Wanem Samting i Pasim Rot na Yu No Kisim Baptais?
“Lukim, wara i stap. Wanem samting i pasim rot na mi no inap kisim baptais?”−APOSEL 8:36.
1. Wanem samting i bin kamap long rot i lusim Jerusalem i go daun long Gasa?
ENSEL bilong Jehova i tok pinis na nau wanpela samting em i kamap long rot i lusim Jerusalem i go daun long Gasa, na yumi mas tingim gut dispela samting i bin kamap. Wanpela karis i wokabaut long rot na wanpela man bilong Itiopia i sindaun long karis na kaunim Baibel. Nau wanpela man i ran i go klostu long karis. Em i tok: “Ating yu save as bilong dispela tok yu ritim, o nogat?” Na Itiopia i bekim tok olsem: “Sapos man i no soim rot long mi, bai mi inap save olsem wanem?” Evanselis Filip, em ensel i bin salim em i kam, em i soim rot long dispela man. Em i kalap na sindaun long karis na em i “telimautim gutnius bilong Jisas.” Taim em i kirap long stori em i kamapim wanpela tok profet em Aisaia i bin raitim.
2, 3. (a) Taim man bilong Itiopia i harim dispela gutnius, em i mekim wanem? (b) Olsem na i gat wanem ol askim?
2 Tupela i go yet long rot na Itiopia i kirap na tok, “Lukim, wara i stap. Wanem samting i pasim rot na mi no inap kisim baptais?” Em i tok na karis i sanap. Filip wantaim dispela man, tupela i go daun long wara na Filip i baptaisim em. Tupela i lusim wara na i kam antap na nau spirit bilong God i kisim Filip i go, na Itiopia i amamas na bihainim dispela rot bilong em na i go.−Aposel 8:26-39.
3 Sapos yu save bung wantaim ol Witnes Bilong Jehova, tasol yu no kisim baptais yet, ating dispela samting i bin kamap long bipo inap kirapim yu long askim olsem: Olsem wanem na dispela Itiopia inap kisim kwik baptais? Yumi mas baptais olsem wanem? Baptais i makim wanem samting? Wanem samting i pasim rot na mi no kisim baptais?
Em i No Baptais Kwiktaim Tumas
4. Dispela man bilong Itiopia em i husat?
4 Dispela Itiopia “i bin kam long Jerusalem bilong lotu,” olsem na yumi save em i bihainim lotu bilong ol Juda, na em i bin katim skin. Em i no inap long marit, tasol yumi save ol i no bin katim sem bilong em, long wanem kain man olsem i no inap insait long kongrigesen bilong Isrel. (Diuteronomi 23:1) Em i no inap long marit, long wanem em i wanpela wasman. “Em i bikpela man na i holim wok long Kandesi, kwin bilong ol Itiopia. Em i bosim olgeta mani samting bilong Kandesi.”−Aposel 8:27.
5. Olsem wanem na dispela Itiopia inap kisim kwik baptais?
5 Dispela Itiopia em i wanpela man bilong ol arapela lain. Tasol em i bin tanim bel na bihainim lotu bilong ol Juda, olsem na em inap long kisim baptais maski tok bilong Kingdom i no bin i go yet long ol man bilong ol arapela lain, olsem Konilias long yia 36 C.E., em ol dispela man i no save katim skin. Dispela Itiopia em i kisim lotu bilong ol Juda na em i save long God na long Baibel, tasol em i sot long sampela save long ol samting bilong spirit. Olsem na God i salim Filip i go autim tok long em, na Filip inap givim baptais long em maski gutnius i no bin i go yet long ol man bilong ol arapela lain.
Baptais Bilong Ol Kristen Bilong Pastaim
6. Man bilong Itiopia i kisim baptais olsem wanem? Olsem wanem yu save em i kisim baptais olsem?
6 Dispela man bilong Itiopia i kisim baptais olsem wanem? Dispela tok “baptais” i kam long wanpela tok Grik (ba·ptiʹzo) na insait bilong dispela tok Grik i olsem “putim i go insait, subim i go daun insait.” Taim dispela man bilong Itiopia wantaim Filip i “kamap long wanpela wara,” nau dispela Itiopia i tok em i laik kisim baptais. Tupela “i go daun long wara” bambai Filip i ken givim baptais long dispela man, na bihain “tupela i lusim wara na i kam antap.” (Aposel 8:36-39) Olsem na yumi save taim dispela man bilong Itiopia i kisim baptais, em i go daun insait olgeta long wara na em i baptais.
