Saiens, na Lotu, na Wok Bilong Kisim Stretpela Save

‘Planti lotu giaman i kamap na dispela i tanim tingting bilong mi.’​—⁠Charles Darwin

LONG yia 1800 samting saiens na lotu i stap gut wantaim. Wanpela buk (Darwin: Before and After) i tok: “Long ol rait i kamapim save ol man bilong saiens i bin kisim, ol man bilong raitim i stori long God long pasin i makim olsem ol i bilip long God.”

Buk bilong Darwin (Origin of Species) em wanpela samting i mekim na senis i kamap. Saiens na tok bilong evolusen i wok long pas wantaim na i olsem i no gat wok moa long lotu​—⁠o God. Bikman Julian Huxley i tok: “Ol man i bihainim tingting bilong evolusen, i no gat wok moa long ol i bilip long God.”

Long nau ol man i ting tok bilong evolusen em i olsem as bilong saiens. Saveman Fred Hoyle i tok: “Ol man bilong saiens i tingting strong long pasim ol man bambai ol i no ken bihainim gen ol tingting kranki bilong lotu long bipo, na ol i no tingting strong olsem long kisim stretpela save.” Wanem ol dispela tingting bilong lotu i no stret wantaim saiens?

Lotu i Mekim na Ol Man i No Laik Bilip Olsem God i Bin Wokim Ol Samting

Sampela man, em planti ol i bilong ol lotu Talatala i ting Baibel i no inap kranki, ol i laik helpim Baibel na ol i strong long tok inap 10,000 yia tasol bipo God i bin wokim skai na graun. Ol saveman bilong saiens i tok bilas long dispela tingting, long wanem, em i no stret wantaim save ol i kisim pinis.

Orait, Baibel i tok wanem? Baibel i tok: “Bipo bipo tru God i mekim kamap skai na graun.” (Stat 1:⁠1) Baibel i no tok, hamas yia bipo God i mekim. Na paslain long Stat 1:​3-5 Baibel i no stori long ol samting God i wokim long “de namba wan.” God i bin wokim pinis “skai na graun” taim em i kirap na wokim ol samting long “de namba wan.” Orait, yu ting skai na graun i bin kamap planti bilion yia bipo, olsem ol man bilong saiens i tok? Yumi ken ting olsem, long wanem, Baibel i no makim wanem taim tru i bin kamap.

Na sampela lotu ol i strong long tok, taim Baibel i tok God i wokim ol samting long 6-pela “de,” Baibel i tok long 6-pela de stret, olsem na God i bin wokim olgeta samting long graun insait long 144 aua tasol. Ol man bilong saiens i no bilipim dispela tok, long wanem, ol i ting i no stret wantaim samting tru ol i lukim.

Tok bilong Baibel i stret wantaim tok bilong saiens. Tasol tok bilong ol dispela lotu i no stret. Baibel i no tok olgeta wan wan “de” bilong God i wokim ol samting em inap 24 aua tasol. Nogat. Long Baibel dispela tok “de” inap makim bikpela hap taim. Sampela “de” inap makim planti tausen yia.a

Olsem na tingting bilong ol man olsem God i bin wokim ol samting inap 10,000 yia bipo tasol, na tingting bilong ol man olsem “de” long Baibel i makim de stret bilong 24 aua, i mekim na ol man i no laik bilip olsem God i bin wokim ol samting. Tingting bilong ol i kranki; em i no stret wantaim Baibel o stretpela save ol man bilong saiens i kisim pinis. Tasol i gat sampela samting moa na ol man bilong saiens i no laikim lotu.

