Ol i Autim Tok Bilong Kingdom Long Kain Kain Man Long Malesia
LONG Malesia 4-pela bikpela lotu bilong graun i stap, olsem na yu inap lukim ol haus lotu bilong ol Muslim i gat gol long rup bilong en, na ol ples lotu i gat alta samting, na ol haus lotu i gat taua olsem lata ol i sanapim ol piksa long en. I gat 16,000,000 manmeri i stap long hap bilong Malesia na ol i bilong kain kain lain, olsem ol Malai, na ol Saina, na ol Indian, na ol hapkas, na ol Iban, na ol Kadasan, na ol lain as ples tu. Ating i no gat narapela kantri i gat kain kain man na lotu na pasin na tok ples olsem i stap long Malesia.
Dispela kantri i stap long Solwara Saut Saina klostu long ekweta (i makim namel bilong not na saut) long hap bilong not. Malesia i gat olsem tupela hap bilong en−em poin bipo ol i kolim Malaia i stap long hap bilong san i go daun, na provins bilong Saba na Sarawak long ailan Boneo long hap bilong sankamap. Kirap long ol ples tais klostu long nambis na i go inap long bikbus antap long ol bikpela maunten−Maunten Kinabalu long Saba i go antap inap 4,101 mita−i gat kain kain man i stap na ol i gat kain kain pasin.
Ol Witnes Bilong Jehova i wok long autim “gutnius bilong kingdom” long ol dispela kain kain man. (Matyu 24:14) Olsem wanem ol inap autim tok long ol dispela manmeri i gat kain kain tok ples na pasin na tingting bilong lotu? I hatwok long autim tok long ol o nogat? Na wok bilong ol Witnes i kamap gutpela o olsem wanem?
Ol i Autim Tok long Ol Man i Gat Kain Kain Lotu
Ol Witnes long Malesia ol i mas autim tok long ol man i gat kain kain lotu, olsem na ol i mas lain long luksave long haus bilong ol man, em haus bilong ol man bilong lotu Muslim o lotu Hindu, o ol i bilong lotu Buda o lotu Tao, o ol i Talatala o Katolik. Ol inap luksave olsem wanem?
I gat sampela samting ol inap lukim i makim klia olsem ol man bilong haus i bihainim wanem lotu. Sapos i gat retpela alta i stap ol i ken save, ol man bilong haus i bihainim lotu Tao o lotu Buda. Sapos i gat piksa bilong Maria o bilong Jisas, orait ol i save, em haus bilong ol Katolik. Sapos ol i lukim ol lip bilong mango i stap, ol i save ol man bilong haus i bihainim lotu Hindu. Na sapos ol i lukim rait Arap bilong buk bilong lotu ol i kolim Koran i stap antap long dua bilong haus ol i save, ol manmeri long dispela haus i bihainim lotu Muslim.
Orait, ol i save pinis man bilong haus i bihainim wanem lotu, tasol nau ol i mas mekim sampela tok bilong kirapim em long putim yau na harim tok bilong Kingdom. Planti taim man bilong haus i save bekim tok long ol long hap tok Saina na hap tok Malai na hap tok Inglis, na bai em i tok: “Semua agama sama lah.” Na bihain em i mekim tok Inglis na em i tok: “Sorry, I am not interesting.” Em i amamas na em i tok, em i ting olgeta lotu i wankain tasol na em i no laik harim tok.
Planti manmeri bilong Malesia, em ol i kamap insait long famili bilong lotu Buda o lotu Tao o lotu Hindu, ol i lusim pinis lotu bilong ol tumbuna bilong ol. Tok bilong ol misin ol i kolim Kristen i grisim ol, long wanem ol dispela misin i tok, wantu tasol ol inap kamap Kristen, olsem na nau ol i bihainim kain kain lotu Talatala. Ol pasto bilong ol i kirapim planti bilong ol long sakim gutpela tok bilong Kingdom. Tasol ol Witnes i wok yet long autim tok long dispela kantri i gat kain kain man na lotu na tok ples, na ol i tokim ol man long nem bilong Jehova na long ol samting Jehova i laik mekim.