7. Husat i bin baptais insait olgeta long wara na em i stap olsem piksa bilong yumi ken bihainim?
7 Jisas yet em i baptais olsem−em i go daun insait olgeta long wara. Olsem na Baibel i tok, Jisas i kisim baptais pinis na “em i lusim wara na i kam antap.” (Matyu 3:13, 16) Jon Bilong Baptais i bin painim gutpela ples bilong givim baptais long ol man na em i makim wanpela hap long ples daun bilong Wara Jodan klostu long Selim. Bilong wanem em i makim dispela ples bilong givim baptais long ol man? Long wanem i gat bikpela wara i stap. Baibel i tok: “Planti wara i stap long dispela ples.” (Jon 3:23) Baibel i makim olsem i stret yumi mas baptais insait long bikpela wara.
8. Yumi skelim sampela pasin bilong ol Farisi na ol narapela Juda long bipo na dispela i givim wanem tingting long yumi long insait bilong dispela tok “baptais”?
8 Ol Farisi na ol narapela Juda long bipo ol i save bihainim pasin bilong ol tumbuna. Sapos yumi skelim sampela bilong ol dispela pasin bilong ol, dispela inap helpim yumi long kisim gutpela save long pasin bilong baptais. Mak i tok: “Ol i go long maket na ol i kam bek, na sapos ol i no waswas [tok Grik, ran·tiʹzo], ol i no save kaikai. Na ol i save bihainim planti arapela pasin tu ol i bin kisim long ol tumbuna. Ol i save wasim [tok Grik, ba·pti·smous’] kap na sospen na dis.” (Mak 7:3, 4) Ol dispela man i giaman long mekim pasin holi na taim ol i go long maket na i kam bek, ol i tromoi liklik wara [tok Grik, ran·tiʹzo] long skin. Tasol ol dis samting ol i putim kaikai long en ol i wasim [tok Grik, ba·pti·smousʹ], olsem baptaisim o putim i go insait olgeta long wara.
9. Tetulian i tok wanem long pasin bilong baptais?
9 Bihain ol Kristen giaman i kamap na ol i lusim bilip Kristen tru, tasol wanpela bikman bilong lotu bilong ol, em Tetulian (long yia 160-230 C.E. samting) em i stori long baptais na em i tok: ‘Ol i no save mekim sampela bilaspasin bilong lotu, o mekim planti samting bilong redi, o tromoi mani. Nogat. Ol i putim man i go daun insait long wara, na ol i mekim liklik tok tasol, na tromoi liklik wara long em, na bihain em i lusim wara i kam antap, na nau em i kamap klin liklik (o nogat), na bihain em inap long kisim laip i stap oltaim. Dispela samting i narapela kain samting tru na em i kamapim long ples klia gutpela wok bilong God, na i winim olgeta narapela samting i save strongim tingting bilong man long sakim pasin nogut, na i winim tu ol gutpela samting bai kamap long rot bilong dispela samting, olsem God i tok promis pinis long en.’ Yu lusim dispela tok bilong Tetulian? Em i tok, man “i go daun insait long wara, . . . na bihain em i lusim wara i kam antap.”
10. Ol saveman i tok wanem long pasin bilong ol Kristen bilong pastaim long givim baptais long ol man?
10 Ol saveman tu i tok, taim ol Kristen bilong pastaim i givim baptais long man ol i save putim em i go daun insait olgeta long wara. Wanpela bikpela buk bilong Frans i tok: “Ol Kristen bilong pastaim i save kisim baptais long wanem wanem hap i gat wara na ol i go insait olgeta long wara.” Na wanpela bikpela buk bilong ol Katolik em i tok: “Pasin bilong bipo long givim baptais long man, em olsem: Ol i save putim em i go daun insait olgeta long wara.”−Buk The Catholic Encyclopedia, Volyum 2, pes 261 (bilong yia 1907).
