Ol i No Les Long Autim Tok Long Hap i Gat Ais na Paia
AISLAN i stap long Not Atlantik namel long Not Amerika na Yurop na daunbilo liklik long mak bilong Aktik. I no kol tumas, long wanem, solwara i kam long dispela hap i hat liklik na i hatim Aislan. Ol i save kolim Aislan olsem kantri i gat ais na paia wantaim, long wanem, bikpela maunten ais ol i kolim glesia i stap, winim ol narapela long Yurop, na i gat planti maunten i pairap tu, olsem volkeno, winim ol narapela hap bilong graun. Na hatwara i save kam antap long sampela hap, na hatpela smok bilong wara i gat salfa long en i save kamap long graun.
I gat 260,000 man i stap long dispela namba 2 bikpela ailan bilong Yurop, na tumbuna bilong ol em ol Vaiking, ol i bin kam long dispela hap olsem 1,100 yia bipo. Tok ples Aislan i wankain olsem tok ples Skandinevia bilong ol Vaiking. Tok ples bilong ol i no bin senis, long wanem, ol i save laik tru long kaunim ol stori bilong ol bilong bipo yet, olsem long yia 1200 samting.
Long yia 1500 samting ol i bin kirap tanim tok bilong Baibel long tok ples bilong ol. Long 1540 ol i gat Nupela Testamen, na long 1584 ol i gat olgeta hap bilong Baibel long tok ples bilong ol. Klostu olgeta man i bilong lotu Evanjelikal Luteran, em lotu bilong dispela hap. Planti man i gat Baibel, tasol ol i no ting em i Tok bilong God. Klostu olgeta man ol i no givim bel tumas long lotu; ol i bihainim tingting bilong ol yet.
Gutpela Tok i Kisim Aislan
Sampela man Aislan i bin stap long Kanada ol i paslain long harim gutpela tok bilong Kingdom. Wanpela em Georg Fjölnir Lindal. Papamama bilong em i bilong Aislan, na em i save long tok Aislan. Em i dediket long God Jehova, na em i kirap long mekim wok painia na autim gutpela tok bilong Kingdom long ol man. Long 1929 em i gat 40 krismas na em i bringim gutnius long dispela kantri bilong ais na paia.
Em bikpela wok tru dispela wanpela man tasol i mas mekim! Long kantri Aislan, long not i go saut, em inap 320 kilomita, na long is i go wes em inap 500 kilomita. I gat planti pasis i go insait tru, na longpela bilong nambis na ol dispela pasis em inap 6,400 kilomita, na i no gat planti rot o ka long dispela taim, tasol insait long 10-pela yia Brata Lindal i go long olgeta hap bilong dispela ailan na i tilim planti tausen buk. Em i raun long ol sip, na taim em i laik go long ol fam em i mekim wok long tupela hos—wanpela i bilong karim em, na wanpela i bilong karim ol buk na kago bilong em.
Inap 18 yia i no gat narapela Witnes long Aislan, Brata Lindal tasol. Em i bin wok strong, tasol i no gat wanpela i laik bilipim tok bilong Kingdom. Tasol long Mas 25, 1947, sampela sumatin bilong Skul Gileat Bilong Sosaiti Wastaua ol i kam. Em i bin beten inap longpela taim long Jehova i salim sampela helpim i kam, na nau ol dispela misineri i kam na em i amamas tru! (Matyu 9:37, 38) Em i wok painia i go inap long taim em i go bek long Kanada long 1953.
Sampela Wokman Moa i Kam
Tupela bilong ol dispela misineri hia i bin kam long 1947 ol i bilong Denmak, na tupela yia bihain i gat tupela misineri moa i kam. Sampela pren moa i kam, na olgeta i wok wantaim na i tilim planti tausen buk. Ol Aislan i man bilong kaunim ol buk samting, tasol wan wan tasol i givim bel long gutpela tok bilong Kingdom. Tasol ol brata i no les. Ol i autim yet tok long ol man, na inap 27 yia moa ol i lukim gutpela samting i kamap. Long 1956 i gat 7-pela nupela manmeri i bin kamap strong na givim bel long Kingdom, na ol i dediket long Jehova.
Insait long 10-pela yia i go pinis, lain pablisa bilong Kingdom i kamap dabol. Nau i gat 7-pela kongrigesen na wanpela grup i stap longwe, na i gat 280 pablisa olgeta ol i autim tok bilong Kingdom. Nau yumi ken raun lukim ol dispela kongrigesen.
Raun Long Nambawan Biktaun
Jehova i bin mekim gut long ol dispela brata sista i no bin les inap planti yia. Nau i gat tupela strongpela kongrigesen long biktaun Reikjavik, na ol i save miting long gutpela Haus Kingdom long brens-ofis ol i bin dediketim long 1975.
Friðrik na Ada em tupela bilong ol dispela 7-pela i bin kisim baptais long 1956. Friðrik i tok: “Bipo mipela i save miting long liklik rum antap long haus misineri, na em inap long 12-pela sia tasol, na sapos sampela moa i kam, mipela opim dua i go long narapela liklik rum klostu. Tasol long nau i gat tupela kongrigesen na ol i save pulap long Haus Kingdom!”
