Misin Long Latin-Amerika i Gat Bikpela Hevi—Bilong Wanem Planti Man i Lusim?

KIRAP long not long Meksiko na i go long Sili long saut, klostu olgeta taun na ples i gat haus lotu Katolik i stap. Joseph E. Davis i bosim ol wok bilong wanpela lain bilong dispela lotu, na em i tok, ‘bikpela senis i wok long kamap long misin long ol dispela kantri.’ Em i tok, dispela misin i bin bosim ol dispela kantri inap 300 yia, tasol nau ol samting i wok long senis.

Ol man i save, Misin Katolik i no gat strong moa olsem bilong bipo. Long nau, 15 pesen tasol bilong ol man long Latin-Amerika, olsem Sentral na Saut Amerika, ol i strongpela Katolik. Wanpela buk (1991 Britannica Book of the Year) i tok: ‘Ol bisop Katolik wantaim pop i tingting planti long ol Katolik long Latin-Amerika ol i no bilip moa olsem ol i bin mekim long bipo.’ Bilong wanem i olsem? Bilong wanem planti Katolik i lusim lotu bilong ol? Ol i lusim na ol i mekim wanem?

Bilong Wanem Ol i Lusim Lotu?

Ol bikman bilong Misin Katolik i tok, ol narapela lotu i kamap long Latin-Amerika na ol i pulim ol Katolik. Wanpela pris long Bolivia i tok: ‘Misin Katolik i olsem wanpela diwai, na ol gras nogut i kamap long as bilong en na i pulim ol wara na nau diwai i sot long wara na i laik drai.’

Long Ajentina, long olgeta yia i gat 140 nupela lotu i save kirap, na ating dispela i as na lotu Katolik i go liklik. Bipo, 90 pesen bilong ol man ol i Katolik, tasol long 1975 na i kam inap nau em 60 pesen o 70 pesen tasol ol i stap Katolik yet. Long Tiuana long Meksiko i gat 2 milion man i stap, na 10 pesen i lusim lotu Katolik na ol i go insait long 327 ol narapela lotu. Wanpela nius (Time) i tok: ‘Long Sande long Brasil, planti man Talatala i go lotu, tasol i no planti Katolik i mekim olsem.’ Wanpela nius moa i tok: ‘Ol kadinal bilong Misin Katolik long Latin-Amerika ol i miting wantaim pop long Vatiken bilong toktok long tupela bikpela samting bilong dispela misin, na wanpela hevi bilong ol em ol nupela lotu i kam insait long dispela kantri.’

Pop i miting wantaim ol bisop bilong Meksiko na em i tok, ‘ol man i wok long go insait long ol nupela lotu, long wanem, ol lain Katolik i no givim bel long autim gutnius bilong Baibel long ol man.’ Bilong wanem ol i no mekim olsem? Ol man long dispela hap ol i laik tru long kisim save long ol samting bilong spirit, na ol i no save sakim tok bilong Baibel. Nius Última Hora bilong La Pas long Bolivia i tok: ‘Misin Katolik i insait tumas long ol wok bilong graun na i no mekim wok tru bilong en. Olsem na yumi no kirap nogut taim yumi lukim ol pris i mekim ol wok bilong helpim ol man long ol samting bilong skin na bilong graun tasol na ol samting bilong bisnis na mani na bilong raitim ol stori samting na bilong mekim wok politik.’

Planti Wok Politik na Wok Autim Tok Nogat?

Long 1970 i go inap 1990 Misin Katolik i bin insait tru long ol wok politik, na ol man i les tru long dispela samting bilong misin. Long 1985 sampela man i bin skelim wok bilong wanpela lain, em Katolik Foren Misin Sosaiti bilong Amerika, ol i kolim Merinol, em i mekim bikpela wok long Sentral na Saut Amerika, na ol dispela man i tok, ‘Dispela Sosaiti Merinol i bringim pasin komyunis bilong Maks na Lenin i kam insait na ol man i lain long pait wantaim gavman. Dispela lain i gat strong long mekim olsem, long wanem, ol i wok olsem hap lain bilong Misin Katolik. Ol i kirapim sampela bikman bilong gavman tu long kisim dispela pasin komyunis.’