Lainim Ol na Givim Baptais long Ol
11. Jisas i givim wanem wok long ol disaipel bilong em?
11 Man i no ken baptais nating. Pastaim em i mas kisim stretpela save na em i mas bihainim. Krais i kamapim dispela samting long ples klia taim em i tokim ol disaipel bilong em: “Yupela i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim: Mi stap wantaim yupela olgeta de, inap long dispela taim i pinis.”−Matyu 28:19, 20.
12. Taim man i kisim baptais “long nem bilong Papa,” dispela i makim wanem samting?
12 Taim man i kisim baptais “long nem bilong Papa,” dispela i makim olsem em i save God em i Nambawan Bikpela na em i daun long Em. Em i daun long Jehova, long wanem em i save Jehova em i “God Antap Tru” na em i “bosim olgeta graun,” na em i Man bilong wokim olgeta samting, na em i King bilong heven na graun. (Sam 36:9; 83:18; 2 King 19:15) Na dispela man i save bilip olsem Jehova em i Jas bilong em, na Man bilong givim lo long em, na King bilong em.−Aisaia 33:22; Sam 119:102; Revelesen 15:3, 4.
13. Taim man i kisim baptais ‘long nem bilong Pikinini,’ dispela i makim wanem samting?
13 Taim man i kisim baptais ‘long nem bilong Pikinini,’ dispela i makim olsem em i save long bikpela namba Krais i kisim na em i daun long Krais. Na em i save, God i bin “baim bek olgeta man” long rot bilong Krais. (1 Timoti 2:5, 6) Jisas i stap gut long God i go inap long taim em i dai na bihain “God i litimapim em na putim em antap tru.” Olsem na ol man i laik kisim baptais ol i mas tokaut olsem “Jisas Krais em i Bikpela.” Na bai “nem bilong God Papa em i stap antap tru.” (Filipai 2:9-11) Na ol i mas bilip olsem Jisas em i “man bilong autim stret olgeta tok bilong God,” na em i “King bilong olgeta king.”−Revelesen 1:5; 19:16.
14. Taim man i baptais ‘long nem bilong spirit holi,’ em i mas mekim wanem?
14 Na man i mas baptais tu ‘long nem bilong spirit holi.’ Em i mas save, spirit holi i no wanpela man; em strong bilong God bilong mekim wok. Long dispela strong God i bin wokim olgeta samting, na long dispela strong em i bin givim tingting long ol man bilong raitim Baibel, na em i bin mekim ol narapela wok tu. (Jenesis 1:2; 2 Samuel 23:1, 2; 2 Pita 1:21) Ol man i laik baptais ol i mas save, spirit bilong Jehova em i bikpela samting bilong helpim yumi bambai yumi ken save long “olgeta tingting na pasin bilong God i hait pinis long yumi.” Na spirit bilong God tasol inap helpim yumi long bihainim ol gutpela pasin bilong God, olsem “pasin bilong sori, na amamas, na bel isi, na pasin bilong larim ol i rongim yumi, na pasin bilong helpim ol man na mekim gutpela pasin long ol, na wokabaut stret oltaim, na pasin bilong isi isi, na daunim laik bilong olpela bel.” (1 Korin 2:10; Galesia 5:22, 23) Na ol i mas save, yumi mas kisim: spirit bilong God bambai yumi inap mekim wok bilong autim tok bilong Kingdom.−Joel 2:28, 29.
Baptais i Makim Wanem Samting?
15. Olsem wanem na baptais Kristen i no tekewe sin?
15 Spirit holi i stap long Jon na em i givim baptais long ol man. (Aposel 13:24) Jon i baptaisim ol, i no bilong tekewe sin bilong ol; nogat; em bilong makim olsem ol i tanim bel. (Aposel 19:4) Jisas “i no bin mekim sin,” tasol Jon i givim baptais long em tu. (1 Pita 2:22) Na Ananaias i tokim Sol bilong Tasas: “Yu kirap na kisim baptais. Yu singaut long nem bilong [Jisas], na em i ken wasim yu na rausim sin bilong yu.” (Aposel 22:12-16) Olsem na taim Kristen i baptais long wara, dispela i no tekewe sin bilong em; nogat; blut bilong Jisas i kapsait pinis, dispela tasol inap tekewe sin, na man i mas ‘singaut long nem bilong Jisas’ bambai sin bilong em i ken tekewe.−Hibru 9:22; 1 Jon 1:7.
