Ripot Long Wok Bilong Kingdom
Ranawe i Go Long Oganaisesen Bilong Jehova
BIPO tru profet Aisaia i tok: ‘Yupela ol manmeri i stap long ol ples i stap arere long solwara, yupela olgeta litimapim nem bilong God.’ (Aisaia 24:15) Ol Witnes Bilong Jehova i tingim ol ailan bilong solwara ol i olsem hap bilong “olgeta hap bilong graun” em Jisas i tok ol i mas autim gutnius long en.—Matyu 24:14; Mak 13:10.
Ol ailan Makeses i stap 1,400 kilomita longwe long Tahiti long hap bilong not-is. Ol ailan Makeses i hap bilong ol ailan i stap longwe, em ol i kolim Frens Polinisia na ol i stap long Saut Pasifik. Ol dispela ailan i gat gutpela graun na graun i gat gris, na ples i hat liklik, olsem na ol diwai, gras na kaikai samting i save kamap gut. Tasol i gat ol narapela kain kaikai tu i kamap long ol ailan Makeses. Tingim stori bilong wanpela famili em ol i bin kisim save long tok bilong Kingdom long ailan Hiva Oa.
Jean na meri bilong em Nadine, em ol i sindaun long Westen Yurop, ol i no amamas long bihainim pasin bilong ol lain long dispela hap ol i save hariap hariap long mekim ol samting. Olsem na ol i lusim dispela kain sindaun na ol i go long ol ailan Makeses wantaim pikinini bilong ol. Nupela haus bilong ol em ol i wokim long mambu, na em i stap long wanpela ples daun i stap longwe long ol man. Bilong i go long ol man i stap klostu liklik long ol, ol i mas wokabaut long ol liklik rot long ol maunten inap 2-pela aua. Ples i klostu liklik na i gat dokta na skul na stua long en, ol inap kamap long en insait long tripela aua long liklik ka olsem jip.
Jean na Nadine i no gat laik long lotu. Tasol sampela taim ol i save stori long ol man i bin kamap olsem wanem. Planti taim ol i save stori planti long ol tok bilong evolusen i gat hatwok long save long en. Tasol ol dispela stori bilong evolusen i no helpim ol liklik.
Ol i stap long dispela longwe ples inap 6-pela yia, na ol i kirap nogut taim tupela Witnes Bilong Jehova i kam lukim ol. Ol man long ples klostu i tokim ol Witnes long ples Jean na Nadine i stap long en. Ol i toktok i go na ol i kirap stori long evolusen. Tupela marit i amamas tru long ol Witnes i karim wanpela buk i kam (Life—How Did It Get Here? By Evolution or by Creation?), em ol Witnes Bilong Jehova i wokim. Jean na Nadine i amamas long kisim dispela buk i stori gut long ol man i bin kamap olsem wanem.
I no longtaim na ol Witnes i kirapim stadi wantaim tupela. Insait long tripela yia Jean na Nadine i wok long kamap strong. Stadi i kirapim ol long bilip tru olsem i no longtaim na graun bai kamap Paradais. Taim ol i gat tripela pikinini, ol i hatwok long raun 4-pela aua bilong i go long ol miting Kristen long Haus Kingdom. Tasol dispela i no pasim ol long go long ol miting. I no longtaim na Jean na Nadine i kisim baptais long wara bilong makim olsem ol i dediket pinis long Jehova. Ol i kisim baptais long wanpela kibung i kamap long nambawan bikpela ples long ailan, na inap 38 manmeri i bin bung!
Dispela famili i laik helpim liklik lain pablisa bilong Kingdom, olsem na ol i lusim dispela ples i stap longwe na ol i go long wanpela ples i gat olsem 1,000 manmeri i stap long en, na nau Jean i wok olsem wanpela wokman bilong dispela liklik kongrigesen bilong ol Witnes Bilong Jehova. Dispela famili em ol i bin ranawe i go long ol dispela ailan bambai ol i ken stap bel isi, ol i amamas tru long painim dispela wanpela gutpela ples hait tasol i stap, em oganaisesen bilong Jehova.