‘Strong Bilong Jehova i Stap Long Ol’
“Long dispela pasin tok bilong Jehova i kamapim strong bilong en, na i kamap bikpela na i win.”−APOSEL 19:20.
1. (a) Long taim bilong ol aposel ol birua bilong lotu Kristen i sutim wanem tok long ol Kristen? (b) Taim Pol i raun na autim gutpela tok bilong Kingdom, ol man i mekim wanem? Tasol long olgeta taim wanem samting i stap long ol Kristen?
INAP 1,900 yia samting bipo, ol birua bilong gutnius na bilong wanpela misineri, em aposel Pol, ol i toktok planti na i tok: “Dispela ol man i mekim pasin nogut i kamap long olgeta graun, na nau ol i kam i stap hia. . . . Olgeta dispela man ol i save sakim tok bilong Sisa. Ol i save tok, ‘Narapela king i stap, nem bilong en Jisas.’ ” (Aposel 17:6, 7) Taim Pol i raun na autim gutpela tok bilong Kingdom bilong Jehova long ol man, ol i kirap nogut na ol i pilim tru −sampela i bel nogut long en na sampela i laikim, na sampela i mekim nogut long em. Ol i bin mekim nogut long ol narapela Kristen tu long taim bilong Pol. Tasol long olgeta taim “strong bilong [Jehova] i stap long ol.”−Aposel 11:21.
2 Husat tru i bin kirapim dispela wok misineri Kristen? Em Jisas yet. Em i narapela kain man tru, na tok em i autim i gat strong na i save kirapim tru tingting bilong ol man, na pasin bilong Jisas long bringim dispela tok i go long ol man em i narapela kain. Jisas em i Pikinini bilong God na em i go long lain Juda na i autim tok bilong Kingdom bilong God. Dispela tok i narapela kain tru long yau bilong ol na ol i kirap nogut long en. Tasol ol i no givim bel long dispela tok−ol i ting sapos ol i bihainim Lo bilong Moses, bai God i kisim bek ol.−Matyu 4:17; Luk 8:1; 11:45, 46.
“Long Olgeta Hap Bilong Graun”
3 Olsem na 3-pela de paslain long taim Jisas i dai, ol disaipel Juda bilong Jisas ol i kirap nogut taim em i tokim ol: “Na bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” Ating ol disaipel i tingting planti na ol i ting, olsem wanem ol inap autim dispela gutpela tok “long olgeta hap bilong graun.” Na ol disaipel i no bikpela lain, olsem na ol inap autim tok long olgeta hap graun olsem wanem? Ating ol disaipel i tingting planti long dispela samting.−Matyu 24:14; Mak 13:10.
4 Taim Jisas i dai na i kirap bek pinis, em i givim narapela tok long ol, em i tok: “God i givim mi bikpela namba long heven na long graun. Olsem na yupela i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” Em nau, ol disaipel i no gat narapela rot−ol i save ol i mas kisim tok bilong Bikpela bilong ol i go long “olgeta lain manmeri.”−Matyu 28:18-20.
5 Yes, bihain ol i mas mekim wok misineri long hap bilong ol narapela lain tu! Olsem wanem? Bai ol i strongim bel na mekim dispela wok o nogat? Inap 3-pela yia samting bihain Pita i kamapim tingting bilong em long dispela samting. God i givim wanpela driman long em, na long piksa em i lukim kain kain animal samting i no klin long Lo bilong ol Juda. God i tokim Pita long kaikai ol dispela samting. God i tokim em, ol samting bipo i no klin, nau ol i kamap olsem samting i klin pinis. Pita i harim dispela tok na em i tingting planti. Nau spirit bilong God i bringim Pita i go long haus bilong wanpela man i no bilong lain Juda. Nem bilong dispela man em Konilias, na em i wanpela man bilong Rom. Bipo Pita i ting sapos em i toktok wantaim ol man bilong ol narapela lain, em i brukim lo bilong God. Tasol taim em i kamap pinis long haus bilong dispela man, nau em i save, em laik bilong God yet na em i kam autim tok long Konilias. Pita i kirap autim tok long dispela man wantaim lain bilong em, na taim Pita i toktok yet, spirit holi i kam daun long dispela lain, na dispela i kamapim long ples klia olsem wok misineri Kristen i mas i go long ol narapela lain i no bilong lain Juda.−Aposel 10:9-16, 28, 34, 35, 44.
