Kisim Save Long Jehova Long Rot Bilong Baibel
“Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”—JON 17:3.
1, 2. (a) Wanem insait bilong dispela tok bilong Baibel olsem “save” o “save long”? (b) Wanem sampela tok bilong Baibel i toktok long “save” na i kamapim klia dispela samting?
SAPOS yumi luksave tasol long wanpela man, yumi no inap tok yumi save gut long em. Planti taim Baibel i toktok long “save” na long “save long,” na i makim olsem yumi bin insait long wanpela wok samting, na nau yumi save gut long dispela samting; o yumi gat wanpela poroman na yumitupela i stap wanbel, na nau yumi ken tok yumi save gut long dispela man. (The New International Dictionary of New Testament Theology) Sapos yu save gut long sampela bikpela samting Jehova i bin mekim, yu ken tok yu save long Jehova. Planti taim Baibel i tok long hap bilong Esekiel long Jehova i strafim ol man nogut, na em i tok: “Bai ol i save gut olsem, mi yet mi Bikpela [Jehova].”—Esekiel 38:23.
2 Sampela man i bin giaman long mekim wok bilong Jisas, tasol Jisas i tokim ol: “Mi no save liklik long yupela.” Em i laik tok olsem ol i no lain tru bilong em. (Matyu 7:23) Na 2 Korin 5:21 i tok: “Krais i no save mekim sin.” Em i save sin i wanem samting, tasol em yet i no insait long wok bilong sin. Na Jisas i bin tok, “Laip bilong i stap gut oltaim, em i olsem. . . . Ol i save long yu, . . . na ol i save long Jisas Krais.” Tasol i no olsem ol i save long sampela samting tasol bilong God na Jisas. Ol i mas mekim sampela samting moa.—Lukim tu Matyu 7:21.
3. Wanem samting i makim Jehova em i trupela God?
3 Baibel i lainim yumi long planti pasin bilong Jehova. Em i gat strong na save inap long kolim stret ol samting bai kamap bihain. Dispela em i wanpela mak bilong trupela God. Em i tokim ol god giaman olsem: “Yupela mas tokim kot long ol samting i bin kamap bipo, na . . . tokaut long ol samting bai i kamap bihain.” (Aisaia 41:22, 23) Long rot bilong Baibel, Jehova i tokim yumi long ol samting em i bin wokim pastaim long graun na ol samting i gat laip em i bin putim long graun. Na sampela samting i bin kamap long graun, em i bin tokaut long ol dispela samting paslain tru long taim ol dispela samting i kamap. Na long nau tu em i tokaut long yumi long ol samting bai kamap bihain, na ol samting i mas kamap nau long taim bilong “las de.”—2 Timoti 3:1-5, 13; Stat 1:1-30; Aisaia 53:1-12; Daniel 8:3-12, 20-25; Matyu 24:3-21; KTH 6:1-8; 11:18.
4. Bipo, Jehova i bin mekim wanem wok long dispela bikpela strong em i holim? Bihain em bai mekim wanem wok long dispela strong bilong em?
4 Na narapela pasin bilong Jehova, em i gat bikpela strong. Yumi ken tingim bikpela strong bilong em i kamap long ol sta antap. Ol i gat bikpela paia na hat insait long ol na ol i mekim bikpela lait i kamap. Taim sampela man o ensel i bikhet long Jehova na ol i no laik daun long em, em i mekim save long ol long bikpela strong bilong em, olsem “strongpela soldia tru.” Em i mekim gut nem bilong em na kamapim klia stretpela pasin bilong em. Em inap kamapim bikpela strong bilong em na mekim save long ol man nogut, olsem em i bin mekim long taim bilong Noa na em i salim bikpela Tait Wara i kam, na taim em i bagarapim Sodom na Gomora, na taim em i bin opim Solwara Retsi na wokim rot na bai ol Israel i ken ranawe. (Kisim Bek 15:3-7; Stat 7:11, 12, 24; 19:24, 25) “Na long liklik taim” bihain Jehova bai mekim wok long strong bilong em long “krungutim Satan aninit long lek bilong” lain bilong Jehova.—Rom 16:20.
