Wokboi Bilong Man o Wokboi Bilong God?

WANPELA buk bilong Jemani, em buk Seher, Grübler, Enthusiasten (Ol Profet, Ol Man Bilong Tingting Gut, Ol Man Bilong Givim Bel Tru) i tok: “Planti man i laikim ol Witnes Bilong Jehova.” Maski dispela buk i sutim tok long sampela samting ol Witnes i mekim, em i tokaut olsem: “Ol Witnes i no gat asua long wanpela samting na ol i gat gutpela sindaun liklik. Ol i save wok strong na ol i givim bel tru long mekim wok bilong ol, na ol i man bilong i stap isi na ol i bihainim stretpela pasin taim ol i baim takis. Ol i givim baksait long pasin bilong laikim tumas mani kago. . . . Long olgeta kibung ol i bihainim lo na yumi ken tok amamas long ol. Ol i save daunim laik bilong skin wankain olsem ol man bilong sampela narapela lotu, na ol i winim tru ol narapela long mekim wok bilong God. Tasol samting i mekim ol i winim tru ol narapela lotu Kristen bilong taim bilong yumi, em pasin bilong ol long strong tru long autim ol tok bilong bilip bilong ol, maski ol i gat hevi o bagarap inap painim ol.”a

Maski ol i skelim gut ol Witnes olsem, sampela man i laik kamapim narapela kain tingting long ol Witnes Bilong Jehova. Long klostu olgeta kantri long graun, ol Witnes i bin mekim lotu bilong ol long ai bilong ol man inap planti yia pinis na i no gat wanpela samting i bin pasim ol. Planti milion manmeri i save long ol na ol i givim biknem long ol na ol i wanbel olsem ol Witnes ol inap tru long mekim lotu bilong ol. Olsem na, bilong wanem ol man i tingting planti long ol Witnes Bilong Jehova i wanem kain lain?

Ating wanpela as bilong dispela em olsem: Nau long dispela taim, sampela lotu i insait long pasin nogut bilong bagarapim ol pikinini, na bung wantaim bilong kilim i dai skin bilong ol yet, na pasin bilong birua na tromoi ol bom samting. Tasol kain pasin olsem i save kamap long olgeta hap, i no kamap namel long ol man bilong lotu tasol, nogat. Tasol planti man i no save bilip tumas long lotu, na sampela i mekim pasin birua long en.

Pasin Bilong Bihainim Man Inap Kamapim Samting Nogut

Dispela tok “liklik lain bilong lotu” i makim “wanpela lain i bihainim wanpela narakain bilip o wanpela hetman.” Olsem tasol, ol manmeri bilong wanpela “lotu i bihainim man” ol i “givim bel olgeta long wanpela man, tingting, o wanpela samting.” Ol manmeri bilong olgeta kain lotu, sapos ol i bihainim tru tok na tingting bilong ol bikman bilong ol, ol inap kamap wokboi bilong man. Pasin bilong pas tru wantaim bikman em inap bagarapim bel bilong man, na i olsem dispela bikman i holimpas em long ol samting bilong spirit. Kain samting olsem inap painim man i kamap bikpela insait long kain lotu olsem.

Ol man i tingting planti olsem long wanpela kain lotu, i gutpela sapos ol i kisim stretpela save long en. Ating sampela i bin harim tok olsem ol Witnes Bilong Jehova ol i bilong wanpela oganaisesen bilong lotu i kalabusim ol memba bilong en, na i bosim tru ol, na i pasim ol long kamap fri, na i mekim na ol i no save bihainim pasin bilong ol manmeri bilong ples.

Ol Witnes Bilong Jehova i save ol dispela tok ol man i sutim long ol i no stret. Olsem na ol i singautim yu long skelim dispela samting. Taim yu skelim gut pinis, yu inap kamapim tingting bilong yu yet. Olsem wanem? Ol Witnes i wokboi bilong God, olsem ol yet i tok, o ol i wokboi bilong man? Wanem samting i as bilong strong bilong ol? Tupela stori long pes 12 i go 23 bai givim gutpela bekim long ol dispela askim.

[Futnot]