6 Bihain Pita i go bek long Jerusalem na em i tokim ol elda long dispela samting i bin kamap. “Ol i harim dispela tok bilong Pita, na ol i lusim dispela tok bilong ol. Ol i litimapim nem bilong God na i tok, ‘Olsem na God i tanim bel bilong ol arapela lain, bilong ol tu i ken i stap laip.’ ” (Aposel 11:18) Nau ol narapela lain tu ol inap harim gutpela tok bilong Krais na Kingdom bilong em!
Ol Misineri i Go long Ol Narapela Lain
7 Taim ol i kilim i dai Stiven, wok bilong autim tok i go bikpela, tasol nau dispela wok i senis. Ol man i mekim nogut long ol Kristen long Jerusalem na ol i go nabaut, na ol aposel tasol i stap long Jerusalem. Ol dispela Kristen i go long hap bilong Finisia na Saipras na Antiok na ol i autim tok long ol Juda tasol. “Tasol i gat sampela man namel long ol, . . . bilong Saipras na bilong Sairini, ol i go long Antiok na i autim tok long ol Grik tu. Ol i telimautim gutnius bilong Bikpela Jisas.” Jehova i ting olsem wanem long dispela wok misineri ol Kristen i mekim long ol man bilong ol narapela lain? Baibel i tok, “Strong bilong [Jehova] i stap long ol.” Ol dispela Kristen bilong pastaim ol i strongim bel na ol i no pret long autim tok, olsem na wok misineri i go kamap long ol hap klostu long Solwara Mediterenian. Tasol bihain dispela wok i mas i go bikpela moa yet.−Aposel 4:31; 8:1; 11:19-21.
8 Long yia 47-48 samting C.E., long rot bilong spirit holi, God i kamapim long ples klia wanpela rot bilong mekim wok misineri i go kamap long ol narapela narapela hap. Aposel 13:2-4 i stori long dispela samting na i tok: “Holi Spirit i tok, ‘Yupela i mas makim Banabas wantaim Sol bilong dispela wok mi bin singautim tupela long mekim.’ . . . Holi Spirit i salim tupela i go, na tupela i go daun long Selusia. Long Selusia tupela i kalap long sip, na sip i kisim tupela i go long Saipras.” Ating Pol na Banabas i amamas tru long kisim dispela wok! Em namba wan taim bilong tupela long i go long ol longwe hap na mekim wok misineri. Pol em i go pas long mekim dispela wok misineri Kristen, na dispela wok i mas i go yet inap long taim bilong yumi.
9 Baibel i stori long Pol i bin mekim 3-pela bikpela raun long wok misineri bilong em, na ol i bin kalabusim em na bringim em i go long Rom. Long ol dispela raun bilong em, em i bin kirapim wok autim tok long sampela biktaun long hap bilong Yurop, na em i autim tok bilong Kingdom long ol kantri na ailan nau yumi save kolim Siria, Saipras, Krit, Teki, Grik, Molta, Sisili. Na ating em i bin i go tu long Spen, tasol yumi no save tru long dispela. Em i bin mekim wok bilong kamapim ol kongrigesen long planti ples. Wanem samting i mekim na wok misineri bilong Pol i kamap gutpela tru na planti man ol i bilip?
Ol i Skulim Gut Ol Man
10 Pol i bihainim pasin bilong Jisas long skulim ol man. Olsem na Pol i save gut long pasin bilong pilim tingting bilong man na mekim tok i stret long dispela man yet. Em i gat save long skulim man, na em i save tu long pasin bilong lainim ol narapela long pasin bilong skulim man. Ol tok em i skulim ol man long en, em i kisim long Baibel. Em i no wok long kamapim save na tingting bilong em yet long ol man na bai ol i ting em i saveman. Nogat. Em i autim as bilong ol tok bilong Baibel long ol. (Aposel 17:2, 3) Na taim Pol i laik autim tok long ol, em i tingim pasin bilong ol man bilong dispela ples na wok bilong ol na sindaun bilong ol, na nau em i mekim ol tok i stret long ol dispela man na ol inap kisim gut. Em i tokaut long dispela pasin bilong em na em i tok: “Laik bilong mi yet na mi stap olsem wokboi nating bilong olgeta man, bilong mi ken kisim planti man moa. Olsem na long ai bilong ol Juda mi bin kamap olsem Juda, bilong mi ken kisim ol Juda. . . . Long ai bilong ol man i no gat lo, mi bin kamap olsem man i no gat lo, bilong kisim ol man i no gat lo. . . . Long ai bilong ol man i no gat strong, mi bin kamap olsem man i no gat strong bilong kisim ol man i no gat strong. Mi bin kisim pasin bilong olgeta man bilong traim olgeta rot na kisim bek sampela.”−1 Korin 9:19-23; Aposel 17:22, 23.
