Pasin Bilong Man Inap Senis

WANPELA saveman (Sir Isaiah Berlin) i tok: “Ol man i no ken wok tasol long daunim ol pasin nogut. Ol i mas wok long bihainim ol gutpela pasin.” Tasol yu ting planti man i bihainim ol gutpela pasin? Sori tumas, planti man i bihainim ol pasin nogut.

Long dispela taim long Inglan, pasin bilong pait na bagarapim man i go bikpela inap 11 pesen. Praim minista bilong bipo em i tok, “Mipela i gat wok long painim rot bilong pasim ol man long mekim pasin nogut, na bai lain bilong yumi i ken kamap strong na mekim ol gutpela wok.” Tasol yu ting ol lo na wok bilong gavman inap helpim ol man na bai ol i stretim tingting na lusim pasin nogut? Maski i gat ol strongpela lo bilong pasim ol man long mekim pasin nogut, tasol pasin nogut i stap na i wok long i go bikpela. Olsem na ol lo tasol i no inap pasim ol pasin nogut. Pasin bilong ol man i mas senis.

Baibel i stori long pasin nogut bilong ol man. Aposel Pol i raitim pas i go long ol Kristen long Galesia, na em i stori long ol dispela pasin nogut olsem “pasin pamuk na pasin doti na pasin bilong bel i kirap long mekim ol pasin nogut, . . . na pasin birua na belhat na kros na bel nogut na mangal . . . na pasin bilong bel kaskas long ol man i stap gut na pasin bilong spak na hambak na singaut bikmaus nabaut, na ol kain kain pasin olsem.” Wanpela Baibel (Today’s English Version) i tok ol dispela pasin nogut, em “pasin bilong ol man.”​—⁠Galesia 5⁠:​19-21.

As Bilong Dispela Hevi

Tasol dispela Baibel (Today’s English Version) i no kolim stret tok bilong Pol. Pol i mekim wok long wanpela tok Grik (sarx) na insait bilong dispela tok i olsem “skin”; Pol i no stori long “pasin bilong man.” Olsem na taim ol Baibel i tanim stret tok bilong Pol, ol i stori long “pasin bilong olpela bel” long dispela ves.

Baibel i tokaut klia long ol samting i bin kamap na sin i painim olgeta manmeri​—⁠tasol planti man i no bilip long dispela tok bilong Baibel. Pol i stori olsem: “Yumi save, wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5⁠:12) Pol i tingim stori bilong buk Stat, em namba wan hap bilong Baibel, em i stori long God i bin wokim namba wan man Adam, na meri bilong em Iv. Planti man i save tupela i bin bikhet long God, olsem na God i tok tupela i mas i dai. Sin bilong tupela i kamap long ol pikinini bilong ol, na ol tu i dai. Olsem na “yumi olgeta man yumi bin mekim sin.” Long dispela as, pasin bilong ol man long nau i narapela kain long pasin bilong namba wan man long taim God i bin wokim em na em i gutpela olgeta.​—⁠Rom 3⁠:23; Stat, sapta 2 na 3.

Man Inap Senisim Pasin!

Tasol man inap senisim pasin bilong em na lusim ol pasin nogut bilong em. Baibel i tok yumi inap senisim pasin bilong yumi, olsem lusim ol pasin bilong olpela bel. Yumi inap mekim olsem wanem? Spirit holi bilong God inap helpim yumi.​—⁠Rom 8⁠:⁠9.

Pol i raitim pas long ol Kristen long Kolosi, na em i tokim ol: “Yupela i mas rausim olgeta pasin bilong olpela bel, na kamap nupela man. God i mekim yupela i kamap nupela man, na oltaim em i save givim planti gutpela save long yupela, na em i mekim yupela i kamap wankain olsem em yet.” (Nupela Testamen bilong 1978) Sampela pasin bilong “olpela bel” em Pol i kolim, ol i kirapim ol man long mekim pasin bilong bagarapim samting o bagarapim man, olsem pasin bilong bel i kirap long mekim ol pasin nogut, na pasin bilong kros na belhat na bel nogut.​—⁠Kolosi 3⁠:​5-10.

