim nem bilong God “em i as bilong bilip bilong yumi,” dispela bai helpim tru yumi, a?
Bai Yu Litimapim Nem Bilong God “Em i As Bilong Bilip Bilong Yumi”?
11 Ol samting Jisas na Samuel i bin mekim i kamapim long ples klia olsem ol man inap litimapim nem bilong God na putim dispela wok i stap nambawan wok bilong ol. Baibel i stori long planti narapela man tu ol i bin mekim olsem. Na taim yumi tingim ol samting i bin painim Jisas na Samuel yumi save, sapos yumi litimapim nem bilong God na yumi tingim wok bilong litimapim nem bilong em i nambawan bikpela wok, orait i stret yumi ken ting God bai givim biknem long yumi, na bai em i mekim tru. Tasol yu mas mekim wanem bilong litimapim nem bilong God, na bai God i amamas long yu, na givim biknem long yu, na yu inap kisim ol gutpela samting Baibel i tok yu ken wet long kisim?
12 Wanpela samting yu mas mekim, em olsem: Yu mas pret long mekim pasin God i no laikim. (Malakai 1:6) Ating yumi save dispela tok i stret. Tasol tingim tupela pikinini man bilong Elai. Sapos yu stap long taim bilong ol na yu bin tokim tupela, ‘Yupela i pret long God na i laik litimapim nem bilong em?’ Ating bai tupela i tok: ‘Mipela laik mekim olsem.’ Tru, yumi laik klia long ol pasin God i no laikim bambai yumi ken litimapim nem bilong em, tasol i hatwok long mekim.
13 Sapos traim i painim yumi na yumi inap stil o mekim pasin pamuk samting na bai i no gat wanpela man i save, orait bai laik bilong yumi long litimapim nem bilong God i kirapim yumi long sakim dispela traim? Yumi mas wok long kisim tingting olsem: ‘Sapos mi mekim pasin i no stret, maski ol man i no save, tasol bai mi bagarapim nem bilong God “em i as bilong bilip bilong yumi.’” Na dispela rong i no inap i stap hait oltaim, wankain olsem ol rong bilong tupela pikinini man bilong Elai i no i stap hait oltaim. Pol i stori long “stretpela kot” bilong God na em i tok: “God bai i skelim pe long olgeta man inap long pasin ol i mekim. Sampela i save stap strong long gutpela pasin na i wok long painim rot bilong sindaun gut wantaim God long heven na painim biknem na laip i no inap bagarap. Bai God i givim laip i stap gut oltaim oltaim long ol dispela man. Na sampela i save ting long ol yet tasol, na ol i givim baksait long tok tru na bihainim pasin i no stret, bai God i belhat long ol dispela man na bekim pe nogut tru long ol.”−Rom 2:5-8.
14 Long dispela ves Pol i tok, man i mas mekim “gutpela pasin” i save litimapim nem bilong God, na bai em inap kisim “biknem.” Long Matyu 28:19, 20 Jisas i kolim nambawan gutpela pasin o wok yumi mas mekim long nau, em wok bilong ‘kamapim ol disaipel, na baptaisim ol, na lainim ol long bihainim olgeta tok bilong Jisas.’ Long olgeta hap bilong graun, planti milion Witnes Bilong Jehova ol i mekim dispela wok i litimapim nem bilong God, em wok bilong autim tok na lainim ol man. Planti ol i wok strong bambai ol inap mekim dispela wok long olgeta de, olsem mekim wok painia. Sampela i mekim haptaim, olsem long taim ol i kisim liv o ol i holide long skul, na sampela ol i mekim oltaim. Yumi olgeta wan wan i ken tingim dispela samting na skelim wok yumi yet i mekim bilong autim tok na kamapim ol disaipel. Yumi ken askim skin bilong yumi yet: ‘Mi insait tru long wok bilong autim tok bilong litimapim nem bilong God o nogat?’
