Strongim Bilip Bilong Yumi Long Tok Bilong God
PLANTI man i bin kaunim Baibel, winim ol narapela buk. Tasol hamas man i bilip long ol tok bilong en? Baibel yet i tok, “planti man ol i no bilip.” (2 Tesalonaika 3:2) Olsem na yumi save, taim mama i karim yumi, yumi no gat pasin bilong bilip. Em samting yumi mas wok long kisim. Na man i gat bilip, em i no ken ting em i no inap lusim. Isi isi yumi inap lusim bilip. Olsem na yumi mas wok strong bambai yumi ken stap strong long bilip.—Taitus 2:2.
Em nau, i gat as tru na Lain Bilong Bosim Ol Witnes Bilong Jehova i bin putim dispela tok, “Bilip Long Tok Bilong God,” olsem as tok bilong ol kibung distrik bilong ol long 1997/1998. Planti milion Witnes wantaim ol narapela ol i bin bung wantaim bambai ol inap strongim bilip bilong ol long Tok Bilong God.
Tok Bilong God i Tru —Em i As Bilong Bilip Bilong Yumi
Dispela em i as tok bilong namba wan de bilong kibung. Brata i mekim namba wan tok em i tok amamas long olgeta man i kam bung. Ol i kam long dispela kibung na dispela i makim olsem ol i daun long tok bilong Baibel. Tasol brata i kamapim sampela askim bilong kirapim yumi long tingim ol samting bilong bilip bilong yumi, olsem: ‘Yumi inap mekim wok long Tok Bilong God bilong helpim ol bilip bilong yumi? Yumi amamas tru long ol kaikai bilong spirit na yumi no tingim Baibel, na ol miting bilong kongrigesen, na ol buk em Baibel i as bilong en ol i samting nating tasol? Yumi kamap strong long mekim pasin sori na long kisim stretpela save na gutpela tingting?’ Brata i kirapim olgeta manmeri i kam bung long putim gut yau, na em i tok, “ol i redim dispela ‘Bilip Long Tok Bilong God’ Kibung Distrik bilong helpim yumi long glasim yumi yet na skelim bilip bilong yumi—bilip bilong yumi i bikpela o em i liklik, na em i strongpela bilip o nogat.”
As tok bilong kibung em “Bilip na Wokabaut, No Ken Tingim Tasol Ol Samting Yu Lukim Long Ai.” (2 Korin 5:7) Brata i mekim tok em i tok, “bilip bilong ol man i kamap Witnes Bilong Jehova i no bilip nating.” Tru tumas, man i bilip tru em i no bilip nating! As bilong dispela kain bilip em ol samting tru. Hibru 11:1 i tok: “Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” Brata i tok moa: “Sapos yumi laik bihainim tru pasin bilong bilip na wokabaut, yumi mas i gat bilip i gat strongpela as bilong en.” Yumi bilip na wokabaut, yumi no lukim samting long ai na yumi wokabaut, nogat; olsem na yumi no ken ting yumi mas i gat save long olgeta liklik liklik samting Jehova bai mekim bilong kamapim laik bilong em na long wanem taim em bai mekim ol dispela samting. Ol save yumi kisim pinis long em, dispela i strongim bilip bilong yumi olsem em i gat strong long truim ol samting em i laik mekim, na em bai mekim long gutpela pasin sori na long stretpela pasin.
Narapela tok, “Ol Yangpela Kristen—Ol i Bikpela Samting Insait Long Kongrigesen,” i tokim ol yangpela olsem ol i gutpela samting tru long ai bilong Jehova. Tok i kirapim ol long kamap strong long ol samting bilong spirit long rot bilong mekim sampela wok olsem kaunim Baibel olgeta na inapim ol mak bilong dediket na baptais. Sapos ol i laik kisim sampela skul moa, ol i mas skelim dispela samting wantaim papamama bilong ol na em samting bilong ol yet, tasol sapos ol i kisim sampela skul moa, ol i mas mekim olsem bilong helpim ol long mekim gut moa wok bilong God. Skul bilong graun inap helpim yumi sapos long ol samting bilong bilip bilong yumi, yumi “skelim gut wanem ol samting i bikpela samting tru.”—Filipai 1:9, 10, NW.
