Yu Laik Wanem Samting Bai Painim Ol Pikinini Bilong Yu Long Bihain?

OLSEM WANEM? Yu ting ol pikinini bilong yu i gutpela blesing i dia tumas? (Song 127:⁠3) O yu ting wok bilong mekim bikpela long ol i putim hevi long yu long lukautim ol, na yu no inap save wok bilong yu bai kamap gutpela o nogat? Tru, yu no inap kisim winmani long wok bilong mekim bikpela long ol pikinini, nogat; yu mas tromoi mani bilong mekim olsem i go inap long taim ol pikinini inap lukautim ol yet. Olsem man i mas tingting gut bambai em inap lukautim gut mani kago em i kisim long papamama, ol papamama tu i mas tingting gut bambai ol inap mekim gut wok papamama bilong ol.

Ol papamama i save tingim gut ol pikinini bilong ol, ol i laik bai i stap bilong ol i gat gutpela as bilong en. Maski pasin nogut na ol samting bilong mekim yumi i bel hevi i save kamap long graun, ol papamama inap mekim planti samting bilong lukautim ol pikinini bilong ol. Tingim Werner na Eva, mipela i bin stori long ol long namba wan stori bilong dispela nius.a

Taim Papamama i Tingim Tru Pikinini

Werner i tok, papamama bilong em i no larim em tasol, nogat, ol i laik save tru long ol samting i kamap long skul. Em i tok: “Mi amamas tru long ol gutpela tok ol i kamapim long mi, na mi pilim olsem ol i tingim mi na helpim mi. Papamama i putim strongpela lo long mi, tasol mi save ol i pren tru bilong mi.” Na taim Eva i tingting planti long ol wok bilong skul, olsem na em i bel hevi na em i no inap slip gut, papamama bilong em, Francisco na Inez, ol tu i lusim bikpela hap taim bilong toktok wantaim em na helpim em long stap gut gen long tingting na spirit.

Francisco na Inez i mekim wanem bilong lukautim ol pikinini bilong ol na redim ol long taim ol i bikpela pinis? Kirap long taim ol pikinini i liklik yet, dispela gutpela papamama i helpim ol pikinini long insait long olgeta samting ol i bin mekim long olgeta de. Inez na Francisco i no bung tasol wantaim ol pren i bikpela pinis, nogat, long olgeta hap ol i go long en, ol i kisim ol pikinini i go wantaim ol. Olsem ol gutpela papamama, ol i stiaim gut tingting bilong ol pikinini. Inez i tok: “Mipela i lainim ol long lukautim haus, na skelim gut mani, na lukautim klos bilong ol yet. Na mipela i helpim ol long makim wok mani ol i laik mekim, na long skelim gut wok bilong ol wantaim ol wok bilong spirit.”

Tru tumas, em i bikpela samting long save gut long ol pikinini bilong yu na long stiaim tingting bilong ol! Nau yumi ken skelim 3-pela samting yu inap stiaim tingting bilong pikinini long en: (1) Helpim ol pikinini bilong yu long makim wok mani i gutpela long ol; (2) redim ol long karim ol hevi i save kamap long skul na ples wok; (3) lainim ol long olsem wanem ol inap lukautim ol yet na ol i no ken sot long ol samting bilong spirit.

Helpim Ol Long Makim Wok i Stret Long Ol

Wok mani bilong man i mekim na em i gat sampela mani o nogat, na man i mas lusim bikpela hap taim long mekim wok mani, olsem na gutpela papamama bai skelim laik na save bilong wan wan pikinini. Man i gat stretpela tingting em i no laik putim hevi long ol narapela, olsem na papamama ol i mas tingting gut long olsem wanem ol inap redim pikinini bilong ol long lukautim em yet na famili bilong em sapos bihain em i marit. Olsem wanem? Pikinini man o meri bilong yu i mas skul long mekim wanpela wok bambai em inap kisim wok mani long lukautim gut em yet? Sapos yu tingim tru pikinini bilong yu, wok strong long helpim em long kisim pasin bilong amamas long wok strong, na amamas long lainim ol samting, na long wok gut wantaim ol narapela.