15 Sampela Kristen bipo ol i save autim tok, nau ol i slek long wok. Ol i mekim liklik wok tasol o ol i mekim long wan wan taim tasol. Mipela i no tok long ol Kristen ol i gat sik o nau ol i lapun na ol i no inap mekim bikpela wok bilong autim tok olsem bipo ol i bin mekim. Nogat. Tasol long nau sampela Witnes, em ol i gat kain kain krismas, ol i no givim bel moa long mekim dispela nambawan bikpela wok. Pol i tok, ol Kristen i “no ken les” long mekim gutpela wok, na taim em i tok olsem em i no tingim ol yangpela Kristen tasol o ol lapun Kristen tasol. Nogat. Em i givim dispela tok long olgeta Kristen. Olsem na maski yumi yangpela o yumi lapun pinis, yumi mas wok strong bambai yumi inap autim tok long olgeta taim. Tasol sampela Kristen long nau i kisim tingting wankain olsem sampela Kristen long taim bilong Pol, na ol i ting olsem: ‘Inap planti yia pinis mi mekim wok, nau ol nupela Kristen i ken taitim bun na wok strong.’−Galesia 6:9; Hibru 12:3.
16 Wan wan tasol i kisim kain tingting olsem, tasol yu mas askim skin bilong yu yet: ‘Olsem wanem long mi? Mi slek liklik long wok? Nau mi no mekim bikpela wok olsem bipo mi mekim?’ Maski yumi slek long wok o nogat, tasol yumi olgeta i mas save, God “em i as bilong bilip bilong yumi,” em i tok promis long givim “biknem na bel isi long olgeta man i SAVE MEKIM gutpela pasin.” (Rom 2:10) Pol i kolim wanpela tok Grik, em insait bilong en i olsem: ‘Bilong wokim samting, o kamapim samting, o mekim wok.’ Olsem na yumi save yumi mas MEKIM WOK. Nogut yumi bihainim pasin bilong ol Farisi na ol saveman bilong lo na yumi litimapim nem bilong God long maus tasol. (Mak 7:6; Revelesen 2:10) Sapos yumi givim bel long mekim wok bilong autim tok, bai yumi kamapim long ples klia olsem yumi bilip tru, na bai yumi litimapim nem bilong Man bilong wokim yumi, em dispela Man i bin givim laip long yumi. Sapos yumi wok strong olsem, orait bai rot i op bilong Em i ken givim biknem long yumi o mekim gut long yumi, long nau na i go inap long olgeta taim bihain.−Luk 10:1, 2, 17-20.
Givim Ol Gutpela Samting Bilong Yumi Bilong Litimapim Nem Bilong God
17 Provep 3:9 i stori long narapela samting yumi ken mekim bilong litimapim nem bilong God, em i tok: “Yu mas kisim ol namba wan hap kaikai i mau long gaden bilong yu na givim long Bikpela olsem ofa, na dispela bai i givim biknem long em.” Narapela Baibel i tanim dispela tok olsem: “Givim ol gutpela samting bilong yu bilong litimapim nem bilong Jehova.”−A Translation of the Old Testament Scriptures from the Original Hebrew.
18 Sampela pris pasto i mangalim planti samting na ol i laik kisim gutpela sindaun tru, olsem na planti man i no laik givim mani samting long ol haus lotu na ol misin, em ol i tingting tasol long mumutim bikpela mani kago. (Revelesen 18:4-8) Tru, ol dispela man i mekim pasin nogut, tasol tok bilong Provep 3:9 em i stret. Spirit bilong God i as bilong dispela tok. Orait, olsem wanem yumi ken mekim wok long “ol gutpela samting” bilong yumi bilong litimapim nem bilong God “em i as bilong bilip bilong yumi”?