5. Maski Jehova i gat bikpela strong, em i gat wanem narapela pasin tu?
5 Tasol maski Jehova i gat bikpela strong, em i no mekim pasin antap long ol man, nogat. Em i mekim pasin daun. Long Song 18:35, 36 Devit i tok: “Bikpela, yu lukautim mi na kisim bek mi. Strong bilong yu i helpim mi. . . . Yu bin was long rot bilong mi . . . na lek bilong mi i no wel na mi no pundaun.” Na Jehova i gat pasin daun tu, olsem Baibel i tok: “Em i save lukluk i kam daun na . . . em i save helpim ol rabisman na . . . em i save helpim ol man i sot long ol samting na ol i kisim inap.”—Song 113:6, 7.
6. Wanem wanpela pasin bilong Jehova i ken helpim man long i stap laip?
6 Pasin marimari bilong Jehova i ken helpim yumi long i stap laip. Manase i bin mekim bikpela rong tru, tasol Jehova i bin marimari long em na lusim rong bilong em. Jehova i tok: “Mi save tokim ol man nogut, bai ol i mas i dai. Tasol sapos wanpela man bilong mekim sin, em i givim baksait long sin bilong en, na i wok long mekim stretpela pasin, orait bai em i no inap i dai. . . . Bai mi no ken tingim ol sin em i bin mekim bipo. Nau em i mekim stretpela pasin na em bai i stap gut.” (Esekiel 33:14-16; 2 Stori 33:1-6, 10-13) Jisas i bihainim pasin marimari bilong Jehova, na em i tok, yumi mas lusim rong bilong ol man inap planti taim long olgeta de, olsem “70 taims 7-pela taim.”—Song 103:8-14; Matyu 18:21, 22; Luk 17:4.
God i Save Sori Long Man
7. Olsem wanem Jehova i narapela kain tru long ol god bilong ol Grik? Wanem gutpela samting yumi inap mekim?
7 Sampela saveman bilong ol Grik, olsem ol Epikurian, ol i bilip long ol god, tasol ol i ting ol dispela god i stap longwe tumas long ol na ol i no tingim ol man o sori long ol. Tasol Jehova i no stap longwe long lain bilong em! Jehova i tingim lain bilong em na em i save sori long ol, na ol yet i pas gut wantaim Jehova, na em “i laikim ol manmeri bilong en.” (Song 149:4) Em i bin “bel hevi tru” long ol man nogut paslain long Tait Wara, na em “i ting i gutpela sapos em i no bin wokim ol.” Na taim ol Israel i bin bikhet, dispela i bin givim pen na bel hevi long em. Na sapos ol Kristen i bikhet, em i save bel hevi long dispela. Tasol taim ol i bihainim tok bilong em, em i save amamas. Tru tumas, yumi ol man bilong graun inap long givim hevi long Jehova o mekim bel bilong em i amamas! Em i bin mekim planti gutpela samting bilong helpim yumi, olsem na i gutpela tru long yumi inap mekim ol samting em i amamas long en!—Stat 6:6; Song 78:40, 41; Sindaun 27:11; Aisaia 63:10; Efesus 4:30.
8. Abraham i no bin pret long mekim wanem tok long Jehova?
8 Jehova i gat bikpela sori long yumi, “olsem na yumi no ken pret” long kamapim bel bilong yumi long em. (1 Jon 4:17) Taim Jehova i laik bagarapim Sodom, Abraham i tokim Jehova olsem: “Ating yu laik bagarapim ol gutpela man wantaim ol man nogut? Sapos i gat 50 gutpela man i stap long dispela taun, bai yu bagarapim ol tu wantaim ol arapela? Inap yu tingim dispela 50 gutpela man na yu larim dispela taun i stap na yu no bagarapim? Yu laik kilim ol gutpela man wantaim ol man nogut. . . . Jas bilong olgeta graun, em i mas bihainim stretpela pasin.” Em strongpela tok Abraham i mekim, a? Tasol Jehova i orait long larim Sodom i stap sapos i gat 50 gutpela man i stap long en. Orait, nau Abraham i kolim 45, o 40, o 30, o 20, o sapos “10-pela gutpela man tasol i stap, orait olsem wanem?” Na nau Jehova i tok: “Orait bai mi no ken bagarapim taun, na ol dispela gutpela man i no ken lus.”—Stat 18:23-33.
