Kamapim Popaia Bilong Yumi
SAMTING i bin kamap long dispela pait em i narapela kain tru! Wanpela meri i no holim wanpela samting bilong pait, tasol em i sakim 400 soldia i laik bekim nogut long wanpela man. Meri i krai long ol i no ken mekim dispela samting, olsem na nambawan bilong ol soldia i no tingting moa long bagarapim lain bilong meri.
Nambawan bilong ol soldia em Devit, bihain em i kamap king bilong Israel. Em i harim tok bilong dispela meri Abigel, long wanem, em i laik mekim ol samting God i laikim. Abigel i tokim Devit, sapos em i bekim nogut long man bilong em Nabal, em bai i gat asua long kilim i dai man. Em nau, Devit i tok: “God, Bikpela bilong yumi Israel, i bin salim yu i kam nau, na yu bungim mi. . . . Mi tenkyu long God long gutpela tingting na tok bilong yu, . . . long wanem, nau yu bin pasim mi na mi no kilim i dai sampela man na bekim rong bilong Nabal long han bilong mi yet.”—1 Samuel 25:9-35.
Long wanpela song Devit i askim: “Husat inap save long olgeta rong bilong em yet?” (Song 19:12) Ating yumi tu i no inap save long sampela popaia bilong yumi sapos wanpela man i no kamapim. Na sampela taim sampela hevi i kamap na nau yumi save, yumi bin popaia, o yumi no bihainim gutpela tingting, o yumi bin mekim sampela tok i bagarapim bel bilong man.
No Ken Bel Hevi Tumas
Yumi olgeta i save popaia, tasol yumi no ken larim dispela i bagarapim bel bilong yumi. Wanpela man, em Edward John Phelps, em i bin tok: “Man i no save mekim wanpela popaia, em i no save mekim wanpela [gutpela] wok tu.” Na disaipel Jems i tok: “Planti taim . . . yumi save popaia.” (Jems 3:2) Yu ting pikinini inap lain long wokabaut na em i no pundaun wanpela taim? Nogat, long wanem, taim em i popaia na pundaun, em i wok long lain i go na bihain em inap long wokabaut gut.
Na yumi tu, taim yumi o narapela man i popaia, dispela i mas lainim yumi. Baibel i save kamapim stori bilong sampela man i mekim popaia, na dispela inap helpim yumi na bai yumi no ken mekim wankain popaia olsem ol i bin mekim. Orait, ol popaia bilong ol inap lainim yumi long wanem samting?
Pasin Daun i Bikpela Samting
Wanpela samting i olsem: God i no sakim olgeta man i mekim popaia na tok ol i nogut pinis, nogat. Em i sakim ol man i bikhet na i no laik stretim popaia bilong ol sapos ol inap. Jehova i bin tokim King Sol bilong Israel long bagarapim olgeta lain bilong Amalek, tasol Sol i no mekim. Taim profet Samuel i kamapim dispela rong long Sol, pastaim Sol i mekim olsem i no bikpela samting, na bihain em i putim asua i go long sampela man. Em i no tingting long stretim dispela rong—em i tingting tasol long haitim, nogut em i kisim sem long ai bilong lain bilong em. Olsem na Jehova i rausim em long wok king.—1 Samuel 15:20-23, 30.
Devit i senisim Sol long wok king, na em tu i mekim sampela bikpela popaia. Tasol Jehova i lusim ol dispela rong bilong em, long wanem, em i mekim pasin daun na larim Jehova i skulim na stretim em. Pasin daun i mekim na em i harim tok bilong Abigel. Ol soldia bilong em i redi long pait, tasol long ai bilong ol Devit i tokaut olsem em i no bin tingting gut na klostu em i mekim bikpela popaia. Long olgeta taim pasin daun bilong em i helpim em long askim Jehova long lusim rong bilong em, na i helpim em long stretim pasin bilong em.