16. (a) Baptais i no tekewe sin, tasol em i makim wanem samting? (b) Long tok piksa wanem samting i kamap taim man i kisim baptais?
16 Taim Kristen i baptais, dispela i no tekewe sin bilong em, tasol i makim olsem em i dediket long God Jehova long rot bilong Krais. (Lukim Matyu 16:24.) Insait bilong dispela tok “dediket” i olsem ‘tokaut, o tok promis, o givim.’ Olsem na man i dediket long God em i givim em yet olgeta long God long rot bilong Krais bilong bihainim laik bilong God olsem em i tok promis pinis. Taim man i kisim baptais na ol i putim em i go daun insait long wara, long tok piksa i olsem ol i ‘planim’ em insait long wara na bihain ol i litimapim em i kam antap−em i lusim pinis ol pasin bipo em i bihainim, olsem em i ‘dai’ long ol dispela pasin, na em i kam antap bilong wokabaut long nupela laip, bilong bihainim laik bilong Jehova olgeta.−Lukim Rom 6:4-6.
17. Bilong wanem i no stret long givim baptais long liklik pikinini?
17 Olsem na baptais em i bikpela samting tru na man i laik kisim baptais em i mas tingting gut pastaim. I no stret ol i givim baptais long ol liklik pikinini, olsem ol bebi, long wanem bebi i no gat save, na em i no inap tingim wanem rot em i mas bihainim, o kamap wanpela disaipel. (Matyu 28:19, 20) Taim Filip i autim tok long Sameria “ol man na meri” i kisim baptais, i no ol liklik pikinini. (Aposel 8:4-8, 12) Baptais em bilong ol man na meri ol i bikpela pinis inap long ol i ken lain na kisim save, na ol i ken bilip, na ol i ken mekim ol wok i kamapim bilip bilong ol. (Jon 17:3; Aposel 5:14; 18:8; Hibru 11:6) Wanpela man bilong raitim stori bilong bipo (em Augustus Neander) em i stori long dispela samting na em i tok: ‘Bilip i save poromanim baptais, olsem na yumi ken save, . . . i no gat dispela pasin bilong givim baptais long ol bebi [long taim bilong ol aposel]. . . . Dispela pasin i bin kamap inap olsem 200 yia bihain na ol i tok ol aposel i as bilong en, tasol dispela pasin em i kamap bihain long taim bilong ol aposel na dispela samting yet i makim olsem ol aposel i no as bilong en.’−Buk History of the Planting and Training of the Christian Church by the Apostles (Nu Yok, 1864), pes 162.
18. (a) Man i mas mekim wanem, olsem Bai i tok, na em i ken kamap wanpela Witnes Bilong Jehova? (b) Man i mas mekim wanem ol wok bilong bilip na dispela bai makim olsem i stret em i ken baptais? (c) Wanem samting long taim bilong baptais i kamapim long ples klia olsem ol man i laik kisim baptais ol i mas bilip tru long ofa bilong Krais?
18 Taim Baibel i stori long ol man i kisim baptais, planti taim Baibel i tok ol i bilip na ol i kisim baptais. (Aposel 4:4; 5:14; 8:13; 16:27-34; 18:8; 19:1-7) Olsem na sapos wanpela man i laik kamap wanpela Witnes Bilong Jehova, dispela man i mas bilip−em i mas bilip na mekim ol wok bilong bilip na kisim baptais. Taim em i no kisim yet baptais, em i bilip na dispela i kirapim em long bihainim gutpela pasin bilong God, na givim bel long God Jehova, na mekim wok bilong autim tok bilong Kingdom, na em i bilip olsem ofa bilong Krais i baim bek em.Taim ol man i laik kisim baptais, man bilong mekim tok bilong baptais i save givim tupela askim long ol, na namba wan askim i kamapim long ples klia olsem ol i mas bilip tru long ofa bilong Krais. Dispela askim i olsem: “Long rot bilong ofa bilong Krais Jisas, yu hevi long ol rong yu bin mekim na yu tanim bel na yu dediket pinis long Jehova long bihainim laik bilong em?” Sapos man i tok, yes em i bin mekim olsem, na em i tok em i save olsem taim em i dediket na baptais pinis dispela samting i makim em i wanpela Witnes Bilong Jehova na em i insait long oganaisesen bilong God, em spirit bilong Em i bosim, orait i stret dispela man i ken kisim baptais.