Friðrik i bin lukautim Dipatmen Bilong Kaikai long ol kibung bilong pastaim, na em i tok: “Mi tasol i mas mekim olgeta wok, na sampela taim mi mas mekim ol tok tu inap 4-pela taim long olgeta de bilong kibung. Mi save pasim wanpela laplap antap long klos bilong mi taim mi wok long haus kuk, na taim mi mas i go antap long pletfom na mekim wanpela tok, mi mas rausim laplap hariap na putim saket na go. Olsem na sampela taim mi lusim tingting long rausim dispela na ol brata i mas toksave long mi. Tasol long nau i gat 400 inap 500 i save kam long kibung, na i gat ol gutpela elda i save mekim ol tok, na i gat planti brata sista i amamas long wok long Dipatmen Bilong Kaikai.”
Kongrigesen Keflavik i stap long hap wes bilong Reikjavik inap 50 kilomita, na rot i go long ples i gat ol blakpela sit bilong paia ol i kolim lava em volkeno i bin tromoi i kam antap taim maunten i paia. Lava bilong volkeno i karamapim bikpela hap bilong Aislan. No gat bikpela diwai. Sampela liklik gras laiken na narapela liklik gras tru i stap, na sampela liklik diwai, em sampela i gat kaikai.
Kongrigesen long Keflavik i bin kamap long 1965 na i gat 19 pablisa. Klostu long en i gat ples balus intenesenel na ples ami bilong Amerika i stap. Ol i tambuim ol Witnes long autim tok long ples bilong ami, tasol ol Witnes i gat ol Baibel-stadi long dispela hap, na ol i helpim planti man long kisim save long tok i tru.
Orait, yumi lusim Reikjavik inap 55 kilomita long hap bilong is na i gat narapela kongrigesen i stap long Selfos. Long dispela hap i gat planti gras na bulmakau na sipsip na bikpela ples bilong kisim susu na bata samting. Na liklik taun Verageti i stap long wanpela gutpela ples daun, na long olgeta hap yumi lukim smok bilong hatwara i go antap. Long dispela hap i gat planti ples em wara i boil na i kam antap. Ol man i mekim wok long dispela samting na ol i wokim haus i gat hat insait na ol i planim tomato na kukamba na ol plaua.
Liklik kongrigesen i stap na i gat 19 pablisa bilong Kingdom. Em i bin kamap long 1988, na Sigurður Svava na meri bilong em Guðrún i lusim Reikjavik na i kam hia bilong helpim ol. Sigurður tasol i stap elda. Em i bin kamap Witnes long 10-pela yia bipo, na paslain long dispela taim em man bilong musik na long paitim dram long ben. Nau em i save klinim ol windo na lainim ol man long musik. Bipo em i man bilong dring na kisim drak, na marit bilong em i bruk, tasol long nau em i stap amamas na mekim wok bilong Jehova.
Long Hap Bilong Is
Yumi lusim Selfos na i go inap 680 kilomita long ol liklik rot i no gutpela tumas na yumi kamap long taun Retafiti long is long nambis. Yumi go hap aua moa, na yumi lukim bikpela volkeno Hekla. Em i bin pairap 4-pela taim kirap long yia 1900 i kam inap nau.
Long 1973 wanpela volkeno i pairap bikpela long Vestmanya (long ol ailan Westman). I gat 5,300 man i bin stap na ol i mas ranawe hariap i go long bikples insait long sampela aua tasol. Bihain ol i stretim bek taun na ol man i kam bek gen. Nau tupela Witnes i stap, na ol i autim gutpela tok long ol dispela man. Orait, yumi go tupela aua moa na yumi kamap long bikpela glesia Vatnajokul, olsem maunten ais, em i gutpela tru, na em i bikpela inap 8,300 kilomita skwea. Na taim yumi kam yumi lukim planti gutpela wara i kalap i kam daun, na ol wara tu.
Yumi raun inap 10-pela aua na nau yumi kam pinis long Retafiti na yumi bungim 12-pela pablisa ol i bilong laspela kongrigesen i bin kamap long Aislan. Paslain long 1988 i no gat Witnes long dispela hap, na long dispela yia ol i wokim haus misineri. Tupela misineri bilong Swiden, em Kjell wantaim meri bilong em Iiris, ol i kirap wok misineri long Aislan long 1963, na nau Sosaiti i salim tupela i kam autim tok long dispela 15,000 man long dispela hap hia i no gat taun. Nambis i longpela inap 500 kilomita, na planti man i stap long ol liklik ples na ol i kisim pis.
Kjell i tok: “Jehova i bin mekim gut long wok bilong Kingdom long dispela hap bilong Aislan. Kongrigesen i bin kamap hia long Janueri 1, 1993, na mipela stadi gut wantaim planti man na ol i wok long kamap strong. Bipo Brata Lindal i bin raun long hos, tasol nau mipela i raun long ka jip i gat 4-wil-draiv. I hatwok long draivim ka i go antap long maunten long tudak bilong taim bilong kol na rot i gat ais. Wanpela taim win i subim ka na i lusim rot na kapsait i go daun long maunten na i tanim tupela o 3-pela taim, na gutpela tru mipela i no bagarap!”