Na yumi ken tingim tu bikpela pait nogut i bin kamap paslain liklik long 1980 na ol i kilim i dai 10,000 i go inap 30,000 manmeri na ol i no larim ol i tokaut long kot pastaim​—⁠ol i bagarapim ol nating. Wanpela nius (National Catholic Reporter) i gat het-tok olsem: “Asua Bilong Blut i Stap Long Misin Long Ajentina,” na nius i tok, ‘Dispela samting i bin kamap long Ajentina i wankain olsem samting ol Natsi i bin mekim bipo long Jemani, olsem na ol man i ting Misin Katolik i moa tingting long holim bikpela strong na em i no tingting long wok bilong autim tok bilong God long ol man na long kamapim tok i tru long ol.’

Misin Katolik i tingting tumas long holim bikpela strong insait long ol gavman bilong graun, olsem na dispela misin i no stap olsem pren bilong God. Baibel i tok: “Harim. Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.” (Jems 4:⁠4) Olsem na long nau planti man i no bilip moa olsem dispela misin inap soim rot long ol, na ol i ting em i no inap helpim ol long kisim tok bilong God. Orait, olsem wanem long ol man i bin lusim dispela misin?

Ol Sipsip i No Gat Wasman

Ol i wankain olsem ol lain bilong lotu Juda long taim bilong Jisas, em ol bikman bilong lotu i no bin lukautim gut ol long ol samting bilong spirit. Baibel i tok, Jisas “i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Planti man i bin lusim lotu Katolik na ol i go long ol lotu evanjelikal, tasol olsem wanem? Ol dispela narapela lotu i save lukautim gut ol na givim tok i tru bilong Baibel long ol? Ol lotu Talatala i save bihainim tru tok na pasin bilong Jisas, o nogat? Jisas i tok, lain tru bilong em i no save insait long ol wok bilong dispela graun. Em i tok: “Ol manmeri bilong mi ol i no bilong dispela graun, olsem mi tu mi no bilong dispela graun.”​—⁠Jon 17:⁠14.

Planti narapela lotu i mekim olsem ol i bihainim tok bilong Baibel, tasol ol bikpela tok bilong ol i wankain olsem bilong Lotu Katolik. Olsem na inap ol man bilong Latin-Amerika i mekim wankain tok olsem ol man bilong Andis, ol i save tok: “Es la misma cholita con otra pollera” (Long tok Pisin i olsem: “Em dispela liklik meri Indian tasol; i no narapela; tasol em i senisim bilas bilong em”).

Klostu olgeta lotu Talatala i tok, God em i God Triwan, tasol Baibel i no tok olsem. Wanpela bikpela buk (The Encyclopedia of Religion) i tok: ‘Ol man bilong skelim tok bilong Baibel na ol tisa bilong ol misin ol i tokaut olsem, Olpela Testamen bilong tok Hibru i no tok i gat God Triwan, na Nupela Testamen tu (bilong tok Grik) i no gat sampela tok i tok klia olsem i gat God Triwan.’a

Ol Talatala i insait tru long ol pasin na wok politik bilong dispela graun, wankain olsem ol Katolik. Wanpela buk (Encyclopedia of Latin America) i tok: ‘Ol Talatala long Latin-Amerika ol i bihainim ol narapela man long eleksen long ol samting bilong politik. Planti taim ol pasto i tokim ol man long vot long wanpela man politik na bai dispela man i ken helpim lotu bilong pasto.’ Na wanpela nius (Latin American Research Review) i tok: ‘Taim ol lotu i kam nupela long Guatemala na i kam inap nau, ol i insait long ol wok politik na ol i lainim ol man long dispela samting i olsem hap samting bilong lotu bilong ol.’