Ol Witnes Bilong Jehova i no les kwik na ol i pilim gut tingting bilong ol man, olsem na nau planti man i putim gut yau long tok bilong Kingdom na ol i bilip. Wanpela em Patrik, bipo em i save smok na gras bilong em i longpela na em i no save kom. Em i lain long ol pasin pait bilong ol Saina, olsem kung-fu na karate samting, na sapos wanpela samting i mekim em i belhat, kwiktaim em i kirap mekim pait. Em i ting em i bilong i dai tasol, olsem na em i pilim tru wanpela tok bilong Revelesen 21:4, em wanpela man bilong autim tok bilong Kingdom i kaunim long em. Dispela tok i olsem: “Bai ol man i no i dai moa.” Patrik i kirap long stadi na lainim ol tok bilong Baibel. Em i amamas tru long ol tok em i lainim, olsem na em i raitim pas i go long mama bilong em na tokim mama long ol dispela tok, na taim em i go bek na i stap gen wantaim mama em i toktok wantaim mama long ol dispela tok. Tasol mama i no laik harim na em i birua tru long Patrik.
Wanpela taim Patrik wantaim mama i wok long stretim liklik brata bilong Patrik, em tu i bin lain gut long dispela pasin pait ol i kolim karate. Liklik brata hia i kirap mekim dispela pasin pait na em i paitim na kikim Patrik, tasol Patrik i no bekim pait, em i stap isi tasol, na mama bilong em i kirap nogut tru. Nau mama i laik save long ol dispela tok Patrik i bin lainim na i bin kirapim em long senisim tru pasin bilong em. Kwiktaim bilip bilong mama i kamap strong, na 6-pela mun bihain em i kisim baptais. Nau mama i kirap na autim tok long lapun mama bilong em i gat 73 krismas na em i bilong lotu Buda. Lapun mama tu i amamas long harim tok olsem em inap kisim laip i stap oltaim. Em i no inap rit rait, tasol em i kirap lainim ol tok bilong buk Yu Inap i Stap Oltaim long Paradais long Graun. Em i wok long kisim save long planti rait bilong tok ples Saina na em i holim long tingting. Nau em tu i save autim tok bilong Kingdom.
Kain Kain Tok Ples na Pasin
Ol manmeri long Malesia i gat kain kain tok ples, olsem na taim ol Witnes i go autim tok, ol i mas pulimapim ol buk na nius bilong kain kain tok ples long paus bilong ol. Tasol maski ol i mekim olsem tu, planti taim i hatwok long ol i autim tok.
Olsem: Maski Witnes em i wanpela Saina na em i holim ol buk na nius long tok Saina, tasol taim em i go autim tok, sapos em i bungim wanpela Saina, ating bai em i no inap autim tok long em. Bilong wanem i olsem? I gat kain kain tok Saina na sapos Witnes i save long tok Saina ol i kolim Hokien, na man bilong haus i save long tok Saina ol i kolim Kantonis, olsem wanem bai tupela i toktok wantaim? Taim man i mekim tok Saina, nek bilong em i mas go antap na i go daun taim em i kolim sampela tok, na sapos em i kolim kranki bai em i mekim narapela kain tok tru. Olsem: Wanpela taim wanpela sista painia em i save long tok Saina ol i kolim Hokien, em i go autim tok long ol Saina i save mekim tok Kantonis. Sista i kolim kranki tok ples na em i raun tokim ol em i wanpela “sumatin i longlong,” tasol em i laik tok em i wanpela “sumatin bilong Baibel.”