Orait nau ol i mekim wanpela tok i gat 3-pela hap bilong en, “Yu Save Bihainim Ol Lo Bilong Husat?” Bilip long Tok Bilong God i kirapim yumi long bihainim ol lo bilong Baibel. Ol Kristen i save bihainim ol tok na ol lo bilong Jehova. Olsem: Baibel i tok strong long yumi no ken tok doti o tok nogut. (Efesus 4:31, 32) Brata i mekim tok em i kamapim askim, olsem: “Taim yu kros o [narapela] i skrapim bel bilong yu, yu save bikmaus nogut long poroman marit bilong yu o long pikinini bilong yu?” Yumi save, dispela pasin i no pasin Kristen. Na God i bin putim ol lo long wanem kain bilas i gutpela long yumi. Ol Kristen i mas putim “ol gutpela klos samting, inap tasol long ol [olsem i makim pasin daun].” (1 Timoti 2:9, 10) Em i olsem: Yumi no sem long pasin bilong yumi, na yumi pilim olsem pasin bilong yumi i stret, na yumi gat gutpela tingting, na yumi mekim ol samting long skel tasol. Pasin bilong laikim tru ol narapela, na ol tok bilong Baibel, na ol samting bel bilong yumi i pilim i stret, ol dispela samting i stiaim tingting bilong yumi long yumi mas mekim wanem.
Narapela tupela tok i kamap ol i stori long olgeta wan wan ves bilong Hibru 3:7-15 na 4:1-16. Ol dispela ves i givim tok lukaut long yumi olsem ‘sin inap giamanim yumi na pasim strong bel bilong yumi.’ (Hibru 3:13) Olsem wanem yumi inap sakim sin? Jehova i helpim yumi long rot bilong Tok bilong em. Tru tumas, “tok bilong God em i gat laip, na em i wok strong i stap . . . na em i save gut tru long olgeta tingting na laik bilong bel bilong yumi.”—Hibru 4:12.
Laspela tok long namba wan de bilong kibung em “Wanpela Buk Bilong Helpim Olgeta Man.” Dispela tok i kamapim klia olsem ol tok bilong Baibel em i tru na yumi inap bilip long en, na i stret, na em inap helpim ol man. Ol brata sista i amamas taim ol i harim brata i tokaut long wanpela nupela buklet, nem bilong en, A Book for All People! Taim ol i wokim dispela nupela buklet, ol i tingim sampela lain ol i bin skul gut, tasol ol i no gat save long Baibel. Bilong pinisim dispela tok, brata i tok: “Ol man i mas kirap na skelim tok bilong Baibel. Mipela i save, sapos ol i skelim ol tok bilong en bai ol i save, tru tumas Baibel em i wanpela buk bilong helpim olgeta man!”
Bihainim Pasin Bilong Jisas, Em i “As Bilong Bilip Bilong Yumi”
Dispela as tok bilong namba tu de bilong kibung i kirapim ol man long tingim Krais Jisas, em i “as bilong bilip bilong yumi.” Yumi mas bihainim gut “pasin bilong em.” (Hibru 12:2; 1 Pita 2:21) Planti lotu i gat nem Kristen ol i save tokim ol lain bilong ol olsem: ‘Bilip long Bikpela Jisas na em bai kisim bek yu!’ Tasol yu ting pasin bilong bilip em olsem tasol? Baibel i tok, sapos “man i bilip nating na bilip bilong en i no kamapim gutpela pasin tu [olsem wok], orait bilip bilong dispela man i olsem em i dai pinis.” (Jems 2:26) Yumi mas bilip long Jisas, na tu, yumi mas mekim ol wok em i mekim, olsem yumi mas autim gutnius bilong Kingdom bilong God.
Ol tok i kamap long moningtaim i toktok long wok bilong autim gutnius. Olsem Pol, yumi tu i mas i gat bikpela laik long tokim ol man long rot bilong God long kisim bek ol. (Rom 1:14-16) Jisas i autim tok long ol man long olgeta hap. Yumi go long ol haus na autim tok na dispela i save kamapim ol gutpela samting, tasol taim yumi go long ol haus, planti man i no stap. (Aposel 20:20) Planti ol i stap long skul o ples wok, o ol i raun long ol stua o long sampela hap. Olsem na yumi mas autim tok long ol ples ol man i save bung long en na long ol narapela hap tu i gat ol man i stap.
Narapela tok “Kamap Strong na Holimpas Tok i Tru” i kirapim yumi long tingim hamas nupela disaipel i kisim baptais—long averes inap olsem 1,000 long olgeta de! Em bikpela samting long ol dispela nupela i mas kamap strong na holimpas tok i tru. (Kolosi 2:6, 7) Brata i mekim tok, em i tok, rop bilong purpur samting em i save pulim wara na kaikai, na tu, i helpim purpur long sanap strong. Olsem tasol, long rot bilong stadi na ol gutpela poroman, ol nupela disaipel inap kamap strong na holimpas tok i tru.
