Mi Mekim Wok Long Taim Bilong Kisim Kaikai Long Gaden
STORI BILONG WINIFRED REMMIE
“PLANTI kaikai tumas i mau pinis long gaden, tasol i no gat planti wokman i stap bilong kisim.” Bikpela bilong yumi, Jisas, em i sori tru long ol manmeri em tingting bilong ol i paul nabaut na ol i stap nogut tru olsem ol sipsip i no gat wasman, na dispela i kirapim em long mekim dispela tok antap. Mi tu mi bin pilim olsem, na long olgeta taim inap 40 yia pinis mi wok strong long bihainim singaut bilong Papa bilong gaden long mekim wok bilong kisim kaikai i mau pinis.—Matyu 9:36, 37.
Mama i karim mi long Wes Afrika, na mipela olgeta 7-pela pikinini i pikinini meri. Papamama i mekim gutpela pasin sori long mipela, tasol ol i putim strongpela lo tu long mipela; na ol i man bilong lotu. Ol i strong long mipela i mas i go long lotu na Sande-skul long olgeta wik—mipela i no inap abrusim dispela samting. Tasol dispela i no putim hevi long mi, long wanem, mi laikim tru ol samting bilong God. Olsem na taim mi gat 12-pela krismas ol i makim mi bilong lukautim ol klas bilong Sande-skul.
Marit na Raun
Long 1941, taim mi gat 23 krismas, mi maritim Lisfil Remi (Lichfield Remmie), em i mekim wok kuskus long wanpela ofis bilong gavman. Mipela i gat gutpela sindaun, tasol mipela i laik raun, na mipela laik bungim planti mani kago, olsem na long yia 1944, mipela i go long kantri Laibiria. Long 1950 bikpela senis i bin kamap long laip bilong man bilong mi, na bihain i kamap long laip bilong mi tu. Long dispela taim em i bin toktok wantaim wanpela misineri bilong ol Witnes Bilong Jehova, nem bilong em Hoil Ervin (Hoyle Ervin). Man bilong mi i kirap long stadi na lainim tok bilong Baibel, na 3-pela wik tasol bihain, em i kirap long mekim wok autim tok.
Mi bel hevi tru taim man bilong mi i no go moa long lotu bilong mipela, long wanem, bipo em i strong long bihainim lotu Talatala, na em i no kaikai mit long taim bilong tambuim mit, olsem Len. Namba wan taim mi lukim em i holim paus na i laik i go autim tok, mi kros nogut tru na mi tok: “Yu olsem wanem? Yu man i gat namba na yu laik autim tok wantaim ol dispela longlong man!” Mi tok kros olsem, tasol em i stap isi.
Long de bihain, Brata Ervin i kam long haus bilong mipela bilong stadi Baibel wantaim Lisfil. Mi no sindaun wantaim tupela, na ating long dispela as Brata Ervin i tokim mi, ‘Yu no save long rit rait, a?’ Mi sem nogut tru! Mi bin skul na mi laik kamapim save bilong mi na kamapim klia olsem lotu bilong em i lotu giaman!
Mi Kisim Tok i Tru
Bihain liklik, mi lukim wanpela buk i stap long tebol, nem bilong en “God i Save Mekim Tok Tru Oltaim” (Let God Be True). Mi ting, ‘Nem bilong dispela buk i kranki stret. Yumi olgeta i save, i no gat wanpela taim God i bin mekim tok giaman.’ Mi lukim sampela tok moa long dispela buk na i no longtaim na mi kros long narapela tok bilong en, em buk i tok man i no gat tewel! Na tu, buk i tok ol dok na pusi i gat laip wankain olsem man! Mi kros nogut tru long ol dispela tok. Mi ting olsem ‘Em i longlong tok.’
Taim man bilong mi i kam bek long haus, mi kros na tok olsem: “Ol dispela man bilong giaman ol i tok yumi no gat tewel. Ol i profet giaman!” Man bilong mi i no tok kros; long pasin isi em i tok: “Wini, olgeta dispela tok em i stap long Baibel.” Bihain mi kirap nogut taim Brata Ervin i opim Baibel bilong mi yet na long pasin isi em i soim tok long mi olsem yumi no gat tewel na taim yumi dai yumi dai tru. (Esekiel 18:4) Mi laikim tru dispela tok i stap long Stat 2:7, olsem: “Man [Adam] i kisim laip.” Man i no kisim tewel; em i kisim laip.
