Bilong Wanem Pasin Stil i Go Bikpela?
LONG Sande, Oktoba 18, 1992, planti man i go sindaun long gutpela nambis long biktaun Rio de Janero, ol i kolim Kopakabana na Ipanema. Wantu ol lain raskol i kam. Ol i pait namel long ol yet, na ol i go nabaut na stilim ol gutpela samting bilong ol manmeri i stap long nambis. Polis i liklik lain na ol i no inap mekim wanpela samting. Em samting nogut tru i save painim ol asples na ol turis long san long dispela hap.
Tru tumas, pasin stil i go bikpela. Long ol biktaun ol stilman i save hansapim ol yangpela na stilim ol samting bilong ol, na sampela taim ol i hansapim ol yangpela bilong kisim spot-su bilong ol—na ol i redi long kilim i dai yangpela tu bambai ol inap kisim. Ol i go insait long haus bilong man, maski man i stap o nogat. Sampela hausmeri i go wok long haus na taim ol i save pinis ol samting i stap we long haus, ol i stilim mani na ol bis samting i gat bikpela pe bilong en na ol i go pinis. Bikpela lain i bung wantaim na go insait long stua na pulim ol samting. Sampela lain i stilim ol man. Dispela samting i kamap planti long kantri Brasil long nau. Ating ol man i bin stilim samting bilong yu, o yu save long sampela pasin stil i kamap long hap bilong yu. Tasol bilong wanem planti man i stil?
Bilong Wanem Ol i Stil?
Tupela bikpela as bilong dispela i olsem: Ol i stap rabis o ol i kisim drak. Tasol i gat narapela as i no stap ples klia. Wanpela buk (The New Encyclopædia Britannica) i tok: “Ol man i wok long painim as tru bilong pasin raskol, tasol nogat.” Tasol buk i tok, “planti yangpela i pilim olsem ol i stap nogut na ol i no inap kisim ol gutpela samting olsem ol narapela,” na ol i kirap long stil na mekim ol narapela pasin nogut. Long nau ol man i laik kisim planti samting, tasol ol i no gat rot bilong kisim samting ol i laikim, olsem na ol i save stil.
Tasol yumi ken tingim tok bilong narapela buk (The World Book Encyclopedia) i tok: “Sampela lain i strong long bihainim yet ol pasin bilong bipo na ol i no laik senisim. Namel long kain lain olsem, pasin raskol i no i go bikpela. Pasin raskol i go bikpela namel long ol lain i gat planti senis long sindaun bilong ol, olsem long ples ol i stap long en, na wok ol i mekim, na ol samting ol i ting bai painim ol long bihain.” Buk i tok moa olsem: “I no gat planti wok ol yangpela inap kisim. Na ol wok nating ol inap kisim, ol i les long mekim; ol i save, sapos ol i stil bai ol inap kisim kwik bikpela mani. Na ol i no pret long i go kalabus, long wanem, i stap bilong ol i nogut pinis.”
Ol man i no gat wok o ol i no kisim bikpela pe, i no planti ol i stil; tasol planti man i wok long ofis na i gat gutpela wok, ol i save paulim ol samting long ples wok, olsem em i hap pe bilong ol. Ating yu harim stori long pasin giaman sampela memba, o wokman bilong gavman, o bisnisman, i bin mekim na ol i paulim bikpela mani tru. Tru tumas, i no ol rabisman tasol i stil.
Na tu planti piksa wokabaut long haus piksa na long televisen i stori long pasin stil (o long wanpela stilman) na i pani na i save mekim ol man i lap, na nau ol man i kisim tingting olsem i no gat rong long stil. Taim ol i lukim kain piksa olsem, ol i tok em bilong amamas tasol, tasol em i skulim ol long pasin bilong stil, na long pasin hait em i givim tingting long ol olsem stil em gutpela pasin bilong helpim ol. Sampela man i laik kisim planti samting, na sampela i les long wok, na sampela i lukim planti man i stil na ol i no kisim strafe, na dispela i kirapim ol long stil, na nau pasin stil i go bikpela. Tru tumas, yumi stap long taim bilong “planti hevi nogut tru,” na planti man i tingim ol yet tasol na laikim tumas mani.—2 Timoti 3:1-5.
Yupela i No Ken Stil
Ol man bilong dispela graun i no bihainim pasin i stret, tasol i bikpela samting long bihainim lo olsem: “Ol stilman i no ken stil moa.” (Efesus 4:28) Man i laikim tumas mani kago o ol amamas, em inap giamanim em yet na ting, maski strafe inap painim em, gutpela sapos em i stil. Tasol stil em i samting nogut tru long ai bilong God, na man i stil em i no sori long ol narapela man. Maski man i stilim liklik samting tasol, dispela inap mekim na bai bel bilong em i go strong na i no pilim rong moa. Na sapos ol man i save man i stil, husat bai bilip long em? Baibel i tok yumi mas was gut na yumi no ken “kilim man i dai o stilim ol samting o mekim ol arapela kain pasin nogut.”—1 Pita 4:15.
Tru, bel bilong yu i pen long pasin stil i go bikpela, tasol ol manmeri i sindaun long ol hap em pasin stil i bikpela tru ol i save mekim wanem bilong lukautim ol yet? Olsem wanem sampela stilman i bin senisim pasin bilong ol? Yu ting bihain bai i no gat pasin stil moa? Orait, kaunim stori i kamap bihain long dispela, nem bilong en: “Taim i No Gat Stilman Moa.”