Jisas i Bilip Long God o Nogat?

Wanpela Askim i Givim Hatwok Long Ol Man i Bilip Long God Triwan

“OLSEM wanem bai yumi tok, Jisas i bilip long God? Em yet i God; em i save long olgeta samting na lukim olgeta samting, no gat wok long em i kisim helpim. Tasol pasin bilong bilip i olsem yu tingting long narapela i mas helpim yu, na yu bilip long samting yu no inap lukim. Olsem na i no inap God-Jisas i bilip long God.”

Wanpela tisa bilong lotu long Frans (Jacques Guillet) i tok, dispela tingting em bikpela tingting bilong lotu Katolik. Yu kirap nogut long en? Olsem wanem? Yu ting Jisas i bin i stap gutpela piksa bilong makim olgeta pasin ol Kristen i mas bihainim, na pasin bilong bilip tu? Sapos yu ting olsem, yu no tingim tok bilong ol misin long God Triwan.

Ol saveman bilong lotu Katolik na Talatala na Otodoks i ting “tok hait” bilong God Triwan em i “as bilong bilip na pasin Kristen,” olsem na ol i no save Jisas i bilip long God o nogat.a Tingting bilong ol i no klia. Sampela i ting Jisas i bilip. Dispela tisa bilong lotu (Guillet) i tok, “yumi no inap sakim tingting olsem Jisas i bilip long God.” Tasol em i tok tu, dispela i “narapela kain tru” sapos yumi tingim tok bilong God Triwan.

Planti tisa bilong lotu i gat tingting wankain olsem wanpela pris bilong Frans (Jean Galot), em i tok Krais “em i God tru na man tru . . . olsem na Krais i no inap bilip long em yet.” Wanpela nius Katolik (La Civiltà Cattolica) i tok, “Pasin bilong bilip i olsem yu bilip long narapela; yu no bilip long yu yet.” Olsem na tok bilong God Triwan i mekim na planti man i ting, Jisas i no bilip long God.

Ol tisa bilong lotu i tok, “Long fopela Gutnius i no gat liklik tok olsem Jisas i bilip long God.” Long Nupela Testamen, hap tok Grik (pi·steuʹo) ol i tanim olsem “bilip long” o “i gat bilip,” na hap tok Grik (piʹstis) ol i tanim olsem “bilip,” dispela tupela tok i makim bilip bilong ol disaipel, ol i bilip long God na long Krais. I no makim olsem Jisas i bilip long Papa. Orait, yu ting Pikinini bilong God i no bilip? Ol tok na ol samting em i mekim i givim wanem tingting long yumi? Baibel i tok wanem?

Sapos Em i No Bilip, Bai Em i Beten?

Jisas em i man bilong beten. Long olgeta kain taim em i save beten​—⁠taim em i baptais (Luk 3:21); long nait olgeta long taim em i laik makim ol 12-pela aposel (Luk 6:​12, 13); long taim em i stap long maunten wantaim Pita na Jon na Jems na bodi bilong em i kamap narakain. (Luk 9:​28, 29) Em i beten i stap na wanpela disaipel i tokim em: “Yu skulim mipela long mekim prea,” na em i lainim ol long Beten Bilong Bikpela. (Luk 11:​1-4; Matyu 6:​9-13) Em i kirap long moningtaim tru na i go long ples i no gat man na beten longtaim (Mak 1:​35-39); na em i beten long apinun, long maunten, taim em i salim ol disaipel i go pinis (Mak 6:​45, 46); em i beten wantaim ol disaipel na bilong helpim ol disaipel. (Luk 22:32; Jon 17:​1-26) Tru tumas, beten em i bikpela samting long Jisas.

Taim em i laik wokim mirakel, em i beten pastaim, olsem long taim em i laik kirapim bek pren bilong em, Lasarus. Em i tok: “Papa, mi tenkyu long yu, long wanem, yu harim pinis beten bilong mi. Mi save pinis oltaim yu save harim beten bilong mi. Tasol mi ting long ol manmeri i sanap hia na mi mekim dispela tok, bilong ol i ken save yu bin salim mi na mi kam.” (Jon 11:​41, 42) Em i bilip tru olsem Papa i harim beten bilong em, na dispela i makim klia olsem em i bilip tru long God. Pasin bilong beten na bilip i wok wantaim, olsem Krais i makim taim em i tokim ol disaipel: “Sapos yupela i . . . beten long kisim wanpela samting, na sapos yupela i bilip tru olsem, yupela bai i kisim dispela samting, orait mi tokim yupela, dispela samting bai i kamap olsem yupela i tok.”​—⁠Mak 11:24.