Tupela i bin stap 30 yia long Aislan, na Iiris i tok: “Planti bilong ol narapela kantri i bin kam hia bilong helpim mipela. Planti i mas go bek gen, tasol ol i bin mekim bikpela wok long autim tok long ol man na go bek gen na helpim ol moa. Mipela i stap yet na mipela i amamas long lukim ol gutpela wok i kamap long hatwok ol dispela narapela i bin mekim. Nau Jehova i hariapim wok long dispela hap.”
Sampela nupela man i bin autim tok long ol wanwok na ol i kam insait. Atli i bin wok long wanpela kampani konstraksen, na ol misineri i lainim em long tok i tru na em i autim tok long ol wanwok. Tupela i harim, na tupela yet i kirap autim tok, na wanpela wantaim meri bilong em ol i kisim baptais long Novemba 1992. Narapela i stadi yet wantaim ol Witnes long Baibel.
Yumi Go Long Not
Nau yumi lusim Retafiti na yumi go long wes inap 300 kilomita na yumi kamap long narapela kongrigesen long taun Akrare. Sosaiti i bin salim sampela painia salim i go long dispela hap long 1950 samting, na ol misin i mekim nogut long ol. Ol misin i putim ol toksave long nius na tokim ol man long ol i no ken harim tok bilong ol Witnes Bilong Jehova. Planti long dispela taun ol i mekim ol wok bilong ol spirit nogut. Tasol ol painia na misineri i karim dispela hevi na ol i no les kwik, olsem na long nau i gat gutpela kongrigesen i stap na i gat 35 manmeri i autim tok bilong Kingdom, na pasin sori i stap namel long ol.
Friðrik em wanpela elda, na bipo em man bilong kisim pis. Em i bin go long kibung distrik long 1982, na em i bilipim ol tok i tru em i bin harim. Em i kam bek long Akrare na em i laik autim tok i tru long famili bilong em na ol pren na wanwok. Em i lusim wok bilong kisim pis na bai em i gat taim bilong wok wantaim kongrigesen. I gat wanpela meri em pren bilong em, na em i tokim meri olsem tupela i no ken sindaun moa wantaim inap long tupela i marit, long wanem, em i laik kamap wanpela Witnes Bilong Jehova. Na em i laik bai meri i mas stadi long Baibel, long wanem, em i no laik maritim wanpela meri i no “bilip long Bikpela.” (1 Korin 7:39) Em i amamas, long wanem, Helga i kirap long stadi. Tupela i marit long Februeri 1983 na bihain liklik tupela i baptais. Bihain moa mama na susa tu bilong Friðrik ol i kam insait long tok i tru.
Nau yumi go inap 350 kilomita long Akranes, na yumi mas brukim 3-pela lain maunten na go long ol gutpela ples daun. I gat gutpela rot kolta i no olsem ol rot nogut bipo yumi bin raun long en. Liklik kongrigesen tasol i stap long Akranes—no gat wanpela liklik kongrigesen olsem i stap long Aislan—em tupela famili na i gat 5-pela pablisa, na tupela i elda. Bipo ol i lusim Reikjavik na bai ol i ken kam hia long liklik taun, long wanem, i sot tru long ol Witnes long dispela hap. (Aposel 16:9, 10) Inap tupela yia nau ol i bin wok strong long autim gutpela tok long dispela hap, na ol i save, Jehova bai mekim na wok bilong ol bai karim kaikai.—1 Korin 3:6.
Lain Bai Go Bikpela Yet
Ol fama i save planim kaikai insait long ol haus em smok bilong hatwara i save hatim, na ol i kamapim planti kain kaikai na ol narapela samting tu. Na ol Witnes tu i mekim kain wok olsem: ol i planim ol kaikai bilong spirit, olsem tok i tru, na long pasin isi ol i givim dispela kaikai long ol man, na long rot bilong spirit holi Jehova i mekim gut long wok bilong ol, na lain bilong em long kantri Aislan i go bikpela.
Long dispela yia i gat 542 manmeri i bin kam long Memorial bilong tingim i dai bilong Krais, na ol pablisa i mekim olsem 200 Baibel-stadi long ol man long olgeta mun. Ol pablisa i amamas long i go autim tok long longwe teritori, olsem na yumi save ol gutpela man long dispela bikpela kantri Aislan bai harim tok bilong Gutpela Wasman Krais Jisas. (Jon 10:14-16) Ol strongpela pablisa insait long 64 yia i go pinis ol i no bin les long autim tok long dispela kantri i gat ais wantaim paia, na nau ol i ken amamas long hatwok bilong ol i bin kamapim gutpela wok!
[Mep long pes 24]
(Bilong save ol dispela rait i stap we long pes, lukim buk o magasin)
Akrare
Akranes
Keflavik
Selfos
Vestmanya
Retafiti
Hekla
Gisa
VATNAJOKUL
REIKJAVIK
[Kredit Lain]
Based on map by Jean-Pierre Biard