Dispela tok i stret long ol man bilong kisim baptais. Long namba tu de bilong kibung, planti nupela disaipel ol i bihainim pasin bilong Jisas na kisim baptais. Narapela tok, “Bilip Long Tok Bilong God Em i Bringim Man Long Baptais,” i kirapim tingting bilong ol man bilong kisim baptais olsem taim ol i go insait tru long wara, dispela i makim stret olsem ol i dai long olpela pasin bilong inapim laik bilong ol yet. Taim ol i lusim wara na kam antap, dispela i makim olsem nau ol i stap laip bilong mekim laik bilong God.
Buk Jut long Baibel em i as bilong narapela tok, “Wok Strong Tru Long Holimpas Bilip Bilong Yu.” Brata i mekim tok, em i tok, yumi mas lukautim bilip bilong yumi long rot bilong sakim ol samting em inap pulim yumi long mekim pasin pamuk, na pasin bilong bikhet na sakim tok, na pasin olsem bikhet na lusim tok i tru. Bihain narapela tok, “Lukautim Gut Famili Bilong Yu,” i givim gutpela tok long ol papamama. Baibel i tok em wok bilong papamama long lukautim famili bilong ol long ol samting bilong spirit, na skin, na bel. (1 Timoti 5:8) Bilong mekim olsem, ol i mas lusim bikpela hap taim, na toktok gut wantaim, na pas gut wantaim. Jehova i amamas tru long hatwok ol papamama Kristen i save mekim bilong helpim ol pikinini bilong ol long kamap bikpela insait long tok i tru.
Orait nau wanpela tok i gat 3-pela hap, “Yumi Go Long Haus Bilong Jehova,” i helpim yumi long laikim tru ol miting. Ol miting i gutpela ples malolo bilong helpim yumi long lusim tingting long ol hevi bilong dispela graun. Long ol miting, yumi gat rot long strongim bel bilong ol narapela, na yumi inap kamapim klia olsem yumi laikim tru ol wanbilip bilong yumi. (Hibru 10:24, 25) Na ol miting i save helpim yumi long kamap gutpela tisa, na ol i helpim yumi long save gut long ol samting God i laik mekim. (Sindaun 27:17) Yumi no ken lusim pasin bilong bung wantaim kongrigesen, na yumi mas tingim tok bilong Jisas em i tok: “Sapos tupela o tripela man i kam bung long nem bilong mi, orait mi yet mi stap namel long ol.”—Matyu 18:20.
Laspela tok bilong de em “Nau God i Traim Bilip Bilong Yu.” Sapos i no gat wanpela samting i bin traim bilip, yumi no save bilip i gat strong o nogat. Em i olsem wanpela sek yu no kisim yet mani bilong en long beng. Olsem wanem? Dispela sek i gat strong na bai yu inap kisim mani stret olsem sek i tok? Na i olsem tu long bilip bilong yumi. Sampela samting i mas traim bilip bilong yumi bilong kamapim ples klia olsem bilip bilong yumi i gat as bilong en na yumi bilip tru. (1 Pita 1:6, 7) Brata i tok: “Sampela taim, ol pris pasto na ol man i bikhet na givim baksait long lotu i tru ol i save kirapim ol niusman na ol gavman long kamapim sampela tok giaman long yumi—ol i mekim sampela tok giaman long bilip Kristen na ol pasin bilong yumi. . . . Olsem wanem? Bai yumi larim ol dispela man em Satan i pasim tingting bilong ol long pretim na bagarapim bel bilong yumi na bai yumi sem long gutnius? Bai yumi larim ol tok giaman ol i kamapim long tok i tru i mekim na yumi no go moa long ol miting na mekim wok autim tok long olgeta taim? O bai yumi sanap strong na strongim bel na strong moa long autim tok i tru long Jehova na Kingdom bilong em?”
Bilong Stap Laip Yumi Mas Bilip
As tok bilong namba 3 de bilong kibung ol i kisim long tok bilong Pol: “Buk bilong God i gat tok olsem, ‘Ol man i bilip, bai God i kolim ol stretpela man na ol bai i stap laip.’ Na dispela tok i soim yumi klia olsem, i no gat rot bilong wanpela man i bihainim lo na God i kolim em stretpela man.” (Galesia 3:11) Narapela tok i gat 3-pela hap, “Ol Tok Profet Bilong Joel Bilong Kamap Long Taim Bilong Yumi,” i kamap long moningtaim. Buk Joel i makim taim bilong yumi na i tok: “Klostu bai taim nogut i kamap, em De bilong Bikpela. Em i taim bilong Bikpela i mekim save long olgeta lain . . . Long dispela taim God I Gat Olgeta Strong bai i salim bikpela bagarap i kam long yumi. Sori tumas, dispela De bai i nogut tru.” (Joel 1:15) Olsem ol grasopa i no les liklik, ol Kristen God i bin makim ol long spirit holi ol i no bin larim wanpela samting i pasim ol long autim tok bilong Kingdom nau long dispela taim bilong las de.
