Yumi Man Bilong Bilip

Tokaut Long Kingdom Bilong God Long Ol Ailan Bilong Fiji

JISAS KRAIS i bin stori long tupela rot. Wanpela rot em i op tumas na em i go long i dai. Na narapela rot i liklik na i hatwok long bihainim, tasol em i go long laip. (Matyu 7:​13, 14) Bilong helpim ol manmeri long makim rot i stret, God Jehova i stretim rot bambai olgeta manmeri bilong olgeta hap ol inap harim gutnius bilong Kingdom. (Matyu 24:14) Olsem na ol lain bilong olgeta hap ol i wok long harim tokaut bilong Kingdom, na sampela ol i makim olsem ol i laik i stap laip na kamap olsem “ol manmeri bilong bilip na kisim laip.” (Hibru 10:39) Mipela laik kirapim yu long ritim stori bilong sampela manmeri bilong Fiji na ol narapela ailan bilong Saut Pasifik i stap klostu long Fiji, ol i makim olsem ol i laik i stap laip.

Ol i Bin Bilip na Wet Long Jehova

Mere i skulmeri yet long namba wan taim em i bin harim tok bilong Kingdom long 1964. Em i no inap toktok tumas wantaim ol Witnes Bilong Jehova, long wanem, em i sindaun long wanpela ailan i stap longwe. Tasol bihain em inap kisim stretpela save long Baibel. Long dispela taim, em i marit pinis long wanpela man em i wanpela hetman bilong lain bilong ples. Mere i laik bihainim ol lo bilong Baibel, olsem na man bilong em wantaim ol lain bilong em ol i save mekim nogut long em, na ol narapela wan ples ol i givim baksait long em. Tasol maski ol i mekim olsem, em i kisim baptais long 1991.

I no longtaim na man bilong Mere, nem bilong em Josua, i wok long senisim tingting bilong em liklik na em i kirap putim yau taim Mere i toktok wantaim ol pikinini bilong ol long tok bilong Baibel. Josua i no go moa na lotu wantaim ol Metodis. Tasol em i wanpela hetman bilong ples, olsem na em i go pas long ol bung bilong ples ol i save mekim long olgeta wik. Long ai bilong ol wanples Josua em i no stap gut long ples, long wanem, lotu Metodis em i bikpela samting insait long sindaun bilong ol manmeri bilong Fiji. Olsem na pasto bilong dispela hap i laik kirapim Josua long kam bek long lotu Metodis.

Josua i no pret na em i tokaut olsem em wantaim famili bilong em bai lotu long God Jehova “long strong bilong Holi Spirit na long pasin i tru.” (Jon 4:24) Long wanpela bung bilong ples, namba wan bikman bilong ples i tok Josua wantaim famili bilong em ol i mas lusim ples. Ol i givim 7-pela de long ol long lusim ailan na haus, na graun, na gaden bilong ol​—⁠yes, olgeta samting bilong ol.

Ol brata Kristen long narapela ailan i helpim Josua wantaim famili bilong em long painim wanpela haus na hap graun bilong planim gaden long en. Josua wantaim namba wan pikinini man bilong em ol i baptais pinis, na narapela pikinini man em i wanpela pablisa bilong gutnius i no baptais yet. I no longtaim i go pinis na Mere em i kirap mekim wok painia oltaim (wok bilong autim tok bilong Kingdom long olgeta de). Ol i laik mekim wok bilong Jehova, olsem na Josua i lusim namba bilong em na famili olgeta i lusim ol samting bilong skin, tasol ol i pilim wankain olsem aposel Pol, olsem dispela em i samting nating taim ol i skelim wantaim ol gutpela samting ol i bin kisim.​—⁠Filipai 3:⁠8.

