Ol Lain i Winim Skul Gileat i Kisim Presen Olsem Wok Misineri
LONG Mas 1, 1992 ol 22 manmeri bilong namba 92 klas bilong Skul Gileat ol i winim skul na ol i kisim wanpela presen—em wok misineri. Wanpela brata bilong Lain Bilong Bosim Ol Witnes, em Lloyd Barry, i tokim ol: “Yupela i mas amamas tru long kisim dispela gutpela presen, na yupela mas mekim wok long en bilong helpim ol narapela long i stap amamas.”
I gat 4,662 manmeri na ol lain bilong Betel em ol i bin singautim i kam long dispela bung bilong winim skul. Ol i bung long Haus Kibung Bilong Jesi Siti, long provins Nu Jesi. Na inap olsem 970 i bung long ol haus bilong Sosaiti Wastaua long provins Nu Yok, olsem long Bruklin na Walkil na Pateson. Ol dispela 970 i harim ol tok long rot bilong telefon. Olgeta i putim gut yau long ol tok ol brata i givim long ol sumatin em bilong helpim ol long tingim gut dispela gutpela presen ol i kisim, olsem wok misineri, na mekim gutpela wok long en.
Bilong kirapim program ol i givim bel long mekim singsing 155, nem bilong en “Amamas Long Ol Brata!” Bihain Frederick W. Franz, em presiden bilong Skul Gileat na i gat 98 krismas, em i givim bel long mekim beten na olgeta i pilim tru. Bihain siaman bilong dispela bung, em Carey Barber bilong Lain Bilong Bosim Ol Witnes, em i tok amamas long olgeta manmeri i kam bung, na em i tok: “Long dispela taim, winim olgeta taim bipo, i gat bikpela wok long ol misineri bilong Skul Gileat.” Em i mekim liklik tok na em i tok, nau bai ol i harim sampela sotpela tok bilong helpim ol.
Wanpela brata bilong Komiti Bilong Lukautim Haus Betel, em Curtis Johnson, em i toktok long “Lukautim Gut Gaden Bilong Yu.” Em i tok taim ol dispela nupela misineri i kamap pinis long ples wok bilong ol, olgeta wan wan bai i gat wanpela gaden bilong spirit ol i mas lukautim. (1 Korin 3:9) Lain bilong Jehova i olsem wanpela gaden bilong spirit i kamapim stretpela pasin na litimapim nem bilong God long ai bilong ol manmeri bilong olgeta lain. (Aisaia 61:11) Brata Johnson i tok, ‘Yu lukautim gut gaden bilong yu o nogat, dispela bai mekim na bai wok misineri bilong yu i kamap gutpela o i kamap nogut.’ Wanem samting bai helpim ol long lukautim gut dispela gaden? Em i tok: ‘Sapos yu tingting strong long kamapim ol wok i stret, na yu stap klostu long God long rot bilong beten, na mekim ol pasin i stret wantaim beten bilong yu, orait bai God Jehova i stap olsem banis bilong lukautim gaden bilong yu.’
Bihain Lloyd Barry i toktok long “Oltaim Yupela i Mas Amamas Long Bikpela.” (Filipai 4:4) Brata Barry i bin mekim wok misineri inap planti yia long Japan, winim 25 yia, olsem na em i gat save pinis long dispela wok na em inap givim sampela gutpela tok long ol dispela nupela misineri bilong helpim ol long amamas long mekim dispela wok. Em i tok: ‘Bai yupela i kisim save olsem amamas bilong yu long mekim wok bilong God, dispela bai helpim yu long sanap strong na winim planti hevi.’ (Sindaun 17:22) Em i kirapim tingting bilong ol sumatin bai ol i tingim nupela sindaun samting ating ol i mas lain long en. Na ating ol i mas lain long nupela tok ples tu. Em i tok: ‘Yu mas wok strong bambai yu inap lain long nupela tok ples, tasol taim yu inap toktok gut wantaim ol manmeri long tok ples bilong ol yet, dispela tu bai mekim yu i amamas.’
