Gutnius Bilong Paradais Long Tahiti
TAHITI! Taim yumi harim dispela nem, yumi tingim wanpela ples i narapela kain na i gutpela tru. Dispela ples i bin kisim nem long rot bilong ol man bilong malenim piksa na ol man bilong raitim stori, olsem Paul Gauguin, Robert Louis Stevenson, na Herman Melville, em ol piksa na stori bilong ol long ol naispela ailan long hap bilong Saut Pasifik i stap isi tru, em i bin pulim tingting bilong planti man.
Tahiti em i nambawan bikpela ailan bilong ol 120 samting ailan long Frens Polinisia i stap long hap bilong Saut Pasifik. Long tingting bilong planti man, dispela ailan bilong Saut Pasifik i olsem ples paradais, tasol ol manmeri i stap long Tahiti ol i mas harim tok bilong narapela paradais liklik taim bai kamap. (Luk 23:43, Nupela Testamen na Ol Sam, bilong 1978) Long nau i gat 1,918 Witnes Bilong Jehova long Tahiti, na ol i wok strong long tokim ol 220,000 manmeri long wanpela gutpela tok, olsem klostu nau na Kingdom bilong God bai kamapim wanpela paradais tru long olgeta hap bilong graun—i no long Tahiti tasol.—Matyu 24:14; KTH 21:3, 4.
Inap planti yia, brens-ofis bilong Sosaiti Was Taua long Fiji, i stap longwe olsem 3,500 kilomita, em i bosim wok bilong autim tok long Tahiti. Tasol Fiji i stap longwe tumas long Tahiti, olsem na i hatwok long bosim dispela wok bilong autim tok, na wok i no kamap gutpela tumas. Olsem na long Epril 1, 1975, ol i kamapim wanpela brens-ofis long Tahiti, na dispela i kamapim bikpela senis long wok bilong ol Kristen tru long dispela hap. Orait, ol dispela samting i kamap olsem wanem? Na wok bilong autim tok i kirap olsem wanem long Tahiti?
Taim Wok i Kirap Nupela
Long 1930 samting, em i namba wan taim ol i bin harim gutnius bilong Kingdom long Tahiti, na planti manmeri bilong dispela ailan, em ol i save tingim tru ol tok bilong Baibel, ol i laik tru long harim dispela tok. Tasol gavman i putim tambu long wok bilong ol Witnes long autim tok, na i gat sampela tambu moa, olsem na i no gat sampela Witnes long dispela ailan i kam inap long 1958 samting. Long dispela taim, Agnès Schenck, em wanpela meri bilong Tahiti na em i sindaun long Amerika, em i tingting long go bek long Tahiti wantaim man na pikinini man bilong em. Em i stori long olsem wanem ol dispela samting i bin kamap. Em i tok:
“Long kibung distrik long Los Enjelis long 1957, Brata Knorr [long dispela taim em i stap presiden bilong Sosaiti Was Taua] i tok ol i sot tru long ol man bilong autim tok bilong Kingdom long Tahiti. Long dispela taim mi bin baptais inap wanpela yia pinis, na mi tok, ‘Yumi mas i go long Tahiti!’ Tupela famili, em famili Neill na famili Caranos, em ol gutpela pren bilong mipela, ol i harim dispela tok bilong mi. Ol i tok ol i laik tru long kam wantaim mipela, tasol mipela i no gat planti mani. Man bilong mi i gat sik inap longtaim, na pikinini man bilong mi i yangpela tru. I hatwok long mipela i lusim Amerika. Ol pren bilong mipela long ol kongrigesen i stap klostu, ol i harim stori bilong samting mipela i laik mekim na ol i salim sampela mani na sampela samting bilong haus long mipela. Orait long Me 1958 mipela i kisim sip i go long Tahiti wantaim sampela kago bilong mipela, na 36 sit bet!