Sapos Jisas i no bilip long God, em i no ken beten long God, a? Tok bilong ol misin long God Triwan i no stret long Baibel, na taim ol i lainim ol man olsem Jisas em i stap man na God wantaim, dispela i paulim tok bilong Baibel. Na ol man i no inap save gut long tok klia bilong Baibel na strong bilong en. Yu ting Jisas i beten long husat? Em yet? Yu ting em i no save em i God? Na sapos em i God na em i save em i God, bilong wanem em i beten?

Ol beten Jisas i mekim long laspela de em i stap laip long graun i kamapim klia moa olsem em i bilip strong long Papa bilong em long heven. Dispela i kamap klia taim em i tok: “Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen na bai mi stap wantaim yu.”​—⁠Jon 17:⁠5.

Taim em i stap long gaden Getsemani, long maunten Oliv, em i save bikpela traim tru i laik painim em na bai em i dai, “na bel bilong en i hevi, na em i pilim nogut tru,” na em i tok: “Bel bilong mi em i hevi tumas, na klostu mi laik i dai.” (Matyu 26:​36-38) Na em i brukim skru na beten olsem: “Papa, sapos yu laik, yu ken rausim dispela kap long mi. Tasol yu no ken bihainim laik bilong mi. Nogat. Yu mas bihainim laik bilong yu tasol.” Na “wanpela ensel bilong heven i kam long em na i strongim em.” God i harim beten bilong em na helpim em. Em i pilim nogut tru na em i gat bikpela traim, olsem na “tuhat bilong en i kamap olsem blut na i pundaun long graun.”​—⁠Luk 22:​42-44.

Jisas i pilim nogut tru, na ensel i mas strongim em, na em i beten askim God long helpim em​—⁠ol dispela samting i makim wanem samting? Tisa bilong lotu (Jacques Guillet) i tok: “Yumi save Jisas i beten, na beten i bikpela samting long laip bilong em na long ol samting em i mekim. Em i beten olsem ol man i save beten, na em i beten bilong helpim ol man. Man i beten, yumi save em i bilip long God. Orait, yu ting Jisas i no bilip na em i beten?”

Ol i nilim Jisas long diwai na taim em i laik i dai, em i singaut strong na kolim tok bilong wanpela Song bilong Devit. Em i bilip, na singaut strong, na mekim laspela beten olsem: “Papa, mi putim spirit bilong mi long han bilong yu.” (Luk 23:46; Matyu 27:46) Wanpela Baibel Itali (Parola del Signore) i raitim dispela tok olsem Jisas ‘i putim laip bilong em’ long han bilong Papa.

Tisa hia (Jacques Guillet) i tok: “Ol man bilong raitim Gutnius i stori long Krais i dai long diwai, na em i kolim tok bilong ol singsing bilong Israel na singaut long Papa, na stori bilong ol i givim save long yumi olsem dispela singaut em singaut bilong dispela wanpela Pikinini tasol Papa yet i bin kamapim; em singaut bilong man i pilim nogut tru, na em i save tru Papa bai helpim em, na em i bilip tru; em singaut bilong man i holimpas bilip na em i dai.”

Dispela i makim klia tru olsem Jisas i bilip long God, tasol sampela tisa bilong lotu i tok, Jisas i “save tru” long God; em i no bilip long God. Tasol Baibel i no as bilong dispela tok.

Jisas i karim bikpela pen na hevi na sanap strong na dispela i givim wanem save long yumi long em i bilip o nogat?

Man Bilong “Inapim Tru Bilip Bilong Yumi” Em i Kamap Nambawan Tru

Long Hibru sapta 11, aposel Pol i stori long ol bilipman i stap paslain long Krais, na bihain em i stori long nambawan man i soim yumi pasin bilong bilip, na em i tok: “Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. . . . Em i tingting long [amamas em bai kisim] na em i stap strong, na em i karim pen na i dai long diwai . . . Ol man bilong sin bipo ol i birua nogut long Jisas. Tasol em i sanap strong moa. Yupela tingim dispela, olsem na yupela i no ken les long sanap strong.”​—⁠Hibru 12:​1-3.

Planti tisa bilong lotu i tok, dispela ves i no stori long “bilip bilong Jisas yet”; ves i tok long wanpela wok bilong em, olsem man bilong kamapim bilip o as bilong bilip. Hap tok Grik (te·lei·o·teś) hia i makim man em i inapim tru samting o mekim i kamap nambawan tru. Jisas em i Man bilong “inapim tru bilip bilong yumi,” long wanem, taim em i kam long graun em i truim ol tok profet bilong Baibel na kamapim strongpela as bilong bilip. Tasol yu ting dispela i makim olsem em yet i no bilip?