11 Pol wantaim ol wanwok Kristen bilong em ol i mekim gutpela wok. Maski wanem kain hevi i painim ol, ol i no les−ol i wok strong tru long autim tok long ol ples ol i go long en; na ol i kamapim ol kongrigesen long planti hap na ol i wok tu long strongim ol kongrigesen. (Aposel 13:14, 43, 48, 49; 14:19-28) Dispela wok Kristen bilong autim tok em i go kamap long planti hap tru, olsem na bihain Pol inap tok: “Bipo tok tru bilong gutnius i kamap long yupela, na yupela i harim. . . . Long olgeta hap graun dispela gutnius i save kamap bikpela . . . na mipela i autim long olgeta manmeri i stap long graun.” Tru tumas, wok bilong ol misineri Kristen bilong pastaim i bin kirapim tru ol man.−Kolosi 1:5, 6, 23.
12 Tasol bihain sampela man bilong kongrigesen Kristen ol i lusim bilip na ol i wok long kamapim ol bilip giaman insait long kongrigesen. Bipo Jisas na ol aposel i bin tokaut long dispela samting bai kamap. (Matyu 7:15, 21-23; Aposel 20:29, 30; 1 Jon 2:18, 19) Olsem na sampela handet yia bihain ol bilip bilong ol dispela Kristen giaman na bilip bilong ol haiden i karamapim na daunim gutpela tok bilong Kingdom. Ol misin giaman ol i kolim Kristen ol i salim ol misineri bilong ol i go long ol narapela narapela kantri, tasol ol i no i go bilong autim tok tru bilong Kingdom bilong God long ol man. Nogat. Ol i go bilong kisim ples bilong ol man na ol i subim ol man long i stap aninit long ol gavman politik bilong ol yet, em ol i bin salim ol i kam, na sapos ol man i no laik, orait ol dispela misineri i kilim ol i dai. Wok misineri Kristen tru i no gat moa, tasol em i no pinis olgeta.
13 Klostu long yia 1900 namba wan presiden bilong Sosaiti Was Taua, em Charles T. Russell, em i save ol ples i sot tru long ol misineri. Olsem na em i kirapim wanpela bikpela wok bilong autim tok, na em yet i go long planti hap bilong Amerika na i autim tok, na em i kisim sip na i raun long olgeta hap bilong graun na em i autim tok long planti kantri. Em i bin wokim planti buk samting i kamapim ol tok bilong Baibel na ol i wokim long 35 tok ples. Ol i tok em i bin raun inap olsem 1 milion kilomita samting na em i mekim planti pablik-tok, winim 30,000. Em i dai long yia 1916.
14 Namba tu man bilong kamap presiden bilong Sosaiti Was Taua em Joseph F. Rutherford. Em tu i pilim olsem ol kantri i sot tru long ol misineri bilong autim tok bilong Baibel. Long yia 1920 samting em i salim sampela man i gat save ol i go long ol narapela narapela kantri bilong kirapim wok bilong autim tok. Ol misineri i bin kirapim wok bilong autim tok bilong Kingdom long hap bilong Spen na Saut Amerika na Wes Afrika. Long 1931 Sosaiti i singaut long sampela brata i ken i go mekim wok misineri long hap bilong Spen na strongim wok bilong autim tok long dispela hap. Tripela yangpela man bilong Englan i tok ol i laik i go long Spen. Ol i wok inap 4-pela yia long autim tok long Spen, tasol insait long dispela taim planti hevi moa yet i painim ol na ol i hatwok tru long mekim dispela wok. Long 1936 bikpela pait bilong Spen i kamap na ol i mas ranawe i go bek long ples bilong ol, nogut ol i bagarap.