9. Olsem wanem na Jehova i no kros long Abraham i mekim planti toktok long em? Dispela inap givim wanem save long yumi?
9 Jehova i no kros long Abraham i bin mekim dispela tok long em, long wanem, Jehova i save Abraham i bel hevi long ol gutpela man bai kisim bagarap. Na Abraham i tingim Lot tu i stap long Sodom, em i pikinini bilong brata bilong Abraham. Na Abraham em i pren bilong Jehova. (Jems 2:23) Sapos wanpela man i tok strong o tok kros long yumi, ating em i pren bilong yumi o nogat, yumi mas traim pilim tingting bilong em, nogut em i gat sampela hevi samting na dispela i kirapim em long mekim tok olsem. Yumi mas bekim tok isi long em olsem Jehova i bin mekim long Abraham.
10. Sapos yumi no pret long tokaut long God, olsem wanem dispela i gutpela long taim yumi laik beten long em?
10 Jehova em i man bilong “harim beten bilong” yumi, na yumi laik bai yumi inap tokaut stret long em long taim yumi gat hevi o bel bilong yumi i bagarap na i no stap isi. (Song 51:17; 65:2, 3) Na sampela taim tingting bilong yumi i no wok gut long taim yumi laik beten, na maus bilong yumi i no inap tok klia na kamapim gut hevi bilong yumi, na “yumi save krai long bel tasol, . . . na long dispela pasin Holi Spirit yet i save [beten] bilong helpim yumi,” na Jehova bai harim. “Yu save long olgeta tingting bilong mi. . . . Sapos mi laik mekim wanpela tok, yu save pinis long dispela tok.” Tasol yumi mas wok strong long beten long Jehova, na no ken les o malolo; yumi mas mekim mekim long olgeta taim.—Rom 8:26; Song 139:2, 4; Matyu 7:7, 8.
11. Olsem wanem yumi save Jehova i tingim tru yumi?
11 Jehova i save tingim yumi na lukautim yumi, long wanem, em yet i bin wokim yumi. “Olgeta samting i gat laip i save lukluk i go long em na em i save givim kaikai long ol taim ol i hangre . . . inap long ol i stap gut.” (Song 145:15, 16) Em i save mekim gut long ol pisin, na em i save bilasim ol plaua, na Jisas i tok, Jehova bai lukautim yumi moa yet, winim ol pisin na plaua. Olsem na yumi no ken larim hevi i daunim yumi. (Lo 32:10; Matyu 6:26-32; 10:29-31) 1 Pita 5:7 i tok: “God i save wari long yupela. Olsem na olgeta hevi yupela i karim, yupela i mas putim long han bilong en.”
“Wankain Tru Olsem God Yet”
12, 13. Yumi ken kisim save long Jehova long ol samting em i bin wokim na long ol wok em i bin mekim, tasol wanem narapela rot na yumi inap kisim save long em?
12 Ol samting Jehova i bin wokim, na ol stori long Baibel long ol samting em i bin mekim, ol dispela samting i lainim yumi long pasin bilong Jehova. Na ol tok na pasin bilong Jisas tu em i rot bilong givim save long yumi. Jisas i tok: “Man i lukim mi, em i lukim Papa i bin salim mi na mi kam.” (Jon 12:45) Na em i tok: “Man i lukim mi, em i lukim Papa.” (Jon 14:9) Na Kolosi 1:15 i tok: “[Jisas] em i wankain olsem God yet.” Na Hibru 1:3 i tok: “[Jisas] em i soim bikpela lait bilong God na em i lait moa yet long yumi, na em i wankain tru olsem God yet.”
13 Jehova i bin salim Jisas i kam olsem pe bilong baim yumi na bilong i stap olsem piksa bilong yumi na bai yumi ken bihainim ol pasin na toktok bilong em. Em i bin kamapim tok bilong Jehova. Em i tok: “Olgeta tok mi mekim, em mi save mekim olsem Papa i bin tokim mi.” (Jon 12:50) Em i no bihainim tingting bilong em yet, nogat. Em i bihainim tok bilong God. Em i tok: “Mi no inap mekim wanpela samting long tingting bilong mi yet.”—Jon 5:30; 6:38.