Buk Joel i stori tu long ol gutpela samting yumi ken wetim i kamap. Em i tok: “Olgeta manmeri i singaut long nem bilong Jehova ol i no ken bagarap.” (Joel 2:32, NW) Bilong singaut long nem bilong Jehova, i no olsem yumi kolim tasol nem bilong em, nogat. Yumi mas tanim bel tru, na sakim ol rong. (Joel 2:12, 13) Kwiktaim yumi mas mekim ol dispela samting, long wanem, klostu nau Jehova bai givim strafe long ol lain olsem em i bin mekim long ol Moap na Amon long taim bilong King Jehosafat bilong Juda.—2 Stori 20:1-30; Joel 3:2, 12.
Narapela tok, “Wetim Jehova na Soim Olsem Yu Bilip,” i strongim bel bilong olgeta brata sista. Yumi stap klostu tru long pinis bilong taim bilong las de, olsem na yumi inap tingting bek long truim bilong planti tok promis bilong Jehova, na yumi gat bikpela laik long lukim truim bilong ol samting i mas kamap yet. Lain bilong Jehova i mas i stap isi yet na no ken les kwik—ol i no ken lusim tingting olsem olgeta samting Jehova i bin tok promis long en, ol dispela samting bai kamap tru.—Taitus 2:13; 2 Pita 3:9, 10.
Bilong pinisim program bilong moningtaim, yumi lukim wanpela pilai, “Ai Bilong Yu i Mas Gutpela.” Dispela pilai i kirapim yumi long skelim tingting bilong yumi olsem yumi gat wanem tingting long ol samting bilong skin. Maski yumi sindaun we, sapos yumi laik bai yumi no tingting planti oltaim long ol samting, yumi mas bihainim tok bilong Jisas em i tok ai bilong yumi i mas gutpela, olsem yumi mas lukluk i go stret long Kingdom bilong God.—Matyu 6:22.
Nem bilong pablik-tok em “Bilip na i Stap Bilong Yu Long Bihain.” Em i kamapim klia olsem ol bikman bilong graun ol i no inap stretim ol hevi bilong ol man. (Jeremaia 10:23) Ol samting ol man i bin mekim long bipo, ol dispela pasin i wok long kamap gen na i kamap bikpela moa yet na i kamapim ol bikpela bagarap moa. Ol Witnes Bilong Jehova i gat wanem tingting long bihain? Mipela i bilip olsem i stap bilong ol man i bihainim tok bai i gutpela tru long bihain, em long taim Kingdom bilong God i bosim graun. (Matyu 5:5) God bai truim ol tok promis bilong em na dispela bai helpim olgeta man i bilip long Tok bilong em, em i tok: “Nau Bikpela i stap klostu long yupela . . . , olsem na nau em i taim bilong yupela i mas beten long em na i go klostu long em.”—Aisaia 55:6.
Jisas i tingim taim bilong yumi na em i kamapim wanpela bikpela askim olsem: “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?” (Luk 18:8) Laspela tok i stori gen long sampela tok i bin kamap long kibung, na i soim olsem wanem kibung i bin kamapim klia olsem planti man i bilip long Tok Bilong God, maski yumi stap namel long ol man i no bilip na ol i tingim ol samting bilong graun tasol.
Tasol yumi wan wan i ken askim yumi yet, ‘Mi wanpela man i bilip long God na long Tok bilong em?’ “Bilip Long Tok Bilong God” Kibung Distrik bai helpim yumi long bekim yes long dispela askim. Yumi tenkyu tru long Jehova i bin strongim bilip bilong yumi long em na long Tok bilong em, em Baibel!
[Ol Piksa long pes 24]
Planti volantia i amamas long mekim wok na bai planti tausen man i kam long kibung ol i gat ples slip
[Ol Piksa long pes 25]
Long planti hap bilong graun ol i mekim wok long ol bikpela stediam
[Piksa long pes 25]
L. A. Swingle bilong Lain Bilong Bosim Ol Witnes em i kamapim wanpela nupela buklet
[Piksa long pes 26]
Planti ol i kisim baptais bilong makim olsem ol i dediket pinis long Jehova
[Ol Piksa long pes 27]
Ol man i kam long kibung ol i amamas na mekim ol singsing bilong Kingdom. Liklik piksa: pilai “Ai Bilong Yu i Mas Gutpela”