Ol i Mekim Wok Nogut Long Strong Bilong Bosim Ol Man

Long bipo na i kam inap long nau, lotu i bin mekim planti pasin i no stret. Namel long yia 500 na yia 1500, ol bikman bilong lotu i paulim tok olsem God i bin wokim ol samting bambai ol i ken makim olsem i stret ol i helpim ol maniman i bosim Yurop. Ol i tok, God i bin wokim ol man, olsem na em yet i makim wanem kain sindaun bai ol i kisim, olsem ol bai stap maniman o rabisman. Na wanpela buk (The Intelligent Universe) i tok: “Ol i save tokim ol namba 2 na namba 3 pikinini man bilong maniman ‘God yet i makim’ na ol i no inap kisim samting bilong papa o kisim liklik tasol. Na ol i save tokim ol wokboi, ol i mas amamas tasol long ‘dispela kain sindaun God i singautim ol long en.’ ”

Olsem na yumi no ken kirap nogut long planti man i no laik bihainim gen “ol tingting kranki bilong lotu long bipo”! Lotu i mas helpim ol man long kisim save long God, tasol nogat; ol bikman bilong lotu i bin helpim ol yet. (Esekiel 34:⁠2) Wanpela nius (India Today) i tok: “Yumi tingim pasin em lotu i bin mekim kirap long bipo yet na yumi kirap nogut long sampela man i bilip yet long en. . . . Long nem bilong Bikpela Man bilong wokim olgeta samting . . . ol man i bin mekim pasin nogut tru long ol narapela man.”

Pasin nogut bilong ol lotu giaman i tanim tingting bilong Darwin, em i tok: “Isi isi mi no bilip moa olsem lotu Kristen i kam long God. Planti lotu giaman i kamap kwiktaim long planti hap bilong graun na dispela i tanim tingting bilong mi.”

Lotu i Tru Em i Win

Pasin giaman bilong lotu i no nupela samting long dispela graun. Ol bikman bilong lotu long taim bilong Jisas i laik kisim strong bilong bosim ol man na Jisas i tokim ol: “Long ausait yupela i olsem gutpela man​—⁠tasol long insait, ol pasin giaman na pasin nogut i pulap i stap.”​—⁠Matyu 23:​28, Baibel Phillips.

Tasol lotu Kristen tru “i no bilong dispela graun.” (Jon 17:16) Ol Kristen tru i no save insait long lotu giaman o wok politik nogut; ol i no bilipim olkain tok olsem i no gat Man i bin wokim yumi. Aposel Pol i tok: “Gutpela save bilong dispela graun em i olsem longlong pasin tasol long ai bilong God.”​—⁠1 Korin 3:19.

Tasol i no olsem ol Kristen tru i no laik kisim save long ol samting ol man bilong saiens i wok long kisim save long en. Nogat. God i tokim profet Aisaia long bipo, olsem: “Yupela lukluk i go antap long skai na lukim ol sta samting i stap antap. Husat tru i bin wokim ol?” (Aisaia 40:26) Bilong save gut long Man bilong wokim olgeta samting, God i kirapim Jop long tingim ol gutpela samting i stap long graun na long antap.​—⁠Jop, sapta 38-41.

Tru tumas, ol man i bilip olsem i gat Man bilong wokim olgeta samting, ol i pilim tru ol gutpela samting em i bin wokim. (Song 139:⁠14) Na ol i save bilip tru long ol tok bilong dispela Man, em God Jehova, long gutpela samting bai kamap long bihain. (KTH 21:​1-4) Planti milion manmeri i wok long stadi long Baibel na nau ol i save, ol man i no bin kamap nating, na ol samting bai painim ol i no ken kamap nating. God i no wokim nating ol man; em bai kamapim tru laik bilong em, na olgeta man i bihainim tok bai kisim blesing. Mipela laik bai yu yet yu ken kisim save long dispela samting.

[Ol Futnot]

[Blok long pes 6]

OL I NO SAVE?

LONG yia 1971, loya Norman Macbeth i raitim buk (Darwin Retried​—⁠An Appeal to Reason) na em i tok: “Ol Witnes Bilong Jehova tu i bin kisim bikpela save long ol samting i gat laip.” Em i kaunim wanpela tok long nius Kirap! i stori long tok bilong evolusen na em i tok: “Mi kirap nogut long stretpela tingting ol i kamapim, em i daunim tok bilong Darwin.” Em i lukim olsem ol i bin skelim gut ol samting na kamapim tok bilong sampela saveman i helpim tok bilong ol, na em i tok: “Nau Simpson i no ken tok moa olsem: ‘. . . ol man i no bilip long en [evolusen], klostu olgeta i no save long ol samting tru bilong saiens.’ ”

[Piksa long pes 7]

Ol samting bai painim ol man long bihain i no ken kamap nating