Tingim Nicole. Em i tok: “Papamama bilong mi i gat wok bisnis long klinim ol ofis samting na mi mas wok wantaim ol long en. Ol i tokim mi long givim hap mani mi kisim long dispela wok bilong baim ol samting bilong haus, na hap mani i stap mi ken baim ol samting bilong mi yet o putim long beng. Dispela i helpim mi long pilim olsem mi gat wok bilong mi yet long mekim, na dispela i helpim mi gut taim mi bikpela pinis.”

Baibel i no tok long wanem kain wok mani man i mas mekim. Tasol em i kamapim sampela gutpela tok bilong helpim yumi. Olsem: Aposel Pol i tok: “Sapos man i no laik mekim wok, orait em i no ken kisim kaikai.” Na em i raitim pas long ol Kristen long Tesalonaika, na em i tok: “Tasol nau mipela i harim tok long sampela bilong yupela ol i sindaun nating tasol. Ol i no mekim wanpela wok. Nogat. Ol i wok long toktok nabaut tasol long olgeta samting bilong ol arapela man, em i no samting bilong ol. Orait nau long nem bilong Bikpela Jisas Krais mipela i givim strongpela tok long ol dispela man olsem, ol i mas sindaun gut, na ol i mas mekim wok, bai ol i ken lukautim ol yet long kaikai samting.”​—⁠2 Tesalonaika 3:​10-12.

Mekim wok mani bambai yumi ken kisim bikpela mani, dispela tasol i no bikpela samting long i stap bilong yumi. Bihain, ol man i gat laik long kisim bikpela namba, bai ol i no amamas moa na ating ol bai kisim save, ol i “olsem wanpela man i ran i go bilong holimpas win.” (Saveman 1:14) Ol papamama i no ken strongim ol pikinini long wok strong long kisim namba na mani kago. I gutpela sapos ol i helpim ol pikinini long pilim gutpela tok Jon i raitim: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa. Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol. Na dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”​—⁠1 Jon 2:​15-17.

Olsem Wanem Yu Inap Lukautim Ol Long Bel na Tingting?

I gutpela sapos yu papa o mama i bihainim pasin bilong man i save lainim ol man bilong pilai spot. Em i no tingting tasol long helpim ol man bilong pilai spot long ran hariap moa o long tromoi lek na kalap longpela moa. Ating em bai wok long helpim ol long winim ol tingting kranki bilong daunim ol bambai bel na tingting bilong ol i strong. Olsem wanem yu inap strongim bel bilong ol pikinini bilong yu na kirapim ol?

Tingim Rogério, em wanpela yangpela i gat 13 krismas. Em i tingting planti, long wanem, skin bilong em i wok long senis, na papamama i no stap wanbel na ol i no tingim em, olsem na em i bel hevi. Yumi ken mekim wanem bilong helpim ol yangpela olsem Rogério? Yu no inap banisim ol pikinini bilong yu bambai ol hevi i no ken painim ol na pasin nogut i no ken paulim ol, tasol yu no ken les long wok papa o mama bilong yu. Yu no ken strong tumas long lukautim ol pikinini, tasol stretim ol long gutpela tingting, na no ken lusim tingting olsem olgeta pikinini i no wankain. Mekim gut long pikinini na sori long em na dispela bai helpim yangpela long i stap bel isi. Na tu, dispela bai mekim na taim em i bikpela, em bai bilip na amamas long em yet.

Maski papamama bilong yu i bin lukautim yu gut long bel na tingting o nogat, i gat 3-pela samting inap helpim yu long kamap papa o mama i helpim tru pikinini: (1) No ken tingting tasol long ol hevi bilong yu, na yu ting ol hevi bilong pikinini i olsem liklik samting tasol; (2) long olgeta de wok strong long toktok gut wantaim ol long gutpela pasin; (3) kamapim gutpela tingting long olsem wanem ol i ken stretim ol hevi na wok wantaim ol narapela man.

Birgit i tingim taim em i yangpela yet, na em i tok: “Mi mas lain olsem, mi no inap senisim pasin bilong ol man bambai ol i kamap olsem man mi laik ol i mas kamap. Mama i tokim mi, sapos mi lukim ol narapela i gat ol pasin mi no laikim, orait samting mi ken mekim em long klia long pasin bilong ol. Na em i tok, gutpela taim bilong senisim pasin bilong mi em taim mi yangpela yet.”