Wanpela brata bilong Komiti Bilong Haus Faktori, em Eldor Timm, em i toktok long “Lukluk i Go Long Prais.” Em wanem prais? Em prais bilong laip i stap oltaim oltaim! Bilong kisim dispela prais, oltaim yumi mas lukluk i go long en. Brata Timm i skelim ol Kristen i ran long resis bilong kisim laip wantaim ol man bilong spot ol i ran long resis long taim bilong ol aposel. Em i stori long ol samting bilong dispela tupela lain i wankain na ol samting i narapela kain. Olsem ol man bilong spot, ol Kristen tu i mas trening strong, na bihainim ol lo bilong resis, na lusim ol samting i laik pasim ol long ran strong. Tasol ol Kristen i narapela kain, long wanem, ol i mas ran long resis long olgeta de bilong laip bilong ol, na prais bilong ol i bilong oltaim oltaim. Na i no wanpela tasol bai kisim prais. Nogat. Ol Kristen i ran long resis i go inap long pinis, olgeta bai kisim prais. Bilong pinisim tok, Brata Timm i tok: ‘Bilong kisim prais bilong laip, yumi mas i stap wanbel wantaim Jehova, em Man bilong givim prais. Na bilong i stap wanbel wantaim Jehova, yumi mas i stap wanbel wantaim ol brata.’
Bihain Milton Henschel bilong Lain Bilong Bosim Ol Witnes i toktok long “Ol Tok Bilong Baibel i Strongim Bel Bilong Yumi na Mekim Yumi Wetim Gutpela Samting i Kamap.” (Rom 15:4) Em i tok, ‘Insait long 5-pela mun i go pinis, yupela i bin mekim bikpela wok long Baibel. Yupela i lainim gut. Yupela i bilip strong long ol gutpela samting yumi wetim. Nau yupela i laik i go long ples wok bilong yupela, na yupela i no ken lusim tingting long as bilong dispela strongpela bilip bilong yupela, em olsem: Yu lainim gut na bihainim gut ol tok bilong Baibel.’ Bilong helpim ol long save olsem wanem stori bilong Baibel inap strongim bilip bilong yumi long ol gutpela samting yumi wetim, Brata Henschel i kolim stori bilong Hetman sapta 6 i go 8. Dispela 3-pela sapta i stori long God i givim wok long Gideon bilong kisim bek ol Israel long han bilong ol Midian. Brata i kamapim gut dispela stori na ol samting stori i makim long nau, na em i tok: ‘Taim yu gat rot bilong lainim gut ol tok bilong Baibel na tingim gut ol dispela samting, dispela i strongim bel bilong yu.’
Olgeta i laik putim gut yau long laspela tok tupela bikpela tisa bilong ol sumatin i laik givim long ol. Tisa Jack Redford i mekim tok pastaim na em i toktok long “Mekim Pasin i Stret.” Em i tok: ‘Long Skul Gileat yupela bin lain gut long pasin i stret, olsem Baibel i kolim. Nau bai yupela i go mekim wok misineri long ol ples i gat hatwok. Na mipela i save, sampela hevi i hatwok long stretim bai painim yupela. Tasol maski dispela, na maski yupela i gat wanem tingting long dispela, mipela i save yupela inap mekim pasin i stret.’ Wanem samting inap helpim ol? Wanpela samting em olsem: Ol i mas i gat stretpela tingting long ol narapela man. Brata Redford i tok: ‘Yu no ken ting ol sinman inap mekim pasin i stret olgeta.’ Na sapos ol sumatin i gat stretpela tingting long hevi i kamap, dispela tu inap helpim ol. Em i tok, ‘Gutpela samting na samting nogut i save painim yumi olgeta. Taim gutpela samting i painim yumi, yumi no gat hatwok—yumi save amamas tasol. Tasol ol samting yupela i mekim taim hevi na traim i painim yupela, dispela bai mekim na bai yupela i stap strong long wok misineri o nogat.’—Jems 1:2-4.
Kuskus bilong Skul Gileat, em Ulysses Glass, em i toktok long “I Gat Wanem Gutpela Samting Bilong Bihain?” Em i mekim toktok olsem papa na em i kirapim ol sumatin long wok oltaim long strongim bilip bilong ol bai ol i bilip strong long ol gutpela samting yumi wetim i kamap long bihain. (Sindaun 13:12) Em i tok, ‘Taim bilip bilong yumi i wok long lus, pastaim yumi no pilim. Ating sampela samting i kamap na yumi tingim tumas ol hevi bilong yumi yet na yumi no tingim God na wok bilong yumi long i stap gut wantaim Em. Ating sik i painim yumi, o yumi ting narapela man i bin mekim nogut long yumi. O ating yumi tingim sampela brata i gat planti samting bilong skin, winim yumi, o wok bilong ol long autim tok i karim planti kaikai, winim bilong yumi, na yumi bel nogut long dispela. Sapos yumi larim kain tingting olsem i daunim yumi isi isi, i no longtaim na bai yumi no bilip strong moa long Kingdom, na ating bai yumi no ran strong moa long resis bilong kisim laip.’ Yumi ken mekim wanem? ‘Yumi mas kirap mekim ol samting bilong strongim bilip bilong yumi bambai yumi bilip strong gen. Yumi mas tingim gut na putim long bel bilong yumi olgeta tok promis bilong God i no inap lus nating, na yumi mas lukluk i go long Kingdom, em samting tru. Na yumi mas kirap gen long toktok long Jehova, na bai yumi kamap amamas gen.’