15 Bihain long 1940 wanpela nupela pasin i kamap long wok misineri. Namba 3 presiden bilong Sosaiti Was Taua i kamap, em Nathan H. Knorr. Sampela man ol i wok wantaim em, na ol i givim bel long wok bilong ol. Ating spirit holi i stiaim tingting bilong Brata Knorr na long 1942 em i tingting long kirapim wanpela skul misineri bilong helpim wok bilong autim tok taim Namba Tu Pait i pinis. Olsem na long mun Februeri, 1943 em i kirapim wanpela skul bilong ol misineri, ol i kolim Skul Giliat, long Provins Nu Yok. Dispela skul i gat 4-pela tisa na i lainim ol painia long mekim wok misineri, em ol man na meri tu. Baibel i as bilong ol save ol i kisim long dispela skul. Long olgeta 6 mun 6 mun i gat olsem 100 manmeri ol i lain long kamap misineri. Olsem wanem? Ol i bin mekim gutpela wok misineri?
16 Long 1943 i gat 126,329 Witnes ol i autim tok long 54 kantri. Tasol olsem wanem long nau? Inap 45 yia i go pinis na nau i gat bikpela lain moa yet, winim 3 milion, ol i autim tok long 212 kantri na ailan bilong solwara. I gat olsem 6,000 misineri ol i go long Skul Giliat, na yumi ken tok, ol dispela misineri i bin wok strong tru na nau bikpela lain Witnes i stap long olgeta hap. Ol dispela misineri i bilong 59 kantri, na kirap long taim dispela skul i kamap nupela na i kam inap long nau, ol i bin i go long 148 kantri. Inap 45 yia bipo i gat 100,000 Witnes tasol, na nau i gat tenpela kantri em olgeta wan wan i winim pinis 100,000 Witnes em ol i autim gutpela tok. Long planti bilong ol dispela kantri, ol misineri bilong Giliat i bin go pas long mekim wok bilong autim tok.
17 Taim yumi skelim wok bilong ol misineri long taim bilong ol aposel na wok bilong ol misineri long taim bilong yumi, yumi ken save, i gat wankain as na wok bilong ol i karim gutpela kaikai. Wanpela as i olsem: Ol i save painim rot bilong toktok wantaim ol man long kain kain taim na ples, na ol i save go long haus bilong ol man na toktok wantaim ol. Na tu, ol i save stadi wantaim ol man long tok bilong Baibel. (Jon 4:7-26; Aposel 20:20) Na narapela as em olsem: Ol i kamapim tok bilong Baibel long Kingdom bilong God tasol inap stretim tru ol hevi bilong ol man; dispela tok i klia tru na ol man inap kisim gut. (Aposel 19:8; 28:16, 23, 30, 31) Na planti misineri bilong yumi ol i save wok long ol hap em ol man i rabis na ol i sot long ol samting na ol i no gat gutpela sindaun, na taim ol i harim gutpela tok bilong Kingdom ol i ken save, stretpela gavman bilong God tasol inap helpim tru ol. Na namba 3 as em olsem: Jisas i bin skulim lain bilong em long mekim pasin sori long ol man, na ol misineri bilong yumi long nau ol i bihainim tok bilong Jisas na ol i mekim pasin sori long ol man bilong olgeta kain skin na bilong olgeta ples. Tru tumas yumi ken tok, insait long 45 yia i go pinis, ol misineri bilong Sosaiti Was Taua ol i bin mekim bikpela wok bilong helpim oganaisesen bilong Jehova long i go bikpela long olgeta hap bilong graun.−Rom 1:14-17; 1 Korin 3:5, 6.
Planti Moa i Kirap Mekim Wok Painia
18 Ol misineri bilong Giliat i bin givim bel long mekim wok bilong ol, na ating dispela pasin i bin kirapim ol narapela na ol tu i laik kamap painia. Olsem na long nau i gat planti tausen tausen witnes bilong Jehova ol i bihainim pasin bilong ol dispela misineri na ol i givim bel tru long wok bilong autim tok. Ol dispela lain ol i bihainim tru lek bilong Jisas.−Hibru 2:10; 12:2.