Ol hap tok bilong pas Pol i raitim long ol Hibru 11 na i stap long blok long pes 15, em i kamapim klia olsem Jisas i gat bilip. Jisas i karim hevi na bihainim tok na dispela i skulim em na em i kamap nambawan man tru. Em i stap nambawan man tru, tasol ol samting i painim em i skulim em na em i kamap nambawan man tru long olgeta samting, long bilip tu, bambai em inap tru long i stap Hetpris na helpim ol Kristen tru long kisim laip. Em i save beten long Papa “na em i singaut strong na i krai planti,” na em i “bihainim tru tok bilong God” na “aninit long God.” (Hibru 3:​1, 2; 5:​7-9) Long Hibru 4:​15, Baibel i tok “olgeta traim” i kamap long em olsem i save kamap long olgeta Kristen, em kain kain samting “i traim bilip” bilong ol. (Jems 1:​2, 3) Olsem na yu ting i no gat samting i traim bilip bilong Jisas?

Jisas i singaut long God bilong helpim em, na em i bihainim tok bilong God, na karim hevi, na traim i painim em, na em i stap gut long God, na aninit long God, na dispela olgeta samting i makim klia olsem Jisas i bilip long God, na em yet i mas kamap inap tru long bilip pastaim bambai em i ken kamap Man bilong “inapim tru bilip bilong yumi.” Tru tumas, em i no God Pikinini olsem bilip bilong God Triwan i makim.​—⁠1 Jon 5:⁠5.

Yu Ting Em i No Bilip Long Tok Bilong God?

Tok bilong God Triwan i paulim tru tingting bilong ol tisa bilong lotu na ol i strong long tok, Jisas “i no inap bilip long Buk Bilong God na tok bilong en”; “em yet i Tok bilong God, olsem na em inap autim tasol dispela tok.”​—⁠Buk Gesù il Signore (em misin i orait long en), bilong Angelo Amato.

Tasol planti taim Jisas i kolim ol tok bilong Baibel na dispela i makim wanem samting? Taim Satan i traim em, tripela taim em i kolim tok bilong Baibel bilong bekim tok. Namba 3 bekim i soim Satan olsem Jisas i save lotu long God wanpela tasol. (Matyu 4:​4, 7, 10) Na Jisas i bin kolim sampela tok profet i makim em, na em i kamapim klia olsem em i bilip long truim bilong en. (Mak 14:​21, 27; Luk 18:​31-33; 22:37; skelim wantaim Luk 9:22; 24:​44-46.) Dispela i kamapim klia olsem Jisas i save long ol tok Papa i bin kirapim ol man long raitim, na em i bilip long en na bihainim, na em i bilip tru olsem ol tok profet i makim em bai kamap tru, olsem hevi na traim i mas painim em, na bai em i dai na kirap bek.

Jisas i Makim Pasin Bilong Bilip Yumi Mas Bihainim

Jisas i wok strong long holimpas bilip i go inap long em i dai bambai em i ken i stap gut long Papa bilong em na ‘winim strong bilong dispela graun.’ (Jon 16:33) Man i no bilip em i no inap winim pait olsem. (Hibru 11:6; 1 Jon 5:⁠4) Jisas i bilip na em i win tru, olsem na em i makim pasin ol gutpela disaipel bilong em i ken bihainim. Em i bilip tru long God em i God tru.

[Ol Futnot]

[Blok long pes 15]

Jisas, Man Bilong Inapim Bilip, Em i Kamap Nambawan Tru

Hibru 2:10: “God i laik bai Jisas i mas kirapim wok bilong kisim bek ol manmeri, olsem na em i larim Jisas i karim pen, na long dispela pen em i mekim Jisas i kamap nambawan man tru bilong helpim ol manmeri.”

Hibru 2:​17, 18: “Long olgeta samting em i mas kamap wankain tru olsem ol brata bilong en, na em bai inap i stap hetpris bilong ol . . . Em i kamap hetpris bilong sori long ol manmeri, na em i save bihainim olgeta tok bilong God na . . . tekewe sin bilong ol manmeri. Ol traim i bin kamap long em na em yet i bin karim pen. Olsem na em inap long helpim ol manmeri long taim ol traim i kamap long ol.”

Hibru 3:2: “God i bin givim dispela wok long em, na em i bihainim tru tok bilong God, long wankain pasin olsem bipo Moses i bin mekim.”

Hibru 4:15: “Yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin.”

Hibru 5:​7-9: “[Jisas] i save, God inap long kisim bek em, na em i no mas i dai, olsem na em i beten strong long God, na . . . i krai planti. Em i . . . aninit long God, olsem na God i harim beten bilong em. Jisas em i Pikinini Bilong God, tasol em i karim pen, na dispela i skulim em tru long pasin bilong bihainim tok bilong God. Dispela i mekim em i kamap nambawan man tru bilong bihainim tok. . . . Na em i kamap Man bilong helpim na kisim bek olgeta manmeri.”