Olsem Wanem Yu Ken Strongim Marit Bilong Yu
OL FARISI i laik trikim Jisas na ol i askim em: “Ating lo bilong yumi i orait long man i ken rausim meri long laik bilong em yet?” Bilong bekim dispela askim em i tokim ol long namba wan marit, na em i tok: “Samting God i pasim pinis, em man i no ken katim.”
Ol Farisi i tok: “Moses i givim lo long yumi na i tok man i ken raitim pepa bilong katim marit na givim long meri na rausim em i go.” Tasol Jisas i tokim ol: “Yupela i man bilong bikhet, olsem na Moses i larim yupela i rausim meri. Tasol bipo tru i no gat dispela pasin. Mi tok olsem long yupela. Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.”—Matyu 19:3-9.
Long pastaim tru, marit em samting bilong i stap oltaim, na dai i no inap katim marit bilong namba wan man na meri bilong em, long wanem, tupela i gutpela olgeta na tupela inap i stap oltaim. Tasol tupela i bin mekim sin, na nau ol i mas dai, na dispela i mekim nogut long ol marit, long wanem, ol i save dai na lusim poroman bilong ol. Dai i save pinisim marit, olsem Baibel i tok: “Sapos man bilong [meri] i dai, orait meri i no pas moa. Sapos em i laik maritim wanpela man, orait em i ken maritim em.” (1 Korin 7:39) Tasol long sampela hap, sapos man bilong meri i dai, ol i subim meri long kukim skin bilong em long paia na kilim em yet i dai; ol i tok, tupela i marit yet na ol i go i stap long narapela hap.
Lo God i Givim Long Moses
Long taim Jehova i bin givim Lo long Moses, marit i wok long go nogut, olsem na Jehova i tingim hatpela pasin bilong ol Israel na em i larim ol i katim marit. (Lo 24:1) Tasol sapos meri i mekim liklik pasin kranki tasol, dispela i no inap long man i ken rausim em, long wanem, Jehova i tok, man i mas laikim ol manmeri olsem em i save laikim em yet. (Wok Pris 19:18) Na sapos man i laik kisim pepa bilong katim marit bilong em, pastaim em i mas toktok wantaim sampela man i gat namba long dispela wok na pastaim ol i mas traim oraitim gen marit bilong tupela. Tasol God i no bin putim lo na bai “man i ken rausim meri long laik bilong em yet,” nogat.—Matyu 19:3.
Tasol bihain ol Israel i no tingting tumas long marit bilong ol i mas i stap gut, olsem na ol i tingim tasol dispela lo i larim ol i katim marit, na sapos ol i les long meri bilong ol na meri i mekim liklik pasin kranki samting, ol i save rausim meri. Inap 500 yia samting paslain long Krais, ol man i save rausim nating meri bilong ol long ol liklik samting tasol. Jehova i tokim ol pinis, em i no laik tru long man i katim marit. (Malakai 2:14-16) Olsem na Jisas i bin tok strong long ol Israel long pasin nogut bilong ol long katim marit bilong ol.
Mas i Gat As na Ol i Ken Katim
Tasol Jisas i kolim wanpela as na i orait long katim marit, em pasin pamuk. (Matyu 5:31, 32; 19:8, 9) Pasin pamuk i olsem mekim maritpasin long man o meri i no poroman marit bilong ol, o long wanpela animal.
Tasol Jisas i no tok, sapos man o meri i pamuk, poroman i mas katim marit. Em i samting bilong em long tingim hevi inap kamap sapos em i katim marit. Na sapos man i pamuk na meri bilong em i tingting long katim marit bilong tupela, meri i ken tingim tok God i bin mekim long Iv taim Iv i brukim lo. God i tok Iv i mas i dai, na nau God i tokim Iv: “Bai yu gat bikpela laik yet long man bilong yu.” (Stat 3:16) Tupela man bilong raitim buk, em C. F. Keil na F. Delitzsch, ol i tok, dispela “bikpela laik” bilong meri i olsem wanpela strongpela laik tru i stap long skin bilong em. (Buk Commentary on the Old Testament) Tru, laik bilong sampela meri i no strong tumas olsem, tasol sapos meri i tingting long katim marit bilong em na lusim poroman i bin mekim pasin pamuk, em i mas tingting long hevi bai painim em long taim tingting na skin na bel bilong em bai sot long man i ken helpim em na inapim laik bilong em long bihain, em dispela laik bilong skin ol meri i bin kisim long Iv. Tasol sampela meri i ting, nogut man bilong ol i bin kisim sik AIDS taim em i pamuk, olsem na ol i tingting long katim marit na bai ol tu i no ken kisim dispela sik long man bilong ol; Jisas i tok ol inap mekim olsem.