19 Bihain long 1960 i hatwok long Sosaiti i salim ol misineri i go long sampela kantri. Skul Giliat bilong Sosaiti Was Taua i wok yet long lainim ol nupela misineri na salim ol i go long ol narapela narapela hap em ol i sot long ol man bilong autim tok. Tasol long planti planti hap i gat bikpela wok tru i stap bilong ol manmeri ol i givim bel tru long mekim wok olsem painia. Planti ol i bin stretim rot bilong ol yet long i go long ol narapela kantri em ol i sot long ol man bilong autim tok. Olsem wanem long yu? Yu inap i go na wok wantaim ol? Sampela ol i mekim olsem pinis na ol i tok, tru ol i sot long sampela samting bilong helpim sindaun bilong ol, tasol planti ol i save tok, ol i no tingim ol dispela hevi, long wanem ol i kisim bikpela amamas tru long givim tok i tru bilong Kingdom long ol sipsip i stap long ol dispela hap i no gat planti wok bisnis na mani long en. Taim ol i mekim dispela wok ol i kisim gutpela pe tru, olsem ol i kisim “planti brata na planti susa na planti mama na planti pikinini,” na ol i kisim bikpela amamas long tokim ol dispela manmeri long gutpela samting ol yet i wet long kisim bihain, olsem “laip i stap gut oltaim oltaim.”−Mak 10:28-30.
20 Na i gat planti tausen tausen Witnes Bilong Jehova long nau ol i save mekim wok painia oltaim na painia haptaim long olgeta mun. Planti bilong ol dispela lain ol i save wok strong long autim tok long hap bilong ol yet. Long planti kantri ol dispela lain i save go pas long mekim bikpela wok long autim tok, na planti taim ol i mas i go autim tok long ol haus pastaim ol i bin autim tok long en. Ol i save mekim gut skin bilong ol na pes bilong ol i lait na ol i amamas, na dispela i kamapim long ples klia gutpela samting bilong Kingdom ol i wetim i kamap bihain. Na ol i kisim planti nupela pren na ol i helpim planti man long kisim save long tok i tru bilong Kingdom. Taim i gat planti painia i autim tok, ol aua ol i lusim long litimapim nem bilong God, ol dispela aua i go bikpela moa. Long hap bilong Japan planti Witnes Bilong Jehova pastaim ol i bilong lotu Buda. Insait long tenpela yia nau, long olgeta wan wan yia ol i kisim planti aua moa yet long autim tok, winim ol narapela kantri; Amerika tasol i winim Japan. Bilong wanem ol pablisa long Japan i winim planti aua olsem long autim tok? Long wanem planti ol i mekim wok painia, olsem: Long olgeta wan handet wan handet, klostu 50 ol i painia. Orait, olsem wanem long yu? Yu inap stretim rot bambai yu ken mekim wok painia? I no gat wanpela wok i winim dispela kain wok.
21 Na i gat ol narapela Witnes tu i ‘wok strong long mekim gutpela wok.’ (Taitas 2:14) Sampela em ol lapun, na sampela i gat sik, na planti ol i gat famili na ol i mas mekim wok mani bilong lukautim ol, na sampela em ol yangpela ol i stap yet long skul na ating ol i no inap mekim wok painia oltaim. Ol tu i ken givim bel long dispela wok olsem ol painia i mekim. Bilong mekim olsem, ol dispela pablisa i ken wok long strongim bel bilong ol painia na planti taim ol i ken wok wantaim ol painia long autim tok, na ol i ken givim bel long painim rot bilong autim tok long ol man. Ol yangpela i ken tingting strong long kamap painia bihain, na ol i ken putim dispela olsem mak ol i laik winim; orait taim ol i baptais pinis ol i ken mekim wok painia haptaim long sampela sampela taim. Ol i ken bihainim pasin bilong yangpela man Timoti na tingim gut dispela wok na bai ol i ken kamap strong wantaim ol narapela manmeri bilong God.−1 Timoti 4:15, 16.
22 Maski yumi gat wanem kain sindaun o yumi holim wanem kain wok, tasol yumi olgeta i mas larim spirit bilong Jehova i kirapim yumi long wok strong moa long mekim wok bilong em. Yumi laik bai ‘strong bilong Jehova’ i stap long yumi olgeta wan wan na bai ol man i ken lukim ol wok yumi mekim long strong bilong Jehova na ol i ken tok, “Long dispela pasin tok bilong [Jehova] i kamapim strong bilong en, na em i kamap bikpela na i win.”−Aposel 11:21; 19:20.
Sampela Askim Bilong Kamapim Gen Ol Bikpela Tok
◻ Wok misineri Kristen i kirap olsem wanem? Em i go inap long wanem ol hap?
◻ Pol i gat wanem wok long mekim wok misineri i go bikpela?
◻ Olsem wanem wok misineri i kamap strong gen nau long taim bilong yumi?