19 Long nau planti man moa i laik harim tok bilong Kingdom na ol i kam bung wantaim ol Witnes Bilong Jehova, olsem na ol Witnes i mas skruim Haus Kingdom bilong ol i go bikpela o wokim nupela Haus Kingdom. Em wanpela rot bilong “givim ol gutpela samting bilong yu bilong litimapim nem bilong Jehova.” Ol yangpela na ol lapun tu ol i bin helpim dispela wok. Sampela i pasim tok long bel long givim mani bilong helpim dispela wok, na bihain ol i mas bosim gut skin na ating lusim sampela samting bilong ol yet bambai ol inap givim mani inap olsem ol i tingting pinis long givim. Na sapos planti yia i lus namel long taim ol brata i tingting long wokim nupela Haus Kingdom na ol i sanapim pinis, orait ating bai ol i hatwok moa. (2 Korin 9:6, 7) Tasol sapos ol i givim mani bilong helpim ol kain wok olsem, dispela i litimapim tru nem bilong Jehova, long wanem ol Haus Kingdom i ples bilong lotuim Jehova long en. Ol Kristen na ol man i bung wantaim ol, ol i ken i go long ol Haus Kingdom bilong kisim save long Jehova. Tok bilong Jisas long Matyu 6:3, 4 i givim tingting long yumi na yumi ken bilip tru olsem God bai givim biknem long ol man i bin litimapim nem bilong em.
20 Tasol yumi mas was gut: Ol Farisi na ol saveman bilong lo ol i no tingim wok bilong litimapim nem bilong God em i nambawan bikpela wok; ol i wok strong long bungim mani bilong helpim ol yet. Olsem na Matyu 15:4-8 i tok, gutpela sapos yumi skelim yumi yet: Tru yumi mekim wok long mani kago samting bilong yumi bilong litimapim nem bilong God o nogat? (Jeremaia 17:9, 10) Olsem: Sapos wanpela Kristen i mekim wok bisnis na em i kisim bikpela mani liklik, ating em bai ting long wok i go yet na mekim dispela wok oltaim bambai em i ken kisim planti mani moa. Ating em bai tingting olsem: ‘Ol narapela i ken mekim wok painia o i go autim tok long ol hap i no gat planti Witnes long en, tasol mi bihainim narapela rot bilong litimapim nem bilong God−mi mas wok yet long kisim mani bambai mi gat bikpela mani moa na mi ken givim olsem ofa bilong helpim wok bilong God.’ Na tru, ating mani em i givim i helpim tru wok. Tasol gutpela sapos em i askim skin bilong em yet: “Sindaun bilong mi i kamapim long ples klia olsem mi laik litimapim nem bilong God na dispela em i nambawan tingting i kirapim mi long wok strong long kisim bikpela mani moa?” (Luk 12:16-19; lukim tu Mak 12:41-44.) Na em i mas askim skin bilong em yet, olsem: ‘Mi inap stretim ol wok bilong mi bambai mi ken mekim bikpela wok moa long nambawan bikpela wok bilong nau, em wok bilong autim tok?’ Maski yumi gat planti samting o yumi no gat planti samting, tasol yumi olgeta wan wan i mas skelim tingting bilong yumi na ol wok yumi mekim na askim skin bilong yumi yet, olsem: ‘Mi inap mekim bikpela wok moa bilong litimapim nem bilong Man bilong givim laip long mi, em dispela God “em i as bilong bilip bilong yumi”?
21 Jehova bai truim ol tok promis em i bin mekim long yumi. Yumi inap wetim gutpela samting tru i kamap, olsem: Ating long nau na inap long olgeta taim bihain, bai Jehova i mekim wankain tok long yumi olsem em i bin mekim long ol Isrel i stap gut long em, em i tok: “Yu bin kamap olsem gutpela samting long ai bilong mi, na mi tingim yu inap long kisim biknem, na mi yet mi laikim yu tumas.” (Aisaia 43:4, NW) Na Jehova i tok promis long givim “laip i stap gut oltaim oltaim” long ol man i “painim biknem” na ol i “stap strong long gutpela pasin.” Tru tumas, Jehova em i as bilong ol gutpela samting yumi ken bilip na wet long en!
Bai Yu Bekim Wanem Tok?
◻ Pasin bilong Jisas i lainim yumi olsem wanem long pasin yumi ol man i ken bihainim bilong litimapim nem bilong Jehova?
◻ Olsem wanem long Elai na Samuel na pasin bilong litimapim nem bilong God?
◻ Wanem sampela samting yu ken mekim bilong litimapim moa yet nem bilong God? Sapos yu mekim olsem, bai God i mekim Wanem?