As Bilong Hevi Bilong Famili
As bilong hatpela pasin bilong ol man, em dispela sin Adam tupela Iv i bin mekim long brukim lo bilong God. (Rom 5:12) Taim tupela i mekim dispela rong long Papa bilong ol long heven, em nau, hevi bilong ol marit i kirap. Snek i grisim Iv long kisim kaikai i tambu, na Iv i kisim na em i kaikai. Bihain em i tokim Adam long samting em snek i bin tokim em long mekim. (Stat 3:6) Em i no bin toktok wantaim Adam pastaim, na dispela rong em i as bilong planti hevi bilong ol marit long nau—man na meri bilong em i no save toktok gut wantaim long ol samting.
Taim Adam tupela Iv i rong pinis na ol hevi bilong dispela i wok long kamap, narapela i sutim tok long narapela na i tok, asua bilong em, olsem planti marit bilong nau i save mekim. Adam i bin tok, meri wantaim Jehova i asua na em i bin mekim rong. Em i tokim Jehova: “Dispela meri yu bin givim mi . . . , em tasol i givim mi pikinini bilong dispela diwai na mi kaikai.” Na meri i tok: “Snek i grisim mi na mi kaikai.”—Stat 3:12, 13.
Jehova i kolim strafe bai painim Adam tupela Iv, na dispela i makim ol hevi bai kamap bihain. Jehova i tokim Iv olsem: “Man bilong yu . . . bai em i bosim yu.” Planti man marit bilong nau, olsem dispela man Isao yumi stori pinis long em, ol i mekim hatpela pasin taim ol i bosim meri bilong ol, na ol i no sori long meri o tingim ol i amamas o nogat, tasol ol dispela meri i gat laik yet long man bilong ol i mas laikim ol na tingim ol. Na sapos man i no mekim olsem, meri bai subim man na tingting long inapim laik bilong em yet. Em nau, man i bosim meri, na meri i laik bai man i tingim em—narapela narapela i bihainim laik bilong ol yet, olsem na tupela i no sindaun gut wantaim. Shunsuke Serizawa i tok: “Man i tingim laik bilong em yet, na meri i tingim laik bilong em yet, na dispela i as bilong planti hevi bilong marit, na yumi mas save long dispela na bai yumi inap helpim ol marit i laik katim marit bilong ol.”
Yumi inap save long pasin bilong stretim ol hevi bilong marit, long wanem, Jehova i givim Tok bilong em long yumi, em Baibel, na sapos ol marit i bihainim dispela tok ol i ken i stap amamas wantaim, maski ol i no gutpela olgeta. Isao i kirap long mekim olsem, na em i bihainim tok bilong Baibel, na nau em wantaim meri pikinini ol i sindaun gut wantaim na i stap amamas. Nau yumi ken toktok long olsem wanem ol lo bilong Baibel i ken strongim ol marit.
Toktok Gut Wantaim
Long planti marit, man tupela meri i no toktok gut wantaim o tingim laik bilong narapela narapela. Ol i tok, asua bilong narapela na hevi i kamap, olsem na i hatwok long narapela i ken save gut long tingting na hevi bilong narapela. Wanpela man i gat wok long skelim dispela samting, em Caryl S. Avery, em i tok: “Narapela i mas save gut long tingting na laik bilong narapela na bai tupela i ken pren gut wantaim na i stap wanbel, tasol planti i no mekim olsem.” Tupela inap i stap olsem sapos tupela i toktok gut wantaim na kamapim tingting bilong ol.