“Taim mipela i kamap pinis long Tahiti, mi olsem meri bilong narapela ples, long wanem, mi bin lusim dispela ailan inap 20 yia pinis. Mipela i kirap long autim tok, tasol mipela mas was gut, long wanem, i gat tambu long wok Kristen bilong mipela. Mipela i mas haitim ol nius, na mipela i mekim wok long Baibel tasol. Pastaim mipela i autim tok long ol man i kisim pinis sabskripsen bilong nius Wastaua na Kirap!, na long ol narapela man nogat.
“Bihain long kibung intenesenel long Biktaun Nu Yok long 1958, Clyde Neill na David Carano wantaim famili bilong ol, ol tu i kam long Tahiti. Mipela i autim tok wantaim na singautim ol man i kam harim ol tok i kamap long haus bilong ol brata. Isi isi ol brata i stretim rot bilong mekim ol wok, na mipela i kirapim wanpela grup bilong Baibel-stadi wantaim 15 manmeri. Tripela mun bihain, Clyde Neill na David Carano wantaim famili bilong ol, ol i mas lusim Tahiti, long wanem, ol i holim visa bilong ol turis na taim bilong ol long i stap long Tahiti i pinis. Olsem na tupela brata hia i ting, taim ol i no go yet ol bai givim baptais long ol nupela man i winim pinis mak bilong kisim baptais. Mi amamas long kisim wok bilong tanim namba wan tok bilong baptais. Long dispela taim, 8-pela manmeri, em ol asples yet, ol i kisim baptais bilong makim olsem ol i dediket pinis long Jehova. Orait bihain long en dispela tupela famili ol i go bek long Amerika.
“Mipela i mekim yet wok autim tok. Mipela i bung long ol liklik grup na mipela i go long ol haus na autim tok long apinun tru. Taim mipela i bungim sampela man i laik harim tok bilong Baibel, sampela taim mipela i toktok wantaim ol i go inap biknait. Na sampela taim ol pasto bilong lotu Talatala ol tu i kam sindaun na mipela i toktok wantaim. Long 1959, namba wan kongrigesen i kamap. Orait long 1960 mipela i amamas tru—gavman i givim tok orait long asosiesen bilong ol Witnes Bilong Jehova. Insait long ol dispela yia mi kisim bikpela amamas na planti samting bilong spirit. Dispela tingting bilong mipela long lusim Amerika na kam long ples i sot long ol man bilong autim tok, Jehova i mekim gut tru long en.” Nau Sista Schenck i gat 87 krismas, na em i mekim yet wok bilong Jehova long kongrigesen bilong em.
Wok i Kamap Gutpela
Long 1969 Sosaiti i salim tupela Witnes bilong Frans, em Jacques na Paulette Inaudi, i kam long Tahiti olsem painia salim. Jacques i tingim bek dispela taim na em i tok: “Taim mipela i kamap long Tahiti, i gat 124 pablisa tasol i stap, na wanpela kongrigesen long Papiti, na tupela painia salim long Vairau, long poin bilong ailan.” I gat wanpela hap graun i longpela nating na i skruim dispela poin i go long ailan Tahiti. I no longtaim na ol i wokim “Gutaim Long Graun” Kibung Intenesenel. Jacques i stori moa olsem: “Dispela em i namba wan taim bilong mi long stretim ol samting bilong wokim wanpela kibung. Mipela i mas stretim rot bilong wokim wanpela program long tok Inglis bilong helpim ol brata sista bilong ol narapela kantri ol i kam long kibung, na i mas i gat wanpela lain bilong pilaim musik bilong mekim ol singsing bilong Kingdom, na mi mas stretim tupela pilai bilong Baibel. I gat 126 pablisa tasol bilong mekim dispela bikpela wok. Mi bilip tru olsem Jehova yet i bin mekim bikpela hap bilong dispela wok.” Ol asples i amamas tru long lukim 488 ol i bung long dispela kibung. Em namba wan taim bilong planti brata sista bilong Tahiti long bungim ol Witnes bilong ol narapela kantri.