Tru, ol pikinini bilong yu i mas kisim wok mani na bel isi, tasol i no dispela ol samting tasol ol i mas kisim. Askim yu yet, ‘Mi ting wok papamama em i wanpela wok God i givim long mi?’ Sapos yu ting olsem, yu bai lukautim ol pikinini bilong yu long ol samting bilong spirit.

Ol Rot Bilong Lukautim Ol Long Spirit

Long tok bilong em antap long maunten, Krais Jisas i tok: “Ol manmeri i save, ol i stap rabis tru long ol samting bilong God, em ol i ken amamas. Ol dispela manmeri bai i kisim ol gutpela samting bilong kingdom bilong heven.” (Matyu 5:⁠3) Bilong lukautim ol pikinini na ol i no ken sot long ol samting bilong spirit, ol papamama i mas mekim wanem? Taim papamama i stap olsem gutpela piksa bilong bilip long God Jehova, dispela i save helpim tru ol pikinini. Aposel Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:⁠6) Tasol bilong bilip i gat as tru bilong en, yumi mas beten. (Rom 12:12) Sapos yu save yu mas lukautim yu yet long ol samting bilong spirit, orait yu bai askim God long givim gutpela tingting long yu bilong stiaim yu, olsem papa bilong wanpela pikinini i bin mekim na em i kamap Hetman Samson long lain Israel. (Hetman 13:⁠8) Yu bai beten, na ritim Baibel bilong kisim kain helpim olsem.​—⁠2 Timoti 3:16, 17.b

Maski em bikpela wok long soim stretpela rot long ol pikinini, na strongim bel na tingting bilong ol, na helpim ol long ol samting bilong spirit, wok papamama inap givim bikpela amamas long yu. Wanpela papa long Brasil i gat tupela pikinini, em i tok: “Ol pikinini bilong mi i bikpela samting long mi. I gat planti gutpela samting mipela inap mekim wantaim ol.” Mama i stori long as na ol pikinini i stap gut, em i tok: “Olgeta taim mipela i stap wantaim, na mipela i wok strong long mekim ol samting wantaim amamas. Na bikpela samting tru, oltaim mipela i save beten askim God long helpim ol pikinini.”

Priscilla i tingim pasin sori na pasin isi papamama i mekim long em taim em i gat hevi. Em i tok: “Ol i pren tru bilong mi na ol i helpim mi long olgeta samting. Taim mi liklik, mi pilim tru olsem mi wanpela ‘presen i kam long Jehova.’ ” (Song 127:⁠3) Olsem planti papamama i save mekim, i gutpela sapos yu makim taim bilong ritim Baibel na ol buk Kristen wantaim ol pikinini. Sapos yupela toktok long ol stori na lo bilong Baibel, dispela inap helpim ol pikinini bilong yupela long kamap strong na wetim gutpela samting i kamap bihain.

Taim Olgeta Pikinini i Stap Bel Isi

Tru, i luk olsem planti pikinini i no gat wanpela gutpela samting ol i ken wetim i kamap long bihain, tasol Baibel i tok, klostu nau graun bai kamap gutpela ples ol manmeri i ken i stap bel isi long en. Tingim dispela nupela taim God i tok promis long kamapim na ol papamama i no gat wok long tingting planti long i stap bilong ol pikinini bilong ol! (2 Pita 3:13) Tingim truim bilong dispela tok profet: “Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim, na ol liklik manki bai i was long ol.” (Aisaia 11:⁠6) Long nau tu, ol man i lotuim Jehova ol i stap gut olsem long ol samting bilong spirit, na dispela i olsem hap truim bilong dispela tok profet. Namel long ol, yu bai pilim olsem Jehova i lukautim gut ol man. Sapos yu laikim tru God, yu ken save tru olsem God i pilim tingting bilong yu papa na mama, na em bai helpim yu long karim ol hevi na traim i save painim yu. Stadi long Tok bilong em na bilip long Kingdom bilong em.

Stap olsem gutpela piksa na helpim ol pikinini bilong yu long rot bilong kisim laip oltaim. Sapos yu larim God Jehova i lukautim yu, gutpela samting tru bai painim yu na ol pikinini bilong yu long bihain​—⁠winim ol samting yu wet long en. Yu inap bilip olsem man bilong raitim Song, em i tok: “Yu mas amamas long Bikpela, na em bai i givim yu ol samting yu laikim tru.”​—⁠Song 37:⁠4.

[Ol Futnot]