Brata Karl Klein bilong Lain Bilong Bosim Ol Witnes i mekim bikpela tok bilong dispela bung, nem bilong en i olsem: “Bilong Wanem Yumi Mas Bihainim Pasin Daun?” Brata Klein i bekim tok olsem: ‘Long wanem, i stret yumi mas mekim olsem, na sapos yumi mekim olsem, yumi bihainim gutpela tingting na pasin sori.’ Em i stori long 4-pela man i stap olsem gutpela piksa bilong pasin daun na yumi mas bihainim pasin bilong ol. Ol tok em i mekim i kirapim tru tingting bilong ol man i harim. Dispela 4-pela man em i stori long ol em olsem: (1) God Jehova, em i mekim pasin daun tru long ol samting em i mekim long Abraham na Moses (Stat 18:22-33; Namba 14:11-21; Efesus 5:1); (2) Krais Jisas, “em i daunim em yet na i bihainim tok bilong God, i go inap long em i dai” (Filipai 2:5-8; 1 Pita 2:21); (3) aposel Pol, em i ‘daunim nem bilong em olgeta na mekim wok bilong Bikpela’ (Aposel 20:18, 19; 1 Korin 11:1); (4) ‘ol hetman bilong yumi,’ olsem namba wan presiden bilong Sosaiti, em Brata Russell, em wanpela taim em i bin raitim tok olsem: ‘Dispela wok em Bikpela i amamas long mekim long rot bilong liklik save na strong bilong mipela, em i no wanpela wok mipela yet i bin kamapim. Nogat. Em wok bilong sanapim gen, na stretim, na mekim i wok gut wantaim.’ (Hibru 13:7) Brata Klein i kolim sampela samting moa i olsem strongpela as na yumi mas bihainim pasin daun. Sapos ol nupela misineri i bihainim dispela tok na mekim pasin daun, dispela bai helpim ol long mekim gutpela wok long dispela presen ol i kisim, em wok misineri!
Dispela tok i pinis, orait nau siaman i kaunim sampela tok ol brata long planti hap i bin salim bilong gude na amamas long dispela lain i winim skul. Na nau taim i kamap bilong ol sumatin i mas kisim pepa o setifiket bilong skul. Ol i kam long 7-pela kantri—Kanada, Finlan, Frans, Morisas, Netelan, Swiden, Amerika. Tasol ol bai go long 11-pela kantri bilong mekim wok misineri—em Bolivia, Estonia, Grenada, Guatemala, Honduras, Hangari, Morisas, Peru, Togo, Turki, Veneswela.
Long belo ol i malolo, na long apinun, bilong kirapim program i gat sotpela Stadi Wastaua, em Brata Joel Adams bilong Komiti Bilong Dipatmen Bilong Lukautim Wok i lukautim. Bihain ol sumatin i mekim sampela soim long sampela samting i bin painim ol long taim ol i skul na ol i bin autim tok, na las tru i gat pilai, nem bilong en: Bilong Wanem Yumi Mas Daun Long Oganaisesen Bilong God? Ol tok bilong dispela pilai i bilong strongim ol sumatin na olgeta narapela man i harim.
Tru tumas, ol dispela lain i winim skul ol i kisim planti gutpela tok bilong helpim na strongim ol na ol i go long ples wok bilong ol long ol narapela narapela kantri. Sapos ol i bihainim ol dispela tok bai ol inap mekim gutpela wok long dispela presen ol i kisim, olsem wok misineri, na helpim ol yet na ol narapela tu long i stap amamas.
[Sat long pes 22]
Ol Samting Bilong Ol Sumatin
Hamas kantri ol i kam long en: 7
Hamas kantri bai ol i go long en: 11
Hamas sumatin: 22
Krismas bilong ol, averes: 33.4
Hamas yia long tok i tru, averes: 16.7
Hamas yia ol i wok painia, averes: 11.8
[Piksa long pes 23]
Namba 92 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba 1 lain ol i sanap paslain, na namba 4 lain i sanap baksait tru. Taim yu kaunim nem bilong ol, lukim pes bilong ol i kirap long han kais na i go long han sut.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.