I no longtaim na Jacques Inaudi i kisim wok olsem wasman bilong raun. Taim em i go long ol narapela narapela ailan, em i lukim olsem planti man i laik harim tok, tasol i no gat planti pablisa bilong Kingdom long helpim ol. Jacques i tok: “Long dispela as mi wok long kirapim planti famili long kam sindaun long ol dispela ailan bilong autim tok long ol dispela ples i sot long ol man bilong mekim dispela wok. Olsem na isi isi gutnius i go kamap long ol dispela ailan.” Brata Inaudi i mekim wok olsem wasman bilong raun, kirap long 1969 i go inap 1974, na long nau em i stap elda long wanpela kongrigesen long Tahiti.
Wanpela brata i bin bihainim tok bilong Brata Inaudi long go sindaun long narapela ailan bilong autim tok, em Auguste Temanaha, em i wanpela bilong dispela 8-pela manmeri i bin kisim baptais long 1958. Em i stori long ol samting i bin kamap: “Long 1972 wasman sekit, em Jacques Inaudi, em i wok long kirapim mipela long tingting long go mekim wok bilong autim tok long Wahini, em wanpela bilong ol ailan Liwat, long wanpela lain ailan ol i kolim ol ailan Sosaiti. Mi gat tupela tingting, long wanem, ol tok mi mekim long kongrigesen em bilong kaunim Baibel tasol, na mi pilim olsem mi no winim mak bilong mekim bikpela wok olsem. Tasol Brata Inaudi i wok long tokim mi, ‘Yu no ken tingting planti; yu inap mekim!’ Orait bihain mipela i tingting pinis long go. Olsem na long 1973, ol man i baim olgeta samting bilong mipela na nau mipela wantaim 3-pela pikinini bilong mipela i go sindaun long Wahini.
“Taim mipela i kamap long dispela ailan, mi lukim olsem mi mas kirapim olgeta samting—Stadi Wastaua, Skul Bilong Wok Autim Tok, na ol narapela miting. I hatwok liklik, tasol Jehova i lukautim na helpim mipela. Sampela taim em i helpim mipela long painim haus. Orait bihain, wanpela lain i birua long mipela ol i laik rausim ol Witnes long ailan, tasol wanpela man bilong politik long dispela ailan em i kirap na sambai long mipela. Tru tumas, Jehova i bin was long mipela long dispela taim.” Long nau i gat tupela kongrigesen long Wahini—wanpela long tok ples Frans i gat 23 pablisa long en, na wanpela long tok ples Tahiti, i gat 55 pablisa long en.
Long 1969, Sosaiti i salim Hélène Mapu olsem wanpela painia salim bilong autim tok long hap bilong dispela poin. Hélène i tok: “Planti man ol i laik harim tok bilong Baibel long dispela hap, na insait long sotpela taim tasol mi kirapim planti Baibel-stadi.” I no longtaim na ol i kamapim wanpela liklik kongrigesen long Vairau, tasol ol i sot long ol elda. Bihain Colson Deane, em i sindaun long Papara, i stap klostu liklik olsem 35 kilomita, em inap helpim kongrigesen. Brata Deane i stori long dispela na em i tok: “Mipela i mas stretim gut ol samting bambai mipela inap wok wantaim kongrigesen long Vairau. Mi save wok long Fa, em i stap longwe long Vairau inap 70 kilomita, long hapsait bilong ailan. Taim mi pinis wok long apinun, mi mas go kwik long haus na kisim meri pikinini bilong mi na go long Vairau. Bihain, wok mani bilong mi i mekim na mipela mas i go sindaun long Fa. Olsem wanem? Bai mipela inap helpim yet Kongrigesen Vairau? Mipela i laik tru long helpim ol brata bilong dispela hap, olsem na mipela i pasim tok olsem mipela bai go yet long dispela kongrigesen. Long ol nait bilong miting, mipela i no save kamap long haus paslain long biknait, long wanem, sampela ol i no gat ka na mipela i mas kisim ol i go long haus, kam bek na kisim sampela lain moa, olsem. Mipela i mekim olsem inap 5-pela yia. Nau mipela i amamas tru long lukim 4-pela kongrigesen i stap long dispela hap bilong ailan, na mipela i save tingim yet dispela taim bipo.”