Na maski man i kolim tok i stret, ating dispela tok i gat narapela narapela insait long en long narapela narapela man. Ol Malesia i bilong kain kain lain, olsem na ol i laik amamasim ol man bilong olgeta kain lain; ol i no laik skrapim bel bilong ol. Olsem na sapos wanpela man i tokim ol long mekim wanpela samting, bai ol i mekim tasol; ol i no ken sakim em. Na sapos ol i no save gut long dispela man, ol i no ken tru sakim em. Olsem na sapos yu tokim wanpela Malesia, ‘Yu laik stadi?’ o ‘Yu laik kam long miting?’ ating bai em i tok, ‘Mi laik.’ Tasol yu no ken kirap kwik na amamas na ting tru bai em i mekim. Nogat. Yu mas lain pastaim na bai yu inap save, husat i laik tru long harim tok na husat i tok nating tasol.
Long Malesia i gat planti holide na bikpela de bilong lotu na long ol dispela de ol i no go long wok. Ol i save raun lukim ol pren na famili bilong ol. Long kain taim olsem, ol Witnes long Malesia i save wok strong moa long autim tok. Tasol ol i mas bihainim gutpela tingting na mekim gutpela pasin isi bambai wok bilong ol i ken kamap gutpela long kain taim olsem.
Wanpela kain taim olsem em bikpela de Nuyia bilong ol Saina. Ol Tao i bilip olsem ol i mas mekim gutpela tok na gutpela pasin tasol long ol man long dispela de bambai ol yet inap i stap gutpela long dispela nupela yia olgeta. Olsem na taim ol Witnes i autim tok long dispela de ol i no kolim ol kain tok olsem “dai,” o “sik,” o “pen.” Taim ol i toktok wantaim wanpela man ol i mas stori long gutpela samting, na ol i save mekim kain tok olsem: “Yu inap i stap oltaim long nupela taim bilong bihain, na bai yu stap gutpela olgeta, no gat sik, na bai yu stap bel isi.” Dispela bikpela de bilong ol em i no taim bilong stori long ol hevi i save painim ol.
Long “Graun Bilong Ol Man
i Save Kisim Het Bilong Ol Birua”
Long hap bilong Is Malesia i gat kain kain lain as ples, na dispela i kirapim yumi long tingim tok bilong Baibel i tok, bai i gat bikpela lain manmeri i bung ol i bilong “olgeta lain man, na bilong olgeta graun, na bilong olgeta kain skin, na bilong olgeta tok ples.” (Revelesen 7:9) Bipo ol man i save kolim hap bilong Sarawak olsem “Graun Bilong Ol Man i Save Kisim Het Bilong Ol Birua,” tasol nau planti manmeri long dispela hap i bihainim tok bilong Kingdom.
Olsem: Long hap bilong nambis long Sarawak i gat wanpela taun i stap, ol i kolim Miri, na ol manmeri long dispela taun ol i wok bisnis long kisim wel. Fopela yia bipo i gat 3-pela Witnes tasol ol i autim tok long dispela taun. Tasol long nau planti manmeri long dispela taun ol i laik kisim save long ol tok bilong Baibel. Wanpela sista painia em i gat 17 Baibel-stadi, na sampela Baibel-stadi bilong em ol yet i mekim Baibel-stadi long narapela man i laik harim tok. Nau kongrigesen long liklik taun Miri i kamap strong.
Lain Iban bilong Sarawak ol i narapela kain−ol i save stap long ol longpela haus. Ol i save wokim longpela haus veranda i gat olsem 30 o 40 rum insait long en bilong ol famili famili; ol i wokim long strongpela diwai na morata. Ol i wokim arere long bus na klostu long wara. Ol Witnes i save autim tok long ol manmeri i stap long ol dispela kain haus.
Wanpela taim ol i laik mekim wanpela tok bilong Baibel long ol man bilong wanpela longpela haus olsem. Nem bilong tok i olsem: “I Gat Wanem Gutpela Samting Inap Painim Ol Man i Dai Pinis?” Hetman bilong haus, ol i kolim em tuai rumah, em i singautim olgeta i kam bung long rum bung, ol i kolim ruai. Olgeta i mekim gutpela pasin−ol i pasim maus na harim gut ol tok i go inap long tok i pinis. Nau, wanpela man i kirap na em i tok: “Olsem wanem na ol man i dai pinis ol i no save long wanpela samting?” Na narapela i strong long tok olsem olgeta gutpela man i go pinis long heven, na ol man nogut i stap long bikpaia. Tasol sampela i amamas long harim tok olsem ol inap i stap oltaim long paradais long graun, na ol i laik kisim sampela save moa long dispela samting. Kain samting olsem i bin kamap taim Pol i autim tok long ol Atens long Ariopagas long bipo.−Aposel 17:32-34.
