Yu Ting Yumi Gat Wanpela Tewel?

ISI tasol ol pren na famili i wokabaut klostu long bokis bilong man i dai pinis. Ol i lukluk long bodi bilong wanpela manki em i gat 17 krismas. Ol pren wanskul bilong em, klostu ol i no luksave long em. Ol dokta i bin givim kemoterapi long em, olsem na planti gras bilong em i lus pinis, na sik kensa i bin mekim na skin bilong em i lus olgeta. Ol i tingting, tru em bodi bilong pren bilong ol? Inap sampela wik tasol paslain long dispela de, em i gat tingting long planti samting, na em i gat planti askim, na em i gat strong! Mama bilong manki hia, aiwara bilong em i go daun na planti taim em i tok: “Nau Tommy i stap amamas moa. God i laik bai Tommy i stap long heven wantaim em.”

Bel bilong dispela mama i bagarap stret, tasol em i ting olsem pikinini bilong em i stap laip yet, na dispela tingting i mekim gut bel bilong em liklik. Long lotu ol i bin skulim em olsem yumi gat wanpela tewel i no save dai, na olgeta pasin na tingting bilong man i stap long dispela tewel yet. Mama i bilip olsem tewel bilong pikinini bilong em i no bin i dai; em i ting dispela tewel em i wanpela spirit, olsem na taim pikinini i dai, tewel i bin lusim bodi bilong em na i go antap long heven bilong i stap wantaim God na ol ensel.

Long taim bilong wanpela bikpela hevi olsem, bel bilong ol man i save strong long holim tingting bilong wanpela gutpela samting i wetim ol man i dai pinis, olsem na i no hatwok long save bilong wanem ol man i save laikim dispela bilip. Yumi ken tingim tok bilong wanpela tisa bilong lotu (J. Paterson-Smyth), em i stori long dispela samting long buk The Gospel of the Hereafter. Em i tok: “Dai em i wanpela liklik samting taim yumi skelim wantaim samting i kamap bihain long en​—⁠dispela gutpela ples moa yet em Dai i save bringim yumi long en.”

Long planti hap bilong graun, na long planti lotu na pasin bilong ples, ol man i bilip olsem yumi man i gat wanpela tewel i stap insait long yumi, olsem wanpela spirit, na taim bodi i dai, dispela spirit i stap laip yet. Long ol planti tausen bikpela na liklik lotu i gat nem Kristen, klostu olgeta i holim dispela bilip. Na em i wanpela bilip bilong lotu Juda tu. Ol Hindu i bilip olsem God i bin wokim tewel long pastaim tru, na taim mama i karim pikinini, tewel i kalabus insait long bodi bilong pikinini, na taim em i dai, tewel i save lusim em na i go long narapela bodi, na em i mekim mekim olsem. Ol Muslim i bilip olsem taim pikinini i kamap nupela, long dispela taim yet tewel tu i kamap nupela, na taim bodi i dai, tewel i stap laip yet. Na sampela lain bilong Afrika, ol i kolim animis, na ol Sinto na ol Buda tu, ol i save bilip olsem ol man i gat tewel, tasol ol i save tanim stori bilong en liklik.

Sampela Askim Ol Man i Tingting Planti Long En

Tru, klostu olgeta lain bilong graun ol i save bilip long tewel bilong man, tasol dispela bilip i kamapim sampela askim yumi tingting planti long en. Olsem: Sapos wanpela man i no bin bihainim stretpela pasin na em i dai, famili bilong em i no save, tewel bilong em i go we. Em bai kamap nupela gen long bodi bilong wanpela animal samting? O em i go long klinpaia na paia bai klinim em i go i go inap long taim em i winim mak bilong i go long heven? O samting nogut tru bai painim em, olsem em bai go long bikpaia na kisim pen inap oltaim oltaim? O em i kamap wanpela spirit na ol man i mas mekim gut long em na bai em i no ken kros long ol?

Ol kain bilip olsem inap givim hevi long ol man i stap laip yet. Olsem wanem? Yumi mas mekim gut long spirit bilong ol famili bilong yumi i dai pinis na bai ol i no ken bekim nogut long yumi? Yumi mas helpim ol long lusim wanpela ples nogut olsem klinpaia? O yumi mas guria na tingting olsem ol i karim bikpela pen long bikpaia na yumi no inap mekim wanpela samting bilong helpim ol? O yumi mas mekim long sampela animal olsem ol i gat tewel bilong ol man i dai pinis i stap insait long ol?

Na i gat sampela askim long God yet na ol man i tingting planti long en. Planti papamama, olsem dispela mama yumi stori pinis long em, ol i bilip olsem God i bin “kisim” tewel bilong pikinini bilong ol i go long heven bilong i stap wantaim em, na pastaim dispela bilip i mekim gut bel bilong papamama. Tasol bihain planti papamama ol i tingting: Wanem kain God inap givim sik nogut tru long wanpela pikinini i no gat rong, na wantu em i kisim pikinini long papamama na bringim em i go long heven, na i no taim yet bilong em i mas i go, na bel bilong papamama i bagarap stret long dispela? Kain God olsem i no gat stretpela pasin na pasin sori na marimari, a? Na sampela ol i ting, kain God olsem i no gat gutpela tingting na save. Ol i tok, sapos God i gat gutpela tingting na save, bilong wanem em bai putim ol manmeri long graun pastaim sapos bihain olgeta i mas i go i stap long heven? Sapos olsem, orait God i bin hatwok nating long wokim dispela graun, a?​—⁠Skelim wantaim Lo 32:4; Song 103:8; Aisaia 45:18; 1 Jon 4:⁠8.

Olsem na dispela bilip olsem yumi gat wanpela tewel i no save dai, em i save kamapim sampela askim yumi tingting planti long en, na sampela tok bilong en i pait wantaim narapela tok bilong en. Bilong wanem i olsem? As bilong dispela bilip i mekim na ol dispela askim i kamap. Sapos yu skelim as bilong dispela bilip, ating dispela bai givim sampela save long yu long dispela samting; na ating bai yu kirap nogut long save, Baibel yet i tok wanem long dispela samting. Tok bilong Baibel long laip ol man bai kisim bihain long i dai bilong ol em i helpim ol man long wetim gutpela samting i kamap, na em i winim tru tok bilong dispela samting ol lotu bilong graun i skulim ol man long en.