Maus Bilong Bel i Makim

Bilong bihainim maus bilong bel em Baibel i skulim pinis, man i mas bilip na no ken pret. Dispela tok i makim tru Suraang, em i wanpela yangpela meri i baptais nupela na em i stap long ailan Tarawa, em wanpela ailan bilong Kiribati. Suraang em i wanpela nes long haus sik na em i askim ol long larim em i lusim wanpela hap wok nes bilong em. Ol i no amamas long askim bilong em, olsem na ol i salim em i go bilong lukautim wanpela etpos long wanpela ailan i no gat ol wanbilip i stap long en.

Long dispela ailan em i pasin bilong ples long ol nupela man i mas mekim ofa long masalai bilong dispela ples. Ol manmeri i bilip olsem sapos yu no mekim ofa bai yu dai. Tasol Suraang i no larim ol i mekim dispela ofa bilong em na lain bilong em, long wanem, dispela i olsem lotuim ol god giaman. Olsem na lain bilong dispela ples i wetim masalai i pasim nek bilong Suraang. Tasol taim i no gat wanpela samting nogut i kamap long Suraang o long lain bilong em, dispela i opim rot bilong em long autim tok long planti manmeri.

Tasol ol traim bilong Suraang i no pinis yet. Sampela yangpela man bilong dispela ailan ol i laik grisim ol yangpela meri i kam nupela long dispela ailan long slip wantaim ol. Tasol Suraang em i sakim ol tok gris bilong ol na em i stap gut long God. Em inap mekim wok painia oltaim, maski em i mas redi i stap long mekim wok nes long olgeta taim.

Taim Suraang i laik lusim ailan, ol i mekim wanpela bikpela kaikai bilong tok amamas long wok em i bin mekim. Paslain long dispela bikpela kaikai ol hetman bilong ples ol i tok olsem em i namba wan misineri tru i bin kam lukim ol. Em i bin sanap strong na bihainim ol lo bilong Baibel na long dispela as sampela long dispela ailan ol i bin putim yau long tok bilong Kingdom.

Ol Traim Bilong Skin

Sampela ples i stap longwe long ol narapela ples na lain bilong Jehova i mas taitim bun tru long mekim wok autim tok na bung long ol miting Kristen. Tingim gutpela pasin bilong 4-pela Witnes i baptais pinis​—⁠wanpela man na 3-pela meri​—⁠ol i lusim planti aua long i go i kam long ol miting. Ol i mas brukim 3-pela wara. Long taim bilong haiwara, brata bai go pas long brukim wara na pulim wanpela bikpela sospen em i bin pulimapim ol paus, buk, na klos bilong miting long en. Bihain em bai brukim wara gen na helpim 3-pela sista long brukim wara.

I gat ol narapela kain hevi i save painim narapela liklik grup ol i save mekim ol miting long ailan Nonouti long Kiribati. Haus ol i mekim miting long en em inap long 7-pela o 8-pela man tasol, na banis bilong haus ol i bin wokim long waia bilong banisim kakaruk. Ol narapela i mas sindaun ausait na lukluk i go insait. Dispela haus i stap ples klia long ai bilong ol narapela manmeri ol i go i kam long ol bikpela haus lotu bilong ol. Tasol ol wokboi bilong Jehova i save olsem God i laikim tru ol manmeri, ol haus nogat. (Hagai 2:⁠7) I gat wanpela sista long dispela ailan i baptais pinis na em i lapun na i no inap wokabaut longwe tumas. Tasol i gat wanpela yangpela meri, em wanpela pablisa i no baptais yet, em i save subim em raun long wanpela liklik wilka. Ol i kamapim bikpela laik tru bilong ol long tok i tru!

Winim 2,100 pablisa i mekim wok long ol ailan bilong Fiji na ol i tingting strong long mekim wok yet long autim gutnius bilong Kingdom bilong God. Na ol i pilim tru olsem planti moa bai kamap olsem “ol manmeri bilong bilip na kisim laip.”

[Mep long pes 8]

(Bilong save ol dispela rait i stap we long pes, lukim buk o magasin)

Ostrelia

Fiji