Baibel i tok piksa olsem: “Tingting bilong man i olsem wanpela hul wara i daun moa. Tasol man i gat gutpela save, em inap pulim dispela tingting i kam antap.” (Sindaun 20:5) Man i mas wok long kamapim tingting i stap long bel bilong meri na bai em i ken pilim, na meri i mas mekim olsem long man bilong em. Sapos meri bilong yu i bin mekim bikpela wok na skin bilong em i les na bel bilong em i no stap isi, na yu tok, ‘Mi tu i bin wok strong olsem,’ dispela i no inap helpim em. Tasol sapos yu tok, ‘Sori, ating yu bin mekim bikpela wok, a? Yu gat sampela hevi samting?’ Na nau yutupela i ken toktok wantaim, na no ken les long harim hevi bilong em, maski yu mas toktok longpela taim, na ating nau yupela bai kamap wanbel gen. No ken surik long harim ol tok bilong poroman, nogut hevi i go bikpela.
Ol i mas mekim tok i klia na bai narapela i ken save gut na kisim gut tingting bilong narapela. Baibel i tok: “Lusim pasin bilong giaman. . . . Mas mekim tok tru tasol . . . , long wanem, yumi olgeta i stap hap bilong wanpela bodi.” (Efesus 4:25) Olsem na taim wanpela i laik toktok, em i mas tingting gut pastaim. Sapos meri i kros na i ting man i no save harim tok bilong em, em i ken tingim tok bilong Sindaun 17:27: “Man i gat planti save, em i no save toktok planti. Na man i gat gutpela tingting, em i no save belhat kwik.” Olsem na meri i no ken tokim man: “Yu no save harim tok bilong mi!” Gutpela sapos em i ken tok: “Mi save yu gat planti wok, tasol sapos yu ken stap wantaim mi sampela taim na yumi ken pren gut na toktok wantaim, bai mi amamas.”
“Mas kisim tingting long . . . arapela . . . na bai wok . . . i ken kamap gutpela.” (Sindaun 15:22) Tru, meri bilong yu i save laikim yu, tasol em i no save long tingting bilong yu. Long gutpela pasin, yu mas kamapim tingting bilong yu long em, na bai yutupela i ken i stap olsem Kristen tru na stretim bek marit bilong yupela na “i stap wanbel, na . . . stap wanlain.”—Efesus 4:2, 3.
Tingim samting i bin painim Kazuo. Meri bilong em i save toktok planti, na Kazuo i save go pilai laki. Dispela i mekim na em i gat bikpela dinau em i mas bekim, tasol em i dinau moa. Em i kirap stadi long Baibel na nau em i kamapim hevi bilong em long meri, na em i ting meri bai pairap na toktok planti, tasol nogat, long wanem, meri tu i bin kirap stadi long Baibel. Meri i tok isi na i tok: “Yumi ken toktok gut wantaim long olsem wanem yumi ken bekim dispela dinau.”
Tupela i baim haus bilong ol i go long ol man, na tupela i kisim pe bilong en, na insait long wanpela yia ol i bekim ol dinau. Meri i bin kaunim Filipai 4:6, 7 na dispela i senisim tingting bilong em: “No ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas [beten] long God . . . na askim em long helpim yupela. Bel isi God i save givim yumi, em i gutpela samting tru, . . . God bai i mekim yupela i stap bel isi tru, na . . . bel na tingting bilong yupela bai i stap gut tru.” Na meri i tok: “Pren bilong mi i lukim mi i amamas, maski mi gat hevi, na em tu i kirap stadi long Baibel.” Kazuo wantaim meri bilong em i kisim baptais, na nau tupela i stap amamas wantaim.
Tupela marit i mas tok tru long poroman na bilipim tok bilong em. Ol dispela marit yumi stori pinis long ol, ol i beten tu long Jehova, em i As bilong marit. Maski ol marit i gat hevi, sapos ol i bihainim tok bilong em, em bai mekim gut long ol na helpim ol na bai ol i stap bel isi. Tupela i ken bung na man i ken beten na ‘autim olgeta hevi na tingting’ bilong tupela na askim God long helpim ol long hevi bilong ol. (Song 62:8) Jehova bai harim beten bilong ol.
Tru tumas, ol marit inap strongim marit bilong ol. Maski nau i gat planti hevi, ol marit inap i stap amamas wantaim. Na yu ken painim sampela tok moa long buk Rot Bilong Kamapim Amamas Insait Long Famili, em Sosaiti Was Taua bilong Nu Yok i wokim. Na sapos tupela marit i givim bel long bihainim ol lo bilong Baibel, ol i ken tingting long i stap wantaim na i stap amamas long nupela taim God bai kamapim.