Mekim Beten Bilong Dediket long God
19. Bilong wanem yumi mas mekim beten bilong dediket long God?
19 Ol man i kisim baptais ol i mas bilip long God na long Krais. Tasol bilong wanem ol Witnes Bilong Jehova i tok yumi mas mekim beten bilong dediket long God? Long wanem i stret yumi mas beten tokaut long Jehova long tingting bilong yumi, olsem yumi tingting pinis long lotuim em wanpela tasol na mekim wok bilong em wanpela tasol. (Diuteronomi 5:8, 9; 1 Kronikel 29:10-13) Long rot bilong beten, Jisas i bin tokim Papa bilong em long heven em i laik bihainim laik bilong Em tasol. (Hibru 10:7-9) Taim Jisas i kisim baptais “em i beten i stap”! (Luk 3:21, 22) Olsem na yumi ken save tru, i stret yumi mas mekim beten bilong dediket long God.
20. Olsem wanem yumi ken save, ol Kristen bilong pastaim i bin tokim ol nupela disaipel ol i mas mekim beten bilong dediket long God?
20 Ating ol Kristen bilong pastaim i strong long tokim ol nupela disaipel ol i mas mekim beten bilong dediket long God, long wanem Tetulian i tok: ‘Ol man i laik kisim baptais ol i mas beten planti taim, na tambuim kaikai, na brukim skru.’ Na paslain long dispela taim (olsem long yia 100-165 samting C.E.) Justin Martyr i bin tok, ‘Mi laik stori tu long pasin mipela bihainim bilong dediket long God taim mipela kamap nupela pinis long rot bilong Krais . . . ol man i bilip olsem ol tok mipela i lainim ol long en i stret na i tru, na ol i laik bihainim ol dispela tok, mipela save tokim ol, ol i mas beten, na ol i mas tambuim kaikai bambai God i ken orait long ol na sin bilong ol i ken tekewe, na mipela i save beten na tambuim kaikai wantaim ol.’
21. Sapos yu bin kisim baptais sampela yia bipo, maski ol i no bin tokim yu long mekim beten bilong dediket long God, tasol ating yu bin mekim wanem?
21 Sapos yu bin kisim baptais sampela yia bipo na long dispela taim ol i no strong long tok yu mas mekim beten bilong dediket long God, i no olsem baptais bilong yu i no stret. Nogat. Na long dispela taim bipo, maski ol i no strong long tokim ol man, tasol planti ol i bin beten taim ol i dediket long God. Wanpela brata em i bin dediket 40 yia bipo taim em i manki yet, em i tingim yet pasin em i bin mekim. Em i tok em i brukim skru na beten strong na tokim Jehova em i laik mekim laik bilong Em. Na bipo, sapos paslain long baptais man i no bin mekim beten bilong dediket long God, orait long taim bilong baptais em i mekim, long wanem taim brata i mekim pinis tok bilong baptais, bihain ol man i laik baptais na ol narapela brata sista i kam bung ol i save beten wantaim.
Bilong Wanem Sampela i Surik?
22. Bilong wanem sampela i surik long kisim baptais?
22 Dediket na kamap wanpela witnes bilong Jehova em wanpela gutpela samting tru yu inap mekim. Orait, bilong wanem sampela i surik long kisim baptais? Ating ol i no givim bel tru long God, olsem na ol i no bihainim tok bilong God na pasin bilong Jisas na kisim baptais. (1 Jon 5:3) Tru, ol man i no baptais ol i no tok ol i no laik bihainim pasin bilong Jisas o ol i no laik bihainim tok bilong God. Nogat. Tasol ol i givim bel tumas long ol samting bilong dispela graun na ol i no gat taim bilong mekim ol wok bilong God. Sapos dispela samting i pasim yu long kisim baptais, gutpela sapos yu kirap na givim bel na tingting bilong yu i go long God. Olsem bai yu bihainim savepasin. Ol man i laikim tru God, ol i no ken laikim tu pasin bilong dispela graun na olgeta samting bilong graun. (1 Jon 2:15-17) Nogut yu giamanim bel bilong yu na yu ting sapos yu “bungim planti mani” dispela inap lukautim yu na bai yu stap gutpela. (Matyu 13:22) Yu mas dediket long God Jehova; dispela samting tasol inap lukautim yu na bai yu stap gutpela.−Sam 4:8.