Nau mi save, bipo mi kranki tru! Mi pilim olsem ol pris pasto i bin giamanim mi na mi no go moa long lotu. Mi kirap long go long ol miting Kristen bilong ol Witnes Bilong Jehova. Mi kirap nogut long lukim narapela i laikim tru narapela! Mi pilim olsem dispela em lotu i tru.
Mekim Wok Bilong Kisim Kaikai Long Kep Pamas
Tripela mun samting bihain, rot i op long man bilong mi inap stilim bikpela hap mani long kampani bilong em—tasol em i no mekim. Ol wanwok bilong em i tok bilas long em olsem: “Remi, yu no inap kamap maniman—bai yu stap rabis inap long yu dai.”
Tasol kampani i save em i man bilong stretpela pasin, olsem na ol i givim bikpela wok moa long em na salim em i go long Kep Pamas bilong opim nupela ofis. Mipela i givim bel long autim tok long dispela hap, na tupela mun tasol bihain i gat liklik lain ol i laik tru long harim ol tok bilong Baibel. Bihain, taim Lisfil i go long nambawan biktaun Monrovia bilong kisim sampela samting bilong nupela ofis, em i kisim baptais. Na tu, em i askim Sosaiti long salim sampela helpim i kam long Kep Pamas bilong lukautim dispela lain ol i laikim tumas ol tok i tru.
Olsem na Sosaiti i salim Brata na Sista Faust i kam long Kep Pamas. Sista Faust i bin helpim gut mi, na long Disemba 1951 mi kisim baptais bilong makim olsem mi dediket pinis long Jehova. Orait, nau mi strong moa long mekim wok bilong “bungim kaikai bilong laip i stap gut oltaim oltaim.” (Jon 4:35, 36) Long Epril 1952, mi kirap mekim wok autim tok long olgeta de, olsem mekim wok painia.
Kwiktaim Jehova i blesim ol wok mi mekim, na insait long wanpela yia tasol mi helpim 5-pela manmeri long dediket na kisim baptais. Wanpela bilong ol (nem bilong em Louissa Macintosh), em kasen sista bilong W. V. S. Tubman, em presiden bilong Laibiria long dispela taim. Em i kisim baptais na kirap mekim wok painia, na em i stap gut long God inap long taim em i dai long 1984. Wan wan taim em i bin autim tok long presiden.
Mipela i Go Long Biukanan Daunbilo
Long 1957, taim wasman distrik i kam lukim mipela, em i singautim mipela long mekim wok painia salim. Mipela i beten na toktok gut wantaim na bihain mipela i orait long mekim dispela wok. Tasol pastaim Lisfil i mas i go long Kep Pamas inap sampela mun bilong pinisim wok bilong em long dispela hap, olsem na mi go paslain long em long Biukanan Daunbilo na kirapim wok bilong Jehova long dispela hap. Taim mi kamap pinis, wanpela famili (Maclean) i givim ples slip long mi. Long de bihain, ol i bihainim pasin bilong ples na kisim mi i go lukim namba tu hetman bilong lain Pele. Dispela hetman wantaim famili bilong em ol i mekim gutpela tok amamas long mi na mi autim tok long liklik lain i kam bung long haus bilong em. Dispela hetman na meri bilong em wantaim 4-pela narapela bilong dispela lain mi bin autim tok long ol long dispela de, bihain ol i kamap Witnes Bilong Jehova.
I no longtaim na mi mekim Stadi Wastaua wantaim 20 samting manmeri. Oltaim mi save beten askim Jehova long helpim mi, na em i strongim mi na inapim mi long lukautim ol sipsip bilong em. Taim skin bilong mi i les o mi pilim olsem mi no inap, mi save tingim ol manmeri bilong bipo ol i bin i stap strong long bilip; mi save tingim tru ol meri, olsem Debora na Hulda, em ol i no pret long mekim wok Jehova i bin tokim ol long mekim.—Hetman 4:4-7, 14-16; 2 King 22:14-20.
Mi stap 3-pela mun long Biukanan Daunbilo na nau, olsem long Mas 1958, mi kisim wanpela pas i toksave olsem wasman sekit, nem bilong em Jon Saruk (John Charuk), bai kam lukim mipela. Mi baim, olsem rentim, wanpela rum daunbilo long wanpela haus, em dispela rum i bikpela inap long planti i kam bung long en. Mi go long Biukanan Antap bilong bungim Brata Saruk, tasol em i no kam. Mi wet i go inap long tudak na nau skin bilong mi i les na mi go bek long Biukanan Daunbilo.
