Gutpela Rot Bilong Save Long Ol Samting Bilong Bihain
Stori Bilong Wanpela Meri Em i Painim Pinis Rot i Go long Laip
LOTU em i bikpela samting long famili bilong mi. Papa bilong mi em i wanpela Juda na maski em i kamap Katolik bambai em inap maritim mama bilong mi, em i laikim yet Baibel. Ol lain bilong mama i strong long lotu Katolik. Tupela sista bilong em i sister Katolik, na wanpela kasen-brata bilong em i pris, na tupela pikinini man bilong brata bilong em i bruder Katolik.
Long taim bilong namba 2 pait bilong olgeta hap, papa bilong mi i tingting planti na pret pret, nogut ol i kisim em i go putim em long wanpela banis kalabus nogut, long wanem em i wanpela Juda. Dispela pret i bagarapim papa na maski em i no lapun yet, em i dai. Mama i bilip tru olsem yumi gat tewel na em i save go bung wantaim ol lain i save toktok wantaim ol spirit, long wanem em i ting long dispela rot bai em inap toktok wantaim papa.
Taim mi bikpela pinis, mi bihainim yet lotu Katolik. Tasol dispela lotu i no helpim mi long save long ol samting bai painim mi long bihain. Husat inap helpim mi long save?
Mi bihainim pasin bilong mama na mi tu mi go askim long ol lain i save toktok wantaim ol spirit. Taim ol i bung, pastaim ol i save mekim mak bilong kruse na ol i save beten. Olsem na mi ting ol narapela kain samting mi lukim i kamap long dispela bung, em God i as bilong en. Long dispela taim mi kisim strongpela laik long helpim ol man i gat sik samting, olsem na mi insait long wanpela lain Katolik i save stretim rot bilong helpim ol sikman long i go long ples holi bilong ol Katolik long Lurts (Lourdes). Ol sikman i save go long dispela ples bilong wetim mirakel i kamap na bai sik bilong ol i pinis.
Mi no save liklik long ol Witnes Bilong Jehova, tasol wanpela taim man bilong mi i kisim tupela nius long ol na mi kaunim na mi laikim tru ol tok mi kaunim, long wanem ol i kolim ol tok bilong. Baibel bilong helpim ol dispela tok. Mi save kain nius olsem inap helpim mi long kisim save long ol tok bilong Baibel. Mi raitim pas long ofis bilong ol Witnes na tokim ol mi laik baim sabskripsen bambai mi ken kisim ol dispela nius long olgeta mun. Ol Witnes i kam lukim mi na mi kirap long stadi na lainim ol tok bilong Baibel.
Mi amamas tru long ol tok i tru bilong Baibel mi kisim save long en na mi kirap tokim sampela pren bilong mi long en. Mi mekim olsem long meri i gat wok long stretim rot bilong ol sikman i go long Lurts, tasol mi kirap nogut, long wanem em i belhat stret na mekim ol tok nogut tru long ol Witnes, olsem na mi lusim em i go. Na man bilong mi tu i birua long mi. (Matyu 10:36) Pastaim mi hatwok, tasol taim mi wok strong long bihainim ol gutpela tok mi kisim save long en, dispela i helpim famili na mipela i wok long sindaun gut wantaim. Mi kisim baptais long yia 1977.
Ol Witnes Bilong Jehova i bin helpim mi long save long ol gutpela tok i tru bilong Baibel, na mi save, long dispela as tasol mi inap save long rot i go long laip. Na mi save mi tu mi gat wok bilong helpim ol narapela man bambai ol i ken save long Jehova na long ol gutpela samting em i laik mekim long bihain. Bai mi mekim olsem wanem? Gutpela rot em olsem: Mi mas autim tok long olgeta de, olsem mekim wok painia. Tasol em hatwok, long wanem ol narapela long famili i bilong narapela lotu. Tasol mi bilip long Jehova na wetim em i helpim mi na soim rot long mi, na nau mi amamas tru, winim olgeta taim bipo, long wanem mi mekim wok painia oltaim. Nau mi bilip tru olsem Jehova em i “gutpela tru” na olgeta manmeri “i save bilip tru” long em ol i stap amamas.—Buk Song 34:8.