23. I gat wanem narapela samting na sampela i no laik dediket long Jehova na kisim baptais?
23 Sampela ol i tok ol i laikim tumas God, tasol ol i surik long dediket, long wanem ol i ting long dispela rot ol i ken abrusim ol wok em man i dediket pinis em i mas mekim, na ol i no ken kot long dispela. Ol i laik i stap long Paradais, tasol ol i no laik’ mekim ol wok ol i mas mekim, o ol i mekim liklik wok tasol. (Provep 13:4) Tasol ol i mas kamap long kot, long wanem ol i harim pinis tok bilong Jehova na ol i no bihainim: (Esikiel 33:7-9) Sapos ol i dediket long God, dispela bai kamapim long ples klia olsem ol i save long laik bilong God, na ol i laik bihainim laik bilong Em. Dispela i no ken putim hevi long ol. Nogat. Sapos ol i bihainim tok, bai ol i kisim blesing long Jehova, na bai ol i stap belgut na amamas long wanem ol i tok ol i laikim tumas Jehova na nau ol i truim tok bilong ol.
24. Na i gat wanem samting moa na sampela i surik long kisim baptais?
24 Na sampela i pilim olsem ol i no save gut long as bilong ol tok bilong Baibel bambai ol i tokim narapela man long en, na dispela samting i mekim na ol i surik long kisim baptais. Tasol man bilong Itiopia i toktok wantaim Filip long karis na kisim liklik save tasol na em i kirap na kisim baptais. Taim em i autim tok bilong God long ol narapela man, pastaim em i no inap bekim tok long olgeta man i givim askim long em. Tasol long bel bilong em em i pilim tru ol tok em i harim na em i tenkyu tru long God, olsem na em i no pret na surik. Baibel i tok: “Man i save laikim [God], em i no save pret. Sapos pasin bilong laikim [God] i kamap gutpela tru, orait em i save rausim pret.” (1 Jon 4:18) Maski man i gat bikpela save em inap bekim olgeta askim, i no dispela samting bai kirapim em long dediket long God na kisim baptais. Nogat. Tasol sapos long bel em i laikim tumas God, orait bai em i dediket long God na kisim baptais.−Luk 10:25-28.
25. Ol man i tok ol i laikim tumas God Jehova, em i laik bai ol i mekim wanem?
25 Sapos yu no baptais yet, askim skin bilong yu: Ol man i tok ol i laikim tumas God, God i laik bai ol i mekim wanem? Em i laik bai ol i givim bel olgeta long em, na ol i mas lotu long em “long spirit na long pasin i tru.” (Jon 4:23, 24; Eksodas 20:4, 5; Luk 4:8) Man bilong Itiopia i lotu olsem long God, na taim rot i op, em i no lusim taim−kwiktaim em i kisim baptais. Orait olsem wanem ? Gutpela sapos yu kirap kwik na beten strong na dediket long Jehova, a? Na gutpela sapos yu askim yu yet: “Wanem samting i pasim rot na mi no kisim baptais?”
Sampela Askim Bilong Kamapim Gen Ol Bikpela Tok
◻ Olsem wanem na man bilong Itiopia em inap kisim kwik baptais?
◻ Ol Kristen bilong pastaim i gat wanem pasin bilong baptais?
◻ Taim man i kisim baptais ‘long nem bilong Papa, na Pikinini, na spirit holi,’ dispela i makim wanem samting?
◻ Baptais Kristen i makim wanem samting?
◻ Bilong wanem yumi mas mekim beten bilong dediket long Jehova?
◻ I gat wanem samting na sampela i surik long dediket na baptais?