“Yu Krais, Yu Pikinini Bilong God i Gat Laip”
JISAS i harim stori bilong ol disaipel long ol man i ting em i husat, na bihain Jisas i tok: “Na yupela yet i tok mi husat?” Saimon Pita i bekim tok, “Yu Krais, yu Pikinini Bilong God i gat laip.”−Matyu 16:15, 16.
Olsem wanem? Pita wanpela tasol i ting Jisas em i Pikinini bilong God? Nogat tru! Planti moa ol i ting olsem−lukim lista hia na as bilong dispela tingting bilong ol:
OL BILIPMAN BILONG PASTAIM: Jon Bilong Baptais, na ol disaipel olsem Nataniel na Mata, na Sol bilong Tasas, na sampela moa, ol i kolim Jisas olsem Pikinini bilong God. (Matyu 14:33; Jon 1:33, 34, 49; 11:27; Aposel 9:20) Ol i lukim ol samting i painim Jisas na ol samting Jisas i mekim olsem ol profet i bin tok Krais bai mekim, na dispela i strongim bilip bilong ol.
OL BIRUA BILONG PASTAIM: Ol Juda i laik kilim Jisas i dai ol i kolim em Pikinini bilong God. Na ol soldia i sanap taim ol i nilim Jisas long pos bilong kilim em i dai, ol tu i kolim em Pikinini bilong God. (Matyu 27:54; Jon 19:7) Tru, ating dispela i no makim ol i bilip olsem Jisas em i Pikinini bilong God, tasol em i makim olsem ol i save planti man i bilip olsem Jisas em i Pikinini bilong God na ol i tokaut long dispela bilip bilong ol. Na ol narapela kain samting i kamap long taim ol i nilim Jisas long pos na kilim em i dai, ol dispela samting i kirapim tingting bilong sampela na ol i ting, tru Jisas em i Pikinini bilong God.
OL ENSEL: Taim ensel Gebriel i tokaut long mama i karim pinis Jisas, em i tok Jisas em i Pikinini bilong God. (Luk 1:32, 35) Sampela man i gat spirit nogut i stap long ol na spirit nogut i kirapim ol long singaut olsem: “Yu Pikinini Bilong God, yu laik mekim wanem long mipela?” (Matyu 8:28-32) Taim Jisas i no kam daun yet long graun, em i bin i stap long heven, olsem na ol gutpela ensel na ol ensel nogut i save em i husat.
JISAS YET: Jisas i no save hambak na tok em i Pikinini bilong God bambai ol narapela man i ken laikim em o em i ken kisim biknem. Nogat. Em i save daunim nem bilong em yet na planti taim em i kolim em yet olsem “Pikinini Bilong Man.” (Matyu 12:40; Luk 9:58) Tasol sampela taim em i tokaut olsem em i Pikinini Bilong God.−Jon 5:24, 25; 10:36; 11:4.
GOD JEHOVA: Husat i moa save olsem Krais Jisas em i Pikinini Bilong God? Em God Jehova yet. Tupela taim Jehova yet long heven em i tok olsem: “Dispela em i Pikinini bilong mi. Mi laikim em tumas. Bel bilong mi em i gutpela long em.”−Matyu 3:17; 17:5.
God i Orait long Jisas−Olsem Wanem long Yu?
Long taim bilong ol aposel, planti tausen manmeri i bilip olsem Jisas em i Krais na God i bin salim em i kam, olsem em i tok promis pinis. Na ol i bilip olsem em i kam bilong stretim bek nem bilong Jehova, em i Bos tru bilong heven na graun, na bilong givim laip bilong em olsem pe bilong baim bek ol man. (Matyu 20:28; Luk 2:25-32; Jon 17:25, 26; 18:37) I gat planti birua bilong Jisas, olsem na ol man i kamap disaipel bilong em ol i mas bilip tru olsem em i Pikinini bilong God, na bai ol i no pret long bihainim em. Ol i strongim bel na ol i wok strong long mekim dispela wok em i givim long ol, em wok bilong kamapim ol disaipel.−Matyu 28:19.
Long nau planti milion disaipel Kristen i save, stori bilong Jisas i no wanpela stori nating−Jisas em i stap tru. Ol i bilip long em, em i King bilong Kingdom bilong God i kamap pinis long heven, na nau em i wok long stiaim ol samting bambai em i ken bosim dispela graun na ol wok bilong graun. Yumi amamas long harim tok long dispela Kingdom o gavman bilong God nau em i laik i kam na bosim graun, long wanem em bai pinisim ol hevi nau i stap long graun. Ol dispela Kristen tru i autim tok bilong dispela Kingdom long ol narapela man, na long dispela rot ol i kamapim bel bilong ol, ol i givim bel olgeta long dispela man em God yet i bin makim em bilong i stap King.−Matyu 24:14.
Ol man i givim bel long dispela Kingdom em ‘Krais, Pikinini Bilong God i gat laip’ em i bosim, ol dispela man bai inap long kisim ol blesing bilong oltaim. Yu tu yu inap kisim ol dispela blesing!
[Rait long pes 4]
Planti milion man bipo ol i no save gut olsem Jisas em i Pikinini bilong God o nogat, tasol nau ol i givim bel long em, em i King bilong Kingdom bilong God
[Piksa long pes 3]
Pita i luksave olsem Jisas em i ‘Krais, Pikinini Bilong God i gat laip,’ na ol witnes bilong Jehova long nau (winim 3 milion) ol tu i bilip olsem