Askim

Melkisedek em man bilong bipo na em i wanpela pris, na bilong wanem Baibel i tok, em “i no gat tumbuna”?

Hibru 7:3 i tok olsem. Tasol lukim ves 1 inap 3:

“Melkisedek em i king bilong Salem, na em i pris bilong God Antap Tru. Taim Abraham i pait na i kilim ol king na i wokabaut i go bek long ples, Melkisedek i bungim em long rot na i givim blesing long em. Na Abraham i tilim olgeta samting em i kisim long pait long 10-pela hap na i givim wanpela hap long Melkisedek. Yumi tanim dispela nem Melkisedek olsem, King Bilong Stretpela Pasin. Na em i king bilong Salem tu, em yumi tanim olsem King Bilong Pasin Bilong Bel Isi. Melkisedek i no gat papa na mama, na em i no gat ol lain tumbuna bilong en. Em i no gat de bilong mama i karim em, na i no gat de bilong em i dai. Em i stap wankain olsem Pikinini Bilong God. Em i stap pris oltaim oltaim.”​—⁠Hibru 7:​1-3.

Melkisedek em i wanpela man, olsem Abraham tu em i wanpela man, na tupela i bin toktok wantaim long sampela samting. (Stat 14:​17-20; Hibru 7:​4-10) Melkisedek i mas i gat papamama olsem ol narapela man i gat, na ating em i gat sampela pikinini tu, na em i gat ol tumbuna tu. Na em i mas dai tu olsem ol narapela man i save dai, na olsem Rom 5:​12, 14 i makim. Tasol Baibel i no kolim ol dispela samting, na yumi no save wanem taim em i bin dai na em i pinis long wok pris, na i olsem em “i no gat de bilong em i dai.”

Pol i bin stori long Melkisedek taim em i toktok long Krais Jisas bai stap nambawan Hetpris, na i olsem Melkisedek i makim Jisas long taim Jisas i mekim wok pris. Pol i tok: “Jisas i . . . kamap hetpris wankain olsem Melkisedek.” (Hibru 6:20) Wankain olsem wanem?

Pol i save dispela tok long Stat sapta 14 i no kolim stori bilong famili bilong Melkisedek o bilong papamama bilong em o tumbuna bilong em o wanem taim em i bin dai, olsem na Pol i tok tasol olsem Melkisedek “i no gat lain tumbuna bilong em.”

Olsem wanem Jisas tupela Melkisedek i wankain? Tru yumi save, God Jehova i Papa bilong Jisas, na Maria em mama bilong em, na em i bilong lain Juda. Tasol sampela samting bilong Jisas na Melkisedek i wankain: Em i no bilong lain bilong Livai, em lain pris bilong ol Israel. Em i no bin kamap pris long dispela rot, nogat. Na Melkisedek tu​—⁠em i no “man bilong dispela lain i mas kamap pris” olsem “lo i tok,” em lo bilong ol Israel. (Hibru 7:​15, 16) Long bipo, sapos papa em i pris, pikinini tu i mas kamap pris. Tasol “God i makim” Jisas long “stap hetpris, wankain olsem Melkisedek.”​—⁠Hibru 5:⁠10.

Na Jisas i no bin kamapim pikinini, na em i no gat sampela tumbuna pikinini na bai ol i ken senisim em na kamap pris long bihain, nogat. Long dispela pasin tu em “i no gat ol lain tumbuna bilong en.” Long olgeta taim bihain em bai mekim wok pris na skulim ol man. Pol i toktok long dispela wok bilong Jisas olsem:

“Jisas i stap oltaim oltaim. Em i holim wok pris oltaim, na i no gat senis bilong en. Olsem na oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol.”​—⁠Hibru 7:​24, 25.

Yumi stori pinis hia long tok bilong Pol long Hibru 7:3 na yumi kisim pinis dispela save. Tasol nogut dispela save i stap nating long tingting bilong yumi. Em i mas kirapim yumi long pilim gutpela pasin sori God Jehova i bin mekim long yumi long wokim rot na bai em i ken lusim ol rong bilong yumi inap oltaim oltaim, na em i bin wokim rot bilong skulim yumi na stiaim yumi long olgeta taim bihain.