Jehova i Bin Helpim Mi
EM STORI BILONG MAX HENNING
Em 1933, na nau tasol Adolf Hitler i kamap nambawan bos long Jemani. Tasol ol Witnes Bilong Jehova long Belin, ol inap olsem 500, ol i no bin surik liklik. Planti yangpela ol i kamap painia, olsem mekim wok autim tok long olgeta de, na sampela i orait tu long i go mekim wok long ol narapela kantri bilong Yurop. Mitupela pren bilong mi Werner Flatten, i save kirapim narapela narapela olsem: “Bilong wanem yumi save wet na lusim nating taim? Bilong wanem yumi no kirap na mekim wok painia?”
ETPELA de bihain long mama i karim mi long 1909, tupela gutpela waspapamama i bin kisim mi na lukautim mi. Tasol long 1918 mipela famili i bel hevi stret taim liklik pikinini meri bilong ol, olsem susa bilong mi, em i dai wantu tasol. Liklik taim bihain, ol Sumatin Bilong Baibel—bipo ol i save kolim ol Witnes Bilong Jehova olsem—ol i kam long haus bilong mipela na waspapamama bilong mi ol i bin putim gut yau long ol tok i tru bilong Baibel na ol i bilip long en. Na ol i helpim mi tu long pilim tru ol samting bilong spirit.
Mi bin wok strong long lain long skul na bihain mi kamap plama. Tasol bikpela samting moa, mi kirap mekim ol wok bilong spirit. Mitupela Werner i kirap mekim wok painia long Me 5, 1933. Mipela i save kikim wilwil i go long wanpela taun em i stap 100 kilomita longwe long Belin, na mipela i save stap long dispela hap na autim tok inap tupela wik. Bihain mipela i save kam bek long Belin na mekim sampela wok samting mipela i mas mekim. Mekim pinis, orait mipela i save go bek long dispela taun na autim tok inap tupela wik.
Mipela i tok mipela i laik mekim wok long narapela kantri, na long Disemba 1933 ol i makim mipela bilong i go wok long kantri bipo ol i kolim Yugoslavia. Tasol taim mipela i no i go yet, ol i senisim ples wok bilong mipela na tok mipela i mas go long Utrekt long Netelan. Liklik taim bihain mi kisim baptais. Long dispela taim ol i ting wok autim tok em nambawan samting—baptais nogat. Kirap long dispela de mi save wetim Jehova i helpim mi long olgeta taim. Wanpela tok em man bilong raitim Song i bin mekim i strongim mi tru: “Tasol God yet i save helpim mi. Tru tumas, Bikpela i save lukautim mi na mi stap gut.”—Song 54:4.
Mekim Wok Painia Long Netelan
Liklik taim bihain long mipela i kamap long Netelan, ol i senisim ples wok gen na tok mipela i mas i go long biktaun Rotadam. Mipela i stap wantaim wanpela famili, na papa na wanpela pikinini man tu i mekim wok painia. Sampela mun bihain Sosaiti i baim wanpela bikpela haus long Lirsam, wanpela taun klostu long Utrekt, bilong ol painia i ken stap long en, na mitupela Werner i go sindaun long en.
Taim mipela i sindaun long dispela haus painia, mipela i save raun long wilwil bilong i go long ol ples klostu, na bilong i go long ol ples longwe mipela i mekim wok long wanpela ka em inap karim 7-pela man. Long dispela taim, inap wan handet Witnes tasol i stap long Netelan olgeta. Long nau, 60 yia bihain, i gat 4,000 pablisa insait long 50 kongrigesen long ol ples mipela i bin raun autim tok long en taim mipela i sindaun long dispela haus painia.
Mipela i bin wok strong long autim tok, inap 14-pela aua long olgeta de, na dispela i mekim mipela i amamas. Nambawan tingting bilong mipela, em mipela mas tilim planti buk samting. Planti taim insait long wanpela de, mipela i bin tilim 100 liklik buk long ol manmeri i laik harim tok. Tasol long dispela taim bipo mipela i no save go bek lukim ol na mekim Baibel-stadi long ol.
Wanpela taim mitupela poroman bilong mi i bin autim tok long taun Fresvek. Em i wok long autim tok long wanpela man i sanap long dua bilong wanpela strongpela banis bilong ami, na mi kaunim Baibel bilong mi. Mi bin katim planti hap tok bilong en long retpela na blupela ing. Bihain, wanpela kamda i bin mekim sampela wok long wanpela rup i stap klostu, em i tokim dispela man i sanap long dua olsem, em i ting mi wanpela man bilong lukstil. Olsem na long dispela de yet ol polis i kam holim mi taim mi autim tok long wanpela papa bilong stua, na ol i kisim Baibel bilong mi.