Na Pol i raitim wankain tok long ol Kristen long Efesus, na em i tok, yumi mas “kamap ol nupela manmeri.” Na em i tok, God i mekim yumi i kamap nupela, na pasin bilong ol nupela manmeri ‘i stret na holi tru.’ Em i stori moa olsem: “Yupela i mas rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut. Yupela i mas mekim gutpela pasin long ol arapela Kristen na givim bel bilong yupela long ol.”​—⁠Efesus 4⁠:​24, 31, 32.

Olsem wanem? Yu ting tok bilong Pol i hatwok tumas long bihainim? Yu ting man inap senisim tru pasin bilong em na kamap nupela man? Ol stori bilong bipo i helpim yumi long save, ol Kristen bilong pastaim i bin senisim pasin bilong ol​—⁠bipo sampela ol i man nogut tru, tasol ol i bin senisim pasin bilong ol. Pasin bilong lain Kristen i narapela kain tru long pasin bilong ol narapela manmeri long dispela taim bipo. Jastin Matir, em wanpela man i bin stap long taim bilong ol Kristen bilong pastaim, em i stori long pasin bilong ol Kristen olsem: “Bipo mipela i man bilong birua long ol narapela man na wok long bagarapim ol, na mipela i nolaik tru long i stap wantaim ol man bilong narapela lain, long wanem, pasin bilong ol i narapela. Tasol Krais i kam, na pasin bilong mipela i senis. Nau mipela i sindaun gut wantaim ol man bilong narapela lain, na mipela beten askim God long helpim ol birua bilong mipela.”

Olsem wanem long nau? Yu ting ol man inap senisim pasin bilong ol olsem? Ol inap! Planti tausen manmeri i wok long mekim olsem. Nau mipela laik stori long wanpela.

Stiven i go bikpela long wanpela hap bilong Inglan i gat planti faktori long en. Papa bilong em i no bilip long God. Stiven i mekim planti pasin nogut na taim em i gat 12-pela krismas, polis i holim em na kot i putim em long wanpela kain skul kalabus bilong stretim ol manki, na em i mas i stap long dispela skul inap 3-pela yia. Long kot em i tokaut olsem em i bin brukim haus na stil inap 64 taim! Em i wok long i go bikpela na em i no pret moa long ol polis samting, na em i wok long mekim ol pasin i moa nogut. Em i giaman na kisim mani, na em i dring spak, na em i sakim lo na mekim nabaut, na em i paitim polis. Em i paitim polis na nau polis i holim em na em i go kalabus. Pasin bilong em i go nogut tru. Em i kamap man bilong pait. Em i tok, “Sapos man i no bilip long God, i no gat wanpela pasin nogut em i pret long mekim bambai em i ken kisim samting em i sot long en.”

Sapos bel bilong man i strong olsem, wanem samting inap helpim em long senisim pasin bilong em? Brata bilong Stiven em i kamap wanpela Witnes Bilong Jehova, na Stiven i orait long brata bilong em i helpim em. Stiven i stadi long Baibel inap liklik taim na dispela i kirapim em long wok long senisim pasin bilong em na kamap “nupela man.” Pasin bilong em i senis olgeta. Kirap long taim Stiven i stadi pastaim na i kam inap long nau, em inap olsem 5-pela yia, na nau Stiven i marit na i stap amamas, na em i mekim gutpela wok insait long wanpela kongrigesen bilong ol Witnes Bilong Jehova, olsem wokman bilong kongrigesen.

Olsem na sampela man inap senisim pasin bilong ol. Tasol yu ting pasin nogut bilong ol man, dispela samting tasol i mekim na ol lain bilong graun i laik bagarap?

Satan Bilong Baibel

Aposel Pol i mekim wanpela tok profet long “taim bilong las de.” Ol tok bilong em i stap long blok antap. Em i tok pasin nogut bai i go bikpela tru na dispela bai kamapim “planti hevi nogut tru.” Olsem wanem? Pasin nogut bilong ol man, em tasol i as bilong dispela samting?​—⁠2 Timoti 3⁠:⁠1.

Nogat. Narapela samting i as bilong en. I gat wanpela man nogut i stap, em i gat bikpela strong na em i kirapim ol man long bihainim ol pasin nogut. Sampela man i no bilip olsem yumi kisim sin long Adam, na ol i no bilip olsem i gat wanpela man i stap, em i gat bikpela strong na em i wok long kirapim ol man long bihainim laik bilong em. Baibel i tok, yumi no inap lukim dispela man, tasol em i stap, em Satan.