Long narapela longpela haus wanpela man i stap, nem bilong em Juing Insoll, em i gat 72 krismas. Em i bilong lain Iban na em i save bihainim lotu Angliken. Taim em i yangpela em i laik save long bekim bilong ol kain askim olsem: Sapos God em i God bilong pasin sori, olsem wanem na em i salim ol man i dai pinis i go long bikpaia na givim bikpela pen long ol? Sapos tru God i stap, bilong wanem planti pasin i no stret i kamap? No gat wanpela man inap bekim gut ol dispela askim bilong em. Wanpela taim wanpela poroman bilong Juing i stap long biktaun em i kisim wanpela buk, nem bilong en Tok i Tru i Bringim Man long Laip Oltaim. Em i lukim dispela buk inap bekim ol askim bilong Juing na em i givim long Juing na tokim Juing bihain em i ken bekim dispela buk long em. Juing i amamas tru long dispela buk! Winim 60 yia pinis em i bin wok long painim save long tok i tru bilong pasin bilong God na nau em i kisim pinis dispela save!
Dispela buk em bilong narapela man, olsem na Juing i laik kisim wanpela bilong em yet. Em i raun inap 241 kilomita i go kamap long nambawan biktaun bilong Sarawak, em Kusing, na em i painim painim dispela buk long ol stua i gat ol buk long en. Em i painim painim, nogat. Long apinun em i go slip long haus bilong wanpela wanblut bilong em, na em i harim tok olsem narapela wanblut bilong em i bin kisim dispela buk. Ol i soim em Haus Kingdom i stap we na em i go kisim 15 kain kain buk na nius na kisim i go bek long longpela haus em i stap long en.
Juing i kaunim pinis olgeta tok bilong ol dispela buk na nius na em i go bek long biktaun. Em i tokim ol brata em i laik kisim baptais. Ol elda i amamas, tasol ol i tokim em, em i no inap long kisim baptais. Tasol ol i kirap nogut, long wanem i no longtaim na ol i save em inap tru long kisim baptais. Olsem na ol i baptaisim em! Em i kisim planti buk na nius moa bilong Baibel na em i go bek long longpela haus na em i kirap long autim tok long ol manmeri i stap klostu long em. Pastaim em i tingting planti, long wanem ol dispela pren bilong em i kaunim ol buk na nius em i givim long ol, tasol ol i no kisim kwik tok i tru. Bihain em i save, em i mas lainim ol long ol dispela tok, olsem na em i kirap mekim Baibel-stadi long ol. Taim Juing i salim ripot long ol brata long wok autim tok em i bin mekim, em i save stori long olgeta wok bilong autim tok em i mekim long olgeta de!
I gat wanpela taun i stap longwe, nem bilong en Lahat Datu. Dispela taun i stap long hap bilong provins Saba. Ol brata i bin kisim ripot i kam long dispela hap, olsem: Wanpela yangpela meri marit em i gat 3-pela pikinini em i bin kisim save long tok i tru long rot bilong ol pas wanpela sista long nambawan biktaun, Kota Kinabalu, em i salim long em. Bihain dispela meri i laik kisim baptais long kibung sekit. Brata bilong mekim tok bilong baptais em i mekim tok i stap na man bilong dispela meri i kam na tokim meri bilong em, em i mas lusim kibung na i go bek long haus wantaim em.
Ol i go bek long haus na man i laik mekim gut bel bilong meri bilong em, tasol nogat. Bihain em i les na em i tok: “ laikim wanem samting?” Meri i tok, “Mi laik kisim baptais.” Man i tok, “Dispela em i bikpela samting long yu?” Meri i bekim tok olsem: “Long tingting bilong mi, dispela em i nambawan bikpela samting.” Olsem na man i tok: “Orait, singautim elda bilong yu i kam−bai mi yet mi wokim wanpela swimin-pul na yu ken baptais hia.”