Ol i bringim mi long kot, na ol i kotim mi long ol mak i stap long Baibel bilong mi; ol i tok mi wok long droim piksa bilong dispela banis bilong ami. Kot i tok mi gat asua, na jas i makim mi bilong stap kalabus tupela yia. Tasol mi apil na mi winim kot. Mi amamas long stap fri, tasol mi amamas moa yet taim ol i bekim Baibel bilong mi i gat ol tok mi bin raitim long en!
Long Julai samting long 1936, mi wantaim Richard Brauning, wanpela painia long haus painia, mitupela i bin autim tok long taim bilong hat long hap not bilong kantri. Long namba wan mun, mipela i lusim 240 aua long autim tok na mipela i tilim planti planti buk na nius. Mipela sindaun long wanpela haus sel na mekim ol wok bilong lukautim mipela yet, olsem wasim klos, redim kaikai, na sampela samting moa.
Bihain ol i makim mi long wok long wanpela bot, nem bilong en Lightbearer, bihain planti manmeri long hap not bilong Netelan i save long en. Faipela painia i save sindaun long dispela bot, na long rot bilong en ol inap autim tok long planti hap i stap longwe.
Sampela Nupela Wok
Long 1938, ol i makim mi olsem wasman son—em nem ol i bin givim long ol Witnes Bilong Jehova ol i save mekim wok olsem wasman sekit long dispela taim. Olsem na mi lusim bot Lightbearer na mi kirap i go raun long tripela provins long hap bilong saut, bilong lukim ol kongrigesen na ol Witnes ol i stap long ol longwe hap.
Mipela i save raun long wilwil tasol. Planti taim mipela i mas lusim wanpela de olgeta bilong go kamap long narapela kongrigesen o grup. Wanpela biktaun mi bin raun long en em Breda, na mi stap nau long dispela hap. Long dispela taim i no gat wanpela kongrigesen long Breda—tupela lapun marit tasol i stap, ol i Witnes.
Taim mi bin wok wantaim ol brata long provins Limbek, wanpela man i save wok long wanpela main, em Johan Pieper, em i singautim mi i kam bilong bekim planti askim bilong em. Em i holimpas tok i tru bilong Baibel na em i kamap man bilong autim tok na i no save pret. Fopela yia bihain ol i holim em na putim em long wanpela banis kalabus, na em i stap kalabus inap tripela yia na hap. Taim em i lusim pinis, em i kirap wok strong gen long autim tok na long nau em i stap elda yet. Na wok i go bikpela tru: Pastaim i gat wanpela liklik kongrigesen long Limbek na 12-pela Witnes; nau i gat 17 kongrigesen na 1,550 pablisa!
Ol Natsi i Bosim Mipela
Long Me 1940 ol Natsi i kam insait long Netelan. Sosaiti i singautim mi long go wok long brens-ofis bilong Sosaiti Was Taua long Amstedam. Mipela i mas was gut tru na mekim wok, na dispela i helpim mipela long pilim tru dispela savetok bilong Baibel: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.” (Sindaun 17:17) Gutpela pasin wanbel i bin kamap strong tru long dispela taim bilong hevi, na dispela i bin helpim mi long kamap strong moa yet long spirit na i redim tingting bilong mi long karim ol bikpela hevi tru bai kamap bihain.
Ol i makim mi bilong bosim wok bilong salim ol buk samting i go long ol kongrigesen, na ol brata i save kisim i go. Tasol ol polis Gestapo i wok long painim ol yangpela man bilong wok leba nating long Jemani, olsem na mipela i makim ol sista Kristen bilong karim ol buk samting. Bihain ol i salim wanpela sista i kam long Deheg, nem bilong em Wilhelmina Bakker tasol ol i save kolim em Nonnie, na mi kisim em i go long dispela hap em wasman bilong brens, Arthur Winkler, em i hait i stap. Mi no laik tru long pulim ai bilong ol man, olsem na mi bilas olsem wanpela fama Holan na pasim tu ol su diwai, na mi kisim Nonnie i go raun long wanpela kain tren i ran long rot. Bihain mi kisim save olsem Nonnie i hatwok tru long bosim em yet long lap, long wanem, bilas bilong mi i bin wok long pulim ai bilong ol man.
Long Oktoba 21, 1941, wanpela i kamapim long ol birua ples hait bilong mipela long Amstedam, em ples bilong putim olgeta buk samting na pepa. Long taim ol polis Gestapo i kam bilong kisim ol dispela samting, ol i holim Winkler wantaim Nonnie. Taim ol i bringim tupela long haus kalabus, tupela i harim tupela polis Gestapo i toktok long ol i bin bihainim “wanpela liklik man i gat blakpela gras,” tasol ol manmeri i pas pas long rot na ol i no lukim em moa. Tupela i save ol polis i stori long mi, olsem na Winkler i painim rot bilong salim toksave long ol brata. Kwiktaim ol i salim mi i go long Deheg.
