“God i Skulim Yumi” Kibung Distrik
OL MAN i laik bai Jehova i skulim ol, ol i wet long “God i Skulim Yumi” Kibung Distrik. Ol tok bilong 4-pela de bilong kibung bai kamapim ol bikpela tok bilong Baibel em inap lukautim gut ol Kristen nau long dispela taim nogut i gat planti hevi long en. Ol tok bilong kibung bai helpim ol long sanap strong na sakim olgeta samting “i birua long tok tru bilong God.” Na ol tok bilong kibung bai helpim ol tu long kamap gutpela tisa moa bilong Tok bilong God, em Baibel.—1 Timoti 1:10.
I gat planti man i stap olsem gutpela piksa bilong yumi ken bihainim pasin bilong ol! God Jehova yet em i Nambawan Tisa tru! Olsem na Elihu i tok stret taim em i tokim Jop, Jehova “i save skulim yumi na yumi kisim planti save. Na save bilong yumi i winim tru save bilong ol wel animal na ol pisin.” Na em i kamapim wanpela askim i stori long Jehova, olsem: “Husat inap skulim yumi olsem em?” (Jop 35:11; 36:22) Aisaia 30:20 i tok God bai “skulim yupela,” olsem na em i Nambawan Man bilong skulim yumi.
Krais Jisas, em Pikinini bilong God, em i namba tu tisa. Ol man i save kolim em, “Tisa,” na dispela tok “Tisa” i stap planti taim long 4-pela Gutnius long Baibel. Tru Jisas i oraitim sik bilong planti man na wokim ol narapela mirakel tu, tasol ol man i no save kolim em Dokta, nogat; ol i save kolim em Tisa, long wanem, em i man bilong skulim ol man.—Matyu 8:19; Jon 13:13.
Olsem na i stret Jisas i lainim ol disaipel na aposel bilong em long mekim wok tisa olsem em yet i bin mekim. Matyu 10:5 i go inap 11:1 na Luk 10:1-11 i kamapim klia dispela samting. Taim em i laik go antap long heven, Jisas i tokim ol disaipel long mekim wok tisa olsem Matyu 28:19, 20 i tok. Buk Aposel wantaim ol pas i stap long Nupela Testamen, ol i stori long olsem wanem ol disaipel bilong Jisas long bipo ol i bin wok strong long mekim gut dispela wok em Jisas i bin givim long ol bilong lainim ol man, na ol i givim bel moa yet long mekim dispela wok.
Long nau taim i sot pinis na yumi no ken lusim taim long mekim dispela wok bilong lainim ol man. Yumi stap long lastaim bilong dispela pasin bilong graun, olsem na yumi gat wok long helpim ol man long abrusim bagarap. Nogut ol i poroman wantaim Bikpela Babilon long ol sin em i save mekim na ol i kisim pe nogut bilong ol dispela sin, olsem na i mas i gat man bilong lainim ol na helpim ol bambai ol inap lusim Babilon na mekim wok bilong Jehova na Kingdom bilong em.—KTH 18:4.
Bilong helpim ol Witnes Bilong Jehova long mekim wok bilong ol long lainim ol man, Jehova i mekim wok long rot bilong oganaisesen bilong em long kamapim “God i Skulim Yumi” Kibung Distrik. Ol dispela kibung ol inap 4-pela de, na ol kibung bai kirap long mun Jun long hap bilong not. Yumi ol wan wan wokboi bilong Jehova i dediket pinis, gutpela sapos yumi go long wanpela bilong ol dispela kibung. Yumi mas putim gut yau, kirap long taim ol i mekim namba wan singsing long Fonde long belo bek i go inap long taim ol i mekim laspela beten long Sande long belo bek.
(Bilong save long ol ples bilong wokim Kibung Distrik, lukim buk o magasin.)