◻ Wanem samting i mekim na wok misineri na wok painia i kamapim gutpela kaikai?
◻ Olsem wanem yumi ken givim bel long mekim wok bilong autim tok olsem ol painia i mekim?
2. Husat i bin kirapim wok misineri Kristen? Em i kirapim dispela wok olsem wanem?
3. Jisas i bin mekim wanem tok profet na ating ol disaipel Juda i kirap nogut long en? Bilong wanem ol i kirap nogut?
4. Taim Jisas i kirap bek pinis, em i givim wanem tok long ol disaipel?
5, 6. (a) Olsem wanem na gutpela tok bilong Kingdom i kamap long ol man bilong ol narapela lain? Taim ol i harim dispela tok, wanem gutpela samting i kamap? (b) Taim Pita i tokim ol elda bilong Jerusalem long ol samting i bin kamap long Konilias, ol i mekim wanem?
7. Olsem wanem wok misineri Kristen i go kamap long ol kantri klostu long Solwara Mediterenian? Jehova i ting olsem wanem long dispela wok?
8. Olsem wanem God i kamapim long ples klia rot bilong mekim wok misineri i go kamap long ol narapela narapela hap?
9. Pol i bin mekim wanem gutpela wok taim em i raun long wok misineri bilong em?
10. Olsem wanem na wok bilong Pol i kamap gutpela tru?
11. Olsem wanem yumi save, Pol wantaim ol wanwok bilong em ol i mekim gutpela wok misineri? Wok bilong autim tok i go bikpela long dispela taim o olsem wanem?
12. Wanem samting i mekim na wok misineri bilong ol Kristen i pinis inap long sampela taim bihain?
13. Olsem wanem wanpela bikpela wok misineri i bin kirap long taim bilong nau? Inap long yia 1916 wanem gutpela samting i kamap long dispela wok?
14. Joseph F. Rutherford i mekim wanem bilong skruim wok misineri i go bikpela moa?
15. Long yia 1940 samting, wanem samting i kamap na dispela i helpim wok misineri long i go bikpela tru?
16. (a) Long yia 1943 i gat hamas Witnes i autim tok? Nau i gat hamas ol i autim tok? (b) Ol misineri i bin mekim wanem na ol i helpim dispela wok long i go bikpela olsem? Stori long dispela samting.
17. Wanem 3-pela samting i mekim na wok misineri bilong pastaim na bilong nau tu i kamap gutpela?
18. Husat ol i givim bel tru long autim Tok olsem ol misineri bilong skul Giliat?
19. Planti Witnes ol i gat wankain tingting olsem bilong ol painia na ol i mekim wanem? Ol i tok ol i kisim wanem gutpela samting long dispela?
20. (a) Long planti hap husat ol i mekim bikpela wok long autim tok? (b) Olsem wanem na Japan i kisim bikpela aua moa long autim tok, winim klostu olgeta narapela kantri? (c) Yumi mas tingim wanem askim?
21. (a) Sampela Witnes ol i no inap mekim wok painia oltaim, tasol ol i ken mekim wanem na bai ol i gat wankain tingting olsem bilong ol painia? (b) Ol yangpela i ken mekim wanem na bai ol i gat wankain tingting olsem bilong ol painia?
22. Maski yumi gat wanem kain sindaun, yumi mas tingting strong long mekim wanem? Sapos yumi mekim olsem, wanem gutpela samting bai kamap?
[Sat long pes 11]
Wok Bilong Kingdom Long 10-pela Kantri−1988
(long olgeta dispela kantri i gat bikpela lain pablisa, winim 100,000)
Kantri Ol Pablisa Ol Painia Aua bilong Hamas i Bung long Autim Tok Memorial
Amerika 797,104 96,947 161,478,732 1,822,607
Meksiko 248,822 32,117 58,061,457 1,004,062
Brasil 245,610 22,725 44,218,022 718,414
Itali 160,584 25,477 43,354,687 330,461
Naijiria 134,543 14,022 27,800,623 398,555
Japan 128,817 52,183 60,626,840 297,171
Jemani 125,068 8,416 22,020,942 215,385
Englan 113,412 11,927 22,103,713 211,060
Filapin 107,679 21,320 26,337,621 305,087
Frans 103,734 9,189 21,598,308 205,256
[Piksa long pes 6]
Pol tupela Banabas i go bilong mekim wok misineri