Nonnie i lusim kalabus na em i go bek long Deheg bilong mekim wok painia. Mi bungim em gen long dispela hap. Tasol taim ol i kalabusim wasman bilong kongrigesen long Rotadam, ol i salim mi i go long dispela hap olsem senis bilong em. Bihain ol i kalabusim wasman bilong Kongrigesen Guda na ol i salim mi i go long dispela hap olsem senis bilong em. Orait bihain, long Mas 29, 1943, ol i holimpas mi. Mi wok long sekim olgeta buk na nius bilong Baibel mipela i holim, na mi kirap nogut taim ol polis Gestapo i kam insait long haus.
Ol buk samting i stap nabaut long tebol, na wanpela lista tu i stap, i gat nem bilong ol brata sista Kristen, tasol ol i bin raitim ol dispela nem long narapela kain pasin i olsem hait. Mi tingting planti tru na mi beten askim Jehova long opim rot bambai mi no ken kamapim ol dispela brata sista ol i stap fri yet bilong autim tok. Mi opim han na putim antap long dispela lista—ol i no lukim mi i mekim olsem—na mi krungutim long han bilong mi. Bihain mi tokim ol mi laik go long toilet na ol i tok orait long mi ken i go, na mi brukbrukim lista na tromoi i go daun long toilet na wara i karim i go pinis.
Long kain taim olsem bilong bikpela hevi tru, mi lain long kisim strong long rot bilong tingim ol samting Jehova i bin mekim bilong helpim lain bilong em bipo, na ol tok promis em i mekim bilong kisim bek ol. Oltaim mi save tingim dispela promis: “Bipo ol man i belhat long yumi, na ol i pait long yumi. Na sapos Bikpela i no bin helpim yumi, ol birua inap bagarapim yumi tru long belhat bilong ol.”—Song 124:2, 3.
Kalabus na Banis Kalabus Nogut
Ol i kisim mi i go long haus kalabus long Rotadam, na mi amamas mi inap holim yet Baibel bilong mi. Na tu mi holim buk Salvation, na sampela hap bilong buk Children, na mi gat bikpela hap taim bilong kaunim ol dispela buk. Bihain long sikspela mun mi kisim bikpela sik na mi mas go slip long haus sik. Taim mi laik lusim kalabus, mi haitim ol buk aninit long matres bilong mi. Bihain mi kisim save olsem narapela Witnes, Piet Broertjes, em i bin painim ol dispela buk taim ol i putim em long rum kalabus mi bin slip long en. Olsem na ol dispela buk i bin mekim wok long strongim bilip bilong sampela narapela tu.
Taim mi orait gen ol i salim mi i go long wanpela haus kalabus long Deheg. Long dispela hap mi bungim Leo C. van der Tas, em wanpela stiuden bilong lo, na em i stap long kalabus, long wanem, em i bin sakim ol Natsi. Em i no save liklik long ol Witnes Bilong Jehova, na rot i op long mi inap autim tok long em. Sampela taim em i kirapim mi long biknait tru bilong mekim sampela askim. Em i kamapim long ples klia em i laikim pasin bilong ol Witnes, na em i kamapim moa yet taim em i save olsem mipela inap lusim kalabus sapos mipela i sainim tasol wanpela pepa i tok, mipela i no laik moa long i stap Witnes. Taim pait i pinis, Leo i kamap loya na planti taim em i helpim Sosaiti Was Taua long kot taim sampela i laik pasim mipela long mekim ol samting bilong lotu i stret long mipela i ken mekim.
Long Epril 29, 1944, ol i putim mi long wanpela tren bilong i go long Jemani. Mipela i stap long tren inap 18-pela de na mipela i no raun gut. Long Me 18 ol i putim mi long banis kalabus nogut bilong Bukenval. I stap bilong mipela i nogut olgeta inap long taim ami bilong ol narapela kantri i pait long Jemani ol i bin kam lusim mipela long dispela kalabus. Planti tausen manmeri i dai, na planti i dai long ai bilong mipela stret. Mi no laik mekim wok long wanpela faktori i stap klostu, em ol i wokim ol samting bilong pait, olsem na ol i putim mi long wok long wanpela smolhaus.
Wanpela de ol i tromoi bom long dispela faktori. Planti ol i ranawe i go hait long haus slip bilong ol soldia, na sampela i ranawe i go long bus. Sampela bom i pundaun long dispela haus slip, na sampela paia-bom i pundaun long hap bilong bus na bus i paia. Man! Mi lukim ol samting nogut tru! Planti i stap laip yet na paia i kukim ol! Mi painim pinis wanpela gutpela ples hait, na taim paia i dai mi wokabaut i go bek long kem na abrusim skin bilong planti planti man ol i dai pinis.