Dispela tok Satan (olsem “birua”) i stap planti taim long Baibel, na i makim wanpela spirit nogut. Tasol sampela man i tok, Satan i no olsem wanpela man tru, olsem wanpela spirit nogut. Ol i tok, ‘Satan bilong Baibel i olsem sin i stap long skin bilong yumi.’a Tasol long stori bilong gutpela wokboi bilong Jehova, em Jop, Baibel i kolim wanpela tok Hibru (has·Sa·tanʹ) i makim Satan i olsem wanpela man tru. (Jop 1⁠:⁠6) Na i wankain long Luk 4⁠:2 (Satan, tok Grik ho di·aʹbo·los). Dispela tupela tok i makim wanpela man na i no makim pasin bilong man.

Taim aposel Pol i raitim pas i go long ol Efesus, em i helpim yumi long save Satan i gat bikpela strong. Em i stori long “ol strongpela spirit . . . i save bosim graun long dispela taim bilong tudak, . . . olgeta spirit nogut i stap antap.” (Efesus 6⁠:12) Satan i stap na i gat sampela “strongpela spirit” moa i stap wantaim em, em ol ensel nogut. Ol i wok long “giamanim olgeta manmeri bilong graun,” na ol i wok strong long pulim ol sinman long mekim moa yet ol pasin nogut. (Kamapim Tok Hait 12⁠:⁠9) Olsem na Pol i tok strong long ol Kristen olsem ol i mas “sanap strong na sakim olgeta kain pasin bilong trik na giaman Satan i save hait na mekim.” Satan em i as bilong pasin nogut ol man i wok long bihainim long nau.​—⁠Efesus 6⁠:⁠11.

Senis Bai Kamap

Pita, em i bin i stap long taim bilong Pol, em i tokim yumi, Satan wantaim ol narapela spirit nogut bai pinis, na bai ol i no inap bosim moa ol manmeri. Pita i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3⁠:13) Klostu nau bai pasin nogut i pinis long dispela graun. Satan na ol ensel nogut bai bagarap olgeta. (Rom 16⁠:20; Kamapim Tok Hait 20⁠:​1-3) Long dispela taim bai ol man i bihainim pasin i litimapim nem bilong God, na olgeta man i stap long graun bai ol inap kisim laip i stap oltaim.​—⁠Rom 3⁠:⁠23.

Wanpela presiden bilong Amerika long bipo, em Thomas Jefferson, em i tok: ‘Bipo mi tok na nau mi laik tok gen, sapos man i skelim gut ol tok bilong Baibel, dispela bai helpim em long kamap gutpela man.’ Olsem yumi stori pinis, tok bilong Baibel i gat strong na sapos yumi larim dispela tok i bosim wokabaut bilong yumi, yumi inap senisim pasin bilong yumi. (Rom 12⁠:⁠2) Yumi inap bihainim ol gutpela pasin. Na sapos yumi poromanim ol manmeri i laik tru long bihainim gutpela pasin, dispela samting tu inap helpim yumi long bihainim. (Hibru 10⁠:​24, 25) Ol Witnes Bilong Jehova i laik tru long helpim yu. Gutpela sapos nau yu go toktok wantaim ol!

[Ol Futnot]

[Blok long pes 6]

“LONG TAIM BILONG LAS DE”—Tok Bilong Baibel

‘Tasol yu mas save olsem: Long las de bai planti hevi nogut tru i kamap. Bai ol man i laikim ol yet tasol, na laikim tumas mani. Bai ol i litimapim nem bilong ol na hambak nabaut, na tok bilas long God. Bai ol i sakim tok bilong papamama, na ol i no tok tenkyu. Bai ol i sakim olgeta pasin holi. Bai ol i no pren long ol wanblut, na ol i kros na tok baksait nabaut. Bai ol i no bosim laik bilong bodi, na bagarapim ol man nabaut, na birua long olgeta gutpela pasin. Bai ol i mekim nogut long pren bilong ol, na bihainim kwik olgeta tingting kranki. Bai ol i tingim ol yet i bikpela man, na laikim tumas ol kain kain amamas na ol i no laikim God. Bai ol i bihainim pasin bilong God long skin tasol. Yu mas surik long ol dispela man.’​—⁠2 Timoti 3⁠:​1-5.

[Piksa long pes 7]

Klostu nau bai pasin bilong ol man i litimapim nem bilong God