Na man i mekim olsem. Taim wasman sekit i kam long dispela hap, meri hia i kisim baptais long dispela swimin-pul man bilong em i bin wokim bilong em! Wanem samting i bin helpim dispela sista na em i strong long kisim baptais? Maski em i stap longwe long ol brata, em yet em i save stadi na redim olgeta tok bilong ol miting, na dispela i olsem em i go long miting. Sapos wanpela taim em i no redim ol tok i olsem em i “lusim” miting, na em i pilim olsem em lusim wanpela taim bilong kisim kaikai. Nau dispela sista i save lainim ol pikinini bilong em long ol tok bilong Baibel na em i gat 3-pela Baibel-stadi.
‘Liklik Lain i Kamap Planti Olsem Wan Tausen’
Long yia 1939 wanpela brata bilong Australia wantaim meri bilong em, em Alfred na Thelma Wicke, tupela i bin i go long Malesia na kirapim wok bilong Kingdom long dispela hap. Ol i bin mekim wok misineri inap olsem 50 yia nau na Jehova i bin blesim tru wok bilong tupela! Long yia 1972 Sosaiti i putim wanpela brens-ofis long Penang na makim Brata Wicke i stap wasman bilong brens. Bihain long dispela taim wok bilong Kingdom long Malesia i bin kamap bikpela kwiktaim. Long 1972 i gat 207 tasol ol i autim tok bilong Kingdom long dispela kantri, tasol 10-pela yia bihain dispela lain i go bikpela inap 3-pela taim. Olsem na long Julai 1983 ol i putim brens-ofis i go long Klang, em biktaun i stap long nambis klostu long nambawan biktaun, em Kuala Lumpur. Dispela nupela brens-ofis i olsem 3-pela haus i stap wantaim na olgeta haus wan wan i olsem tupela haus, wanpela daunbilo na wanpela antap. (Lukim piksa long pes 28.)
Sampela yia bipo ol i kirap long wok strong bambai ol inap autim tok long planti manmeri moa em ol i save mekim tok Saina o tok Tamil. Nau i gat tupela kongrigesen tok Saina, na long sampela narapela kongrigesen i gat liklik lain o grup ol i save mekim tok Saina o tok Tamil; na i gat grup bilong ol Japan tu, em 20 samting manmeri i save bung long en.
Nau long Malesia i gat 20 kongrigesen na klostu 900 pablisa. Sapos yumi skelim lain publisa wantaim olgeta manmeri i stap long Malesia i olsem wanpela pablisa i mas autim tok long 18,500 man. Olsem na i gat bikpela wok i stap yet. Yumi ken save lain Witnes inap i go bikpela moa long dispela hap, long wanem 2,633 manmeri i bin i kam bung long taim bilong Memorial long yia 1988. Ol Witnes long Malesia i amamas long dispela samting na planti moa i kirap mekim wok painia. Ol i wet tasol long winim 1,000 pablisa. Ol i save tingim gut tok promis bilong Jehova, em i bin tok: “Man i liklik em bai kamap planti olsem wan tausen, na man i liklik em bai kamap olsem wanpela bikpela lain. Mi Jehova, mi yet bai mi hariapim dispela wok long taim stret bilong en.”−Aisaia 60:22, NW.
[Mep long pes 28]
(Bilong save ol dispela rait i stap we long pes, lukim buk o magasin)
THAILAND
MALAYSIA
Penang
Kuala Lumpur
Klang
Singapore
MALAY PENINSULA
SUMATRA
EQUATOR
South China Sea
PHILIPPINES
SABAH
Kota Kinabalu
Mt. Kinabalu
Lahad Datu
BRUNEI
Miri
MALAYSIA
SARAWAK
Kuching
BORNEO
600 Km
400 Ml