Planti manmeri long nau i save long ol samting nogut tru i bin kamap long taim ol Natsi i bagarapim planti milion manmeri. Mi tenkyu tru long Jehova, em i strongim tingting bilong mi na mi no wok long tingim tingim ol dispela samting nogut tru i bin painim mi. Taim mi tingting bek long dispela hap taim mi bin stap kalabus, nambawan tingting bilong mi em olsem, mi amamas mi bin stap gut long Jehova na dispela i givim biknem long em.—Song 124:6-8.
Mekim Wok Bihain Long Pait
Taim mi lusim kalabus na go bek long Amstedam, mi bin go stret long brens-ofis na mi askim ol long makim narapela ples wok bilong mi. Mi gat bikpela laik long harim wanem ol samting i bin kamap long taim mi no stap. Nonnie i kirap wok pinis long brens. Long laspela yia bilong pait, em i mekim wok long karim ol buk samting i go long ol kongrigesen. Ol i no bin holim em gen, tasol planti taim, klostu ol i mekim olsem.
Inap liklik hap taim mi bin mekim wok painia long Harlem, tasol long 1946, ol i singautim mi long i go wok long brens long Amstedam, long dipatmen bilong salim ol buk samting i go. Klostu long pinis bilong 1948, mitupela Nonnie i marit, na mipela i lusim brens bilong mekim wok painia wantaim. Ples wok bilong mipela em long Asen. Twelpela yia bipo, mi wantaim Richard Brauning i bin stap long dispela hap long taim bilong hat, na mipela i bin slip long haus sel na mekim wok autim tok. Mi kisim save olsem ol i bin sutim Richard long rot taim ol i laik kamap long wanpela banis kalabus nogut.
Dispela hap taim mi bin stap kalabus i nogutim skin bilong mi. Sikspela yia bihain long taim mi lusim Bukenval, sik i kisim mi na mi mas slip tasol long bet inap 4-pela mun. Sampela yia bihain, long 1957, sik TB i daunim mi inap wanpela yia olgeta. Skin bilong mi i no gat strong liklik, tasol tingting bilong mi long mekim wok painia i stap strong yet. Long dispela hap taim mi sik, mi save autim tok long olgeta taim rot i op. Mi pilim olsem dispela tingting bilong mekim wok painia em wanpela bikpela samting i bin helpim mi long taim mi gat sik, na dispela i mekim na mi no kamap wanpela sikman i les tasol. Mitupela Nonnie i tingting strong long mekim wok painia inap long skin i no gat strong moa.
Taim mi orait pinis, ol i makim mipela long stap long biktaun Breda. Em 21 yia bihain long namba wan taim mi bin kam long Breda olsem wanpela wasman bilong son. Taim mipela i kamap long 1959, i gat wanpela liklik kongrigesen na 34 Witnes i stap long en. Long nau, 37 yia bihain, i gat 6-pela kongrigesen na 500 samting Witnes, ol i save bung long 3-pela Haus Kingdom! Long ol miting bilong mipela na long ol kibung, mipela i save lukim planti em mipela i bin helpim ol long sampela rot long kisim save long tok i tru bilong Baibel. Planti taim mipela pilim wankain olsem aposel Jon, em i tok: “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.”—3 Jon 4.
Nau mitupela i lapun pinis. Mi gat 86 krismas na Nonnie i gat 78 krismas, tasol mi mas tok olsem wok painia em wanpela wok i save helpim skin long i stap gut. Kirap long taim mi bin kam sindaun long Breda, mi winim planti hevi bilong sik, em mi bin kisim long taim mi stap long kalabus. Na tu, mi amamas mi bin mekim wok bilong Jehova inap planti yia, na planti gutpela samting i kamap long dispela.
Mitupela i save amamas taim mipela i tingting bek long ol planti yia mipela i bin mekim wok na ol blesing mipela i kisim. Mipela i save beten askim Jehova long olgeta de long givim spirit na strong long mipela bambai mipela inap mekim wok bilong em long olgeta taim mipela i stap laip. Mipela i bilip strong olsem man bilong raitim Song i tok: “Tasol God yet i save helpim mi. Tru tumas, Bikpela [Jehova] i save lukautim mi na mi stap gut.”—Song 54:4.
[Piksa long pes 23]
Mi sanap arere long haus sel mipela i slip long en taim mipela i wok painia long 1936 samting
[Piksa long pes 23]
Bot mipela i save raun long en bilong go long longwe teritori
[Piksa long pes 23]
Ol i toktok wantaim mipela long kibung long 1957
[Piksa long pes 24]
Mi wantaim meri bilong mi long nau