14. (a) Jisas i lukim wanem kain ol man na em i sori long ol? (b) Bilong wanem ol man i amamas long harim ol tok bilong Jisas?
14 Jisas i bin lukim ol kain kain man em ol i gat sik lepra, na skin nogut, na yaupas, na ol man i gat spirit nogut i stap long ol, na em i sori long ol. Em i oraitim ol sikman, na kirapim man i dai pinis. Ol man i sot na hangre long samting bilong spirit, em i lainim ol long ol dispela samting. Em i mekim gutpela switpela tok long ol, na bel bilong ol i pilim gut dispela tok bilong em, olsem na ol i bilip na givim bel long em. Ol i kam hariap long haus lotu na bai ol i ken harim em i toktok, na ol i no lusim em hariap. Ol i amamas long harim tok bilong em. Ol i tok, “bipo i no gat wanpela man i mekim toktok olsem dispela man i mekim.” Ol i kirap nogut long pasin bilong em long skulim ol man. (Jon 7:46; Matyu 7:28, 29; Mak 11:18; 12:37; Luk 4:22; 19:48; 21:38) Taim ol birua i givim sampela tok long em bilong trikim em, ol tok em i mekim i pasim rot bilong ol na ol i no inap mekim sampela tok moa long em.—Matyu 22:41-46; Mak 12:34; Luk 20:40.
15. Wanem nambawan bikpela samting Jisas i bin autim tok long en? Em i givim wok long ol narapela long mekim wanem?
15 Jisas i bin tokim ol: “Kingdom bilong heven em i kam klostu pinis,” na em i tokim ol long ol i mas painim dispela Kingdom. Em i salim ol man i go na autim tok olsem, “Kingdom bilong heven em i kam klostu pinis,” na ol i mas “mekim olgeta lain manmeri i kamap disaipel,” na “autim tok . . . i go inap long olgeta hap bilong graun.” Long nau i gat olsem 4,500,000 Witnes Bilong Jehova i bihainim tok bilong Jisas na ol i mekim ol dispela wok.—Matyu 4:17; 6:33; 10:7; 28:19; Aposel 1:8.
16. Jehova i Man bilong pasin sori, tasol wanem samting i bin givim bikpela pen na bel hevi long em? Tasol dispela i bin mekim wanem gutpela wok?
16 Olsem 1 Jon 4:8 i tok: “God yet em i as bilong dispela pasin bilong laikim ol arapela,” olsem pasin sori. Em i namba wan pasin bilong em. Taim em i salim Pikinini bilong em i kam long graun bilong i dai na baim bek ol man, dispela i givim bikpela pen na bel hevi tru long God. Na taim bikpela pen i painim Jisas, na Jisas i krai long Papa bilong em long heven, ating dispela i bin givim bikpela bel hevi moa yet long Jehova. Tasol dispela samting i kamapim klia olsem Satan em i man bilong tok giaman—em i bin tok, i no inap wanpela man bai stap gut long Jehova sapos bikpela traim na pen i painim em. Na dispela ofa bilong Jisas long lusim laip bilong em, dispela i bilong helpim yumi, olsem na bel bilong yumi i mas pilim tru dispela bikpela samting em i bin mekim. (Jon 3:16) Na Jisas i no bin dai hariap. Em i karim bikpela pen longtaim, na isi isi em i dai. Em bikpela ofa Jehova tupela Jisas i bin mekim bilong helpim yumi. Yumi ken skelim ol tok bilong Baibel long ol samting i bin kamap.
17-19. Jisas i tok wanem long ol hevi i mas painim em?
17 Inap 4-pela taim samting Jisas i stori long ol aposel long ol samting bai painim em. Pastaim em i bin tokim ol: “Harim. Nau yumi go long Jerusalem, na ol bai givim Pikinini Bilong Man long han bilong ol bikpris na ol saveman bilong lo. Na bai ol i mekim kot long em na pasim tok long kilim em i dai. . . . Na ol . . . man bai tok bilas long em na spetim em na wipim em na kilim em i dai.”—Mak 10:33, 34.