Long biknait mi harim wanpela man i paitim dua. Mi opim dua na lukim Brata Saruk i stap na man bilong mi tu. Gutpela tru tupela i kam wantaim. Olsem wanem ol i save mi stap we? Ol i bin bungim wanpela man bilong painim abus na ol i bin askim em, em i save long wanpela meri i save autim tok bilong Jehova long ol man. Man ya i tok, “Yes,” na em i stiaim ol i go long ples slip bilong mi. Mi amamas tru, long wanem nau mi save, insait long dispela 3-pela mun mi bin stap long Biukanan Daunbilo, pasin na wok bilong mi i bin kamap olsem bikpela lait long ai bilong ol manmeri!—Matyu 5:14-16.
Taim Brata Saruk i kam, planti ol i kam bung na harim tok, na wanpela taim inap olsem 40 ol i kam. Kwiktaim wanpela strongpela kongrigesen i kamap, na mipela i wokim wanpela gutpela Haus Kingdom. Tasol sampela hevi tu i bin painim mipela. Olsem: Long 1963, long Kolahun, ol man i mekim nogut long mipela, na ol i holim man bilong mi na putim em long kalabus. Ol i paitim em nogut tru na em i mas slip long haus sik.
Em i lusim haus sik na liklik taim bihain i gat wanpela kibung i kamap long Banga. Long laspela de bilong kibung ol soldia i bungim mipela olgeta i stap long kibung na tok strong long mipela i mas salutim plak. Taim mipela i tok “Nogat,” ol soldia i subim mipela long putim han i go antap na lukluk stret long san. Ol i paitim sampela bilong mipela long gan bilong ol. Bilong helpim mi long stap gut long God, mi kirap mekim wanpela singsing bilong Kingdom long mi yet, nem bilong em “No Ken Pret Long Ol!” Bihain, ol soldia i tromoi mipela i go long wanpela kalabus i doti nogut tru. Tripela de bihain ol i lusim ol man bilong ol narapela ples i go fri. Ol i rausim mitupela Lisfil i go long kantri Siera Leon. Long de bihain ol i lusim ol Witnes bilong ples i go fri.
Sampela Wok Moa na Sampela Blesing Moa
Mipela i kisim nupela ples wok long kongrigesen bilong Bo, long hap saut bilong Siera Leon. Mipela i mekim wok long dispela hap inap 8-pela yia, na bihain mipela i kisim nupela ples wok long Niyala. Taim mipela i stap long Niyala, ol i makim man bilong mi long kamap helpim bilong wasman sekit, na mi amamas mi inap wok wantaim em long dispela wok. Long yia 1975 samting, mipela i kisim nupela ples wok long kongrigesen bilong Is Fritaun.
Mi lainim pinis planti manmeri long ol tok bilong Baibel, na taim mi lukim planti bilong ol i lotuim God tru, mi kisim bikpela amamas. Inap 60 samting bilong ol i kamap olsem pikinini na tumbuna pikinini bilong mi long spirit, ol i olsem “pas” i tokim ol man mi mekim wok bilong God. (2 Korin 3:1) Sampela ol i bin senisim tru pasin bilong ol, olsem wanpela profet meri bilong wanpela lain bilong lotu bilong Aladura (nem bilong em Victoria Dyke). Em i tingim gut tok bilong 1 Jon 5:21 na em i tromoi ol samting em i bin mekim wok long en bilong lotuim ol god giaman. Em i dediket na baptais na bihain em i mekim wok painia salim, na long dispela rot em i helpim planti wanblut bilong em long kam insait long lain bilong Jehova.
Mitupela man bilong mi i marit klostu inap 44 yia pinis, na long Epril 1985, em i dai. Tasol mi no pilim olsem mi stap wanpis, nogat. Mi wok yet long mekim wok bilong Jehova, em Helpim bilong mi, na mi autim tok long olgeta de. Na mi pilim olsem mi stap gutpela pren tru bilong ol manmeri mi bin helpim ol long kisim save long Jehova. Ol i olsem famili tru bilong mi. Mi laikim tru ol na ol i laikim tru mi. Taim mi gat sik, ol i kam hariap bilong lukautim mi, na mi tu mi save helpim ol.
Tru tumas, sapos mi mas mekim gen olgeta dispela samting, bai mi amamas long insait long dispela wok bilong kisim kaikai i mau, olsem wanpela wanwok bilong Jehova.
[Piksa long pes 23]
Winifred Remmie long nau