Na pasin daun i save helpim lain bilong Jehova long stretim ol tok kranki bilong ol. Taim Pol i kot long kaunsil, hetpris i tok long ol i mas paitim Pol. Tasol Pol i tok: “God bai i paitim yu yet, long wanem, yu olsem banis nogut ol i bin penim long waitpela pen.” (Aposel 23:3) Ating ai bilong Pol i nogut, na dispela i mekim na em i no save dispela man em i hetpris. Tasol sampela man i tokim em: “Yu laik tok nogut long hetpris bilong God, a?” Pol i tok: “Ol brata, mi no save dispela man em i hetpris. Mi mekim rong, long wanem, buk bilong God i gat tok olsem, ‘Yupela i no ken tok nogut long wanpela hetman bilong yupela.’ ” (Aposel 23:4, 5; Kisim Bek 22:28) Em nau, long pasin daun Pol i kamapim popaia bilong em.
Ol i Kamapim Popaia Bilong Ol
Na Baibel i tokaut olsem sampela i bin senisim tingting kranki bilong ol. Asap em i bin mekim olsem. Pastaim em i lukim ol man nogut i gat planti samting na i olsem ol i stap amamas, olsem na em i tok: “Bel bilong mi i stap klin, na mi no bin mekim sampela sin. Ating dispela em i lus nating, a?” Tasol bihain Asap i go long haus bilong Jehova na em i wok long tingting olsem: Taim man i lotuim Jehova dispela i save helpim em. Na long Song 73 em i tokaut long popaia bilong em.
Jona tu i bin kisim tingting kranki. Taim em i autim tok pinis long taun Ninive, ol Ninive i tanim bel, tasol Jona i no amamas taim Jehova i no givim strafe long ol. Nau Jehova i stretim Jona na Jona i save, tingting bilong em i kranki. Long hap bilong Baibel ol i kolim Jona, em i kamapim ol popaia bilong em na yumi save em i tanim bel.—Jona 3:10–4:11.
Na Jop tu, em i ting Jehova i as bilong ol hevi bilong em—em i no save Satan yet i as bilong en. Olsem na Jop i laik kamapim klia olsem i no stret em i kisim hevi olsem. Tasol em i no save long bikpela tok i kamap, olsem: Sapos traim i painim ol wokman bilong Jehova, bai ol i stap gut long em o nogat? (Jop 1:9-12) Bihain Elihu na Jehova i helpim Jop na em i save em i bin popaia, na em i tokaut olsem: “Sori tumas, mi bin mekim planti kranki toktok . . . Olsem na mi . . . sindaun long das na long sit bilong paia, bilong soim yu olsem mi tanim bel pinis.”—Jop 42:3, 6.
Taim yumi kamapim popaia bilong yumi, Jehova i amamas long yumi. Olsem ol dispela stori i soim yumi, sapos yumi kamapim ol popaia bilong yumi na wok strong long stretim ol tingting kranki o tok kranki o pasin kranki, Jehova i no ken givim baksait long yumi. Tasol yumi ken mekim wanem long dispela save?
Yumi Mas Mekim Sampela Samting
Sapos yumi kamapim popaia bilong yumi na mekim sampela samting bilong stretim, dispela inap helpim famili long pas gut wantaim. Olsem: Ating papa o mama i bin mekim bikpela wok, o wanpela samting i bin skrapim bel bilong em, olsem na taim em i stretim pikinini em i belhat na toktok strong. Sapos em i no stretim dispela popaia, dispela inap nogutim famili. Pol i tok: “Yupela papa, yupela i no ken bagarapim tingting bilong ol pikinini . . . stretim gut ol . . . na skulim ol long tok bilong Bikpela.”—Efesus 6:4.
Wanpela yangpela Kristen nem bilong em Pol em i tok, ‘Taim papa i ting em i bin popaia, em i save tokaut. Dispela pasin i helpim mi long i stap daun long em.’ Tasol taim yumi tokaut long wanpela popaia bilong yumi, yumi mas wok strong na bai yumi no ken mekim gen dispela kain popaia long bihain.