18 Jisas i save gut long ol dispela hevi i laik painim em, long wanem, em i save long pasin nogut bilong ol Rom long wipim na paitim man na givim pen long em. Rop bilong wip i gat ol hap ain na bun bilong sipsip long en na i save katkatim baksait na lek bilong man na skin i bagarap na blut i kapsait. Jisas i save dispela samting nogut bai painim em, na sampela mun paslain em i bin tok: “Mi mas kisim wanpela kain baptais. Nau mi no kisim yet, na bel bilong mi em i hevi tru.”—Luk 12:50.
19 Taim ol dispela hevi i kam klostu, em i beten long Papa bilong em long heven na i tok: “Nau bel bilong mi i hevi na mi tingting planti. Na bai mi tok wanem? Ating bai mi tok, ‘Papa, yu ken tekewe dispela samting i laik kamap long mi nau’? Nogat. Mi no ken tok olsem. Dispela taim bilong hevi i mas kamap long mi. Long dispela as tasol mi kam.” (Jon 12:27) Ating Jehova i pilim tru dispela krai bilong Pikinini bilong em! Sampela aua paslain long taim em i dai, em i stap long Getsemani, na bel bilong em i bagarap tru, na em i tokim Pita na Jems na Jon olsem: “Bel bilong mi em i hevi tumas, na klostu mi laik i dai.” Na bihain inap sampela minit moa em i mekim laspela beten long Jehova na i tok: “ ‘Papa, sapos yu laik, yu ken tekewe dispela kap long mi. Tasol yu no ken bihainim laik bilong mi. Nogat. Yu mas bihainim laik bilong yu tasol.’ Jisas i pilim hevi nogut tru, na em i beten strong moa. Na tuhat bilong en i kamap olsem blut na i pundaun long graun.” (Matyu 26:38; Luk 22:42, 44) Ol dokta i save dispela inap kamap long man taim em i gat bikpela bel hevi tru, na ol i kolim dispela samting olsem hematidrosis.
20. Wanem samting i helpim Jisas long karim dispela bikpela hevi?
20 Hibru 5:7 i tok: “Taim Jisas i stap man long graun, em i save . . . beten long God. Em i save, God inap long kisim bek em, na . . . em i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em.” Tasol God i no helpim em long abrusim i dai. Orait, olsem wanem yumi save, God i harim beten bilong em? Luk 22:43 i tok: “Wanpela ensel bilong heven i kam long em na i strongim em.” God i salim ensel bilong strongim Jisas long karim hevi.
21. (a) Olsem wanem yumi ken save, Jisas i winim tru dispela hevi na em i no bin pundaun? (b) Sapos bikpela hevi i bungim yumi, yumi laik bai yumi inap long tok wanem?
21 Ensel i strongim pinis bel bilong Jisas, na nau Jisas i kirap sanap na em i go bungim Pita na Jems na Jon na em i tok: “Yupela kirap, na yumi go.” (Mak 14:42) I olsem em i tok, ‘Mi laik go na bai dispela man i ken givim kis long mi na kamapim mi long ol birua na ol i ken wokim kot giaman long mi na toknogutim mi na spetim mi na paitim mi na nilim mi long pos na kilim mi i dai.’ Em i go, na ol i mekim olsem, na em i hangamap long diwai na karim bikpela pen moa inap olsem 6-pela aua na nau em i dai. Taim em i laik i dai na em i pilim win bilong em i laik pinis, em i singaut strong na i tok: “Em i pinis nau.” (Jon 19:30) Em i bin sanap strong na i stap gut long Jehova, em King bilong em. Ol samting Jehova i laik bai em i mekim long graun, em i mekim pinis. Sapos yumi yet i laik i dai, o Armagedon i kamap, olsem wanem long yumi? Bai yumi tu inap tok, ‘Ol wok Jehova i givim long mi bilong mekim, em i pinis nau’?
22. Bihain hamas man bai save long Jehova?
22 Klostu nau Jehova bai kamapim laik bilong em na “olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun.”—Aisaia 11:9.
Yu Tingim Yet?
◻ Olsem wanem long dispela tok “save” o “save long” wanpela samting?
◻ Baibel i tok wanem long pasin sori bilong Jehova?
◻ Abraham i mekim wanem na yumi save em i no pret long tokaut long Jehova?
◻ Taim yumi tingim Jisas na ol pasin bilong em, olsem wanem dispela i helpim yumi long save long Jehova tu?