Yu Tingim Yet?
Yu bin amamas long kaunim ol tok bilong ol nupela Wastaua? Orait yu inap bekim ol dispela askim i stap daunbilo:
◻ Jisas i tok, “Sapos yupela i lusim sin bilong ol man, orait sin bilong ol bai i lus.” Olsem wanem? Dispela tok i makim olsem ol Kristen i ken lusim sin bilong man? (Jon 20:23)
Baibel i no tok olsem God i givim strong long ol Kristen, o long ol elda bilong ol kongrigesen, na ol i ken lusim sin bilong narapela, nogat. Ol tok i stap klostu long tok bilong Jisas i makim olsem, long rot bilong spirit holi God i bin givim strong long ol aposel long lusim sin o long ol i no ken lusim sin. (Lukim Aposel 5:1-11; 2 Korin 12:12.)—4/15, pes 28.
◻ Taim J. J. Stewart Perowne i tanim tok bilong Buk Song long namba wan taim long 1864, em i kamapim klia wanem samting?
Long Buk Song em Perowne i tanim, em i bin wok long “bihainim stret pasin bilong raitim tok ples Hibru, olsem pasin bilong bungim ol tok wantaim, na em i mekim wok long sampela kain tok ol Hibru yet i save mekim.” Taim em i mekim olsem, em i amamas long mekim gen wok long nem bilong God olsem “Jehova.”—4/15, pes 31.
◻ Jisas i givim wanem tok long ol disaipel bilong stiaim tingting bilong ol na ol i ken save long ol samting ol i mas mekim long ol gavman bilong dispela graun?
Jisas i bin tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Matyu 22:21) Na em i tok: “Sapos wanpela man [olsem man bilong gavman] i strong long yu mas karim kago bilong en i go inap wan kilomita, orait yu mas karim kago i go inap 2 kilomita.” (Matyu 5:41) Jisas i laik soim ol olsem ol i mas laik long daun na bihainim ol tok i stret long bihainim, maski em i tok bilong wanpela man tasol o sampela lo bilong gavman i stret wantaim lo bilong God. (Luk 6:27-31; Jon 17:14, 15)—5/1, pes 12.
◻ Olsem wanem yumi ken wokabaut long tok i tru? (Song 86:11)
Bilong mekim olsem, yu mas bihainim ol lo bilong God, na givim bel long mekim wok bilong em, na stap gut long em. (Song 25:4, 5; Jon 4:23, 24)—5/15, pes 18.
◻ Jehova i salim Jona i go long Ninive na wanem samting i bin kamap long ples klia?
Wok Jona i mekim bilong autim tok long Ninive i kamapim long ples klia olsem pasin bilong ol Ninive i narapela kain long pasin bilong ol Israel—ol Ninive i tanim bel, tasol ol Israel i bikhet—ol i sot tru long bilip na pasin daun. (Skelim wantaim Lo 9:6, 13; Jona 3:4-10.)—5/15, pes 28.
◻ Long Stat 3:15, Snek i makim husat na “meri” i makim husat?
Dispela Snek em i no wanpela snek tru, nogat; em dispela man i bin toktok long rot bilong snek, em Satan. (KTH 12:9) “Dispela meri” em i no Iv, nogat; em oganaisesen bilong Jehova long heven, em mama bilong lain bilong Jehova long graun em i makim ol long spirit holi. (Galesia 4:26)—6/1, pes 9.
◻ Olsem wanem ol man inap lusim Bikpela Babilon na i stap gut? (KTH 18:4)
Ol man i mas klia olgeta long olgeta lotu giaman, na long ol pasin na tingting bilong ol tu. Ol i mas ranawe i go long ples hait insait long oganaisesen Jehova i bosim. (Efesus 5:7-11)—6/1, pes 18.
◻ Bilong wanem Baibel i stori planti taim long tarangau?
Ol man bilong raitim Baibel ol i mekim tok piksa long pasin bilong ol tarangau bilong makim ol samting olsem gutpela tingting na save, na pasin bilong God long lukautim man, na pasin bilong spit.—6/15, pes 8.
◻ Ol wokman bilong God long nau, em ol i tingting long i stap oltaim long graun, ol i kisim spirit bilong God wankain olsem ol Kristen God i makim ol long spirit holi?
Bekim bilong dispela askim i olsem: Yes. Tupela lain wantaim inap kisim spirit bilong God—em i no save givim bikpela hap spirit moa long wanpela lain; na tupela lain wantaim inap kisim wankain save na insait bilong ol tok.—6/15, pes 31.
◻ Bilong wanem em i gutpela samting long yumi long nau long skelim ol wok holi ol pris bilong Israel i bin mekim long tempel long Jerusalem?
Sapos yumi mekim olsem, bai yumi inap pilim gut pasin marimari God i bin mekim, em i wokim rot bambai ol sinman bilong graun long nau ol inap kamap wanbel gen wantaim em. (Hibru 10:1-7)—7/1, pes 8.
◻ Olsem wanem namba 2 tempel ol i wokim long Jerusalem i kamap gutpela tru winim tempel Solomon i wokim?
Namba 2 tempel i stap longtaim moa winim olpela tempel inap 164 yia, na planti manmeri moa yet bilong ol narapela narapela lain ol i kam insait long banis bilong em. Na bikpela samting moa, dispela namba 2 tempel i narapela kain, long wanem, Pikinini bilong God, em Krais Jisas, em i skulim ol man insait long ol ples bung bilong en.—7/1, pes 12, 13.
◻ Long wanem taim God i kamapim haus spirit bilong em?
Em i mekim long yia 29 C.E. taim em i orait long beten Jisas i mekim long taim em i kisim baptais. (Matyu 3:16, 17) God i orait long Jisas i laik givim skin bilong em long God olsem ofa, na dispela i makim olsem: Long ol samting bilong spirit wanpela alta i kirap long mekim wok na em i winim tru dispela alta i stap insait long haus bilong God long Jerusalem.—7/1, pes 14, 15.
◻ Bilong wanem yumi mas lusim rong bilong narapela?
Sapos wanpela brata i mekim rong long yumi na em i tok sori pinis, yumi mas lusim rong bilong em bambai pasin wanbel bilong ol Kristen i ken stap yet. Sapos yumi bel nogut long wanpela na tingim tingim rong bilong em, dispela bai mekim na yumi i no i stap bel isi. Sapos yumi no lusim rong bilong man, dispela inap mekim na wanpela taim bihain bai Jehova i no inap lusim moa ol rong bilong yumi. (Matyu 6:14, 15)—7/15, pes 18, 19.
◻ Ol Israel inap kamap holi olsem wanem?
Ol i mas pas gut wantaim Jehova na lotuim em long pasin i klin tru. Ol i mas i gat stretpela save long God, em i gutpela na stretpela olgeta [olsem “Man i Holi Tru,” NW] bambai ol inap lotuim em long pasin i holi—ol i mas i stap klin long skin na spirit. (Sindaun 2:1-6; 9:10)—8/1, pes 11.