Insait Bilong Ol Tok i Kam Long Olgeta Hap
Bilong Wanem Yumi Mas Autim Tok?
Ol manmeri i go long lotu ol i no save autim tok, na sampela man i tok, dispela em i wanpela as na long nau lain bilong planti bikpela lotu i go liklik. Misin ol i kolim Yunaitet Sios bilong Krais i tingting planti long dispela samting, olsem na long yia 1988 ol i tok, inap 4-pela yia bai ol i wok strong long stretim dispela samting, olsem ‘kirapim lain bilong ol long autim tok na pulim ol nupela man i kam bambai lain bilong ol i go bikpela.’
Wanpela nius (St. Petersburg Times) i tok sampela narapela bikpela misin long Amerika, olsem Misin Presbitirian na Misin Episkopal, ol tu i kirap mekim olsem. Tasol long dispela taim ol i bin skelim tingting bilong ol manmeri long planti kongrigesen bilong Yunaitet Sios bilong Krais, winim 200, na nau ol i save, planti manmeri long lain bilong dispela misin i gat 1.6 milion memba, ol i no gat laik long toktok wantaim ol narapela man long bilip bilong ol. Wanpela i tok: “Sapos yumi save mekim gutpela pasin, bilong wanem yumi mas autim tok?” Na narapela i tok: “Sapos yu bihainim ol pasin i kamapim bilip bilong yu, i no gat wok long yu toktok wantaim ol narapela na autim bilip bilong yu.”
Tasol wanpela man (Wade Clark Roof) i wok wantaim narapela man long raitim wanpela buk (American Mainline Religion) i stori long ol bikpela lotu long Amerika, na em i tok, ‘ol man i mas tokaut long bilip bilong ol na long tingting bilong ol long God bambai dispela bilip i no ken lus.’
Sapos God i laik bai yumi “mekim gutpela pasin” na “bilip” tasol, bilong wanem aposel Pol i tok: “Sapos mi no autim gutnius, bai mi stap nogut tru”? Em i kamapim as bilong dispela long ol Kristen long Rom, em i tokim ol: “Sapos yu tokaut klia long Jisas em i Bikpela, na sapos long bel bilong yu yu bilip long God i bin kirapim bek em long matmat, orait bai God i kisim bek yu. Long bel yumi save bilip na God i kolim yumi stretpela manmeri. Na long maus yumi save autim bilip bilong yumi na God i kisim bek yumi.”—1 Korin 9:16; Rom 10:9, 10.
Ol i Pulim Mani long Rot Bilong Maritpasin
Wanpela profesa long Japan (em Mamoru Fukutomi) i go pas na em wantaim sampela man moa i bin skelim 390 nius na buk samting ol i bin baim long biktaun Tokio insait long wanpela mun. Long ol dispela nius na buk ol i wokim inap olsem 1,100 stori long ol piksa, olsem komik, na profesa i tok, planti stori tru (inap olsem 50 pesen) i gat piksa long man na meri i mekim maritpasin. Long ol stori bilong ol pikinini tu i gat kain piksa olsem.
Profesa i tok, ‘planti piksa olsem i makim man i subim meri long slip wantaim em na pastaim meri i no laik, tasol bihain meri i givim bel long mekim.’ Ol i bin skelim 6,861 piksa o poto long ol nius bilong Japan em planti manmeri i save lukim na ritim, na wanpela nius (The Daily Yomiuri) i tok, planti piksa tru (inap olsem 80 pesen) i piksa bilong meri “i sanap long pasin bilong pulim man.” Planti meri long ol dispela piksa “i pasim pans tasol, o klos bilong waswas long wara, o ol i no gat klos.” Wan wan tasol (olsem 40 pesen) i gat klos. Na inap olsem 75 pesen bilong ol man long ol dispela piksa ol i gat klos.
Dispela kain piksa bai mekim wanem long ol yangpela? Hap bilong Baibel ol i kolim Sindaun i stori klia long wanpela yangpela man “i no gat gutpela tingting” na em i go klostu long haus bilong wanpela meri pamuk. (Sindaun 7:7) Na meri pamuk i mekim wanem? Em “i no save sindaun gut long haus. Oltaim em i save raun raun long rot na long maket, bilong painim man,” na em i “holimpas” dispela yangpela man. (Sindaun 7:8-13) Nau long taim bilong yumi ol piksa na rait long ol nius i laik “holimpas” ol yangpela. Tasol Baibel i tok: “Yupela i no ken larim bel bilong yupela i kirap long bihainim dispela kain meri.”—Sindaun 7:25.
Husat i “Gutpela Kristen Moa”?
Kaunsil bilong Evanselikal Luteran Sios long Jemani i tok: “Maski Kristen i laik kamap soldia o bel bilong em i gat tok na em i no laik insait long ami, i no stret sapos em i hambak na em i ting olsem em i gutpela Kristen moa, winim narapela, na em i no ken tok, sapos man i gat narapela tingting long em, dispela man i no wanpela Kristen.”
Kaunsil i tokaut olsem long yia 1989. Tasol bilong wanem ol i mekim dispela tokaut? Ol bikman bilong misin i tok, ol i bin mekim dispela tokaut bilong daunim tok bilong sampela insait long misin, em ol i tok sapos bel bilong man i gat tok na em i no laik insait long ami, dispela i makim olsem em i gutpela Kristen moa, winim Kristen i mekim wok ami. Kaunsil bilong Misin i tok, tru sapos ol wan wan Kristen ‘i no mekim pait,’ dispela inap pinisim pasin bilong pait, tasol Kaunsil i tok, long rot bilong ami tu ol man inap pinisim pasin bilong pait na kamapim gutaim long graun.
Wanpela man (nem bilong em Edward Gibbon) em i bin raitim wanpela buk (History of Christianity) i stori long ol Kristen long taim bilong ol aposel na em i tok, ol dispela Kristen “i no laik insait long wok gavman o wok ami.” Na em i tok: “Ol Kristen i mas mekim wok bilong God, olsem na ol i no inap kamap soldia o jas o bikpela bos.”
Olsem na yumi no ken askim olsem: Husat i “gutpela Kristen moa”? Nogat. Yumi mas askim olsem: Man i bihainim pasin i no wankain long pasin bilong lotu Kristen bilong pastaim, em i wanpela Kristen o nogat? Pol i tok: “Tru, mipela i save stap long dispela graun, tasol mipela i no save pait olsem ol man bilong graun. Olgeta samting bilong pait mipela i holim, ol i no samting bilong dispela graun.”—2 Korin 10:3, 4.