Ol i Mekim Laik Bilong Jehova

Jisas i Salim 70 Disaipel i Go

EM MUN Oktoba samting long yia 32 C.E. Sikspela mun tasol i stap na bai Jisas i dai. Olsem na bilong hariapim wok bilong autim gutnius na lainim gut sampela disaipel bilong em, Jisas i makim 70 disaipel na “em i salim ol i go tupela tupela, na ol i go paslain long em. Em i salim ol i go long olgeta taun na ples em yet i laik i go long en.”​—⁠Luk 10:⁠1.a

Jisas i salim ol disaipel bilong em “i go paslain long em” bambai ol manmeri inap wokim tingting hariap olsem ol i laikim Mesaia o ol i sakim em taim em yet i kam bihain. Tasol bilong wanem em i salim ol i go “tupela tupela”? Em i salim ol olsem bambai narapela inap strongim narapela taim ol man i birua long ol.

Bilong kamapim klia olsem taim i sot pinis bilong autim tok, Jisas i tokim ol disaipel bilong em olsem: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i ken salim ol wokman i go bungim kaikai bilong en.” (Luk 10:⁠2) Dispela stori long taim bilong kisim kaikai i stret tru, long wanem, sapos ol wokman i isi isi long kisim kaikai ol gutpela kaikai inap bagarap. Olsem tasol, sapos ol disaipel i no mekim gut dispela wok bilong autim tok, ol gutpela manmeri inap lus!​—⁠Esekiel 33:⁠6.

Tingting Tasol Long Autim Tok

Jisas i tok moa long ol disaipel bilong em olsem: “Yupela i no ken karim paus mani na hanbek na su i go wantaim yupela. Na yupela i no ken givim gude long ol manmeri yupela i bungim long rot.” (Luk 10:⁠4) Em pasin bilong ol man i go raun long karim hanbek na kaikai na sampela sandel, long wanem, aninit bilong sandel inap bagarap na ol rop bilong en inap bruk. Tasol ol disaipel bilong Jisas i no ken wari long ol dispela samting. Nogat. Ol i mas bilip olsem Jehova bai lukautim ol long rot bilong ol wantok Israel, em ol i gat pasin bilong lukautim ol narapela man.

Tasol bilong wanem Jisas i tokim ol disaipel bilong em ol i no ken givim gude long ol manmeri? Yu ting em i laik ol i no mekim pasin pren na gutpela pasin? Nogat tru! Tok Grik a·spaʹzo·mai, insait bilong en i olsem holimpas narapela bilong tok gude, na em inap makim sampela samting moa na i no olsem man i tok “gude” tasol. Em inap makim pasin bilong dispela hap long givim kis, holimpas narapela, na toktok wantaim inap longpela taim. Dispela i save kamap taim tupela man i save long narapela narapela i bung wantaim. Wanpela saveman i tok: “Taim ol man long hap bilong Is i bungim wanpela man na tok gude, ol i no save daunim het tasol o sekan olsem ol man long hap bilong Wes i save mekim, nogat. Ol i save holimpas narapela na daunim het inap planti taim, na sampela taim ol i brukim skru na putim pes i go daun long graun. Ol dispela samting ol i save mekim i save kisim bikpela hap taim.” (Skelim wantaim 2 King 4:29.) Long dispela rot Jisas i helpim ol disaipel bilong em long abrusim ol samting i no bikpela samting, maski em pasin bilong ples bilong ol.

Bihain Jisas i tokim ol disaipel bilong em olsem, taim yupela i go insait long wanpela haus na ol man i amamas long yupela, yupela “i mas i stap long dispela wanpela haus tasol. Na yupela i mas kaikai na dringim ol samting ol i givim long yupela.” Tasol sapos ol i go insait long wanpela taun na ol man i no mekim gut long ol, ol i mas ‘sanap long rot bilong dispela taun, na tok olsem, “Pipia graun bilong dispela taun em i pas long lek bilong mipela, em mipela i rausim bilong soim yupela olsem, yupela i gat asua long dispela pasin yupela i bin mekim.” ’ (Luk 10:​7, 10, 11) Pasin bilong seksekim lek bilong rausim das dispela i makim olsem long pasin bilong i stap bel isi ol disaipel i lusim dispela haus o taun em ol man i no mekim gut long ol na God yet bai mekim save long ol dispela lain. Tasol ol man i kisim ol disaipel bilong Jisas na mekim gut long ol, ol bai kisim blesing long samting ol i mekim. Long narapela taim Jisas i tokim ol disaipel: “Man i kisim yupela na i mekim gut long yupela, em i kisim mi na i mekim gut long mi. Na man i kisim mi, em i kisim God, em i bin salim mi na mi kam. Na man i . . . givim kap kol wara tasol long wanpela bilong ol dispela manmeri nating i stap long lain disaipel bilong mi, orait mi tok tru long yupela, pe bilong dispela man bai i no inap lus.”​—⁠Matyu 10:​40, 42.

Dispela i Lainim Yumi Long Wanem Samting?

Long nau winim 5,000,000 Witnes Bilong Jehova i mekim dispela wok Jisas i givim long ol bilong autim gutnius bilong Kingdom bilong God na kamapim ol disaipel long olgeta hap bilong graun. (Matyu 24:14; 28:​19, 20) Ol i save olsem taim i sot tru long autim dispela tok. Olsem na ol i no lusim nating taim, na ol i no larim ol samting i pasim ol long mekim tru dispela bikpela wok ol i kisim.

Ol Witnes Bilong Jehova i wok strong long mekim gutpela pasin long olgeta man ol i bungim. Tasol ol i no toktok nating long ol samting nabaut wantaim ol man, na ol i no save tok pait long ol samting bilong sindaun bilong ol man o long ol man i no inap stretim ol hevi i kamap long graun. (Jon 17:16) Nogat. Ol i toktok long dispela wanpela rot tasol bilong stretim tru hevi bilong ol man em Kingdom bilong God.

Planti taim yumi lukim ol Witnes Bilong Jehova i wok tupela tupela. Olsem wanem? Sapos ol i wok wan wan bai ol inap mekim bikpela wok moa? Tru, ating ol inap mekim bikpela wok moa, tasol ol Kristen long nau i save pinis olsem taim ol i wok wantaim narapela dispela i save helpim ol. Narapela inap lukautim narapela taim tupela i autim tok long ol ples nogut. Taim ol i wok tupela tupela dispela bai helpim ol nupela long lain long pasin bilong narapela pablisa em i gat save long mekim wok bilong autim gutnius. Tru tumas, narapela i ken helpim na strongim narapela.​—⁠Sindaun 27:⁠17.

Yumi save, taim i sot tru bilong mekim wok autim tok, em wanpela wok yumi mas mekim nau long dispela “taim bilong las de.” (2 Timoti 3:⁠1) Ol Witnes Bilong Jehova i amamas, long wanem, ol lain brata long olgeta hap i sambai long ol na ol i “wok wantaim bilong kirapim ol manmeri long bilip long gutnius.”​—⁠Filipai 1:⁠27.

[Futnot]