◻ Ol man i putim wok bilong litimapim nem bilong God i nambawan wok bilong ol, ol i ken wetim wanem gutpela samting i painim ol?
2. Jisas i ting olsem wanem long litimapim nem bilong God?
3. Olsem wanem yumi save Jisas i bilip long Jehova na wetim em?
4. Jisas em inap tru long kisim wanem namba o biknem na em i kisim pinis? (Revelesen 5:12)
5. God i givim wanem narapela kain namba long Jisas? Olsem wanem dispela i litimapim tu nem bilong God?
6. I stret yumi laik bai ol man i litimapim nem bilong yumi o nogat? Tasol yumi mas was gut long wanem samting? (Luk 14:10)
7. Sapos ol man i litimapim nem bilong yumi, bilong wanem dispela i helpim yumi inap liklik taim tasol?
8. Elai i pundaun olsem wanem long pasin bilong litimapim nem bilong man?
9. Olsem wanem Samuel inap litimapim nem bilong Jehova?
10. Samuel i litimapim nem bilong God na olsem wanem God i givim biknem long Samuel?
11, 12. Yumi mas ting olsem wanem long litimapim nem bilong Jehova? Kolim wanpela samting yumi ken mekim bilong litimapim nem bilong God olsem.
13. Sapos yumi laik litimapim nem bilong God na yumi pret long mekim pasin em i no laikim, olsem wanem dispela inap helpim yumi?
14. Kolim narapela samting yumi ken mekim bilong litimapim nem bilong God. Ating yumi mas givim wanem askim long skin bilong yumi yet?
15. Sampela i mekim wanem long pasin bilong litimapim nem bilong Jehova long rot bilong autim tok?
16. Sapos yumi skelim tingting bilong yumi yet long dispela wok, olsem wanem dispela inap helpim yumi?
17, 18. Kolim narapela samting yumi ken mekim bilong litimapim nem bilong God. Bilong wanem i no stret sapos yumi les long mekim olsem?
19. Sampela ol i mekim wanem bilong bihainim tok bilong Provep 3:9?
20. (a) Bilong wanem i stret yumi mas skelim tingting bilong yumi bambai yumi ken bihainim tok bilong Provep 3:9? (b) I gat wanem ol askim yumi ken givim long skin bilong yumi yet?
21. Sapos yumi litimapim nem bilong Jehova long nau, wanem gutpela samting inap painim yumi?
[Blok long pes 20]
PAS BILONG SAMPELA I BIN GIVIM MANI
Em hia sampela tok bilong sampela pas ol brata i kisim long namba wan ofis bilong Sosaiti Was Taua long Bruklin, Nu Yok, long Amerika:
“Nem bilong mi Abaija. Mi gat 9-pela krismas. Mi laik givim $4.00 long yupela bilong helpim ol brata i wokim ol Haus Kingdom. Ol i ken mekim wok long dispela mani bilong baim plang o bilong baim loli; laik bilong ol.”−Oregon.
‘Mi salim sek wantaim dispela pas. Mi winim pinis 96 krismas na mi yaupas liklik, tasol mi save amamas long bungim mani bilong mi bilong helpim dispela wok. Tru, ka bilong mi i olpela, na mi no save lusim ples long taim bilong kol na i go i stap long ples hat long Florida o long Kalifonia. Mi inap mekim liklik wok tasol bilong autim Gutpela Tok bilong Kingdom long ol haus. Tasol sapos mi bungim mani na salim sampela long yupela, mi pilim olsem mi insait yet long dispela wok.’−Ohaio.
‘Tenkyu long olgeta samting yupela mekim bilong helpim Haus Kingdom. Dispela mani [$5.00] em bilong helpim yupela long wokim ol buk na Wastaua bilong mipela i ken kaunim. Mi bungim dispela mani long wanpela liklik botol. Tenkyu long buklet i stori long skul na i toksave long mipela long spakbrus na ol narapela kain drak.’
“Mi putim sek i stap insait. Inap olsem 200 dola em bilong wokim ol Haus Kingdom, na narapela hap bilong dispela mani yupela i ken mekim wok long en long rot yupela i ting em i gutpela bilong helpim wok bilong autim tok.”−Misuri.