Sapos man o meri marit i mekim popaia na hevi i kamap long dispela, em i mas kamapim, na poroman i ken lusim tingting long en na tupela i ken stap wanbel gen. (Efesus 5:33; Kolosi 3:13) Wanpela man bilong Spen i gat 50 krismas samting, nem bilong em Jesús, em i save belhat kwik, tasol em i save mekim pasin daun na tokaut long meri bilong em Albina olsem em i bin popaia. Albina i tok, ‘Pasin bilong mitupela, taim narapela i mekim sampela tok i bagarapim bel bilong narapela, mipela save tokaut na tok sori long en. Dispela i helpim mitupela long pas gut wantaim.’
Taim Wanpela Elda i Popaia
Sapos ol elda Kristen i kamapim ol popaia bilong ol na tok sori long en, dispela bai helpim ol long wok gut wantaim long pasin wanbel. (Rom 12:10) Ating sampela elda i no laik kamapim popaia bilong ol, nogut kongrigesen i no laik daun moa long ol. Tasol sapos elda i laik haitim popaia bilong em, ating kongrigesen i no laik i stap aninit long em. Sapos wanpela brata i no tingting gut na em i mekim tok kranki na long pasin daun em i kamapim popaia bilong em, ating ol brata sista bai litimapim nem bilong em.
Fernando em wanpela elda long Spen, na em i stori long taim wanpela wasman sekit i miting wantaim bikpela lain elda, na taim em i givim tok long ol em i popaia na mekim wanpela tok kranki long pasin bilong wokim wanpela miting. Orait, long pasin daun wanpela brata i stretim dispela tok bilong em, na kwiktaim em i tokaut olsem em i bin popaia. Fernando i tok, “Taim em i kamapim popaia bilong em long ai bilong dispela bikpela lain elda, mi pilim tru dispela pasin bilong em. Olsem na mi laik daun moa long em. Pasin bilong em i skulim mi olsem mi mas save long ol popaia bilong mi na kamapim.”
Kamapim Kwik Popaia
Sapos yu tokaut kwik olsem yu bin popaia, ol man bai amamas long yu. Long 360 yia samting bipo, Misin Katolik i bin givim strafe long Galileo, long wanem, em i bin tok, graun i no stap namel tru long olgeta sta samting. Orait, long Oktoba 31, 1992 Pop John Paul Namba 2 i tokaut olsem Kot Bilong Misin i bin “popaia” long mekim olsem. Tasol taim yumi larim bikpela hap taim i go pinis bilong kamapim wanpela popaia, ating ol man i no bilip tumas long yumi, a?
Na i wankain tu sapos tok bilong yumi i bin givim hevi long poroman samting—sapos yumi tokaut kwik olsem yumi bin popaia, dispela inap stretim bel hevi. Jisas i tok, yumi no ken lusim taim long kamap wanbel gen. Em i tok: “Sapos yu bringim ofa bilong yu i kam long alta, na yu tingim brata bilong yu em i gat tok long yu, orait yu mas lusim ofa bilong yu i stap klostu long alta. Na yu go pastaim na stretim tok wantaim brata bilong yu. Stretim pinis, orait nau yu ken i go na givim ofa bilong yu long God.” (Matyu 5:23, 24) Sapos kwiktaim yumi kamapim popaia bilong yumi, na yumi askim man long lusim rong bilong yumi, bai yumi inap kamap wanbel gen.
Amamas Long Kamapim Popaia
Pasin yumi mekim long taim yumi mekim popaia, dispela inap helpim yumi o nogutim yumi. Sol i sakim ol tok bilong stretim em, na bihain em i mekim planti popaia moa, na taim em i dai, God i no orait long em. Tasol maski Devit i bin mekim planti popaia na rong, em i tanim bel na em i kisim ol tok bilong stretim em na em i stap gut long Jehova. (Lukim Song 32:3-5.) Yumi tu i laik mekim olsem, a?
Na taim yumi kamapim popaia bilong yumi na yumi wok strong long stretim, o yumi bin mekim rong na yumi tanim bel tru, yumi ken save, God i lusim dispela popaia o rong bilong yumi. Devit i tok: “Sapos God i lusim pinis rong bilong wanpela man, . . . dispela man i ken amamas.” (Song 32:1, 2) Olsem na yumi mas kamapim ol popaia bilong yumi!
[Piksa long pes 29]
Yu ting pikinini inap lain long wokabaut sapos em i no pundaun sampela taim?