Tahiti i Kamap Wanpela Brens
Long 1974, lain bilong autim tok bilong Kingdom i go bikpela inap 199. Long yia antap, N. H. Knorr na F. W. Franz, em presiden na nambatu presiden bilong Sosaiti Was Taua long dispela taim, ol i kam long Frens Polinisia, na ol i lukim olsem i gutpela sapos i gat brens long Tahiti yet bilong bosim wok bilong autim tok long Frens Polinisia, na brens bilong Fiji nogat, long wanem, em i stap longwe tru inap 3,500 kilomita. Olsem na long Epril 1, 1975, ol i kamapim brens long Tahiti, na ol i makim wasman sekit, em Alain Jamet, long kamap wasman bilong brens.
Inap tupela yia samting i go pinis, Brata Jamet i tingim bek ol wok i bin kamap insait long 22 yia i go pinis na em i amamas tru long stori long ol gutpela blesing ol i bin kisim long Jehova. Em i tok: “Kirap long 1975, mipela i wok strong tru long bringim gutnius long olgeta ailan i stap insait long hap mipela i mas autim tok long en, na em i wanpela bikpela hap tru, inap olsem Westen Yurop. Mipela i amamas long ol samting i kamap long dispela wok. Lain bilong autim tok i wok long go bikpela, na long 1983 i gat 538 i autim tok. Long dispela yia yet, ol i wokim wanpela brens-ofis na Haus Betel long Peia. Long nau i gat olsem 1,900 manmeri bilong autim tok, em ol i stap nabaut long 30 kongrigesen long ol ailan Sosaiti, na wanpela kongrigesen na wanpela grup long ol ailan Ostral, na wanpela kongrigesen na tupela grup long ol ailan Makeses, na sampela grup long ol ailan Tuamotu na ol ailan Gambier. Ol i wok long sanapim planti nupela Haus Kingdom—3-pela long ol ailan Makeses na 7-pela long Tahiti—bilong lukautim ol nupela lain i save kam long miting na ol i wok long kamap planti. Insait long 20 yia i go pinis, Jehova i bin mekim gut tru long wok bilong mipela long kamapim kaikai bilong gaden long Tahiti.”
I Gat Planti Wok i Stap Yet
I olsem wok inap i go bikpela moa long Frens Polinisia. Long Mas 23, 1997, inap olsem 5,376 manmeri i bung wantaim ol Witnes Bilong Jehova long olgeta hap bilong Frens Polinisia bilong mekim Memorial bilong tingim indai bilong Krais Jisas. Bilong helpim ol dispela lain long ol samting bilong spirit, ol inap kisim ol buk na nius samting bilong yumi long sampela tok ples bilong ol dispela ailan. I gat sampela buk samting long tok ples Tahiti, na nau ol i wokim sampela long tok ples Paumotu, em tok ples bilong ol man bilong ol ailan Tuamotu na Makeses Not na Saut.
Lain bilong Jehova long ol dispela ailan i wok long go bikpela bikpela, na ol i gat sampela gutpela stori bilong wok autim tok, na dispela i helpim ol pablisa bilong Kingdom long Tahiti long pilim tru sori bilong Jehova na pasin bilong em long isi isi long ol man, long wanem, “em i laik kisim bek olgeta manmeri, bai ol i ken save long as bilong tok tru,” maski ol i stap long ol ailan bilong Saut Pasifik ol i stap longwe. (1 Timoti 2:4) Ol Witnes Bilong Jehova long Tahiti na ol narapela ailan bilong Frens Polinisia ol i bilip tru long tok promis bilong Jehova, olsem: “Ol manmeri bilong ol longwe ples bai i bilip long strong bilong mi, na i wet long mi long helpim ol.”—Aisaia 51:5.
[Mep long pes 26]
Brens bilong Tahiti i save lukautim wok long Frens Polinisia
OSTRELIA
[Piksa long pes 25]
Kirap long han kais i go long han sut: Alain Jamet, Mary-Ann Jamet, Agnès Schenck, Paulette Inaudi, na Jacques Inaudi
[Piksa long pes 27]
Brens-ofis long Tahiti