Ol Talatala i helpim ol wok politik, na dispela samting i kirapim ol man na ol i go insait long ol pait. Bipo Harry Emerson Fosdick i olsem nambawan pasto bilong lotu Talatala long Amerika, na em i bin tok: ‘Long olgeta taim bipo ol lain bilong Wes i insait long pait. Yumi bin kamapim ol man bilong pait, na lainim ol man long pait, na litimapim pasin bilong pait, na givim biknem long ol man i bin winim pait, na putim piksa bilong plak insait long ol haus lotu. Long hap maus yumi bin litimapim nem bilong King Bilong Gutaim, na long hap maus yumi bin litimapim wok bilong pait.’

Yu Mas Mekim Wanem?

Baibel i tok, ol lotu giaman i olsem wanpela meri pamuk i save prenim ol gavman bilong graun, na Baibel i tok: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.”​—⁠KTH 18:⁠4.

Planti man i save, ol pasin giaman i pulap insait long Misin Katolik, tasol ol i no laik lusim, long wanem, em i bin stap longpela taim. Lotu Juda i bin stap longpela taim tu, tasol God i sakim dispela lotu long taim ol Juda i lusim tok i tru bilong em na ol i no stap moa olsem lain bilong em. Nau God i kisim lotu Kristen bilong mekim wok bilong em na i olsem senis bilong lotu Juda. Olsem wanem yu ken luksave long lain Kristen tru?

Insait long 20 yia i go pinis, klostu 1,000,000 man bilong Sentral na Saut Amerika, olsem Latin-Amerika, ol i kamap Witnes Bilong Jehova. Bilong wanem? Wanpela nius bilong Matines de la Tore long Verakrus long Meksiko i tok: ‘Bipo ol dispela sumatin bilong Baibel i bin mekim wok bilong lotu Katolik o ol narapela lotu, tasol ol i bin lukim ol dispela lotu i insait long wok politik na i orait long ol pasin nogut i no stret wantaim tok bilong Baibel, olsem ol bilip giaman na pasin pamuk na pasin pait samting. Ol i lusim lotu i gat ol piksa olsem god giaman na pasin giaman bilong ol tumbuna i no gat as bilong en, na nau ol i amamas long bihainim ol tok na lo bilong Baibel. Nau ol i stap wanbel long bilip bilong ol, na dispela i wanpela mak bilong ol.’

Na narapela nius bilong Latin-Amerika i tok: ‘Ol Witnes Bilong Jehova ol i man bilong wok strong, na ol i save bihainim pasin i stret, na ol i save daun long God. Ol i no save mekim nabaut. Ol tok bilong Baibel i as bilong lotu bilong ol.’ I gutpela sapos yu lainim tok bilong Baibel wantaim ol Witnes Bilong Jehova na bai yu ken save, ol gutpela samting ol i wetim bilong bihain na i stap bilong ol i stret wantaim tok bilong Baibel. Sapos yu kisim save long ol tok bilong Baibel, bai yu ken save tu long pasin bilong lotu long God “long strong bilong Holi Spirit na long pasin i tru.”​—⁠Jon 4:​23, 24.

[Ol Futnot]

[Sat long pes 21]

OL WITNES BILONG JEHOVA LONG SAMPELA KANTRI LONG LATIN-AMERIKA

1971 1992

Kantri Pablisa Pablisa

Ajentina 20,750 96,780

Bolivia 1,276 8,868

Brasil 72,269 335,039

Sili 8,231 44,067

Kolombia 8,275 55,215

Kosta Rika 3,271 14,018

Dominikan Ripablik 4,106 15,418

Ekwado 3,323 22,763

El Salvado 2,181 20,374

Guadelup 1,705 6,830

Guatemala 2,604 13,479

Honduras 1,432 6,583

Meksiko 54,384 354,023

Panama 2,013 7,732

Paragwei 901 4,115

Peru 5,384 43,429

Poto Riko 8,511 25,315

Yurugwei 3,370 8,683

Veneswela 8,170 60,444

BUNGIM 212,156 1,143,175